អាមេរិក-អ៊ីស្រាអែល៖លោកត្រាំទទួលជួបលោកនេតាន់យ៉ាហ៊ូជាមួយនឹងផែនការសន្តិភាពដែលប៉ាឡេស្ទីនច្រានចោល
ចុះផ្សាយនៅថ្ងៃ៖
ស្តាប់ - ០៥:៣៧
នៅថ្ងៃចន្ទ ទី២៧ មករា ប្រធានាធិបតីអាមេរិកលោកដូណាល់ ត្រាំទទួលជួបនាយករដ្ឋមន្រ្តីអ៊ីស្រាអែលលោកនេតាន់យ៉ាហ៊ូនៅសេតវិមានក្នុងទីក្រុងវ៉ាស៊ីនតោន។ នាឱកាសជំនួប លោកត្រាំបង្ហាញលោកនេតាន់យ៉ាហ៊ូនូវផែនការសន្តិភាពមួយសម្រាប់មជ្ឈិមបូព៌ា និយាយជារួម និងសម្រាប់អ៊ីស្រាអែល និងប៉ាឡេស្ទីន និយាយដោយឡែក។ គឺជាផែនការសន្តិភាពដែលអ៊ីស្រាអែលចាត់ទុកជាប្រវត្តិសាស្រ្ត តែត្រូវបានប៉ាឡេស្ទីនច្រានចោលយ៉ាងដាច់អហង្ការ។ គួររម្លឹកថា ផែនការសន្តិភាពមួយនេះត្រូវបានរៀបចំតាក់តែងឡើងដោយលោក Jared Kushner ដែលជាទីប្រឹក្សា និងជាកូនប្រសាររបស់លោកត្រាំ។ នៅក្នុងសន្និសីទរៀបចំក្នុងប្រទេសបារ៉ែនកាលពីខែមិថុនា ឆ្នាំ ២០១៩ លោក Kushner មិនបាននិយាយដល់ការបង្កើតរដ្ឋប៉ាឡេស្ទីនទេ តែបែរជាបានផ្តោតសំខាន់លើការលើកស្ទួយសេដ្ឋកិច្ចប៉ាឡេស្ទីនទៅវិញ។ តើរដ្ឋបាលអាមេរិករបស់លោកត្រាំមិនមែនកំពុងទទួលបរាជ័យដូចរដ្ឋបាលអាមេរិកមុនៗទេ ឬយ៉ាងណានៅក្នុងដំណោះស្រាយឲ្យជម្លោះអ៊ីស្រាអែល ប៉ាឡេស្ទីន?
តាំងពីថ្ងៃចូលកាន់តំណែងប្រធានាធិបតីអាមេរិកកាលពី ៣ឆ្នាំមុន លោកដូណាល់ ត្រាំបានប្រគល់សំណុំរឿងអ៊ីស្រាអែល ប៉ាឡេស្ទីនដ៏រសើបឲ្យកូនប្រសារប្រុសរបស់លោក គឺលោក Jared Kushner ជាអ្នកដោះស្រាយ។ លោកត្រាំបានរម្លឹកម្តងជាពីរដងថា លោកចង់ដោះស្រាយឲ្យបានជោគជ័យលើសំណុំរឿងច្រំដែលមួយនេះដែលប្រធានាធិបតីអាមេរិកមុនៗបានទទួលបរាជ័យគ្រប់គ្នា។ តែរហូតមកដល់ពេលនេះ លោកត្រាំមិនបានបញ្ជាក់ទេថា តើលោកត្រូវធ្វើដូចម្តេចដើម្បីអាចអូសទាញភាគីប៉ាឡេស្ទីនឲ្យចូលតុចរចាឡើងវិញបាន?។ ចូរកុំភ្លេចថា តាំងពីលោកដូណាល់ ត្រាំបានទទួលស្គាល់ហ្សេរ៉ុយសាឡិមជាទីក្រុងផ្តាច់មុខរបស់អ៊ីស្រាអែលកាលពីខែធ្នូ ឆ្នាំ ២០១៧ មក ប៉ាឡេស្ទីនបានកាត់ផ្តាច់ទំនាក់ទំនងផ្លូវការទាំងអស់ជាមួយសេតវិមាន។ ក្រោមភ្នែក ច្រមុះរបស់ប៉ាឡេស្ទីន អាមេរិកលែងមានទឹកមាត់ប្រៃ និងលែងមានឥទ្ធិពលដើម្បីធ្វើជាអាជ្ញាកណ្តាលនៅក្នុងជម្លោះអ៊ីស្រាអែល ប៉ាឡេស្ទីនទៀតឡើយ។
អ្នកនាំពាក្យរបស់ប្រមុខរដ្ឋអំណាចប៉ាឡេស្ទីនបានបញ្ជាក់ច្បាស់ៗថា ប៉ាឡេស្ទីនទាត់ចោលយ៉ាងដាច់អហង្ការនូវអ្វីដែលរដ្ឋបាលលោកត្រាំសម្រេចបានមកទល់ពេលនេះ។ តាមរយៈសារមួយនេះនាំឲ្យគេយល់ភ្លាមថា ប៉ាឡេស្ទីនមិនត្រឹមមិនទទួលយកផែនការសន្តិភាពដែលតាក់តែងឡើងដោយលោក Jared Kushner ប៉ុណ្ណោះទេ តែបានច្រើនចោលទាំងស្រុងលើការងារដែលរដ្ឋបាលរបស់លោកត្រាំបានប្រឹងប្រែងរយៈពេល ៣ឆ្នាំស្តីពីជម្លោះអ៊ីស្រាអែល ប៉ាឡេស្ទីន។ ប្រមុខរដ្ឋអំណាចប៉ាឡេស្ទីនលោកម៉ាមូដ អាបាស់បានបដិសេធការអញ្ជើញរបស់លោកត្រាំដើម្បីជជែកលើផែនការសន្តិភាព។ ចំណែកនាយករដ្ឋមន្រ្តីប៉ាឡេស្ទីនបានអំពាវនាវដល់សហគមន៍អន្តរជាតិកុំឲ្យទទួលយកផែនការសន្តិភាពរបស់លោកត្រាំ និងថា សិទ្ធិរបស់ពលរដ្ឋប៉ាឡេស្ទីនមិនមែនសម្រាប់លក់ទេ។
ក្រៅពីរដ្ឋអំណាចប៉ាឡេស្ទីននៅតំបន់ស៊ីហ្សកដានី ផែនការសន្តិភាពរបស់លោក Jared Kushner ក៏ត្រូវបានទាត់ចោលដោយចលនាប៉ាឡេស្ទីនហាម៉ាស់ដែលកំពុងគ្រប់គ្រងតំបន់ហ្កាហ្សាដែរ។ « ផែនការសន្តិភាពរបស់អាមេរិកមិនត្រឹមមិនអាចទទួលយកបានទេ តែថែមទាំងអាចជំរុញពលរដ្ឋប៉ាឡេស្ទីនឲ្យក្រោកឈរតស៊ូក្នុងដំណាក់កាលថ្មីទៀតផង » នេះជាការព្រមានរបស់ប្រមុខចលនាហាម៉ាស់។ ទន្ទឹមគ្នានេះ អគ្គលេខាធិការអង្គការរំដោះប៉ាឡេស្ទីនហៅកាត់ OLP លោក Saëb Erekat បានបញ្ជាក់ប្រាប់ AFP ក្នុងថ្ងៃអាទិត្យ ទី២៦ មករាថា ប្រសិនបើលោកត្រាំលាតត្រដានផែនការសន្តិភាពសម្រាប់មជ្ឈិមបូព៌ាជាសាធារណៈ OLP នឹងដកខ្លួនចេញពីកិច្ចព្រមព្រៀងអូស្លូ ២ ដែល OLP និងអ៊ីស្រាអែលបានចុះហត្ថលេខាកាលពីខែកញ្ញា ឆ្នាំ ១៩៩៥។
នៅក្នុងកិច្ចព្រមព្រៀងដែលបានអស់សុពលភាពក្នុងឆ្នាំ ១៩៩៩ តែត្រូវបានភាគីទាំងពីរពន្យារពេលបន្ថែមបានពុះចែកតំបន់ស៊ីហ្សកដានីជា ៣តំបន់ ទី១ ហៅតំបន់ A ស្ថិតក្រោមការគ្រប់គ្រងស៊ីវិល និងសន្តិសុខរបស់ប៉ាឡេស្ទីន ទី២ ហៅតំបន់ B ស្ថិតក្រោមការគ្រប់គ្រងស៊ីវិលរបស់ប៉ាឡេស្ទីន និងសន្តិសុខរបស់អ៊ីស្រាអែល និងទី៣ ហៅតំបន់ C ជាតំបន់ដែលស្ថិតក្រោមការគ្រប់គ្រងស៊ីវិល និងសន្តិសុខរបស់អ៊ីស្រាអែល។ សូមរម្លឹកថា ផែនការសន្តិភាពតាក់តែងដោយអាមេរិកសម្រាប់មជ្ឈិមបូព៌ា និយាយជារួម និងសម្រាប់អ៊ីស្រាអែល ប៉ាឡេស្ទីន និយាយដោយឡែកត្រូវបានលើកពេលបង្ហាញជាច្រើនដងដោយគ្មាននរណាម្នាក់បានដឹងពីខ្លឹមសារលំអិតរបស់វា។
នៅក្នុងសន្និសីទរយៈពេល ២ថ្ងៃក្រោមប្រធានបទ « ពីសន្តិភាពទៅកាន់វិបុលភាព » រៀបចំក្នុងប្រទេសបារ៉ែនកាលពីខែមិថុនា ឆ្នាំ ២០១៩ លោក Kushner មិនបាននិយាយដល់ការបង្កើតរដ្ឋប៉ាឡេស្ទីនទេ តែបានផ្តោតសំខាន់លើការលើកស្ទួយសេដ្ឋកិច្ចប៉ាឡេស្ទីន។ មានទឹកប្រាក់ប្រមាណជា ៥០ ០០០លានដុល្លារដែលអាមេរិកគ្រោងអភិវឌ្ឍនៅលើដែនដីប៉ាឡេស្ទីន និងនៅក្នុងប្រទេសអារ៉ាប់ក្បែរខាងមួយចំនួនសម្រាប់រយៈពេល ១០ឆ្នាំ។ បើតាមប៉ាឡេស្ទីន ផែនការសន្តិភាពរបស់អាមេរិកបានទទួលស្គាល់តំបន់យុទ្ធសាស្រ្តនៅស៊ីហ្សកដានីជារបស់អ៊ីស្រាអែល ទទួលស្គាល់ដែនដីអាណានិគមអ៊ីស្រាអែលលើដែនដីប៉ាឡេស្ទីន និងទទួលស្គាល់ហ្សេរ៉ុយសាឡិមជាទីក្រុងផ្លូវការផ្តាច់មុខរបស់អ៊ីស្រាអែល។ តើផែនការសន្តិភាពរបស់អាមេរិកសម្រាប់មជ្ឈិមបូព៌ា និយាយជារួម និងសម្រាប់អ៊ីស្រាអែល ប៉ាឡេស្ទីន និយាយដោយឡែកមានចែងពីការបង្កើតរដ្ឋប៉ាឡេស្ទីនឯករាជ្យមួយរស់ក្បែររដ្ឋអ៊ីស្រាអែលឬអត់?។
គ្មាននរណាម្នាក់អាចដឹងបានទេ ហើយមកទល់ពេលនេះ សូម្បីតែលោកត្រាំ និងកូនប្រសារលោក Kushner ក៏បានបដិសេធមិននិយាយ និងមិនដែលបង្ហើបឃ្លាមួយនេះម្តងណាសោះ។ ពិតណាស់ ប្រជាជនប៉ាឡេស្ទីនត្រូវការលុយ និងការអភិវឌ្ឍន៍សេដ្ឋកិច្ចរបស់ខ្លួន តែប្រធានបទអាទិភាពនៅចំពោះមុខពេលនេះ គឺការមានរដ្ឋអធិបតេយ្យឯករាជ្យមួយរស់ក្បែរខាងរដ្ឋអ៊ីស្រាអែល។ ប្រមុខរដ្ឋអំណាចប៉ាឡេស្ទីនធ្លាប់បានបញ្ជាក់ថា ដរាបណាគ្មានរដ្ឋប៉ាឡេស្ទីនមួយឯករាជ្យទេ ដរាបនោះនៅមិនទាន់អាចនិយាយពីការអភិវឌ្ឍន៍សេដ្ឋកិច្ចប៉ាឡេស្ទីនបានឡើយ។ ជំហររបៀបនេះរបស់ប៉ាឡេស្ទីនមិនមែនជារឿងថ្មី ហើយអាមេរិកខ្លួនឯងក៏បានដឹងដែរថា ការបង្កើតឲ្យមានរដ្ឋប៉ាឡេស្ទីនមួយឯករាជ្យក៏ជាការទាមទារចង់បានយ៉ាងទទូចរបស់សហគមន៍អន្តរជាតិទូទៅដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ