តួកគី ៖ ដំណើរឆ្ពោះទៅរកការបោះឆ្នោតប្រធានាធិបតីជុំទីពីរ ជាលើកទីមួយ
ចុះផ្សាយនៅថ្ងៃ៖
ស្តាប់ - ០៦:៥៦
បើតាមលទ្ធផលបណ្តោះអាសន្ន ប្រធានាធិបតីផុតអាណត្តិលោក អ៊ែរដូហ្កាន បានទទួលសំឡេងគាំទ្រនាំមុខយ៉ាងប្រផុតប្រផើយ និងតិចជាង៥០%។ ដូច្នេះ លោក អ៊ែរដូហ្កាន ត្រូវប្រឈមតទល់ជាមួយលោក កេម៉ាល់ គីលីច្សដារ៉ូហ្គូ បេក្ខជននៃសម្ព័ន្ធបក្សប្រឆាំង ជាថ្មី នៅថ្ងៃទី ២៨ ឧសភា។ នេះជាលើកទីមួយ ហើយសម្រាប់សាធារណរដ្ឋតួកគី ដែលការបោះឆ្នោតប្រធានាធិបតី មិនអាចសម្រេចជ្រើសរើសមេដឹកនាំប្រទេសបាន នៅជុំដំបូង។
ពុំទាន់មានទេលទ្ធផលជាផ្លូវការ ហើយក៏ពុំទាន់មានការបញ្ជាក់ជាផ្លូវការដែរ អំពីចំនួនអ្នកចូលរួមបោះឆ្នោត ដែលទំនងមានអត្រាខ្ពស់ខ្លាំងដល់ទៅជាង៩០%។ ប៉ុន្តែ បើតាមប្រធានក្រុមប្រឹក្សាបោះឆ្នោតតួកគី និងយោងតាមលទ្ធផលនៃការរាប់សន្លឹកឆ្នោតបាន៩៩% លោក អ៊ែរដូហ្កាន បានទទួលសំឡេង ៤៩,៤%។ ចំណែក លោក គីលីច្សដារ៉ូហ្គូ ជាគូប្រជែងដ៏ចម្បង ដែលគ្រប់ការស្ទង់មតិសុទ្ធតែទស្សនទាយថាឈ្នះនោះ បានទទួលការគាំទ្រ ៤៤,៩៦%។ ជាង៥%ទៀត ជាសំឡេងរបស់បេក្ខជនទីបី អ្នកជាតិនិយម លោក ស៊ីណាន អូហ្កាន (Sinan Ogan)។
ដោយគ្មានអ្នកឈ្នះលើស៥០% តួកគីត្រូវបោះឆ្នោតប្រធានាធិបតីជុំទីពីរ ដែលបេក្ខជននាំមុខគេពីរដំបូង ត្រូវតទល់គ្នាជាថ្មី នាថ្ងៃទី ២៨ ឧសភា។ នេះជាលើកទីមួយ សម្រាប់សាធារណរដ្ឋតួកគីដែលមានអាយុ១រយឆ្នាំ និងសម្រាប់លោក អ៊ែរដូហ្កានផ្ទាល់តែម្តង ដែលត្រូវឡើងសង្វៀនឆ្នោតជាលើកទីពីរដូច្នេះ។
ប៉ុន្តែទោះមិនមែនជាជោគជ័យភ្លាមក៏ដោយ ក៏លទ្ធផលថ្ងៃនេះមិនមែនជាបរាជ័យឡើយសម្រាប់លោកអ៊ែរដូហ្កាន។ នៅចំពោះមុខសកម្មជនគាំទ្រ ដ៏កកកុញ ទាំងកណ្តាលយប់ លោក អ៊ែរដូហ្កាន ដែលដឹកនាំប្រទេសអស់២០ឆ្នាំមកហើយ បានអះអាងប្រកបដោយភាពជឿជាក់ថា លោកនឹងបំរើប្រទេសរយៈពេល៥ឆ្នាំ បន្ថែមទៀត។
លោក គីលីច្សដារ៉ូហ្គូ ជាគូប្រជែងដ៏ចម្បង ដែលហាក់មានសមត្ថភាពឈ្នះតាំងពីជុំទីមួយ តែបែរជាធ្លាក់មកនៅលំដាប់ទីពីរ ដោយប្រមូលសំឡេងមិនបានទាំង៤៥%ផងនោះ ទើបជាអ្នកចាញ់ល្បែងភ្នាល់។ តែលោកនៅមានទំនុកចិត្តខ្លាំងក្លាដដែល។ លោកបានប្រកាសនៅយប់មិញថា នឹងឈ្នះជាប្រាកដនៅជុំទីពីរ ព្រោះសង្គមតួកគីស្រេកឃ្លានការប្តូរផ្លាស់។
លោក គីលីច្សដារ៉ូហ្គូ អាចប្តូរផ្លាស់លទ្ធផលឆ្នោត នៅជុំទីពីរទេ ?
សំណាងមានតិចតួចបំផុត ! ពេលនេះ គឺលោកប្រធានាធិបតីផុតអាណត្តិ អ៊ែរដូហ្កាន ជាអ្នកនាំមុខ និងជាអ្នកមានប្រៀបខ្លាំងជាងនៅក្នុងបោះឆ្នោតជុំទីពីរ ព្រោះគណបក្សរបស់លោកអ៊ែរដូហ្កាន ក៏កំពុងក្លាយទៅជាបក្សមានសំឡេងភាគច្រើននៅក្នុងសភាទៀត។ បើ តាមលទ្ធផលបឋម ប្រសូតចេញពីការបោះឆ្នោតសភាថ្ងៃម្សិលមិញជាមួយគ្នានោះ គណបក្សរបស់លោកប្រធានាធិបតីទទួលបាន ២៧០កៅអី ទល់នឹង១៦៨អាសនៈសម្រាប់សម្ព័ន្ធបក្សប្រឆាំងរបស់លោក គីលីច្សដារ៉ូហ្គូ ក្នុងចំណោមអាសនៈសភាទាំងអស់៦០០។
ចំណែក លោក គីលីច្សដារ៉ូហ្គូ ហាក់ដូចជាគ្មានគន្លឹះនយោបាយអ្វីថ្មីផ្សេង សម្រាប់ទាក់ទាញរកសំឡេងថ្មីមកគាំទ្រលោកនៅជុំទីពីរទេ។ ការបោះឆ្នោតជុំទីពីរនេះ ក៏អាស្រ័យផងដែរលើបក្សដែលជាប់ឆ្នោតលំដាប់ទីបីថ្ងៃនេះ។ នោះគឺគណបក្សជាតិនិយម ដឹកនាំដោយលោកស៊ីណាន អូហ្កាន ដែលបានទទួលសំឡេងគាំទ្រប្រមាណ៥,៣%។ លោក គីលីច្សដារ៉ូហ្គូមិនរំពឹងថាអាចទាញយកសំឡេងជាង៥% នេះបានទេ។
បេក្ខជនទីបី ដែលអាចប្តូរផ្លាស់ជោគវាសនាឆ្នោតនៅជុំទីពីរ ជានរណា ?
លោក ស៊ីណាន អូហ្កាន កំពុងក្លាយជាបុគ្គលដែលគួរឱ្យចែចង់ខ្លាំងណាស់ពេលនេះទាំងលោក អ៊ែដូហ្កាន ទាំងលោកគីលីច្សដារ៉ូហ្គូ។ រហូតមកទល់យប់មិញនេះ លោក ស៊ីណាន អូហ្កាន មិនទាន់បង្ហាញ ជំហរ របស់លោកនៅឡើយទេ។ លោកថែមទាំងបដិសេធ មិនចេញសេចក្តី ណែនាំ ឱ្យសកម្មជននិងអ្នកគាំទ្របក្ស ថាគួរបោះឆ្នោតឱ្យបេក្ខជនណាឡើយនៅថ្ងៃទី២៨ខាងមុខ។
ជាអតីតអ្នកនយោបាយជាតិនិយមជ្រុល ប្រឆាំងនឹងគួដឌីស្ថាន លោក អូហ្កាន បានថ្លែងប្រាប់សារព័ត៌មានអាល្លឺម៉ង់មួយ កាលពីព្រឹកមិញថា លោកនឹងអំពាវនាវឱ្យបោះឆ្នោតជូនលោក គីលីច្សដារ៉ូហ្គូ ដរាបណាតែបេក្ខជនបក្សប្រឆាំងរូបនេះ ព្រមផ្តាច់ទំនាក់ទំនងជាមួយគណបក្សស្និទ្ធនឹងក្រុមគួដឌីស្ថាន។ នេះជាលក្ខខណ្ឌ ដែលមិនអាចទទួលបានទេ សម្រាប់លោក គីលីច្សដារ៉ូហ្គូ ព្រោះគណបក្សគួដឌីស្ថានជាកម្លាំងនយោបាយទីបី របស់ប្រទេស។ សំឡេងរបស់គណបក្សនេះបានចូលរួមចំណែកច្រើនណាស់ ក្នុងការរុញច្រានលោក គីលីច្សដារ៉ូហ្គូ ឱ្យបានដល់ថ្ងៃនេះ។ លោកមិនអាចបោះបង់គណបក្សនេះដែល នឹងធ្វើឱ្យសម្ព័ន្ធបក្សប្រឆាំងរង្គោះរង្គើឡើយ។
ចំណុចអវិជ្ជមានចុងក្រោយសម្រាប់លោក គីលីច្សដារ៉ូហ្គូ ពលរដ្ឋតួកគីដែលសាកល្បងជ្រើសរើសលោកគីលីច្សដារ៉ូហ្គូ កាលពីជុំទីមួយ អាចនឹងងាកមករកលោកអ៊ែរដូហ្កានវិញ ដើម្បីនិរន្តរភាពនិងស្ថិរភាព។
តួកគីក្រោយការបោះឆ្នោត ?
ការបោះឆ្នោតជ្រើសរើសប្រធានាធិបតីតួកគីទី ១៣ នេះ មានឥទ្ធិពលនយោបាយខ្លាំងស្ទើរពុំធ្លាប់មានទេសម្រាប់ប្រវត្តិសាស្ត្រតួកគី ដែលសឱ្យឃើញថា នយោបាយដឹកនាំរបស់លោកអ៊ែរដូហ្កានបែបអ៊ីស្លាមនិយម ទំនើប និងស្រមៃក្លាយជាមហាអំណាចមួយ បានចាក់កប់ជ្រៅក្នុងសង្គមតួកគី។
ជោគជ័យរបស់ប្រធានាធិបតីផុតអាណត្តិតួកគី សម្ព័ន្ធមិត្តរបស់លោកពូទីន នឹងធ្វើឱ្យរុស្ស៊ីរីករាយ តែត្រូវបន្តធ្វើការជាមួយទាំងទើសទាល់ចិត្តសម្រាប់រដ្ឋបាលអាមេរិករបស់លោកបៃដិន ក៏ដូចជាបណ្តាមេដឹកនាំអឺរ៉ុបជាច្រើនផ្សេងទៀត ដែលមានទំនាក់ទំនងរកាំរកូសស្រាប់ជាមួយលោកអ៊ែដូហ្កាន និងដែលចង់ឃើញតួកគីមានមេដឹកនាំ ថ្មី បែបប្រជាធិបតេយ្យនិងមិនប្រកាន់សាសនា។ ជាសមាជិកអង្គការអូតង់ តួកគីក៏ជាដៃគូដ៏ចាំបាច់របស់សហភាពអឺរ៉ុប ក្នុងវិបត្តិជនភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ