តួកគី បោះឆ្នោតជ្រើសរើសប្រធានាធិបតី ក្រោមផ្ទៃនៃលទ្ធផលមិនច្បាស់លាស់
ពលរដ្ឋតួកគីជាង៦០លាន ចាប់ផ្តើមបោះឆ្នោតសភា និងប្រធានាធិបតី នៅថ្ងៃអាទិត្យទី ១៤ ឧសភា តាំងពីម៉ោង៨ព្រឹក ម៉ោងក្នុងស្រុក ត្រូវជាម៉ោង៥សកល។ ការបោះឆ្នោត ជុំទីមួយនេះ ទំនងជាថ្ងៃសម្រេចបិទបញ្ចប់សករាជអំណាច ២០ឆ្នាំរបស់លោក អ៊ែរដូហ្កាន ប្រធានាធិបតីផុតអាណត្តិផង។ ការស្ទង់មតិ សុទ្ធតែថាបេក្ខជន កេម៉ាល់ គីលីច្សដារ៉ូគ្លូ ដែលជាគូប្រជែងដ៏ចម្បងនោះ នាំមុខទាំងអស់។
ចុះផ្សាយនៅថ្ងៃ៖
ស្តាប់ - ០១:៣៦
តាមទម្លាប់ប្រជាពលរដ្ឋតួកគី ចូលរួមបោះឆ្នោតក្នុងចំនួនដ៏ច្រើន ប្រមាណដល់ទៅជាង៨០%។ នៅថ្ងៃនេះ វត្តមានអ្នកបោះឆ្នោតអាចកាន់តែខ្ពស់លើសសព្វដងទៀត បើយោលទៅលើទម្រង់នៃភាពប្រកួតប្រជែងដែលមានលក្ខណៈជាការសម្រេចឱ្យប្រធានាធិបតី ផុតអាណត្តិ អ៊ែរដូហ្កានបន្ត ឬបញ្ចប់តំណែងរបស់គាត់។ ជាការជ្រើសរើសមេដឹកនាំថ្មី រវាងបេក្ខភាពចម្បងពីររូប គឺ លោក អ៊ែរដូហ្កាន អ្នកអភិរក្សអ៊ីស្លាមនិយម អាយុ៦៩ឆ្នាំ កាន់អំណាចតាំងពី២០ឆ្នាំមក និងលោក គីលីច្សដារ៉ូគ្លូ អាយុ៧៤ឆ្នាំ នៃបក្សសង្គមប្រជាធិបតេយ្យ ជាសម្ព័ន្ធបក្សប្រឆាំង គាំទ្រដោយលោកខាងលិច។
បន្ទាប់ពីឆ្លងកាត់យុទ្ធនាការឃោសនាបោះឆ្នោតដ៏ពុះកញ្ជ្រោលនិងជួនអមដោយអំពើហិង្សាផងនោះ ការបោះឆ្នោតបានចាប់ផ្តើមដោយស្ងប់ស្ងាត់ទេ។ ក្រសួងមហាផ្ទៃបានប្រមូលកម្លាំងប៉ូលិស នគរបាល កងសន្តិសុខ និងបុគ្គលិក ប្រមាណជាង ៦សែននាក់ ដើម្បីធានាសុវត្ថិភាពពេលបោះឆ្នោត។ ក្រុមបក្សប្រឆាំង ដែលមិនសូវទុកចិត្តលើគណៈកម្មការរៀបចំការបោះឆ្នោត រំពឹងលើ ក្រុមស្ម័គ្រចិត្តរបស់សង្គមស៊ីវិល ក្នុងការធានាឯករាជ្យភាពនៃការបោះឆ្នោត។ ការលួចបន្លំសន្លឹកឆ្នោតជាអ្វីដែលបក្សទាំងសងខាងតែងព្រួយបារម្ភ។
ការិយាល័យបោះឆ្នោតត្រូវបិទនៅវេលាម៉ោង ៥ល្ងាច ត្រូវនឹងម៉ោង២រសៀលម៉ោងសកល។ បេក្ខជនជាគូប្រជែងគ្នាទាំងពីរ សង្ឃឹមដូចគ្នាថានឹងទទួលជោគជ័យនៅល្ងាចនេះ ដោយពុំបាច់ឆ្លងកាត់ការបោះឆ្នោតជុំទីពីរទេ។ បេក្ខជនណាទទួលបានសំឡេងឆ្នោតលើសពី ៥០% នឹងត្រូវឈ្នះក្លាយជាប្រធានាធិបតីតួកគីថ្មី នៅជុំទីមួយនេះតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ