សម្ព័ន្ធមិត្តអ៊ុយក្រែនជួបប្រជុំគ្នានៅអាល្លឺម៉ង់សាជាថ្មីដើម្បីនិយាយពីការផ្តល់អាវុធទៅជួយអ៊ុយក្រែន
ចុះផ្សាយនៅថ្ងៃ៖
ប្រទេសសម្ព័ន្ធមិត្តរបស់អ៊ុយក្រែន កំពុងជួបប្រជុំគ្នានៅថ្ងៃសុក្រនេះ នៅមូលដ្ឋានទ័ពអាមេរិក នៅប្រទេសអាល្លឺម៉ង់ ដើម្បីគិតគូររកមធ្យោបាយផ្តល់សព្វាវុធ ទៅតាមការទាមទាររបស់អ៊ុយក្រែន។ អ៊ុយក្រែន ដែលត្រូវការជំនួយសព្វាវុធទំនើបៗ និងបន្ទាន់ សម្រាប់ត្រៀមបើកការប្រយុទ្ធទ្រង់ទ្រាយធំ ដើម្បីវាយដណ្តើមយកទឹកដីរបស់ខ្លួនពីរុស្ស៊ី នៅខែមេសា។ គិតចាប់តាំងពីរុស្ស៊ីធ្វើសង្រ្គាមឈ្លានពានប្រទេសអ៊ុយក្រែន ជាង ១ឆ្នាំមកនេះ ប្រទេសលោកខាងលិចបានផ្តល់ជំនួយ ជាង ១៥០ពាន់លានដុល្លារ សម្រាប់ជួយអ៊ុយក្រែន ដែលនៅក្នុងនោះ ៦៥ពាន់លានដុល្លារ ជាជំនួយយោធា។ នៅក្នុងរឿងផ្តល់ជំនួយយោធានេះ តើប្រទេសណាខ្លះដែលជួយអ៊ុយក្រែនច្រើនជាងគេ និងជួយផ្តល់អាវុធអ្វីខ្លះ?
រដ្ឋមន្រ្តីការពារជាតិរបស់ក្រុមប្រទេសសម្ព័ន្ធមិត្តរបស់អ៊ុយក្រែនជួបប្រជុំគ្នា នៅថ្ងៃសុក្រនេះ នៅមូលដ្ឋានទ័ពអាមេរិក នៅRamstein ប្រទេសអាល្លឺម៉ង់។ អគ្គលេខាធិការអង្គការអូតង់ដែលទើបត្រលប់ពីដំណើរទស្សនកិច្ច នៅទីក្រុងកៀវ ជាទីដែលលោកបានជួបពិភាក្សាជាមួយ ប្រធានាធិបតី អ៊ុយក្រែន លោកហ្សេឡេនស្គី ក៏មានវត្តមានចូលរួម នៅក្នុងកិច្ចប្រជុំនៅថ្ងៃនេះដែរ។ សម្ព័ន្ធមិត្តរបស់អ៊ុយក្រែនជួបប្រជុំគ្នា នៅក្នុងកាលៈទេសៈមួយដែលអ៊ុយក្រែនកំពុងដាក់សម្ពាធឲ្យសម្ព័ន្ធមិត្តផ្តល់ជំនួយអាវុធបន្ថែម សម្រាប់ត្រៀមបើកការប្រយុទ្ធទ្រង់ទ្រាយធំ នៅនិទិឃរដូវនេះ ដើម្បីវាយដណ្តើមយកទឹកដីរបស់ខ្លួនពីរុស្ស៊ីវិញ។
គិតចាប់តាំងពីរុស្ស៊ីធ្វើសង្រ្គាមឈ្លានពានអ៊ុយក្រែន នៅថ្ងៃទី ២៤កុម្ភៈ ឆ្នាំមុន មានប្រទេសចំនួន ៣១ដែលផ្តល់ជំនួយសព្វាវុធ ដល់ប្រទេសអ៊ុយក្រែន។ មួយភាគធំជាប្រទេសសមាជិកអូតង់ ដែលនៅក្នុងនោះ អាមេរិកជាអ្នកនាំមុខគេ ក្នុងរឿងផ្តល់ជំនួយយោធាដល់អ៊ុយក្រែន។
គិតចាប់តាំងពី ផ្ទុះសង្រ្គាមរុស្ស៊ីឈ្លានពានអ៊ុយក្រែន ជាង១ឆ្នាំមកនេះ លំហូរជំនួយសម្រាប់ប្រទេសអ៊ុយក្រែន មានប្រមាណ ១៥០ពាន់លានដុល្លារ ដែលនៅក្នុងនោះ ជាង ៦៥ពាន់លានដុល្លារជាជំនួយយោធា។ នៅក្នុងជំនួយយោធា ៦៥ពាន់លានដុល្លារសម្រាប់អ៊ុយក្រែន ៤៣ពាន់លានដុល្លារ ជាជំនួយយោធារបស់អាមេរិក។ នៅថ្ងៃពុធម្សិលមិញ រដ្ឋបាលលោកចូ បៃដិនទើបប្រកាសផ្តល់កញ្ចប់ថវិកាថ្មី សម្រាប់ជួយកងទ័ពអ៊ុយក្រែន ដែលមានប្រមាណ ៣២៥លានដុល្លារ។
បន្ទាប់ពីអាមេរិក គឺអង់គ្លេស ដែលផ្តល់ជំនួយយោធា ជិត ៥ពាន់លានដុល្លារ (៤,៩ពាន់លាន) សម្រាប់អ៊ុយក្រែន។ ជាលើកទី១ក្នុងប្រវត្តិសាស្រ្តរបស់ខ្លួន សហភាពអឺរ៉ុបបានផ្តល់ជំនួយយោធាដល់អ៊ុយក្រែន ប្រមាណ ៣,៦ពាន់លានដុល្លារ។ អាល្លឺម៉ង់វិញ ដែលស្ថិតនៅចំណាត់ថ្នាក់ទី៤បើនិយាយពីទំហំថវិកា សម្រាប់ជំនួយយោធាជួយអ៊ុយក្រែន។ បារាំង អ៊ីតាលី និងអេស្ប៉ាញ បានចំណាយថវិកា និងផ្តល់សព្វាវុធក្រាសក្រែលណាស់ដែរ សម្រាប់ជួយអ៊ុយក្រែន។ ចំណែករដ្ឋាភិបាលហូឡង់ បានប្រកាសថា ហូឡង់នឹងប្រើថវិកា ២៥០០លានដុល្លារ នៃថវិកាជាតិឆ្នាំ ២០២៣ សម្រាប់ជួយមនុស្សធម៌ និងយោធានៅអ៊ុយក្រែន។ ជាក់ស្តែង នៅថ្ងៃម្សិលមិញ រដ្ឋាភិបាលហូឡង់ ទើបបានប្រកាសជាមួយរដ្ឋាភិបាលដាណឺម៉ាកថា ប្រទេសទាំងពីរនឹងចូលលុយគ្នា ប្រមាន ១៦៥លានអឺរ៉ូ ដើម្បីទិញរថក្រោះ អាល្លឺម៉ង់ Leopard 2 ឲ្យកងទ័ពអ៊ុយក្រែន។
បើនិយាយពីទំហំថវិកាយោធាសម្រាប់ជួយអ៊ុយក្រែន ប្រទេសប៉ូឡូញ និងប្រទេសនៅតំបន់បាល់ទិក ដូចជាអេស្តូនីជាដើម មិនអាចប្រៀបធៀបនឹងគេបានទេ។ ប៉ុន្តែ ប៉ូឡូញដែលជាប់ព្រំដែនអ៊ុយក្រែន ចំណែកអេស្តូនីដែលមានព្រំដែនជាមួយរុស្ស៊ី សកម្មខ្លាំង និងបង្កើនថវិកាជំនួយោធាសម្រាប់អ៊ុយក្រែន ដល់ទៅ ១,១នៃផលិតផលក្នុងស្រុកសរុប។ សម្រាប់កូនប្រទេសអេស្តូនី បើគេមិនជួយអ៊ុយក្រែន និងបណ្តោយទុកឲ្យអ៊ុយក្រែនដួលរលំធ្លាក់ក្នុងដៃរបស់រុស្ស៊ី នោះ សេរីភាពនៅទីកន្លែងដទៃក្នុងពិភពលោកនឹងត្រូវគំរាមកំហែង។
សព្វាវុធដែលគេផ្តល់ឲ្យអ៊ុយក្រែន គ្រប់គ្រាន់ និងមិនទាន់ពេលវេលា
នៅក្នុងសង្រ្គាមរុស្ស៊ីឈ្លានពានអ៊ុយក្រែន ជាង១ឆ្នាំមកនេះ សម្ព័ន្ធមិត្តរបស់អ៊ុយក្រែន ដឹកនាំដោយសហរដ្ឋអាមេរិកបានចំណាយថវិកា ដល់ទៅ ៦៥ពាន់លានដុល្លារ សម្រាប់ជួយកងទ័ពអ៊ុយក្រែន ប្រយុទ្ធទប់ទល់កងទ័ពរុស្ស៊ី។
ប៉ុន្តែ សម្រាប់ភាគីអ៊ុយក្រែន ជំនួយយោធារបស់សម្ព័ន្ធមិត្តនៅតែមិនគ្រប់គ្រាន់ដើម្បីជួយឲ្យអ៊ុយក្រែន វាយដណ្តើមយកទឹកដីរបស់ខ្លួនពីរុស្ស៊ី ព្រោះថា សព្វាវុធភាគច្រើន ដែលជាគ្រាប់ មីស៊ីលប្រឆាំងរថក្រោះ ប្រឆាំងយន្តហោះ បានជួយកងទ័ពអ៊ុយក្រែន ឲ្យត្រឹមទប់ទល់ ការពារខ្លួនពីការវាយប្រហាររបស់រុស្ស៊ី ប៉ុន្តែ វាមិនអាចជួយឲ្យកងទ័ពអ៊ុយក្រែនអាចមានសមត្ថភាពវាយលុក រុញច្រានកងទ័ពរុស្ស៊ីឲ្យចេញអស់ពីទឹកដីអ៊ុយក្រែន។
រហូតមក ប្រធានាធិបតីអ៊ុយក្រែន លោកហ្សេឡេនស្គី ផ្ទាល់បានទទូចសុំឲ្យប្រទេសលោកខាងលិចផ្តល់សព្វាវុធធុនធ្ងន់ ដូចជារថក្រោះ មីស៊ីលការពារដែនអាកាស និងយន្តហោះចម្បាំង ក្នុងហេតុផលថា មានតែរថក្រោះទំនើបផលិតនៅប្រទេសលោកខាងលិច ដែលមានសមត្ថភាពវាយរុញច្រានកងទ័ពរុស្ស៊ីចេញពីប្រទេសអ៊ុយក្រែន។
អង់គ្លេស ដែលជាប្រទេសផ្តល់ជំនួយយោធាធំទី២របស់អ៊ុយក្រែន បានយល់ព្រមផ្តល់ រថក្រោះ Challenger 2 ចំណែករដ្ឋាភិបាលអាល្លឺម៉ង់ ដែលធ្លាប់រារែក ដោយសារខ្លាចរុស្ស៊ីរបស់លោកពូទីនខឹងសងសឹកអាល្លឺម៉ង់ ដោយសារវត្តមានរថក្រោះនៅក្នុងសមរភូមិអ៊ុយក្រែន នៅទីបំផុតបានសុខចិត្តយល់ព្រមផ្តល់រថក្រោះLeopard 2 ចំនួន១៨គ្រឿងទៅឲ្យអ៊ុយក្រែន។ អាល្លឺម៉ង់សុខចិត្តផ្តល់រថក្រោះ Leopard 2ទៅជួយអ៊ុយក្រែន ក៏ដោយសារ អាមេរិកយល់ព្រមផងដែរ ថា នឹងបញ្ជូនរថក្រោះដ៏ទំនើបរបស់អាមេរិក Abram ទៅឲ្យអ៊ុយក្រែន។ ប៉ុន្តែ ការបញ្ជូនរថក្រោះអាមេរិកទៅដល់ទឹកដីអ៊ុយក្រែន អាចកើតឡើងនៅចុងឆ្នាំ ២០២៣។
នៅក្នុងពេលទទួលជួបអគ្គលេខាធិការ អង្គការអូតង់នៅទីក្រុងកៀវ កាលពីថ្ងៃម្សិលមិញ ប្រធានាធិបតីអ៊ុយក្រែនបានទទូចយ៉ាងរន្ទាន់សុំឲ្យប្រទេសលោកខាងលិចផ្តល់ឲ្យបានឆាប់ៗ រថក្រោះ កាំភ្លើងធំ និងគ្រាប់ យន្តហោះចម្បាំង និងប្រព័ន្ធមីស៊ីលបាញ់ចម្ងាយឆ្ងាយ។គោលដៅរបស់អ៊ុយក្រែន គឺចង់បានអាវុធធុនធ្ងន់របស់ប្រទេសលោកខាងលិច សម្រាប់ត្រៀមបើកការប្រយុទ្ធទ្រង់ទ្រាយធំ ដើម្បីវាយដណ្តើមយកទឹកដីពីកងទ័ពរុស្ស៊ីវិញ នៅក្នុងអអំឡុងខែ មេសា ឧសភា ខាងមុខនេះ។
អ៊ុយក្រែនសង្ឃឹមចង់បានយន្តហោះចម្បាំង និងប្រព័ន្ធបាញ់មីស៊ីលចម្ងាយឆ្ងាយ ដើម្បី វាយប្រហារលើទីតាំងយុទ្ធសាស្រ្តរបស់កងទ័ពរុស្ស៊ី ដូចជាឃ្លាំងស្តុកអាវុធ នៅតំបន់ដូណែតស៍ ជាដើម។ នៅមូលដ្ឋានទ័ពអាមេរិកនៅអាល្លឺម៉ង់ កិច្ចប្រជុំរបស់រដ្ឋមន្រ្តីការពារជាតិរបស់ប្រទេសសម្ព័ន្ធមិត្តអ៊ុយក្រែន នៅថ្ងៃសុក្រនេះ ត្រូវផ្តោតសំខាន់ទៅលើរឿងផ្តល់យន្តហោះចម្បាំង ទៅឲ្យអ៊ុយក្រែននេះដែរ។ ស្លូវ៉ាគី និងប៉ូឡូញជាដើម បានយល់ព្រមផ្តល់យន្តហោះចម្បាំង Mig 29ផលិតនៅសម័យសហភាពសូវៀត ទៅឲ្យអ៊ុយក្រែន ប៉ុន្តែ ប្រទេសផ្សេងទៀត ដូចជាអាល្លឺម៉ង់ជាដើម អរិភាព មិនចង់បញ្ជូនយន្តហោះចម្បាំង ទៅឲ្យអ៊ុយក្រែន។ អ៊ុយក្រែនផ្ទាល់ចង់បានយន្តហោះចម្បាំងអាមេរិក ប្រភេទ F16 ប៉ុន្តែ ទាំងអាមេរិក និងអាល្លឺម៉ង់ សុទ្ធតែធ្លាប់បានបដិសេធច្បាស់ៗថា នឹងមិនបញ្ជូនទៅឲ្យអ៊ុយក្រែននោះទេ។
ប្រទេសលោកខាងលិច នៅតែរារែក មិនផ្តល់សព្វាវុធ ដែលអ៊ុយក្រែនទាមទារចង់បាន
មានហេតុផលធំៗបី ដែលធ្វើឲ្យប្រទេសលោកខាងលិចរារែកមិនផ្តល់សព្វាវុធធុនធ្ងន់ ទៅឲ្យអ៊ុយក្រែន ជាពិសេស គឺយន្តហោះចម្បាំងអាមេរិក F16។
ទី១ គឺទាក់ទងនឹងស្តុកសព្វាវុធរបស់ប្រទេសលោកខាងលិចដែលកាន់តែខើច ដោយសារតែយកទៅជួយអ៊ុយក្រែន និងការផលិតមិនទាន់ពេលវេលា។
ទី២ ប្រទេសលោកខាងលិចខ្លាចថា ការផ្តល់អាវុធកាន់តែទំនើបរបស់ខ្លួនទៅជួយអ៊ុយក្រែនដូចជាយន្តហោះចម្បាំង និងប្រព័ន្ធមីស៊ីលបាញ់ចម្ងាយឆ្ងាយ អាចទាញខ្លួនឯងឲ្យជាប់ពាក់ព័ន្ធកាន់តែខ្លាំងក្នុងសង្រ្គាមអ៊ុយក្រែន និងអាចបង្កើតជាការប្រឈមមុខដាក់គ្នាដោយផ្ទាល់ជាមួយរុស្ស៊ី ដែលអាចបង្កជាសង្រ្គាមលោកលើកទី៣ និងសង្រ្គាមនុយក្លេអ៊ែរ។
ទី៣ គឺបញ្ហាLogistic។ ប្រទេសលោកខាងលិចយល់ថា យន្តហោះចម្បាំងមិនមែនជាដំណោះស្រាយនៅចំពោះមុខទេ ព្រោះវាត្រូវការចំណាយពេលវេលាយូរ ជាពិសេស ក្នុងការហ្វឹកហាត់ពីឡុតអ៊ុយក្រែនឲ្យចេះបើកយន្តហោះចម្បាំងF-16របស់អាមេរិក ដែលត្រូវការហ្វឹកហាត់ដល់ទៅ ៦ខែយ៉ាងតិច។ ដូច្នេះ ប្រទេសសម្ព័ន្ធមិត្តអ៊ុយក្រែនចង់ផ្តោតទៅលើជំនួយដែលគេអាចធ្វើបានឆាប់ៗ សម្រាប់តម្រូវការចំពោះមុខក្នុងសមរភូមិប្រយុទ្ធទប់ទល់នឹងកងទ័ពរុស្ស៊ី។
សម្រាប់អ៊ុយក្រែន ការរារែកក្នុងការផ្តល់អាវុធធុនធ្ងន់ពីសំណាក់ប្រទេសលោកខាងលិច នឹងអាចបង្កឧបសគ្គដល់អ៊ុយក្រែន ដែលត្រៀមបើកការប្រយុទ្ធទ្រង់ទ្រាយធំ ដើម្បីវាយដណ្តើមយកទឹកដីរបស់ខ្លួនពីរុស្ស៊ីវិញ នៅខែ មេសានេះ។ ឯកសារសម្ងាត់របស់ក្រសួងការពារជាតិអាមេរិក ដែលបែកលេចធ្លាយ នៅខែមេសានេះ បានបង្ហាញហើយថា គ្រាប់របស់កងទ័ពអ៊ុយក្រែនបានចុះថមថយជាលំដាប់ ជាពិសេស ដោយសារការប្រយុទ្ធរបស់កងទ័ពអ៊ុយក្រែន សម្រាប់ការពារក្រុង Bakhmout។ នៅក្នុងឯកសារសម្ងាត់របស់មន្ទីរបញ្ចកោណ ភ្នាក់ងារ CIA វាយតម្លៃថា បើសិន ប្រទេសលោកខាងលិចមិនបញ្ជូនសព្វាវុធ តាមការសន្យា និងទាន់ពេលវេលា ទេ នោះអ៊ុយក្រែននឹងអស់គ្រាប់មីស៊ីល សម្រាប់ប្រព័ន្ធការពារដែនអាកាស នៅខែ ឧសភា។
គ្មានគ្រាប់សម្រាប់ប្រព័ន្ធខែលមីស៊ីលអ៊ុយក្រែននឹងអាចរងគ្រោះ សាជាថ្មី ដោយសារការវាយប្រហារគ្រាប់មីស៊ីលបាចសាចរបស់រុស្ស៊ី។ នេះគេមិនទាន់និយាយដល់ តម្រូវការសព្វាវុធ ដែលអ៊ុយក្រែន ត្រូវការបន្ទាន់ សម្រាប់បើកឆាកប្រយុទ្ធទ្រង់ទ្រាយធំ ដើម្បីវាយដណ្តើមយកទឹកដីរបស់ខ្លួនពីរុស្ស៊ីផង។ ប្រធានាធិបតីអ៊ុយក្រែន ផ្ទាល់បានដាក់ក្តីសង្ឃឹមទាំងស្រុងទៅលើកិច្ចប្រជុំ របស់រដ្ឋមន្រ្តីការពារជាតិប្រទេសលោកខាងលិច ដែលរៀបចំនៅប្រទេសអាល្លឺម៉ង់។ តើសម្ព័ន្ធមិត្តរបស់អ៊ុយក្រែននឹងអាចជំនះការខ្វែងគំនិត និងការរារែករបស់ខ្លួន ដើម្បីផ្តល់យន្តហោះចម្បាំងទៅឲ្យអ៊ុយក្រែនដែរឬទេ? លទ្ធផលយ៉ាងណា គេនឹងអាចដល់នៅក្រោយកិច្ចប្រជុំនៅថ្ងៃសុក្រទី ២១ មេសា ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ