អធិការបតីអាល្លឺម៉ង់ទៅជួបប្រធានាធិបតីអាមេរិកដើម្បីនិយាយពីជំហានបន្ទាប់ នៅក្នុងសង្រ្គាមអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:០៧
ប្រមុខរដ្ឋាភិបាលអាល្លឺម៉ង់ចេញដំណើរ ទៅធ្វើទស្សនកិច្ច នៅទីក្រុងវ៉ាស៊ីនតោន។ នៅសេតវិមាន នៅថ្ងៃសុក្រនេះ នាយករដ្ឋមន្រ្តីអាល្លឺម៉ង់ លោកអូឡាហ្វ ស្ហុល៍ ត្រូវជួបពិភាក្សាមួយទល់មួយ ជាមួយ ប្រធានាធិបតីអាមេរិក លោកចូ បៃដិន។ សង្រ្គាមអ៊ុយក្រែន ទំនាក់ទំនង សហប្រតិបត្តិការរវាងអាមេរិក ជាមួយអាល្លឺម៉ង់ ក៏ដូចជាសហភាពអឺរ៉ុប ស្ថិតក្នុងរបៀបវារៈនៃជំនួបកំពូលទ្វេភាគីអាមេរិក អាល្លឺម៉ង់។ នៅមួយថ្ងៃមុនធ្វើទស្សនកិច្ចនៅវ៉ាស៊ីនតោន ប្រមុខរដ្ឋាភិបាលអាល្លឺម៉ង់បានបញ្ជាក់ពីជំហរគាំទ្រយោធារបស់អាល្លឺម៉ង់ សម្រាប់ជួយអ៊ុយក្រែន ប៉ុន្តែ ជាមួយគ្នានោះ លោកបានអំពាវនាវកុំឲ្យចិន ផ្តល់អាវុធទៅរុស្ស៊ី។
នាយករដ្ឋមន្រ្តីអាល្លឺម៉ង់ លោកអូឡាហ្វ ស្ហុល៍ បានធ្វើដំណើរទៅជួបប្រធានាធិបតីអាមេរិក លោកចូ បៃដិន នៅថ្ងៃសុក្រនេះ នៅទីក្រុងវ៉ាស៊ីនតោន។ ដំណើររបស់ប្រមុខរដ្ឋាភិបាលអាល្លឺម៉ង់ ទៅវ៉ាស៊ីនតោន នៅថ្ងៃនេះ មិនសូវអធិកអធម គ្មានអមដោយអ្នកកាសែត ឬផ្តល់សន្និសីទកាសែត ដូចក្នុងទស្សនកិច្ច កាលពី១ឆ្នាំមុននោះទេ។
នៅឆ្នាំមុន លោកអូឡាហ្វ ស្ហុល៍ ធ្វើទស្សនកិច្ចផ្លូវរដ្ឋ បន្ទាប់ពីចូលកាន់តំណែងជានាយករដ្ឋមន្រ្តីអាល្លឺម៉ង់ បន្តពីលោកស្រី អង់ហ្គេឡា មិរកិល។ ទស្សនកិច្ចរបស់លោក អូឡាហ្វ ស្ហុល៍ នៅពេលនោះ គឺធ្វើឡើងនៅតែប៉ុន្មានថ្ងៃមុន រុស្ស៊ីបញ្ជូនទ័ពធ្វើសង្រ្គាមឈ្លានពានអ៊ុយក្រែន។ កាលណោះ គ្មានអ្នកណាគិតដល់ថា ប្រមុខរដ្ឋាភិបាលអាល្លឺម៉ង់យល់ព្រមដាក់ទណ្ឌកម្ម រុស្ស៊ី ព្រោះរុស្ស៊ីជាប្រទេសផ្គត់ផ្គង់ថាមពលប្រេង និងឧស្ម័នដ៏សំខាន់របស់អាល្លឺម៉ង់។ ប្រធានាធិបតីអាមេរិក លោកចូ បៃដិនធ្លាប់តវ៉ាជំហររារែករបស់ប្រមុខរដ្ឋាភិបាលអាល្លឺម៉ង់ នៅចំពោះមុខសង្រ្គាមឈ្លានពានរុស្ស៊ី នៅអ៊ុយក្រែន។
ប៉ុន្តែ នៅមួយឆ្នាំមកនេះ ជំហររបស់ប្រមុខរដ្ឋាភិបាលអាល្លឺម៉ង់បានផ្លាស់ប្តូរច្រើនណាស់។ អាល្លឺម៉ង់ មិនត្រឹមប្រកាសឈប់ទិញប្រេងរុស្ស៊ីតែប៉ុណ្ណោះទេ។ អាល្លឺម៉ង់នៅបានបញ្ជូនជំនយយោធាទៅឲ្យអ៊ុយក្រែន។ លោកនាយករដ្ឋមន្រ្តីអាល្លឺម៉ង់ អូឡាហ្វ ស្ហុល៍ទៅជួបលោកប្រធានាធិបតីអាមេរិកលើកនេះ ដើម្បីបង្ហាញថា អាល្លឺម៉ង់កំពុងដើរលើខ្សែផ្លូវតែមួយជាមួយ អាមេរិក។ ម្យ៉ាងក៏ដើម្បីបង្ហាញថា សម្ព័ន្ធភាពរវាងប្រទេសទាំងពីរ គ្មានរង្គោះរង្គើទេ បើទោះជាប្រទេសទាំងពីរធ្លាប់ មិនចុះសម្រុងគ្នាម្តង នៅក្នុងរឿងបញ្ជូន រថក្រោះទៅឲ្យអ៊ុយក្រែន។ យើងដឹងហើយថា អាល្លឺម៉ង់រារែកមិនចង់បញ្ជូនរថក្រោះ ដ៏ទំនើប របស់ខ្លួន Leopard 2 ទៅមានមុខនៅក្នុងសមរភូមិសង្រ្គាមអ៊ុយក្រែន ដោយសារមិនចង់ឲ្យរុស្ស៊ីរករឿងអាល្លឺម៉ង់។ កាលណោះមានការចុះផ្សាយថា អាល្លឺម៉ង់ បានទាមទារឲ្យអាមេរិកយល់ព្រមបញ្ជូនរថក្រោះដ៏ទំនើបរបស់អាមេរិកទៅឲ្យអ៊ុយក្រែនដែរ ទើបអាល្លឺម៉ង់សុខចិត្តបញ្ជូនរថក្រោះ Leopard 2ទៅអ៊ុយក្រែន។ នៅទីបំផុត អាមេរិកយល់ព្រមតាម គឺបញ្ជូនរថក្រោះ អាមេរិក ទៅអ៊ុយក្រែន ចំណែកអាល្លឺម៉ង់បើកភ្លើងខៀវ ឲ្យគេផ្តល់រថក្រោះLeopard 2ទៅអ៊ុយក្រែន។
ក្រៅតែពីបង្ហាញថា អាល្លឺម៉ង់ ត្រៀមខ្លួនជាមួយអាមេរិក ដើម្បីជួយអ៊ុយក្រែន ជំនួបទល់មុខ មួយទល់មួយ រវាងមេដឹកនាំអាមេរិក និងអាល្លឺម៉ង់ នៅសេតវិមាននៅថ្ងៃនេះ មានគោលដៅផងដែរផ្ញើសារទៅចិន និងរុស្ស៊ីថា ប្រទេសមហាអំនាចទាំងពីរចុះសម្រុងគ្នា និងមានជំហររួមគ្នា ព្រមានចិន កុំឲ្យផ្តល់អាវុធទៅឲ្យរុស្ស៊ី។
នាយករដ្ឋមន្រ្តីអាល្លឺម៉ង់ប្រាប់ចិនកុំឲ្យផ្តល់អាវុធទៅឲ្យរុស្ស៊ី ប្រទេសឈ្លានពាន
នៅក្នុងបទអន្តរាគមន៍ នៅសភាអាល្លឺម៉ង់ កាលពីថ្ងៃព្រហស្បតិ៍ ប្រមុខរដ្ឋាភិបាលអាល្លឺម៉ង់ ពិតជាបាននិយាយថា សាររបស់លោកទៅកាន់ប្រទេសចិន គឺច្បាស់ណាស់។ ចិនត្រូវប្រើឥទ្ធិពលរបស់ខ្លួនទៅលើរុស្ស៊ី ដើម្បីដាក់សម្ពាធឲ្យរុស្ស៊ីដកទ័ពចេញពីអ៊ុយក្រែន។ ចិនមិនត្រូវផ្តល់អាវុធទៅឲ្យរុស្ស៊ី ដែលជាប្រទេសឈ្លានពាននោះទេ។
តើចិនយល់ព្រមស្តាប់ធ្វើតាមការអំពាវនាវរបស់មេដឹកនាំអាល្លឺម៉ង់ដែរឬទេ។ គ្មានអ្នកណាដឹងទេ ប៉ុន្តែ ជាផ្លូវការ ប៉េកាំងបានបដិសេធរួចហើយថា ខ្លួនមិនបានផ្តល់អាវុធទៅរុស្ស៊ី នោះទេ។ ភ្នាក់ងារចារកម្មអាមេរិកនៅសប្តាហ៍នេះនិយាយថា ចិនកំពុងពិចារណាផ្តល់អាវុធទៅឲ្យរុស្ស៊ី ប៉ុន្តែ ការពិភាក្សាកំពុងស្ថិតនៅលើតុនៅឡើយ ពោលគឺនៅមិនទាន់ចេញរូបរាងជាផ្លូវការនៅឡើយទេ។
សម្រាប់នាយករដ្ឋមន្រ្តីអាល្លឺម៉ង់ លោកមិនគិតថា ចិនផ្តល់អាវុធទៅឲ្យរុស្ស៊ីនោះទេ បើសិនចិនអនុវត្តតាមសំដីដែលខ្លួនធ្លាប់ប្រកាន់រហូតមក ពោល គឺមិនចូលក្នុងកិច្ចការផ្ទៃក្នុងរបស់ប្រទេសដទៃ។ ប៉ុន្តែ ចង់ ឬមិនចង់ នាយករដ្ឋមន្រ្តីអាល្លឺម៉ង់ត្រូវតែប្រុងប្រៀបផែនការបម្រុង ក្នុងករណីដែលចិន ផ្តល់អាវុធ ទៅឲ្យរុស្ស៊ី ហើយចិនត្រូវជាប់ទណ្ឌកម្មរបស់អាមេរិកនោះ។ អាល្លឺម៉ង់ទំនងចង់ពិភាក្សាជាមួយអាមេរិកជាមុន ព្រោះថា ចិននេះជាដៃគូសេដ្ឋកិច្ចសំខាន់ណាស់របស់អាល្លឺម៉ង់។ បើសិនចិនជាប់ទណ្ឌកម្មមែន នោះទំនាក់ទំនងសេដ្ឋកិច្ចចិន អាល្លឺម៉ង់ក៏អាចរងប៉ះពាល់ ដែលនឹងអាចធ្វើឲ្យអាល្លឺម៉ង់ខាតបង់ធ្ងន់ធ្ងរ។
អនាគតរបស់អង្គការអូតង់
ទស្សនកិច្ចរបស់នាយករដ្ឋមន្ត្រីអាល្លឺម៉ង់នៅអាមេរិកធ្វើឡើង នៅមុនជំនួបកំពូលរបស់អូតង់ ដែលត្រូវរៀបចំនៅខែកក្កដា នៅទីក្រុង Vilnius ប្រទេសលីទុយអានី។ រដ្ឋបាលលោកចូ បៃដិន ត្រូវប្រកាសពីការពង្រាយទ័ព និងសព្វាវុធ អាមេរិកក្នុងទឹកដីអឺរ៉ុប។ ដោយសារសង្រ្គាមរុស្ស៊ី ឈ្លានពានអ៊ុយក្រែន ចំនួនទ័ពអាមេរិក នៅទឹកដីអឺរ៉ុបបានកើនឡើងដល់ ១សែននាក់។
ដោយបង្កើនវត្តមានទ័ពរបស់ខ្លួននៅទឹកដីអឺរ៉ុប អាមេរិកនៅតែទាមទារឲ្យប្រទេសនៅអឺរ៉ុបដែលជាសមាជិករបស់អូតង់គោរពការសន្យារបស់ខ្លួន គឺបង្កើនការចំណាយយោធា ឲ្យដល់ ២%នៃផលិតផលក្នុងស្រុកសរុបរបស់ខ្លួន។ អាល្លឺម៉ង់រងផ្ទាំងស៊ីបរិះគន់ខ្លាំងជាងគេ ព្រោះវិភាគទានរបស់អាល្លឺម៉ង់ ក្នុងអូតង់តិចតួច បើប្រៀបធៀបនឹងប្រទេសសមាជិកអូតង់ដទៃទៀត។
ប៉ុន្តែ សង្រ្គាមរុស្ស៊ីឈ្លានពានអ៊ុយក្រែន បានធ្វើឲ្យអាល្លឺម៉ង់ប្តូរទស្សនវិស័យរបស់ខ្លួន ដែលធ្លាប់តែពឹងផ្អែកលើសន្តិភាពនិយម និងលទ្ធិប្រជាធិបតេយ្យ។ នៅ ខែកក្កដា ឆ្នាំ ២០២២ នៅតែប៉ុន្មានថ្ងៃ ក្រោយ រុស្ស៊ី បើកធ្វើសង្រ្គាមឈ្លានពានអ៊ុយក្រែន រដ្ឋាភិបាលអាល្លឺម៉ង់ ដែលខ្លាចសង្រ្គាមរាលដាលនៅអឺរ៉ុប និងចូលដល់ទឹកអាល្លឺម៉ង់ បានប្រកាសបង្កើនកញ្ចប់ថវិកាយោធា ១០០ពាន់លានអឺរ៉ូ ដ៏ច្រើនមហាសាល មិនធ្លាប់មានក្នុងប្រវត្តិអាល្លឺម៉ង់ នៅក្រោយសង្រ្គាមលោកលើកទី២។
នៅក្នុងបទអន្តរាគមន៍នៅសភាអាល្លឺម៉ង់ ដែលធ្វើឡើងនៅមួយថ្ងៃមុនចេញដំណើរទៅអាមេរិក លោកនាយករដ្ឋមន្រ្តីអាល្លឺម៉ង់ បានសន្យាជំរុញឧស្សាហកម្មផលិតអាវុធ ក្នុងទឹកដីអាល្លឺម៉ង់។ នៅប៉ុន្មានសប្តាហ៍មុន ប្រមុខអង្គការអូតង់បានព្រមានថា សង្រ្គាមអ៊ុយក្រែន ដែលអាចអូសបន្លាយពេល ប្រើប្រាស់សព្វាវុធច្រើនជាង សព្វាវុធដែលប្រទេសសមាជិកអូតង់កំពុងមាន។ អគ្គលេខាធិការអង្គការអូតង់ធ្លាប់បានទាមទារឲ្យសមាជិកអូតង់បង្កើនការផលិតអាវុធសម្រាប់អ៊ុយក្រែនផង និងសម្រាប់ស្តុកទុក ការពារខ្លួនឯងផង។
នៅសេតវិមាន ក្រៅពីនិយាយពីការផ្តល់អាវុធ ទៅឲ្យអ៊ុយក្រែន លោកនាយករដ្ឋមន្រ្តីអាល្លឺម៉ង់ ដែលមានជំហរប្រយ័ត្នប្រយែង មិនឲ្យមានសង្រ្គាមរ៉ាំរ៉ៃ ក្នុងទឹកដីអឺរ៉ុប ចង់និយាយបញ្ជាក់ជាមួយភាគីអាមេរិក ដើម្បី រកដំណោះស្រាយ សម្រាប់ថ្ងៃមុខ ពោល គឺគេមិនអាចចេះតែផ្តល់អាវុធ ចិញ្ចឹមសង្រ្គាមអ៊ុយក្រែននោះទេ ប៉ុន្តែ គេត្រូវរកច្រកចេញឲ្យវិបត្តិសង្រ្គាមលើកនេះ ដែលអាចជាការចរចាសន្តិភាពជាដើម។ ប៉ុន្តែ នៅក្នុងបទអន្តរាគមន៍នៅសភាថ្ងៃម្សិលមិញ នាយករដ្ឋមន្រ្តីអាល្លឺម៉ង់ និយាយថា គេនៅមិនទាន់ឃើញមានសញ្ញាដែលថា លោកប្រធានាធិបតីរុស្ស៊ី ចង់ បញ្ឈប់សង្រ្គាមនៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ