អ៊ុយក្រែន៖អាមេរិកច្រានចោលសំណើរបស់រុស្ស៊ី និងដាក់សំណើផ្សេងឲ្យរុស្ស៊ីពិចារណា
ចុះផ្សាយនៅថ្ងៃ៖
ស្តាប់ - ០៦:៤២
វិបត្តិអ៊ុយក្រែនកំពុងបន្តជាសំណុំរឿងប្រទាញប្រទង់ខ្លាំងរវាងក្រុមបស្ចិមប្រទេស និងរុស្ស៊ី។ ខណៈដែលកិច្ចប្រជុំទម្រង់ណរម៉ង់ឌីក្នុងក្រុងប៉ារីស ប្រទេសបារាំងនាថ្ងៃពុធ ទី២៦ មករាទទួលបានលទ្ធផលស្តួចស្តើង អាមេរិកបានឆ្លើយតបជាលាយលក្ខណ៍អក្សរទៅកាន់រុស្ស៊ីដោយបដិសេធលើការទាមទាររបស់រុស្ស៊ី។ តែទន្ទឹមគ្នានេះ អាមេរិកក៏បានដាក់សំណើផ្សេងឲ្យរុស្ស៊ីពិចារណា។ គួររម្លឹកថា ក្តីបារម្ភរបស់ក្រុមបស្ចិមលោក ពិសេសអាមេរិក គឺការចូលឈ្លានពានអ៊ុយក្រែនពីសំណាក់រុស្ស៊ី។
កិច្ចប្រជុំទម្រង់ណរម៉ង់ឌីជាទម្រង់នៃកិច្ចចរចា ៤ភាគីចូលរួមដោយប្រទេសបារាំង អាល្លឺម៉ង់ រុស្ស៊ី និងអ៊ុយក្រែន។ កិច្ចប្រជុំទម្រង់ណរម៉ង់ឌីនេះបានផ្តើមដំបូងក្នុងឆ្នាំ ២០១៥ និងមានកម្មវត្ថុដោះស្រាយជម្លោះនៅក្នុងតំបន់ដុនបាស់ស្ថិតប៉ែកខាងកើតប្រទេសអ៊ុយក្រែន។ ជម្លោះនៅតំបន់ដុនបាស់នេះ ជាជម្លោះប្រដាប់អាវុធរវាងអ៊ុយក្រែន និងក្រុមអ្នកទាមទារផ្តាច់ទឹកដីនិយមដែលគាំទ្ររុស្ស៊ី។ ពិតណាស់ កម្មវត្ថុនៃកិច្ចប្រជុំទម្រង់ណរម៉ង់ឌី គឺដើម្បីស្វែងរកសន្តិភាពឲ្យតំបន់ដុនបាស់។ តែរហូតមកដល់សព្វថ្ងៃ ជម្លោះមួយនេះនៅមិនទាន់បានដោះស្រាយ និងកំពុងបន្តអូសបន្លាយ។
កិច្ចប្រជុំនៅថ្ងៃពុធ ទី២៦ មករារយៈពេលជាង ៨ម៉ោងក៏ហាក់មិនទទួលបានលទ្ធផលអ្វីជាដុំកំភួនដែរ។ ភាគីពាក់ព័ន្ធផ្ទាល់ គឺរុស្ស៊ី និងអ៊ុយក្រែនបានត្រឹមឲ្យតម្លៃ និងឯកភាពគ្នាលើការរក្សាបទឈប់បាញ់នៅក្នុងតំបន់ដុនបាស់។ ទោះជាយ៉ាងនេះក្តី បារាំង និងអាល្លឺម៉ង់ក្នុងនាមជាអន្តរការីបានសាទរដោយបញ្ជាក់ថា នេះជាសញ្ញាល្អដែលជួយកាត់បន្ថយភាពតានតឹង និងការប្រឈមមុខដាក់គ្នា។ វិមានប្រធានាធិបតីបារាំងបានយល់ឃើញថា នៅក្នុងបរិបទនៃការគំរាមចូលឈ្លានពានអ៊ុយក្រែនពីរុស្ស៊ីពេលនេះ ការទទួលបានលទ្ធផលកម្រិតនេះពិតជាប្រសើរណាស់។
តែអ្នកចរចារុស្ស៊ីបានព្យាយាមបញ្ជាក់ថា ស្ថានការណ៍នៅក្នុងតំបន់ដុនបាស់ និងស្ថានការណ៍តានតឹងនៅតាមព្រំដែនអ៊ុយក្រែន រុស្ស៊ីពេលនេះជាស្ថានការណ៍ពីរដាច់ដោយឡែកពីគ្នា។ យ៉ាងណាក៏ដោយ ភាគីក្នុងទម្រង់ណរម៉ង់ឌីបានសន្យាជួបគ្នាជាថ្មីនៅ ២សប្តាហ៍ខាងមុខក្នុងទីក្រុងប៊ែរឡាំង ប្រទេសអាល្លឺម៉ង់ដើម្បីបន្តការចរចាឲ្យកាន់តែស៊ីជម្រៅថែមទៀត។
អាមេរិករក្សាជំហរដដែលនៅក្នុងលិខិតផ្ញើឲ្យរុស្ស៊ី
នៅទីបំផុត អាមេរិកបានឆ្លើយតបជាលាយលក្ខណ៍អក្សរទៅកាន់រុស្ស៊ី។ ចម្លើយជាលាយលក្ខណ៍អក្សរដែលអាមេរិកសរសេរទៅកាន់រុស្ស៊ីពេលនេះជាទម្រង់ចម្លើយដែលរុស្ស៊ីបានទាមទារយ៉ាងទទូចពីក្រុមបស្ចិមប្រទេសតាំងពីពាក់កណ្តាលខែធ្នូ។ ឥឡូវរុស្ស៊ីទទួលបានដូចចិត្ត តែខកចិត្តខ្លាំងដែលចម្លើយនោះមិនមែនជាចម្លើយដែលខ្លួនបានរង់ចាំ ឬអាចថាជាដែលខ្លួនបានរង់ចាំ។ មាន ៣ចំណុចសំខាន់ដែលរុស្ស៊ីចង់បានចម្លើយជាលាយលក្ខណ៍អក្សរពីអាមេរិក និងអូតង់ ចំណុចទី១ មិនត្រូវទទួលអ៊ុយក្រែនជាសមាជិកថ្មីរបស់អូតង់ ចំណុចទី២ អូតង់ត្រូវដកទ័ព ព្រមទាំងគ្រឿងសព្វាវុធពីបណ្តាប្រទេសសមាជិកអូតង់នៅអឺរ៉ុបខាងលិចដែលមានព្រំដែនជាប់រុស្ស៊ី និងចំណុចទី៣ សន្តិសុខរបស់រុស្ស៊ីត្រូវតែទទួលបានការធានា។
អាមេរិកបានផ្តល់ចម្លើយជាលាយលក្ខណ៍អក្សរចំនួនពីរច្បាប់ផ្សេងគ្នាទៅឲ្យរុស្ស៊ី ចម្លើយទី១ អាមេរិកបានបញ្ជាក់ជាថ្មីនូវការប្តេជ្ញាចិត្តរបស់ខ្លួនដើម្បីរក្សា និងការពារអធិបតេយ្យភាព និងបូរណភាពទឹកដីអ៊ុយក្រែន រួមទាំងសិទ្ធិរបស់រដ្ឋនីមួយៗនៅក្នុងជម្រើសសម្ព័ន្ធភាព និងការការពាររបស់ពួកគេ។ អាមេរិកបញ្ជាក់ច្បាស់ៗពីគោលការណ៍ទ្វារបើកចំហរបស់អូតង់ មានន័យថា គ្មានការសន្យាជាផ្លូវការមិនឲ្យអ៊ុយក្រែនចូលអូតង់ទេ។ បន្ទាប់មក អាមេរិករម្លឹកជាថ្មីពីការវាយបករបស់ក្រុមបស្ចិមប្រទេស បើរុស្ស៊ីហ៊ានចូលឈ្លានពានអ៊ុយក្រែន។
ក្រៅពីសំបុត្រទី១ ដែលច្រាលចោលសំណើរបស់រុស្ស៊ី អាមេរិក និងអូតង់ក៏បានដាក់សំណើឲ្យរុស្ស៊ីវិញ ក្នុងនោះ អាមេរិកស្នើឲ្យជំរុញការចរចាផ្លូវការស្តីពីការគ្រប់គ្រងគ្រឿងសព្វាវុធ និងការជជែកគ្នាត្រង់ទៅ ត្រង់មកដោយតម្លាភាពស្តីពីស្ថានភាពយោធា និងលំហាត់យោធានៅអឺរ៉ុប។
ប្រធានាធិបតីរុស្ស៊ីលោកពូទីននឹងផ្តល់ចម្លើយលើចម្លើយរបស់អាមេរិក
នៅថ្ងៃព្រហស្បតិ៍ ទី២៧ មករា រុស្ស៊ីបានបញ្ចេញប្រតិកម្មតបនឹងចម្លើយរបស់អាមេរិក។ តែជាប្រតិកម្មមួយដែលមានលក្ខណៈការទូត។ វិមានប្រធានាធិបតីរុស្ស៊ីបានថ្លែងថា ទ្វារនៃការបន្តកិច្ចសន្ទនាជាមួយអាមេរិកមិនទាន់បានបិទទាំងស្រុងទេ។ តែបានកត់សម្គាល់ឃើញថា សំណើរបស់រុស្ស៊ី ពិសេសទាក់ទងនឹងការធានាសន្តិសុខចំពោះរុស្ស៊ីមិនត្រូវបានអាមេរិកយកទៅពិចារណាដិតដល់ឡើយ។ លោកឌីមីទ្រី ប៉េស្កូវ អ្នកនំាពាក្យវិមានប្រធានាធិបតីរុស្ស៊ីបានគូសបញ្ជាក់ពីផលប្រយោជន៍ដែលរុស្ស៊ី និងអាមេរិកត្រូវបន្តកិច្ចសន្ទនារវាងគ្នា។
តែលោកប៉េស្កូវបានឆ្លៀតបន្ថែមថា ចម្លើយរបស់អាមេរិក និងអូតង់ចំពោះរុស្ស៊ីពេលនេះហាក់មិនសូវមានសុទិដ្ឋិនិយមប៉ុន្មានទេ។ ចំណែកប្រមុខការទូតរុស្ស៊ីបានថ្លែងថា ប្រធានាធិបតីរុស្ស៊ីលោកពូទីននឹងផ្តល់ចម្លើយនាពេលខាងមុខលើចម្លើយជាលាយលក្ខណ៍អក្សររបស់អាមេរិក និងអូតង់។ តើជាចម្លើយធម៌ក្តៅ ឬធម៌ត្រជាក់ដែលលោកពូទីនត្រៀមនឹងឆ្លើយបកវិញ។ គ្មានអ្នកណាអាចដឹងក្រៅពីលោកពូទីនខ្លួនឯងទេ។ ទោះជាយ៉ាងនេះក្តី ក្រុមបស្ចិមប្រទេសហាក់បានត្រៀមខ្លួនតបនឹងគ្រប់ចម្លើយពីរុស្ស៊ី។ ប្រមុខអង្គការអូតង់បានបញ្ជាក់ពីការបោះដៃរករុស្ស៊ី តែក៏បានត្រៀមខ្លួននឹងត តាំងទល់រុស្ស៊ីដែរ។ ឃើញថា វិបត្តិអ៊ុយក្រែនហាក់មិនទាន់បានត្រៀមខ្លួនដើម្បីបិទបញ្ចប់នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ