តើអ្វីទៅជាជំហររបស់ចិនក្នុងសំណុំរឿងរុស្ស៊ី-អ៊ុយក្រែន?
ចុះផ្សាយនៅថ្ងៃ៖
ស្តាប់ - ០៤:៣៨
បញ្ហាអ៊ុយក្រែនកំពុងតែបង្កឲ្យមានការប្រឈមមុខដាក់គ្នាយ៉ាងតានតឹង រវាងម្ខាងរុស្ស៊ី និងម្ខាងទៀតសហរដ្ឋអាមេរិក និងប្រទេសសម្ព័ន្ធមិត្តអឺរ៉ុប។ ចុះចិនវិញ ដែលជាប្រទេសមានទំនោរទៅខាងរុស្ស៊ី តើមានជំហរយ៉ាងណានៅក្នុងវិបត្តិអ៊ុយក្រែននេះ?
យើងដឹងថា ចិន និងរុស្ស៊ី មានគូប្រជែងរួមគ្នា គឺសហរដ្ឋអាមេរិក ហើយយើងក៏អាចសង្កេតឃើញដែរថា នៅក្នុងរយៈពេលប៉ុន្មានឆ្នាំចុងក្រោយនេះ នៅពេលប្រទេសទាំងពីរមានការប្រឈមមុខដាក់គ្នាខ្លាំងជាមួយអាមេរិក គឺរុស្ស៊ីក្នុងសំណុំរឿងអ៊ុយក្រែន ចំណែកចិន ក្នុងសំណុំរឿងសិទ្ធិមនុស្ស សមុទ្រចិនខាងត្បូង និងតៃវ៉ាន់ ទំនាក់ទំនង រវាងចិន និងរុស្ស៊ីក៏កាន់តែខិតទៅជិតស្និទ្ធនឹងគ្នាទៅតាមនោះផងដែរ។
ដូច្នេះ វាគួរតែជារឿងឡូស៊ិច ដែលចិនគាំទ្ររុស្ស៊ី នៅក្នុងការប្រឈមមុខដាក់គ្នា ជាមួយ អាមេរិក នៅក្នុងសំណុំរឿងអ៊ុយក្រែន នៅក្នុងពេលបច្ចុប្បន្ននេះ។
ជាក់ស្តែង នៅក្នុងជំនួបតាមវីដេអូ រវាងលោកវ៉្លាឌីមៀរ ពូទីន និងលោកស៊ី ជីនពីង កាលពីថ្ងៃទី១៥ ខែធ្នូកន្លងទៅ លោកប្រធានាធិបតីរុស្ស៊ីបានបញ្ជាក់នូវជំហរប្រឆាំងនឹងការលូកដៃពីខាងក្រៅចូលជ្រៀតជ្រែកកិច្ចការផ្ទៃក្នុង ទាំងកិច្ចការផ្ទៃក្នុងរបស់រុស្ស៊ី និងកិច្ចការផ្ទៃក្នុងរបស់ចិន។ ចំណែកលោកប្រធានាធិបតីចិនវិញ បង្ហាញពីជំហរចង់ឲ្យចិន និងរុស្ស៊ី បង្កើនកិច្ចសហប្រតិបត្តិការ ហើយធ្វើសកម្មភាពរួមគ្នា ដើម្បីការពារផលប្រយោជន៍រួម និងដើម្បីពង្រឹងតួនាទីរបស់ប្រទេសទាំងពីរជាមហាអំណាច នៅក្នុងការចាត់ចែងកិច្ចការអន្តរជាតិ។
បន្ថែមពីលើនេះទៅទៀត នៅក្នុងបទវិចារណកថា ចុះផ្សាយកាលពីថ្ងៃអង្គារកន្លងទៅនេះ កាសែត China Daily ដែលជាកាសែតផ្លូវការរបស់គណបក្សកុម្មុយនិស្តចិន ហើយដែលជាទូទៅ តែងតែឆ្លុះបញ្ចាំងពីជំហររបស់រដ្ឋាភិបាលក្រុងប៉េកាំង ក៏បានបង្ហាញផងដែរនូវការគាំទ្រចំពោះរុស្ស៊ី ក្នុងការទាមទារកិច្ចធានាខាងផ្នែកសន្តិសុខពីសំណាក់អាមេរិក និងអូតង់ ដោយនៅក្នុងនោះ China Daily បានស្តីបន្ទោសបក្សសម្ព័ន្ធអូតង់ថា ជាដើមហេតុដែលនាំឲ្យមានការប្រឈមមុខដាក់គ្នាបច្ចុប្បន្ន តាមរយៈការបន្តពង្រីកឥតឈប់នូវសមាជិកភាពរបស់ខ្លួន ទៅកាន់អឺរ៉ុបខាងកើត ដែលគួរតែទុកជាតំបន់ទ្រនាប់ រវាងអូតង់ និងរុស្ស៊ី។
ក្រៅពីចង់គាំទ្ររុស្ស៊ី ដើម្បីបានជាគ្នាជាមិត្ត រួមកម្លាំងទប់ទល់ជាមួយអាមេរិក ចិនប្រហែលជាសំឡឹងឃើញផលប្រយោជន៍សំខាន់មួយទៀត នៅក្នុងវិបត្តិអ៊ុយក្រែនពេលនេះ គឺបញ្ហាតៃវ៉ាន់។
គេនៅចាំបានថា កាលពីឆ្នាំ២០១៩កន្លងទៅ នៅក្នុងរបាយការណ៍ផ្ញើជូនទៅសភា ការិយាល័យសន្តិសុខជាតិតៃវ៉ាន់ធ្លាប់បានវាយតម្លៃថា គណបក្សកុម្មុយនិស្តចិនចង់ចម្លងតាក់ទិកដែលរុស្ស៊ីប្រើ ដើម្បីកាត់យកតំបន់គ្រីមេពីអ៊ុយក្រែន កាលពីឆ្នាំ២០១៤ ដើម្បីទៅប្រើចំពោះតៃវ៉ាន់។
ដូច្នេះ ដំណើរវិវឌ្ឍនៃវិបត្តិអ៊ុយក្រែនបច្ចុប្បន្ន (អ្វីដែលរុស្ស៊ីធ្វើចំពោះអ៊ុយក្រែន លទ្ធផលដែលរុស្ស៊ីទទួលបាន និងជាពិសេស ប្រតិកម្មរបស់អាមេរិក និងសម្ព័ន្ធមិត្ត) អាចនឹងជាតម្រុយសំខាន់មួយ ឲ្យចិនប្រមើលមើល ពីអ្វីដែលចិនគួរធ្វើ និងអាចធ្វើបានចំពោះតៃវ៉ាន់។ ប្រសិនបើនៅទីបំផុតទៅ រុស្ស៊ីអាចគ្រប់គ្រងអ៊ុយក្រែនបាន ដោយគ្មានការរារាំងពីសំណាក់អាមេរិក និងសម្ព័ន្ធមិត្ត នេះអាចនឹងក្លាយជាគន្លងផ្លូវមួយ ដែលចិនអាចយកទៅអនុវត្ត ដើម្បីចូលកាន់កាប់តៃវ៉ាន់។
ទោះជាយ៉ាងណា ការប្រឈមមុខដាក់គ្នា រវាងរុស្ស៊ី និងប្រទេសលោកខាងលិចនៅពេលនេះ ក៏មិនមែនថាមិនមានហានិភ័យចំពោះចិននោះដែរ ហើយនេះអាចជាកត្តាចម្បងមួយ ដែលធ្វើឲ្យចិនប្រយ័ត្នប្រយែងក្នុងការបង្ហាញជំហរផ្លូវការ និងជាសាធារណៈ ដើម្បីចៀសវាងកុំឲ្យត្រូវគេទាញឲ្យចូលទៅជាប់ផុងខ្លួននៅក្នុងជម្លោះ ហើយនាំទៅរកផ្លូវដែលផ្ទុយពីផលប្រយោជន៍របស់ចិនខ្លួនឯង។
គេមិនត្រូវភ្លេចទេថា ថ្វីដ្បិតតែអាមេរិកគឺជាគូប្រជែងចម្បងរបស់ចិនខាងផ្នែកភូមិសាស្រ្តនយោបាយ ក៏ប៉ុន្តែ ខាងផ្នែកសេដ្ឋកិច្ច ពាណិជ្ជកម្ម និងបច្ចេកវិទ្យាវិញ ចិនមានផលប្រយោជន៍ជាមួយអាមេរិក ច្រើនជាងជាមួយរុស្ស៊ី។ បន្ថែមពីលើនេះទៅទៀត នៅក្នុងវិបត្តិអ៊ុយក្រែននេះមិនមែនមានជាប់ពាក់ព័ន្ធតែជាមួយអាមេរិកមួយនោះទេ ក៏ប៉ុន្តែ ក៏មានពាក់ព័ន្ធផងដែរជាមួយសហភាពអឺរ៉ុប ដែលសុទ្ធតែជាដៃគូពាណិជ្ជកម្មដ៏សំខាន់របស់ចិន គឺអាមេរិកជាដៃគូពាណិជ្ជកម្មលំដាប់ទីមួយ ហើយអឺរ៉ុបជាដៃគូពាណិជ្ជកម្មលំដាប់ទីពីរ។
ដូច្នេះ ប្រសិនបើរុស្ស៊ីចូលឈ្លានពានអ៊ុយក្រែន ហើយចិនជាប់ផុងខ្លួនជ្រៅក្នុងជម្លោះ ដោយមានជំហរជាក់ច្បាស់ថាឈរខាងរុស្ស៊ី ចិននឹងត្រូវប្រឈមជាមួយអាមេរិកផង និងជាមួយសហភាពអឺរ៉ុបផងក្នុងពេលតែមួយ។ ហើយនេះគឺជាហានិភ័យដ៏ធំមួយសម្រាប់ចិន ហានិភ័យនៃការប្រឈមមុខដោយផ្ទាល់ជាមួយអាមេរិក និងអឺរ៉ុប ក៏ដូចជាហានិភ័យនៃផលប៉ះពាល់ដោយប្រយោលខាងផ្នែកសេដ្ឋកិច្ច បង្កឡើងដោយជម្លោះប្រដាប់អាវុធ ការដាក់ទណ្ឌកម្មពីសំណាក់អាមេរិកនិងអឺរ៉ុប និងអស្ថិរភាពនៃការផ្គត់ផ្គង់ក្នុងវិស័យថាមពល ដែលជាកម្លាំងចលករដ៏សំខាន់ សម្រាប់កំណើនសេដ្ឋកិច្ចរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ