កូវីដ១៩៖ WHO សន្យាធ្វើអ្វីៗគ្រប់យ៉ាងដែលអាចធ្វើបានដើម្បីបិទបញ្ចប់កូវីដ១៩ ក្នុងឆ្នាំ ២០២២
ចុះផ្សាយនៅថ្ងៃ៖
ស្តាប់ - ០៧:១៨
នៅថ្ងៃចន្ទ ទី២០ ធ្នូ លោកទេដ្រូស ប្រមុខអង្គការសុខភាពពិភពលោក WHO បានថ្លែងនាឱកាសសន្និសីទកាសែតក្នុងទីក្រុងហ្សឺណែវ ប្រទេសស៊្វីសថា WHO នឹងធ្វើអ្វីៗគ្រប់យ៉ាងទាំងអស់ដែលអាចធ្វើទៅបានដើម្បីបិទបញ្ចប់ជំងឺឆ្លងរាតត្បាតដោយកូវីដ១៩ នៅឆ្នាំ ២០២២។ ទន្ទឹមគ្នានេះ លោកទេដ្រូសបានអំពាវនាវឲ្យគ្រប់គ្នាមានការប្រយ័ត្នប្រយែងនៅក្នុងពិធីអបអរថ្ងៃបុណ្យណូអែល និងថ្ងៃចូលឆ្នាំសកលនាពេលខាងមុខ។ ការប្តេជ្ញា និងការអំពាវនាវរបស់លោកទេដ្រូសយ៉ាងដូចនេះបានធ្វើឡើង ក្នុងពេលដែលពិភពលោកកំពុងបន្តគំរាមកំហែងដោយមេរោគបំប្លែងខ្លួនអូមីក្រុង។
នៅក្នុងសន្និសីទកាសែត លោកទេដ្រូសបានអំពាវនាវឲ្យគ្រប់គ្នាមានការប្រយ័ត្នប្រយែង និងគិតមើលម្តងហើយម្តងទៀតពីការត្រៀមរៀបចំពិធីជួបជុំគ្រួសារនៅក្នុងបុណ្យណូអែល និងថ្ងៃចូលឆ្នាំសកល។ តាមលោកទេដ្រូស ការជួបជុំគ្នាកាន់ច្រើនមានន័យស្មើនឹងចំនួនអ្នកឆ្លងកាន់តែច្រើន ចំនួនអ្នកឆ្លងកាន់តែច្រើននាំឲ្យមានអ្នកចូលមន្ទីរពេទ្យកាន់តែច្រើន ហើយអ្នកចូលមន្ទីរពេទ្យកាន់តែច្រើនអាចនាំឲ្យមានអ្នកស្លាប់កាន់តែច្រើន។ លោកទេដ្រូសយល់ថា ណូអែល និងឆ្នាំសកលពិតជារឿងសំខាន់ដែលម្នាក់ៗចង់ជួបជុំជាលក្ខណៈគ្រួសារ និងមិត្តភក្តិ។
តែលោកទេដ្រូសថា វាក៏មិនយឺតពេលដែរ បើគេលើកពេលជួបជុំទៅពេលក្រោយនោះ។ លោកទេដ្រូសបានផ្តល់អនុសាសន៍ថា គេគួរតែលុបចោលការជួបជុំឥឡូវ និងលើកពេលជួបជុំទៅពេលក្រោយជាជាងជួបជុំឥឡូវ និងយំសោកនៅពេលក្រោយ។ បន្ទាប់មក លោកទេដ្រូសបានទាមទារជាថ្មីឲ្យមានការទទួលបានវ៉ាក់សាំងស្មើភាព ពិសេសសម្រាប់ក្រុមប្រទេសក្រីក្រ។ តាមលោកទេដ្រូស បើគេចង់បិទបញ្ចប់កូវីដ១៩ នៅឆ្នាំ ២០២២ គេត្រូវបិទបញ្ចប់វិសមភាពវ៉ាក់សាំងដោយឲ្យការចាក់វ៉ាក់សាំងរបស់ប្រទេសនីមួយៗមានអត្រា ៧០% ពីពេលនេះទៅឆ្នាំ ២០២២។
ជាថ្មីម្តងទៀត លោកទេដ្រូសបានជំទាស់នឹងការចាក់វ៉ាក់សាំងដូសទី៣ ជាលក្ខណៈទូទៅ និងថា គេគួរតែចាក់ដូសទី៣ លើមនុស្សមានហានិភ័យ និងមានអាយុលើសពី ៦៥ឆ្នាំ។ អ្វីដែលលោកទេដ្រូសចង់បាន គឺចង់ឲ្យមានការយកវ៉ាក់សាំងដូសទី៣ ទៅឲ្យក្រុមប្រទេសដែលមានមនុស្សខ្លះនៅមិនទាន់បានចាក់ដូសទី១ ផង។
អូមីក្រុងគំរាមកំហែងពិភពលោកកាន់តែខ្លាំង?
ការប្តេជ្ញារបស់ WHO បានធ្វើឡើង ខណៈដែលពិភពលោកកំពុងបន្តគំរាមកំហែងដោយអូមីក្រុង។ ពីមួយថ្ងៃទៅមួយថ្ងៃ អូមីក្រុងដែលមានប្រភពចេញពីអាហ្រ្វិកខាងត្បូងកាលពីជិត ១ខែមុនកំពុងឆ្លងក្នុងល្បឿនលឿន និងឆ្លងខ្លាំងចូលប្រទេសកាន់តែច្រើន។ គួរបញ្ជាក់ថា អ្នកមានផ្ទុកអូមីក្រុងម្នាក់មានសមត្ថភាពឆ្លងទៅ ១០នាក់ ពោលច្រើនជាងដែលតាដែលអ្នកឆ្លងម្នាក់មានសមត្ថភាពឆ្លងទៅ ៦នាក់។ សព្វថ្ងៃនេះ អូមីក្រុងបានក្លាយ និងកំពុងក្លាយជាមេរោគបំប្លែងខ្លួនភាគច្រើននៅក្នុងប្រទេសមួយចំនួន ពិសេសនៅក្នុងប្រទេសអឺរ៉ុប។
នៅសហរដ្ឋអាមេរិក គ្រាន់តែក្នុងរយៈពេលមួយសប្តាហ៍ ករណីឆ្លងថ្មីដោយអូមីក្រុងបានកើនពី ១២,៦% ដល់ប្រមាណជា ៧៣%។ នេះជាសញ្ញាអាសន្នមួយដែលបានបង្ខំឲ្យប្រធានាធិបតីអាមេរិកលោកចូ បៃដិនថ្លែងក្នុងថ្ងៃអង្គារ ទី២១ ធ្នូនេះ។ គេនៅមិនទាន់ដឹងថា តើលោកបៃដិនគ្រោងចាត់វិធានការអ្វីខ្លះដើម្បីទប់នឹងអូមីក្រុងទេ។ តែបើតាមអ្នកនាំពាក្យសេតវិមាន លោកបៃដិនគ្មានគម្រោងបិទខ្ទប់ប្រទេសទេ តែនឹងផ្តល់អាទិភាពលើការចាក់វ៉ាក់សាំងដោយអំពាវនាវដល់អ្នកដែលមិនទាន់ចាក់ ឬអ្នកដែលមិនចង់ចាក់។
ក្រៅពីអាមេរិក មានប្រទេសអឺរ៉ុបខ្លះក៏បានបង្កើនយុទ្ធនាការចាក់វ៉ាក់សាំង និងខ្លះទៀតបានជ្រើសយកវិធានការចាស់ដៃដោយបិទខ្ទប់ប្រទេស ដូចយ៉ាងហូឡង់ជាដើម។ វាជារឿងល្អដែលមានប្រទេសជាច្រើនចាត់វិធានការទប់ស្កាត់ តែបើតាមមើលទៅ ដូចហាក់ដូចជាចង់យឺពេលបន្តិច។ អ្វីដែលច្បាស់ អូមីក្រុងឆ្លងលឿន និងឆ្លងខ្លាំង។ តែអ្វីដែលកំពុងបន្តស្រពិចស្រពិល អូមីក្រុងប្រហែលមិនគ្រោះថ្នាក់ខ្លាំងដូចដែលតា។ យ៉ាងណាក៏ដោយ ប្រធានក្រុមអ្នកវិទ្យាសាស្រ្តរបស់ WHO លោកស្រី Soumya Swaminathan បានយល់ឃើញថា វារហ័សពេកដែលគេសន្និដ្ឋានថា អូមីក្រុងកាច ឬស្លូត។
សេដ្ឋកិច្ចសកលឆ្នាំ ២០២២ អាប់អួរដោយអូមីក្រុង?
អូមីក្រុងកាច ឬស្លូតមិនទាន់ដឹងទេ តែអូមីក្រុងកំពុងធ្វើឲ្យសេដ្ឋកិច្ចសកលឆ្នាំ ២០២២ ស្ថិតក្នុងស្ថានភាពមិនច្បាស់លាស់ជាថ្មី។ ទីកន្លែងដែលបានរំជើបរំជួលខ្លាំងជាងគេ គឺផ្សារភាគហ៊ុន។ គ្រាន់តែបើកទ្វារភ្លាមក្នុងថ្ងៃចន្ទ ទី២០ ធ្នូ តម្លៃភាគហ៊ុននៅផ្សារភាគហ៊ុនក្រុងញូយ៉ក និងនៅអឺរ៉ុបបានដាំក្បាលចុះយ៉ាងគំហុក។ ចំណែកតម្លៃប្រេងលើទីផ្សារអន្តរជាតិបានធ្លាក់ចុះ ៥%។ នេះក៏ដោយសារតែភាពស្រពិចស្រពិលជុំវិញមេរោគបំប្លែងខ្លួនអូមីក្រុង និងវិធានការទប់ស្កាត់ចាស់ដៃរបស់ប្រទេសមួយចំនួនដែលអាចទាញទម្លាក់សេដ្ឋកិច្ចសកលជាថ្មីសម្រាប់ឆ្នាំ ២០២២។
បន្ទាប់មក មានការប្រកាសលើកពេលបើកវេទិកាសេដ្ឋកិច្ចពិភពលោកក្រុងដាវូស ប្រទេសស៊្វីសដែលគ្រោងរៀបចំនៅដំណាច់ខែមករា ឆ្នាំ ២០២២។ ការលើកពេលបើកវេទិកានេះប្រហែលមិនជះផលវិបាកអ្វីដល់សេដ្ឋកិច្ចសកលទេ តែវាគ្រប់គ្រាន់ដើម្បីបង្ហាញពីភាពប្រយ័ត្នប្រយែង និងការបារម្ភរបស់ក្រុមអ្នកជំនួញ។ នៅចិន ធនាគារកណ្តាលបានប្រកាសក្នុងថ្ងៃចន្ទ ទី២០ ធ្នូពីការទម្លាក់អត្រាការប្រាក់នាំមុខមួយរបស់ខ្លួន។ នេះជាលើកទី១ ក្នុងរយៈពេលជិត ២ឆ្នាំដែលរដ្ឋាភិបាលចិនបានចាត់វិធានការរបៀបនេះ។
កាយវិការរបស់ចិននេះក៏ ស បញ្ជាក់ឲ្យឃើញថា ចិនចង់បន្តគាំទ្រសកម្មភាពសេដ្ឋកិច្ចរបស់ខ្លួននៅក្នុងបរិបទសេដ្ឋកិច្ចសកលដែលកំពុងបន្តផុយស្រួយខ្លាំងដោយជំងឺកូវីដ១៩ ពិសេសអូមីក្រុង។ គួរបញ្ជាក់ថា ក្រោយពីមានសុទិដ្ឋនិយមឡើងវិញ និងបានស្គាល់ស្ថានភាពប្រសើរឡើងវិញបានបន្តិច សេដ្ឋកិច្ចសកលហាក់កំពុងធ្លាក់ក្នុងភាពអាប់អួរជាថ្មីដោយអូមីក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ