WHO/OMS បញ្ជាក់ជាថ្មី អំពីគ្រោះថ្នាក់ នៃកូវីដអូមីក្រុង ដែលឆ្លងរហ័ស និងអាចយកឈ្នះប្រព័ន្ធអង់ទីក័រ
គិតមកត្រឹមពេលនេះ កូវីដបំប្លែងខ្លួនថ្មី ឈ្មោះអូមីក្រុង បានមានវត្តមាននៅតាមប្រទេសជាង៦០ប្រទេសហើយ។ ក្រោយការប្រមូលទិន្នន័យបានកាន់តែច្រើន អង្គការសុខភាពពិភពលោក បានបញ្ជាក់សារជាថ្មីថា កូវីដអូមីក្រុងនេះ អាចជាគ្រោះដ៏ធំថ្នាក់មួយ ដែលមិនអាចប្រហែសបាន។ គ្រោះថ្នាក់ដែលបណ្តាលមកពី កម្លាំងឆ្លងរាលដាលយ៉ាងរហ័សនៃមេរោគនេះ ហើយវាថែមទាំងអាចយកឈ្នះ ប្រព័ន្ធអង់ទីក័ររបស់មនុស្ស ដែលបានចាក់វ៉ាក់សាំងហើយ ឬអ្នកដែលធ្លាប់ឆ្លងកូវីដរួចហើយ ថែមទៀតផង។
ចុះផ្សាយនៅថ្ងៃ៖
ស្តាប់ - ០២:២១
យោងតាមកំណត់ហេតុបច្ចេកទេស នៅថ្ងៃអាទិត្យ ទី១២ធ្នូ អង្គការសុខភាពពិភពលោកបានបញ្ជាក់អះអាងជាថ្មីម្តងទៀតថា កូវីដអូមីក្រុង ពិតជាអាចបង្កហានិភ័យកម្រិតខ្ពស់ ដោយផ្អែកតាមទិន្នន័យជាច្រើន ដែលគេប្រមូលបាន នៅអាហ្វ្រិកខាងត្បូង។ ទិន្នន័យទាំងនោះ បានបង្ហាញឲ្យឃើញ នូវករណី គេចផុតពីប្រព័ន្ធអង់ទីក័ររបស់មនុស្ស ព្រមទាំងកម្លាំងឆ្លងរាលដាលខ្ពស់ និងយ៉ាងរហ័ស របស់កូវីដអូមីក្រុង។ កត្តាទាំងនេះហើយ បានជានៅអាហ្វ្រិកខាងត្បូង ប៉ុន្មានខែមកនេះ មានការផ្ទុះឡើងខ្លាំង នូវករណីអ្នកធ្លាប់ឆ្លងកូវីដហើយ បានឆ្លងជាថ្មីម្តងទៀត។
អ្នកជំនាញអង្គការសុខភាពពិភពលោក បានសន្និដ្ឋាន ប្រព័ន្ធអង់ទីក័រ របស់មនុស្ស ដែលបានចាក់វ៉ាក់សាំងហើយ ឬអ្នកដែលធ្លាប់បានឆ្លងកូវីដហើយម្តង ប្រហែលជាអាចមានកម្លាំងខ្សោយ មិនអាចទប់ជាប់ ជាមួយនឹងកូវីដអូមីក្រុងបានទេ ក្នុងករណីមួយចំនួនធំ។ ប្រការនេះ មានន័យថា ជាមួយនឹងកូវីដអូមីក្រុង អាចនឹងធ្វើឲ្យមានករណី ឆ្លងជាថ្មីម្តងទៀតច្រើន។
តែយ៉ាងណាក៏ដោយ អ្នកជំនាញអះអាងថា យោងតាមតួលេខ នាពេលបច្ចុប្បន្ននេះ គឺកូវីដអូមីក្រុង បើទោះបីជាឆ្លងលឿនរហ័សមែន តែប្រហែលជាមិនគ្រោះថ្នាក់ ធ្វើឲ្យអ្នកជំងឺឈឺធ្ងន់ ត្រូវបញ្ជូនទៅសង្រ្គោះបន្ទាន់ ខ្លាំងនោះដែរ បើប្រៀបធៀបទៅកូវីដដែលតា។ តែទន្ទឹមនឹងអ្នកនេះ អ្នកជំនាញកំពុងព្យាយាមប្រមូលទិន្នន័យបន្ថែមទៀត ដើម្បីតាមដានចំណុចនេះ។ អង្គការសុខភាពពិភពលោក បានរំលឹកថា ទោះជាយ៉ាងនេះក្តី អាជ្ញាធរសុខាភិបាល ត្រូវតែបន្ថែមការប្រុងប្រយ័ត្ន ព្រោះចង់មិនចង់ ការឆ្លងរាលដាលដែលស្ទុះឡើងខ្លាំង ដោយសារកូវីដអូមីក្រុង គឺវានឹងជម្រុញឲ្យមានករណីអ្នកជំងឺឈឺធ្ងន់ និង អាចស្លាប់កាន់តែច្រើន ទៅតាមនោះដែរ។
យ៉ាងណាមិញ នៅអង់គ្លេស អាជ្ញាធរសុខាភិបាល បានទាញសញ្ញាអាសន្នថា កូវីដអូមីក្រុងកំពុងឆ្លងយ៉ាងលឿនរហ័ស ដូចផ្លេកបន្ទោល។ ករណីឆ្លងថ្មី ប្រមាណ៤០% នៅទីក្រុងឡុងដ៍ គឺសុទ្ធតែជាកូវីដអូមីក្រុង។ មានករណីស្លាប់មនុស្សម្នាក់ ជាលើកទីមួយផងដែរ នៅអង់គ្លេស ដោយសារកូវីដអូមីក្រុង កាលពីថ្ងៃចន្ទ ទី១៣ធ្នូ។ គួរកត់សំគាល់ដែរថា ដើម្បីទប់ស្កាត់ការឆ្លងរាលដាលកូវីដ មិនថាទម្រង់បំប្លែងខ្លួនចាស់ ឬថ្មី ប្រទេសនៅអឺរ៉ុបសឹងទាំងអស់ បានចាប់ផ្តើមបើកយុទ្ធនាការចាក់វ៉ាក់សាំង ដូសជំរុញ យ៉ាងទូលំទូលាយ បន្ទាប់ពីបានសង្កេតឃើញថា ប្រព័ន្ធអង់ទីក័របានចុះខ្សោយទៅវិញ ជាមួយនឹងពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ