តំណាងជាន់ខ្ពស់អាមេរិកនិងចិនជួបគ្នាក្នុងផ្ទៃនៃភាពតានតឹងខ្លាំង
ចុះផ្សាយនៅថ្ងៃ៖
ស្តាប់ - ០៦:០៣
នៅថ្ងៃពុធទី ៦ តុលា ២០២១នេះ ទីប្រឹក្សាសន្តិសុខជាតិរបស់សេតវិមាន លោក Jake Sullivan ជេក ស៊ូលីវ៉ាន់ និង លោក Yang Jiechi យ៉ាង ជៀឈី ប្រធានគណៈកម្មការកិច្ចការបរទេសនៃគណៈកម្មការមជ្ឈិមបក្សកុម្មុយនិស្តចិន ត្រូវជួបគ្នានៅស្វ៊ីស ក្នុងក្របខ័ណ្ឌនៃកិច្ចខិតខំប្រឹងប្រែងសម្របសម្រួលគ្នាតាមផ្លូវចរចា។ តែជំនួបនេះប្រព្រឹត្តទៅក្នុងខណៈដែលទំនាក់ទំនង រវាងប្រទេសទាំងពីរកំពុងស្ថិតក្នុងភាពតានតឹងខ្លាំង ហើយសំណុំរឿងតៃវ៉ាន់ក៏កំពុងតែឡើងក្តៅគគុកខ្លាំងទៀត។ រដ្ឋមន្រ្តីក្រសួងការពារជាតិតៃវ៉ាន់បានលើកឡើងថា ចិនអាចនឹងវាយលុកចូលឈ្លានពានតៃវ៉ាន់ នៅត្រឹមឆ្នាំ២០២៥ខាងមុខ។
គិតចាប់តាំងពីខែមីនា២០២១ ថ្ងៃសង្គ្រាមពាក្យសំដីរវាងប្រមុខការទូតនៃរដ្ឋបាលលោកដៃដិននិងប្រមុខការទូតចិន នៅរដ្ឋអាឡាស្កាមក នេះជាលើកទីមួយហើយដែលមន្ត្រីជាន់ខ្ពស់កំពូលអាមេរិកនិងចិនជួបពិភាក្សាគ្នាដោយផ្ទាល់មួយទល់នឹងមួយយ៉ាងដូច្នេះ។
បើតាមសេតវិមាន ជំនួបរវាងលោក ជេក ស៊ូលីវ៉ាន់ ទីប្រឹក្សាសន្តិសុខជាតិអាមេរិក និងប្រធានគណៈកម្មការកិច្ចការបរទេស នៃគណៈកម្មាធិការមជ្ឈិមបក្ស លោក យ៉ាង ជៀឈី ជាសកម្មភាពបន្តពីជំនួបតាមទូរស័ព្ទ ជាលើកទីមួយ រវាងលោកប្រធានាធិបតីអាមេរិក ចូ បៃដិន និងលោកប្រធានាធិបតីចិន ស៊ី ជីនពីង កាលពីថ្ងៃទី ៩ កញ្ញា ២០២១ ដែលវ៉ាស៊ីនតោនបានចេញសេចក្តីថ្លែងការណ៍ថាអាមេរិកនឹងបន្តស្វែងរកវិធីគ្រប់គ្រងការប្រកួតប្រជែងពាណិជ្ជកម្មចិន-អាមេរិក ប្រកបដោយទំនួលខុសត្រូវ។ ប្រមុខដឹកនាំទាំងពីរយល់ច្បាស់ថា ការប្រកួតប្រជែងគ្នា មិនត្រូវកា្លយជាជម្លោះទេ។
យោងតាមកាសែតហុងកុង South China Morning Post ជំនួបនៅក្រុងZurich ប្រទេសស្វ៊ីសនេះ មានកម្មវត្ថុចំបងមួយ គឺស្ថាបនាបណ្តាញទំនាក់ទំនងគ្នាឡើងវិញនិងអនុវត្តនូវអ្វីដែលប្រធានាធិបតីទាំងពីរ បានសម្របសម្រួលគ្នា។
ដូច្នេះមានន័យថា មានប្រធានបទរសើបៗច្រើនដែលកំពុងរង់ចាំមន្ត្រីទាំងពីរ តែប្រធានបទសំខាន់ជាងគេនោះ ប្រាកដជាសំណុំរឿងពាណិជ្ជកម្ម សិទ្ធិមនុស្ស និងសំណុំរឿងតៃវ៉ាន់ ...
លើកលែងការដំឡើងពន្ធទណ្ឌកម្មលើផលិតផលខ្លះ
តំណាងជាន់ខ្ពស់ផ្នែកពាណិជ្ជកម្មនៃមហាអំណាចទាំងពីរនឹងត្រូវជួបគ្នាក្នុងពេលឆាប់ៗ នេះបើតាមការអះអាងរបស់អាមេរិក ដែលទន្ទឹមគ្នានេះ បានបង្ហើបបង្ហាញអំពីយុទ្ធសាស្ត្រពាណិជ្ជកម្មរបស់ខ្លួន ដោយមានការអនុគ្រោះពន្ធនាំចូលសម្រាប់ផលិតផលមកពីចិនមួយចំនួនធំ។
ជាមួយនឹងសេចក្តីប្រកាសចង់ផ្តើមកិច្ចចរចាថ្មី នៅប៉ុន្មានថ្ងៃខាងមុខនេះ ជាមួយប៉េកាំង ដើម្បីពិនិត្យមើលការដាក់ឱ្យដំណើរកិច្ចព្រមព្រៀងពាណិជ្ជកម្ម លោកស្រី កាទ្រីន តៃ Katherine Tai អ្នកទទួលខុសត្រូវផ្នែកពាណិជ្ជកម្មអាមេរិក បានប្រកាសអំពីការលើកលែងពន្ធនាំចូលខ្លះ។ តែដំណើរការលើកលែងពន្ធនាំចូលផលិតផលមកពីចិន ជាច្រើនមុខ ធ្វើឡើងទៅតាមករណីជាក់ស្តែង លើផលិតផលមុខមួយណា ដែលអាមេរិកគ្មានជម្រើសផ្សេងក្រៅពីត្រូវតែនាំចូលមកពីចិនតែប៉ុណ្ណោះ។ ទង្វើនេះគឺដើម្បីជួយក្រុមហ៊ុនខ្នាតតូចនិងមធ្យមអាមេរិក ដែលកំពុងត្រដររស់ ប្រឈមនឹងផលវិបាកបង្កឡើងដោយការដំឡើងពន្ធលើផលិតផលខ្លះ ដោយត្រូវចំណាយបង់ពន្ធខ្ពស់ជាងមុន ព្រោះពុំអាចរកអ្វីមកជំនួសផលិតផលមកពីចិនបាន។
ចិនអាចវាយយកតៃវ៉ាន់ នៅឆ្នាំ២០២៥
នៅចំពោះមុខសំណុំរឿងតៃវ៉ាន់ ដែលស្រាប់តែស្ទុះឡើងតានតឹងខ្លាំង គួរឱ្យព្រួយបារម្ភមែនទែន លោកប្រធានាធិបតីអាមេរិក ចូ បៃដិន បានប្រកាស នៅយប់ថ្ងៃអង្គារទី ៥តុលា២០២១ ថា លោកនិងលោកប្រធានាធិបតីចិន ស៊ីជីនពីង បានព្រមព្រៀងគ្នា យ៉ាងច្បាស់លាស់ គោរព “កិច្ចព្រមព្រៀងតៃវ៉ាន់” ព្រោះគ្មានមធ្យោបាយឬដំណោះស្រាយអ្វី ផ្សេងល្អជាងការគោរពកិច្ចព្រមព្រៀងឡើយ។ កិច្ចព្រមព្រៀងតៃវ៉ាន់ ដែលលោកចូបៃដិនលើកឡើងនេះ ទំនងចង់សំដៅលើ ការទទួលស្គាល់ប៉េកាំងជាតំណាងផ្លូវការតែមួយរបស់ចិន ឯតៃវ៉ាន់ជាខេត្តមួយចិន។
សហរដ្ឋអាមេរិកក៏បានធានាប្រាប់តៃវ៉ាន់ភ្លាមដែរ ក្រោយប្រសាសន៍របស់លោក ចូបៃដិន ថាវ៉ាស៊ីនតោនមិនប្តូរផ្លាស់នយោបាយជាមួយតៃវ៉ាន់ទេ។ អាមេរិកបន្តការពារនិងផ្គត់ផ្គង់តៃប៉ិ ឱ្យមានមធ្យោបាយការពារខ្លួនជានិច្ច។
ប៉ុន្តែតែការធានាអះអាងនេះ មិនគ្រប់គ្រាន់នឹងធ្វើឱ្យតៃវ៉ាន់ស្ងប់ភ័យទេ។ កាលពីសប្តាហ៍មុន ប្រធានាធិបតីចិន លោក ស៊ី ជីនពីង បានចាត់ទុកស្ថានភាពតៃវ៉ាន់ថាដុនដាបអាក្រក់ខ្លាំង។ នៅថ្ងៃនេះ ក្រោយពីឃើញចិនបានបញ្ជូនយន្តហោះចម្បាំងជិត១៥០គ្រឿង ក្នុងរយៈពេលតែបួនថ្ងៃ ហោះចូលដែនអាកាសតៃវ៉ាន់ រដ្ឋមន្ត្រីក្រសួងការពារជាតិតៃវ៉ាន់ លោក Chui Kuo-Cheng បានប្រកាសថាស្ថានភាពយោធាតៃវ៉ាន់-ចិន បានឡើងតានតឹងខ្លាំងដល់កំពូល មិនធ្លាប់កើតមានទេ ក្នុងរយៈពេលបួនទស្សវត្សរ៍ចុងក្រោយមកនេះ។
នៅចំពោះមុខសភាតៃវ៉ាន់ លោករដ្ឋមន្ត្រីបានពញ្ញាក់អាសន្នថា បើតៃវ៉ាន់ធ្វេសប្រហែសបាត់ការប្រុងប្រយ័ត្នតែបន្តិច ឬគិតអីខុសតែបន្តិច វិបត្តិនៅច្រកសមុទ្ទតៃវ៉ាន់នឹងផ្ទុះឡើងភា្លម។ ប៉េកាំងអាចនឹងវាយលុកចូលឈ្លានពានក្រសោបយកតៃវាន់ នៅឆ្នាំ២០២៥។ សព្វថ្ងៃនេះ ចិនមានលទ្ធភាពនិងសមត្ថភាពវាយយកតៃវ៉ាន់បានហើយ តែបើតាមការគុណគិតលើកត្តាជាច្រើនផ្សេងទៀតទៅ ចិនត្រូវចំណាយនិងខាតបង់ច្រើន ទើបចិនមិនចង់ធ្វើភ្លាម។ ហើយចាប់ពីឆ្នាំ២០២៥ទៅ តម្លៃធ្វើសង្គ្រាមនិងការខាតបង់នឹងធ្លាក់ចុះមកទៅតិចបំផុត។ នេះបើតាមការបញ្ជាក់របស់លោករដ្ឋមន្ត្រីក្រសួងការពារជាតិតៃវ៉ាន់ដដែលដោយពុំបានផ្តល់ការលម្អិតអ្វីច្រើនជាងនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ