ចិនស្ថិតក្រោមសម្ពាធក្រោយសេណារីយ៉ូលេចធ្លាយកូវីដពីមន្ទីរពិសោធន៍នៅវូហានចាប់កក្រើកឡើងវិញ
ចុះផ្សាយនៅថ្ងៃ៖
ស្តាប់ - ០៧:២៨
ចិនកំពុងទទួលរងសម្ពាធខ្លាំង ក្រោយប្រធានអង្គការសុខភាពពិភពលោកបានគាស់រំលើងឡើងវិញនូវសេណារីយ៉ូដែលថាមេរោគកូរ៉ូណាវីរុសលេចធ្លាយចេញពីមន្ទីរពិសោធន៍នៅទីក្រុងវូហាន។ ចំណែកសហរដ្ឋអាមេរិក និងក្រុមប្រទេសជាសម្ព័ន្ធមិត្តវិញ បានរិះគន់ចិនថាលាក់បាំងមិនប្រគល់ទិន្នន័យគ្រប់គ្រាន់ដល់ក្រុមអ្នកស៊ើបអង្កេត។ ហេតុអ្វីបានជាសេណារីយ៉ូលេចធ្លាយកូវីដចេញពីមន្ទីរពិសោធន៍នៅក្រុងវូហានចាប់កក្រើកឡើងវិញ? តើអង្គការសុខភាពពិភពលោកបាននិយាយអ្វីខ្លះទាក់ទងនឹងរឿងនេះ?
សេណារីយ៉ូដែលថាកូវីដលេចធ្លាយចេញពីមន្ទីរពិសោធន៍នៅវូហានកក្រើកឡើងវិញ
របាយការណ៍ស្តីអំពីប្រភពដើមកូវីដដែលជាសមិទ្ធផលកើតចេញមកពីការចុះទៅស្រាវជ្រាវរបស់ក្រុមអ្នកជំនាញអង្គការសុខភាពពិភពលោកនៅទីក្រុងវូហានប្រទេសចិន បានចេញផ្សាយកាលពីថ្ងៃអង្គារ ៣០ មីនាម្សិលមិញ។
របាយការណ៍ដែលមានកម្រាស់ ១២០ ទំព័ររបស់អង្គការសុខភាពពិភពលោក និងក្រុមអ្នកជំនាញចិននេះបានសន្និដ្ឋានថា មេរោគកូរ៉ណាដែលបង្កជាជំងឺកូវីដ១៩ ទំនងជាឆ្លងពីសត្វប្រចៀវមកដល់មនុស្សតាមរយៈសត្វមួយប្រភេទទៀត។ ដោយឡែក សេណារីយ៉ូដែលថាមេរោគកូរ៉ូណាវីរុសបែកធ្លាយចេញពីមន្ទីរពិសោធន៍នៅវូហានវិញ ក្រុមអ្នកជំនាញបានបដិសេធនិងថាវាមិនអាចទៅរួចឡើយ។
ភ្លាមៗនោះ ប្រទេសចិនបានចេញស្វាគមន៍ចំពោះការសន្និដ្ឋានខាងលើដោយក្តីរីករាយ។ សម្រាប់ចិន សេចក្តីសន្និដ្ឋាននេះគឺជាការជួយលាងជម្រះនូវមន្ទិលសង្ស័យ និងពាក្យចោទប្រកាន់ចិនថាបានពន្យារពេលនៃការចូលទៅស៊ើបអង្កេតរបស់ក្រុមអ្នកជំនាញអន្តរជាតិ និងថាចិនបានកម្រិតមិនឲ្យដំណើរការស្រាវជាវអាចប្រព្រឹត្តទៅដោយទូលំទូលាយបាន។
ក៏ប៉ុន្តែ ក្តីរីករាយរបស់ចិនបានរលាយបាត់ទៅយ៉ាងលឿនវិញដែរ នៅក្រោយពេលដែលប្រធានអង្គការសុខភាពពិភពលោក លោកតេដ្រូស និយាយកាលពីថ្ងៃអង្គារម្សិលមិញ ថាការស្វែងរកប្រភពដើមកូវីដ នឹងបន្តធ្វើដោយមើលលើគ្រប់សម្មតិកម្ម ក្នុងនោះក៏មានផងដែរសេណារីយ៉ូលេចធ្លាយកូវីដចេញពីមន្ទីរពិសោធន៍នៅក្នុងទីក្រុងវូហាន។ វូហាន ជាកន្លែងដែលមេរោគកូរ៉ូណា បានលេចឡើងលើកដំបូងគេ មុននឹងឆ្លងរាលដាលពាសពេញពិភពលោក។
ប្រសាសន៍របស់លោកប្រមុខអង្គការសុខភាពពិភពលោកបែបនេះ បានធ្វើឲ្យសេណារីយ៉ូ លេចធ្លាយកូវីដចេញពីមន្ទីរពិសោធន៍នៅវូហានចាប់កក្រើកឡើងវិញ និងធ្វើឲ្យប្រទេសចិន ទទួលរងសម្ពាធកាន់តែខ្លាំងឡើង។
ហេតុអ្វីប្រធានអង្គការសុខភាពពិភពលោកលែងធីបចោលសេណារីយ៉ូនេះទៅវិញ?
កាលពីថ្ងៃអង្គារម្សិលមិញ លោកតេដ្រូស ប្រធានអង្គការសុខភាពពិភពលោក បានមានប្រសាសន៍ថានឹងពិចារណាឡើងវិញនូវសេណារីយ៉ូនៃការលេចធ្លាយកូវីដចេញពីមន្ទីរពិសោធន៍ក្នុងទីក្រុងវូហានរបស់ប្រទេសចិន។
លោកតេដ្រូសបានសម្រេចបែបនេះ ដោយសារតែលោកមានការបារម្ភអំពីកម្រិតនៃភាពទូលំទូលាយក្នុងការទទួលបានទិន្នន័យគ្រប់ជ្រុងជ្រោយនៅអំឡុងពេលដែលក្រុមអ្នកជំនាញចុះទៅស្រាវជ្រាវនៅក្រុងវូហានប្រទេសចិនកាលពីចុងខែមករាកន្លងទៅ។
ទន្ទឹមនេះ ប្រធានស្ថាប័នសុខភាពកំពូលរូបនេះបានឲ្យដឹងទៀតថានៅក្នុងពេលជួបពិភាក្សាជាមួយក្រុមការងាររបស់លោក ពួកគេពិតជាបានបញ្ជាក់ប្រាប់ពីការលំបាកដែលពួកគេមិនអាចទទួលបានទិន្នន័យទូលំទូលាយពិតមែន។
ដោយមូលហេតុនេះ អង្គការសុខភាពពិភពលោកបានអំពាវនាវឲ្យមានការចែករំលែកទិន្នន័យឲ្យបានទាន់ពេលវេលានិងទូលំទូលាយនៅក្នុងការស៊ើបអង្កេតថ្មីទៀតនាពេលអនាគត។
នៅត្រង់ចំណុចនេះ គួររំឭកជូនដែរថានៅគ្រាកន្លងមកក្រុមអ្នកជំនាញបានសន្និដ្ឋានថាការលេចធ្លាយកូវីដចេញពីមន្ទីរពិសោធន៍ គឺជាសេណារីយ៉ូដែលពិបាកនឹងរួចខ្លាំងណាស់។ ហើយរហូតមកទល់នឹងពេលនេះ គេក៏នៅមិនទាន់រកឃើញភស្តុតាងណាមួយ ដើម្បីគាំទ្រការសន្និដ្ឋានខាងលើបានដែរ។
តែទោះបើជាបែបនេះក្តី ប្រធានអង្គការសុខភាពពិភពលោកបានលើកឡើងថា ការស៊ើបអង្កេតបន្ថែមគឺចាំបាច់ត្រូវតែធ្វើដើម្បីបញ្ជាក់ឲ្យច្បាស់ថាតើ កូវីដពិតជាលេចធ្លាយចេញពីមន្ទីរពិសោធន៍នៅវូហាន ឬក៏អត់។ នៅពេលការស៊ើបអង្កេតអាចប្រព្រឹត្តិទៅគ្រប់ជ្រុងជ្រោយ នោះលទ្ធផលពិតជាក់ស្តែងនឹងអាចបំបាត់នូវមន្ទិលសង្ស័យទាំងអស់ជាមិនខាន។
ដោយបច្ចប្បន្ននេះ មន្ទិលសង្ស័យនៅមានច្រើន ហើយប្រភពដើមកូវីដនៅមិនទាន់រកឃើញច្បាស់១០០ % នោះ អង្គការសុខភាពពិភពលោកបានបញ្ជាក់ថា ការស្វែងរកប្រភពដើមកូវីដនឹងបន្តធ្វើដោយមើលលើគ្រប់សម្មតិកម្មទាំងអស់ ហើយគ្មានសេណារីយ៉ូណាមួយត្រូវបានបោះបង់ចោល ឬធីបចោលឡើយ។
សហរដ្ឋអាមេរិកនិងសម្ព័ន្ធមិត្តរិះគន់របាយការណ៍ស្តីអំពីប្រភពដើមកូវីដ
ដោយព្រួយបារម្ភអំពីឯករាជ្យភាពរបស់អង្គការសុខភាពពិភពលោកផង និងដោយម្យ៉ាងយល់ថាចិនលាក់ទិន្នន័យ មិនបើកទូលាយដល់ក្រុមស៊ើបអង្កេតផង សហរដ្ឋអាមេរិក និងបណ្តាប្រទេសសម្ព័ន្ធជាច្រើនទៀត បានរិះគន់របាយការណ៍របស់អង្គការសុខភាពពិភពលោកស្តីអំពីប្រភពដើមនៃកូវីដ។
ដើម្បីជាការឆ្លើយតបទៅនឹងរបាយការណ៍នេះ សហរដ្ឋអាមេរិកនិងសម្ព័ន្ធមិត្តចំនួន ១៣ ប្រទេសរួមមានអង់គ្លេស កូរ៉េខាងត្បូង ជប៉ុន និងអូស្រ្តាលីជាដើម បានសម្តែងការព្រួយបារម្ភចំពោះការស្រាវជ្រាវនេះ និងបានជំរុញឲ្យចិនផ្តល់ឲ្យបាននូវសិទ្ធិពេញលេញគ្រប់គ្រាន់ដល់ក្រុមអ្នកជំនាញក្នុងពេលធ្វើការស៊ើបអង្កេត។
នៅក្នុងសេចក្តីថ្លែងការណ៍រួមគ្នាមួយ អាមេរិកនិងសម្ព័ន្ធមិត្តបានលើកឡើថាបេសកកម្មទៅវូហានត្រូវបានពន្យារពេលយូរ ហើយក្រុមអ្នកស្រាវជ្រាវក៏គ្មានលទ្ធភាពទទួលបានទិន្នន័យនិងគំរូដើមពីអាជ្ញាធរចិនគ្រាប់គ្រាន់ឡើយ។
ឆ្លើយតបនឹងការលើកឡើងខាងលើ ទីក្រុងប៉េកាំង បានអះអាងថាខ្លួនមានតម្លាភាពជាមួយក្រុមអ្នកវិទ្យាសាស្ត្ររបស់អង្គការសុខភាពពិភពលោក។
ចិនបានគូសបញ្ជាក់ថាខ្លួនបានអនុញ្ញាតឲ្យអ្នកជំនាញ ចូលទៅកាន់ទីតាំងជាច្រើនដើម្បីស៊ើបអង្កេតរួមមានទីតាំងផ្សារជាច្រើនកន្លែង មន្ទីរពិសោធន៍ អ្នកជំងឺនិងទិន្នន័យសំខាន់ៗពីមេរោគកូរ៉ូណា។
ដោយរងសម្ពាធកាន់តែខ្លាំងជុំវិញបញ្ហានេះ ប្រទេសចិនបានប្រកាសថា មន្ត្រីសុខាភិបាលរបស់ខ្លួននៅទីក្រុងប៉េកាំងគ្រោងនឹងធ្វើសន្និសីទសារព័ត៌មាមួយនស្តីពីរបាយការណ៍របស់អង្គការសុខភាពពិភពលោកក្នុងពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ