អង្គការសុខភាពពិភពលោកថាការស្វែងរកប្រភពដើមកូវីដនឹងបន្តធ្វើដោយមើលលើគ្រប់សម្មតិកម្ម
រាល់គ្រប់សម្មតិកម្មទាំងអស់ដែលទាក់ទងនឹងដើមកំណើតកូវីដនៅតែបើកចំហទទួលយកដើម្បីអាចស្រាវជ្រាវស្វែងរកឲ្យឃើញពីប្រភពដើមនៃជំងឺកូវីដ១៩។ នេះគឺជាប្រសាសន៍លើកឡើងរបស់លោកតេដ្រូស ប្រធានអង្គការសុខភាពពិភពលោកកាលពីថ្ងៃសុក្រ ១២ កុម្ភៈម្សិលមិញ បន្ទាប់ពីបេសកកម្មរបស់ក្រុមអ្នកជំនាញលោកក្នុងប្រទេសចិន។
ចុះផ្សាយនៅថ្ងៃ៖
ស្តាប់ - ០២:០៥
បេសកកម្មរយៈពេលមួយខែទៅកាន់ទីក្រុងវូហានប្រទេសចិនរបស់ក្រុមអ្នកជំនាញអង្គការសុខភាពពិភពលោកបានបិទបញ្ចប់ទៅ ដោយមិនអាចកំណត់បានឡើយពីប្រភពដើមនៃជំងឺកូវីដ១៩។ ក៏ប៉ុន្តែក្រុមអ្នកជំនាញបានគូសបញ្ជាក់ថានឹងទម្លាក់ចោលនូវសម្មតិកម្មដែលថាមេរោគកូរ៉ូណាបានលេចធ្លាយចេញពីមន្ទីរពិសោធន៍របស់ចិននោះ។
លោកបេន អេមបារ៉ាក់ (Ben Embarak) ប្រធានដឹកនាំការស៊ើបអង្កេតនៅចិនរបស់អង្គការសុខភាពពិភពលោកបាននិយាយនៅសប្តាហ៍នេះថា វាគឺជារឿងពិបាកទៅរួចណាស់ដែលថាកូវីដលេចធ្លាយចេញពីមន្ទីរពិសោធន៍របស់ចិនក្នុងទីក្រុងវូហាន។
ដោយឡែកដោយមានមន្ទិលសង្ស័យទៅលើតម្លាភាពនៃកិច្ចសហប្រតិបត្តិការរបស់ចិនជាមួយក្រុមអ្នកជំនាញអង្គការសុខភាពពិភពលោក សហរដ្ឋអាមេរិកបាននិយាយថានឹងពិនិត្យមើលអំពីលទ្ធផលដែលបានមកពីការអង្កេតស្រាវជ្រាវនៅប្រទេសចិន។
នៅក្នុងសន្និសីទសារព័ត៌មានមួយនៅទីក្រុងហ្សឺណែវ ប្រធានអង្គការសុខភាពពិភពលោក លោកតេដ្រូស អាដាណុម ហ្គេប្រេយេស៊ូស បាននិយាយថា ក្រុមអ្នកជំនាញរបស់លោកបានបំពេញបេសកកម្មដ៏សំខាន់បំផុតមួយ ក្នុងកាលៈទេសៈពិបាកបំផុត។
“មានសំណួរខ្លះលើកឡើងថាតើសម្មតិកម្មមួយចំនួន ត្រូវបានគេបោះបង់ចោលដែរឬទេ?......ខ្ញុំចង់បញ្ជាក់ថារាល់សម្មតិកម្មទាំងអស់ នៅតែបើកចំហទទួលយក ហើយបន្ទាប់មកវាទាមទារការវិភាគ និងការសិក្សាបន្ថែមទៀតលើសម្មតិកម្មទាំងនោះ”។ លោកតេដ្រូស បានគូសបញ្ជាក់។
ទន្ទឹមគ្នានេះ លោកប្រធានអង្គការសុខភាពពិភពលោករូបនេះបានបន្ថែមថាការងារឬក៏រឿងរ៉ាវ មួយចំនួន អាចស្ថិតនៅក្រៅដែនកំណត់ និងវិសាលភាពនៃបេសកកម្មរបស់ខ្លួននៅចិន។ អង្គការសុខភាពពិភពលោក ក៏តែងតែនិយាយហើយថាការស្រាវជ្រាវនេះ នឹងមិនអាចរកឃើញគ្រប់ចម្លើយទាំងអស់នោះទេ។ ក៏ប៉ុន្តែ វាអាចជួយឲ្យរកឃើញបន្ថែមទៀតនូវ ព័ត៌មានសំខាន់ៗ ដែលនាំឲ្យគេស្វែងយល់កាន់តែច្រើន និងច្បាស់ជាងមុនអំពីប្រភពដើមនៃមេរោគកូរ៉ណាថ្មីដែលជាមេរោគបង្កជំងឺរាតត្បាតសកលដូចជាកូវីដ១៩នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ