លោកបៃដិន៖លោកពូទីនជាឃាតក ហើយលោកពូទីននឹងត្រូវបង់ថ្លៃចំពោះទង្វើនេះ
ចុះផ្សាយនៅថ្ងៃ៖
ស្តាប់ - ០៦:៥៤
នៅសហរដ្ឋអាមេរិក ប្រធានាធិបតីលោកបៃដិនបានលើកឡើងជាចំហ និងជាសាធារណៈថា ប្រធានាធិបតីរុស្ស៊ីលោកពូទីនជាឃាតក និងសន្យាថា លោកពូទីននឹងត្រូវបង់ថ្លៃចំពោះទង្វើនេះ។ ការលើកឡើងរបស់លោកបៃដិនបានធ្វើឡើងនៅក្នុងបទសម្ភាសន៍មួយជាមួយទូរទស្សន៍អាមេរិក ABC ចាក់ផ្សាយក្នុងថ្ងៃពុធ ទី១៧ មីនា។ ក្រសួងការបរទេសរុស្ស៊ីបានការហៅឯកអគ្គរដ្ឋទូតរុស្ស៊ីប្រចាំក្រុងវ៉ាស៊ីនតោនឲ្យត្រឡប់ចូលប្រទេសដើម្បីសួរនាំ។ ចំណែកប្រធានរដ្ឋសភារុស្ស៊ីបានចាត់ទុកការលើកឡើងរបស់លោកបៃដិនថាជាសម្តីប្រមាថលើពលរដ្ឋរុស្ស៊ី។
អ្នកដែលបានប្រើពាក្យ« ឃាតក »មុនគេមិនមែនប្រធានាធិបតីអាមេរិកលោកបៃដិនទេ តែគឺអ្នកកាសែតរបស់ទូរទ្សន៍អាមេរិក ABC លោក George Stephanopoulos ដែលបានធ្វើបទសម្ភាសន៍ជាមួយលោកបៃដិន។ នៅក្នុងសំណួរជាច្រើនដែលលោក George បានសួរលោកបៃដិន មានសំណួរមួយសួរលោកបៃដិនថា « លោកស្គាល់លោកវ្ល៉ាឌីមៀរ ពូទីន។ តើលោកគិតថា គាត់ជាឃាតកម្នាក់? »។ « បាទ ខ្ញុំគិតដូចនេះ » នេះជាចម្លើយរបស់លោកបៃដិន។ តែលោកបៃដិនមិនបានលំអិតអ្វីបន្ថែមនៅក្នុងចម្លើយរបស់លោកទេ។
គេមិនដឹងថា តើលោកបៃដិនចង់និយាយសំដៅលើសកម្មជនប្រឆាំងរុស្ស៊ីលោកអាឡិចសី ណាវ៉ាល់នីដែលបានរងគ្រោះដោយការបំពុលកាលពីខែសីហាឬអត់ទេ។ គួររម្លឹកថា លោកណាវ៉ាល់នីជាមេប្រឆាំងស្លាប់រស់នឹងលោកពូទីន និងដែលក្នុងខែសីហា ឆ្នាំ ២០២០ បានរងគ្រោះដោយការបំពុលដែលរដ្ឋបាលអាមេរិកបានទម្លាក់ការទទួលខុសត្រូវលើរុស្ស៊ី។ បច្ចុប្បន្ន សកម្មជនរុស្ស៊ីរូបនេះកំពុងជាប់ឃុំនៅរុស្ស៊ី បន្ទាប់ពីបានត្រឡប់ចូលប្រទេសកំណើតនៅក្រោយការព្យាបាលជាសះស្បើយនៅក្នុងប្រទេសអាល្លឺម៉ង់។
ទោះបីជាលោកបៃដិនមិនបាននិយាយចេញពីមាត់លោកផ្ទាល់ថាលោកពូទីនជាឃាតកក៏ដោយ ក៏ការគ្រាន់តែឆ្លើយយល់ស្របនឹងសំណួររបស់អ្នកកាសែតពិតជាគ្រប់គ្រាន់ដើម្បីបញ្ឆេះកំហឹងរបស់រុស្ស៊ី។ លោកពូទីននៅមិនបានទាន់ឆ្លើយតបអ្វីនឹងលោកបៃដិនទេ តែក្រសួងការបរទេសរស្ស៊ីបានកោះហៅឯកអគ្គរដ្ឋទូតរបស់ខ្លួនប្រចាំក្រុងវ៉ាស៊ីតោនទៅសួរនាំ។ ចំណែកប្រធានរដ្ឋសភារុស្ស៊ីដែលជាមនុស្សជំនិតម្នាក់របស់លោកពូទីនមិនញញើតចាត់ទុកការលើកឡើងរបស់លោកបៃដិនថាជាការប្រមាថលើពលរដ្ឋរុស្ស៊ី និងជាការវាយប្រហារលើរុស្ស៊ី។
ទំនាក់ទំនងរវាងអាមេរិក និងរុស្ស៊ីនឹងឡើងតានតឹងបន្ថែម
គេអាចនិយាយបាន នេះអាចជាលើកទី១ ដែលមានប្រធានាធិបតីអាមេរិកម្នាក់កំពុងកាន់អំណាចហ៊ានលើកឡើងជាចំហ និងជាសាធារណៈថា ប្រធានាធិបតីរុស្ស៊ីលោកពូទីនជាឃាតក។ ពិតណាស់ អស់រយៈពេលជាច្រើនឆ្នាំមកហើយដែលអាមេរិក និងរស្ស៊ីបានស្គាល់ទំនាក់ទំនងរកាំរកូសរវាងគ្នា មិនថាក្នុងជំនាន់ប្រធានាធិបតីអាមេរិកលោកបារ៉ាក់ អូបាម៉ា ឬមួយក៏ជំនាន់លោកដូណាល់ ត្រាំទេ នោះបើគេដឹងថា មិនសូវតានតឹងខ្លាំងនៅក្នុងជំនាន់លោកត្រាំក៏ដោយ។ កន្លងមក គេធ្លាប់ឃើញមានអ្នកតំណាងរាស្រ្តអាមេរិកបានចោទលោកពូទីនជាឃាតក តែមិនដែលមានរូបប្រធានាធិបតីអាមេរិកណាម្នាក់ទេ។
សូម្បីតែលោកអូបាម៉ាដែលមានជំហរប្រឆាំងខ្លាំងនឹងរុស្ស៊ីក៏មិនដែលហ៊ានចាត់ទុកលោកពូទីនជាឃាតកដែរ។ ដូច្នេះចង់ ឬមិនចង់ ការលើកឡើងរបស់លោកបៃដិនពេលនេះនឹងធ្វើឲ្យទំនាក់ទំនងរវាងក្រុងវ៉ាស៊ីនតោន និងក្រុងមូស្គូដែលកំពុងតានតឹងស្រាប់នឹងឡើងតានតឹងមួយកម្រិតទៀត។ រុស្ស៊ីបានព្រមានរួចហើយថា អាមេរិកជាអ្នកទទួលខុសត្រូវទាំងស្រុងលើវិបត្តិការទូតថ្មីរវាងប្រទេសទាំងពីរពេលនេះ។ តែគេបានសង្កេតឃើញថា ខណៈពេលដែលក្រុងមូស្គូកំពុងក្តៅស្លឹកត្រចៀកខ្លាំង ក្រុងវ៉ាស៊ីតោនហាក់ព្យាយាមរំងាប់ស្ថានការណ៍ដោយមិនកោះហៅឯកអគ្គរដ្ឋទូតរបស់ខ្លួនប្រចាំក្រុងមូស្គូដូចដែលរុស្ស៊ីបានធ្វើទេ។
ក្រសួងការបរទេសអាមេរិកបានប្រាប់AFP ថា ការដែលខ្លួនបន្តទុកឯកអគ្គរដ្ឋទូតអាមេរិកនៅរុស្ស៊ី គឺចង់រក្សាកាណាល់ទំនាក់ទំនងឲ្យនៅបើកចំហដើម្បីកាត់បន្ថយភាពមិនយល់គ្នា។ ចំណែកលោកបៃដិនក៏បានបញ្ជាក់ជាថ្មីពីការចង់បន្តធ្វើការជាមួយរុស្ស៊ីទាក់ទងនឹងផលប្រយោជន៍រួម។ អាមេរិក និងរុស្ស៊ីសុទ្ធតែបានដឹងច្បាស់ពីការត្រូវការគ្នាទៅវិញ ទៅមកមិនអាចខ្វះបានដើម្បីផលប្រយោជន៍រួម និងពិភលោក ទោះបីជាមានភាពប្រទាំងប្រទើសរវាងគ្នាជាលក្ខណៈទ្វេភាគីក៏ដោយ។
លោកបៃដិនចង់ជម្រះបញ្ជីជាមួយលោកពូទីន?
តាំងពីពេលចូលកាន់តំណែងប្រធានាធិបតីអាមេរិកក្នុងខែមករា ឆ្នាំ ២០២១ លោកបៃដិនបានបង្ហាញជំហរម៉ឹងម៉ាត់ និងមិនអត់ឱនចំពោះលោកពូទីន។ អ្វីដែលលោកបៃដិនចង់ប្រាប់លោកពូទីនគឺថា លោកមិនមែនលោកត្រាំទេ ហើយទំព័រសករាជនៃទំនាក់ទំនងរវាងរុស្ស៊ីជាមួយអាមេរិកក្នុងជំនាន់លោកត្រាំ និយាយជារួម និងរវាងលោកពូទីន និងលោកត្រាំ និយាយដោយឡែកបានបិទបញ្ចប់ហើយ។ លោកបៃដិនចង់ប្រាប់លោកពូទីនថា អាមេរិកសព្វថ្ងៃបានរកឃើញកន្លែងរបស់ខ្លួនឡើងវិញដែលលែងជាកន្លែងដែលអាមេរិកបានស្គាល់រយៈពេល ៤ឆ្នាំក្នុងជំនាន់លោកត្រាំ។
មែនទែនទៅ មានសំណុំរឿងច្រើនណាស់ដែលអាមេរិកក្នុងជំនាន់លោកបៃដិនចង់ទូទាត់បញ្ជីជាមួយរុស្ស៊ី រួមមាន រុស្ស៊ីជាប់សង្ស័យពីការឲ្យលុយពួកតាលីបង់ដើម្បីសម្លាប់ទាហានអាមេរិកនៅអាហ្វហ្កានីស្ថាន រុស្ស៊ីជាប់សង្ស័យពីការវាយប្រហារតាមអ៊ីនធ័រនែតថ្មីៗនេះលើអាមេរិក និងពិសេសទៅទៀតនោះ គឺការដែលរុស្ស៊ីបានលូកដៃកកូរកកាយរឿងបោះឆ្នោតនៅអាមេរិកកាលពីឆ្នាំ ២០១៦ និងឆ្នាំ ២០២០ កន្លងទៅ។ ក្នុងថ្ងៃអង្គារ ទី១៦ មីនា ក្រសួងស៊ើបការណ៍អាមេរិកបានផ្សព្វផ្សាយរបាយការណ៍មួយដែលបង្ហាញថា លោកពូទីនប្រហែលជាបានព្យាយាមបង្វែរលទ្ធផលបោះឆ្នោតអាមេរិកពីជ័យជម្នះរបស់លោកបៃដិនទៅឲ្យលោកត្រាំ។ រុស្ស៊ីបានបដិសេធដោយចាត់ទុកជារបាយការណ៍មិនពិត គ្មានមូលដ្ឋាន និងគ្មានភស្តុតាង។
តែនៅក្នុងបទសម្ភាសន៍ជាមួយទូរទស្សន៍ ABC លោកបៃដិនបានបញ្ជាក់ថា លោកពូទីននឹងបង់ថ្លៃលើទង្វើមួយនេះ។ « លោកចាំមើលនាពេលខាងមុខនូវផលវិបាកដែលលោកពូទីននឹងទទួល » នេះជាចម្លើយរបស់លោកបៃដិនតបនឹងសំណួររបស់អ្នកកាសែតរបស់ទូរទ្សន៍អាមេរិក ABC លោក George Stephanopoulos ដែលសួរលោកបៃដិនពីតម្លៃដែលលោកពូទីននឹងត្រូវបង់ចំពោះទង្វើលូកដៃក្នុងរឿងបោះឆ្នោតអាមេរិកឆ្នាំ ២០២០ ដែលលោកបៃដិបនបានឈ្នះលោកត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ