តើគេគួរបារម្ភលើវ៉ាក់សាំងបង្ការកូវីដ១៩ របស់មន្ទីរពិសោធន៍អង់គ្លេស AstraZeneca/Oxford ដែរ ឬទេ?
ចុះផ្សាយនៅថ្ងៃ៖
ស្តាប់ - ០៧:១១
នៅថ្ងៃសុក្រ ទី១២ មីនា អង្គការសុខភាពពិភពលោក WHOបានប្រកាសដាក់ឲ្យប្រើនូវវ៉ាក់សាំងបង្ការកូវីដ១៩ របស់មន្ទីរពិសោធន៍ Johnson & Johnson។ គួររម្លឹកថា វ៉ាក់សាំង Johnson & Johnson កំពុងប្រើនៅអាមេរិកតាំងពីខែកុម្ភៈ និងក៏ទើបត្រូវបានទីភ្នាក់ងារឱសថអឺរ៉ុបប្រកាសឲ្យប្រើក្នុងសប្តាហ៍នេះដែរ។ ដោយឡែក ទាក់ទងនឹងព័ត៌មានជុំវិញផលវិបាកកើតចេញពីការចាក់វ៉ាក់សាំង AstraZeneca អង្គការសុខភាពពិភពលោកបានអំពាវនាវឲ្យបន្តប្រើវ៉ាក់សាំង AstraZeneca នេះ ហើយមន្ទីរពិសោធន៍ AstraZeneca ក៏បានចេញមុខការពារប្រសិទ្ធិភាពវ៉ាក់សាំងរបស់ខ្លួនដែរ ក្រោយពីមានប្រទេសមួយចំនួនបានប្រកាសផ្អាកប្រើជាបណ្តោះអាសន្ន។
វ៉ាក់សាំងបង្ការកូវីដ១៩ របស់មន្ទីរពិសោធន៍អាមេរិក Johnson & Johnsonជាវ៉ាក់សាំងទី៣ ហើយដែលអង្គការសុខភាពពិភពលោកបានអនុញ្ញាតឲ្យប្រើតាមរយៈយន្តការកូវ៉ាក់របស់ខ្លួន បន្ទាប់ពីវ៉ាក់សាំងបង្ការកូវីដ១៩ របស់មន្ទីរពិសោធន៍ Pfizer-BioNTech និងរបស់មន្ទីរពិសោធន៍ AstraZeneca។ បើគេប្រៀបធៀបរវាងវ៉ាក់សាំងទាំង ៣ ដែល WHO បានអនុញ្ញាតឲ្យប្រើពេលនេះ វ៉ាក់សាំងJohnson & Johnson និងវ៉ាក់សាំង AstraZeneca មានភាពស្រដៀងគ្នាច្រើនដោយចាប់ផ្តើមពីរបៀបធ្វើ របៀបទុកដាក់ ប្រសិទ្ធិភាព និងតម្លៃរបស់វា។
ខុសពីវ៉ាក់សាំងPfizer-BioNTech ដែលគេត្រូវរក្សាទុកនៅក្នុងសីតុណ្ហភាពរហូតដល់ទៅ ៧០អង្សារក្រោមសូន្រ គេអាចរក្សាទុកវ៉ាក់សាំងJohnson & Johnsonនៅក្នុងទូរទឹកកកធម្មតារយៈពេល ៣ខែនៅក្នុងសីតុណ្ហភាពចន្លោះ ២ និង៨អង្សារ។ ចំណែកតម្លៃរបស់វាក៏សមរម្យដែលអនុញ្ញាតឲ្យ WHO អាចទិញក្នុងបរិមាណច្រើនសម្រាប់ចែកចាយឲ្យក្រុមប្រទេសក្រីក្រតាមរយៈយន្តការកូវ៉ាក់។ ប្រសិទ្ធិភាពរបស់វ៉ាក់សាំងJohnson & Johnsonក៏មិនសូវខុសគ្នានឹងវ៉ាក់សាំង AstraZenecaប៉ុន្មានទេ ពោលមានប្រសិទ្ធិភាពក្នុងរង្វង់៦៧%។
ក៏ប៉ុន្តែ វ៉ាក់សាំងJohnson & Johnsonមានលក្ខណៈពិសេសមួយ គឺចាក់តែមួយដូសទេ ពោលខុសពីវ៉ាក់សាំងដែលគេស្គាល់សព្វថ្ងៃ មិនថា AstraZenecaPfizer-BioNTech Moderna វ៉ាក់សាំងចិន Sinoparm ឬមួយក៏វ៉ាក់សាំងរុស្ស៊ី Spounik V ដែលត្រូវការចាក់ចំនួន ២ដូស។ ទាក់ទងនឹងផលរំខានរបស់វ៉ាក់សាំងJohnson & Johnsonត្រូវបានមន្ទីរពិសោធន៍បញ្ជាក់ថា មិនសូវខុសគ្នានឹងវ៉ាក់សាំងរបស់មន្ទីរពិសោធន៍ផ្សេងប៉ុន្មានទេ ដូចជាឈឺនៅកន្លែងចាក់ ឈឺក្បាល ឬមួយក៏អស់កម្លាំង បន្ទាប់ពីចាក់បានចំនួន ២ថ្ងៃ។ តាមមន្ទីរពិសោធន៍ Johnson & Johnsonផលរំខាននេះគ្មានបង្កផលវិបាកដល់សុខភាពទេ និងបានកើតលើអ្នកចាក់វ៉ាក់សាំងម្នាក់ក្នុងចំណោម ១០នាក់។
មន្ទីរពិសោធន៍ AstraZeneca ការពារប្រសិទ្ធិភាពលើវ៉ាក់សាំងរបស់ខ្លួន
ជាថ្មីម្តងទៀត មន្ទីរពិសោធន៍ AstraZenecaបានចេញមុខការពារលើប្រសិទ្ធិភាពវ៉ាក់សាំងរបស់ខ្លួនជាទូទៅ ដោយមិនបានបែងចែកថា វ៉ាក់សាំងនោះផលិតនៅប្រទេសណាទេ។ នៅក្នុងសេចក្តីប្រកាសព័ត៌មានចេញផ្សាយនាថ្ងៃសុក្រ ទី១២ មីនា មន្ទីរពិសោធន៍ AstraZeneca បានបញ្ជាក់ច្បាស់ៗថា គ្មានភស្តុតាងណាមួយដែលបញ្ជាក់ពីហានិភ័យធ្ងន់ធ្ងរដល់សួតដោយសារតែការចាក់វ៉ាក់សាំង AstraZeneca ទេ។ អ្វីដែល AstraZeneca ចង់បញ្ជាក់ បើធៀបនឹងចង្កោមមនុស្សទូទៅ អត្រាហានិភ័យនៃផលរំខាននេះមានកម្រិតតិចតួចបំផុតសម្រាប់អ្នកដែលបានចាក់វ៉ាក់សាំង AstraZeneca ឬនិយាយឲ្យស្រួលយល់ ផលចំណេញដែលទទួលបានពីការចាក់វ៉ាក់សាំង AstraZeneca នៅតែគ្របដណ្តប់ធំធេងលើផលវិបាក និងហានិភ័យដែលកើតចេញការចាក់វ៉ាក់សាំង AstraZeneca។
ការអះអាងដូចគ្នានេះក៏មានពីទីភ្នាក់ងារឱសថអឺរ៉ុប និងបានបន្ថែមថា ផលរំខានកើតចេញពីការចាក់វ៉ាក់សាំងAstraZeneca ក៏អាចជា Alergyដែរ។ ទីភ្នាក់ងារឱសថអឺរ៉ុបបានបញ្ជាក់ពីការបន្តសិក្សា និងស្រាវជ្រាវលើផលរំខានដែលបានលើកឡើងដោយប្រទេសអឺរ៉ុបខ្លះដែលថា មានកកឈាមដុំៗនៅក្នុងសរសៃឈាម បន្ទាប់ពីការចាក់វ៉ាក់សាំង AstraZeneca។ គួររម្លឹកថា មន្ទីរពិសោធន៍ AstraZeneca បានបញ្ជាក់ពីប្រសិទ្ធិភាពវ៉ាក់សាំងរបស់ខ្លួនក្នុងកម្រិត ៧០% ហើយអត្រាប្រសិទ្ធិភាពនេះក៏ត្រូវបានទទួលស្គាល់ដោយទស្សនាវដ្តីវិទ្យាសាស្រ្តអង់គ្លេស The Lancet ដែរ។ ថ្មីៗនេះទៀត លទ្ធផលនៃការសិក្សាចំនួនពីររបស់អង់គ្លេសបានអះអាងពីប្រសិទ្ធិភាព ៩៤% របស់ AstraZeneca ក្នុងការការពារកុំឲ្យអ្នកឆ្លងកូវីដ១៩ ធ្លាក់ខ្លួនឈឺធ្ងន់ធ្ងររហូតចូលព្យាបាលក្នុងមន្ទីរពេទ្យ។
វ៉ាក់ក់សាំង AstraZeneca នៅជាវ៉ាក់សាំងបង្ការកូវីដ១៩ មានប្រសិទ្ធិភាព?
រហូតមកដល់ពេលនេះ នៅមិនទាន់មានការអំពាវនាវឲ្យមានការបញ្ឈប់ការប្រើវ៉ាក់សាំង AstraZenecaនៅឡើយទេ ទោះជាវ៉ាក់សាំងនេះបានផលិតនៅក្នុងប្រទេសណាក៏ដោយ។ ពិតណាស់ពេលនេះ មានប្រទេសអឺរ៉ុបចំនួន ៤ គឺដាណឺម៉ាក អ៊ីស្លង់ ន័រវែស និងប៊ុលហ្ការីបានព្យួរការប្រើវ៉ាក់សាំង សាំង AstraZenecaដែលផលិតនៅអឺរ៉ុប។ ចំណែកថៃក៏បានប្រកាសផ្អាកមិនចាក់វ៉ាក់សាំង AstraZenecaដែលផលិតនៅឥណ្ឌា។ ក្រៅពីប្រទេសទាំង ៥ខាងលើ ប្រទេសផ្សេងបានបន្តឲ្យប្រើប្រាស់ដោយគេសំឡឹងឃើញប្រយោជន៍ធំធេងបានពីការចាក់វ៉ាក់សាំង AstraZenecaជាងការអត់ចាក់។ ចូរកុំភ្លេចថា មានមនុស្សច្រើនលាននាក់ហើយដែលបានចាក់វ៉ាក់សាំង AstraZenecaហើយក្នុងចំណោមអ្នកចាក់ជាច្រើនលាននាក់នេះ មានប្រមាណតែពី ២០ ទៅ ៣០នាក់ប៉ុណ្ណោះដែលមានផលរំខានខ្លាំងលើសុខភាព។
តើគេគួរបារម្ភពីវ៉ាក់សាំង AstraZenecaនេះដែរ ឬទេ?។ ចម្លើយនៅពេលនេះ គឺមិនគួរបារម្ភទេ។ គួររម្លឹកថាក្រៅពីនៅប្រទេសអង់គ្លេស មន្ទីរពិសោធន៍ AstraZenecaក៏បានផលិតវ៉ាក់សាំងរបស់ខ្លួននៅក្នុងប្រទេសផ្សេង ដូចយ៉ាងនៅអ៊ីតាលី នៅឥណ្ឌា ឬមួយក៏នៅកូរ៉េខាងត្បូង។ មួយវិញទៀត និងក្រៅពីមន្ទីរពិសោធន៍ AstraZeneca មន្ទីរពិសោធន៍ផ្សេង ពិសេស Pfizer-BioNTech ឬ Moderna របស់អាមេរិកក៏បានផលិតវ៉ាក់សាំងរបស់ខ្លួននៅក្នុងប្រទេសផ្សេងដែរ ពិសេសក្នុងប្រទេសអឺរ៉ុប។ ហេតុផលគឺថា មកពីការផលិតនៅកន្លែងតែមួយមិនអាចបំពេញតម្រូវការបាន និងទាន់ពេលសម្រាប់មនុស្សលោក ពិសេសវ៉ាក់សាំងបង្ការកូវីដ១៩។
អ្វីដែលគួរដឹង ជំងឺកូវីដ១៩ ជាជំងឺសកលតែមួយ ទោះបីជាជំងឺនេះបានឆ្លងចូលប្រទេសណាក៏ដោយ។ ចំណែករូបមន្តវ៉ាក់សាំងទៀតសោត ទោះជាAstraZeneca Pfizer-BioNTech ឬ Moderna ក៏ប្រហែលជារូបមន្តតែមួយរបស់មន្ទីរពិសោធន៍នីមួយៗ ទោះជាវ៉ាក់សាំងរបស់មន្ទីរពិសោធន៍ណាមួយបានផលិតនៅក្នុងប្រទេសណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ