ក្រុមអ្នកជំនាញឯករាជ្យ៖WHO និងចិនមានភាពយឺតយ៉ាវក្នុងការទប់ស្កាត់ការឆ្លងរាលដាលនៃវីរុសកូវីដ១៩
ចុះផ្សាយនៅថ្ងៃ៖
ស្តាប់ - ០៦:៣១
នៅថ្ងៃអង្គារ ទី ១៩ មករា អង្គការសុខភាពពិភពលោកហៅកាត់ជាភាសាអង់គ្លេស WHO បើកកិច្ចប្រជុំក្នុងទីក្រុងហ្សឺណែវ ប្រទេសស្វ៊ីស។ នាឱកាសនោះ ក្រុមអ្នកជំនាញឯករាជ្យបង្ហាញរបាយការណ៍របស់ខ្លួនស្តីពីជំងឺកូវីដ១៩។ នៅក្នុងរបាយការណ៍ ក្រុមអ្នកជំនាញបានស្តីបន្ទោសចិន និង WHO ពីបទបានបញ្ចេញប្រតិកម្ម និងចាត់វិធានការយឺតយ៉ាវលើវីរុសកូវីដ១៩។ របាយការណ៍នេះបានធ្លាក់មក ខណៈដែលក្រុមអ្នកជំនាញរបស់ WHO ចំនួន ១០នាក់កំពុងស្ថិតក្នុងទឹកដីចិនដើម្បីស៊ើបអង្កេត ស្វែងយល់ឲ្យបានច្បាស់ពីប្រភពដើម និងអត្តសញ្ញាណរបស់វីរុសកូវីដ១៩ ដែលបានផ្ទុះចេញពីចិនកាលពី ១ឆ្នាំមុន ពិសេសពីទីក្រុងវូហាន។
គួរបញ្ជាក់ថា ក្រុមអ្នកជំនាញឯករាជ្យនេះត្រូវបានរៀបចំបង្កើតឡើងដោយអង្គការសហប្រជាជាតិ និងដឹកនាំដោយប្រធានចំនួន ២នាក់ គឺអតីតនាយករដ្ឋមន្រ្តីនូវែលហ្សេឡង់លោកស្រី Helen Clark និងអតីតប្រធានាធិបតីលីបេរីយ៉ាលោកស្រី Ellen Johnson Sirleaf។ នេះជាលើកទី២ ដែលក្រុមអ្នកជំនាញឯករាជ្យបានចេញផ្សាយរបាយការណ៍របស់ខ្លួនស្តីពីជំងឺកូវីដ១៩។ របាយការណ៍របស់ក្រុមអ្នកជំនាញឯករាជ្យបានផ្តោតសំខាន់លើប្រតិកម្ម និងចំណាត់ការរបស់អង្គការសុខភាពពិភពលោក និងចិនស្តីពីវីរុសកូវីដ១៩។ ការផ្តោតលើចិន ព្រោះជាប្រទេសប្រភពជំងឺកូវីដ១៩។
របាយការណ៍របស់ក្រុមអ្នកជំនាញឯករាជ្យបានមើលឃើញជារួមថា គេពិតជាអាចបញ្ចេញប្រតិកម្មបានយ៉ាងឆាប់រហ័សតាំងពីថ្ងៃមានលេចរោគសញ្ញាវីរុសកូវីដ១៩។ ចំណែកវិធានការទប់ស្កាត់ការឆ្លងរាលដាលក៏គួរណាត្រូវចាប់អនុវត្តភ្លាមៗនៅគ្រប់ប្រទេសទាំងអស់ដែលប្រឈមនឹងករណីវីរុសកូវីដ១៩ ជាយថាហេតុ។ ក្រុមអ្នកជំនាញយល់ឃើញថា រដ្ឋអំណាចចិនថ្នាក់តំបន់ និងថ្នាក់ជាតិគួរណាតែអនុវត្តវិធានការសុខភាពសាធារណៈឲ្យបានស្វាហាប់ខ្លាំងក្នុងខែមករាដើមឆ្នាំ ២០២០។ តែគឺ WHO ដែលក្រុមអ្នកជំនាញឯករាជ្យបានស្តីបន្ទោសខ្លាំងជាងគេដោយបានចោទជាសំណួរ និងចម្ងល់មួយចំនួន។
ហេតុអ្វីបានជា WHO រង់ចាំដល់ដើមសប្តាហ៍ទី៤ ក្នុងខែមករា ឆ្នាំ ២០២០ ទើបកោះប្រជុំគណៈកម្មាធិការបន្ទាន់របស់ខ្លួន?។ ហេតុអ្វីបានជា WHO មានការអាល់អែកក្នុងការប្រកាសភាពអាសន្នសុខភាពសកល និងចាត់ទុកជំងឺកូវីដ១៩ ជាជំងឺឆ្លងរាលដាលសកល?។ ហេតុអ្វីបានជា WHO មានភាពយឺតយ៉ាវក្នុងការផ្តល់អនុសាសន៍ឲ្យពាក់ម៉ាសដើម្បីបង្ការការឆ្លងវីរុសកូវីដ១៩?។ ក្រុមអ្នកជំនាញឯករាជ្យសន្និដ្ឋានថា បើ WHO និងចិនបញ្ចេញប្រតិកម្ម ចាត់វិធានការ និងមានតម្លាភាពលើវីរុសកូវីដ១៩ ឲ្យលឿនតាំងពីដំបូង ម្ល៉េះគ្មានមនុស្សស្លាប់ និងឆ្លងដល់ទៅលាននាក់ទេ។
ឥទ្ធិពលនៃការឆ្លងវីរុសកូវីដ១៩ មានល្បឿនលឿន
គេនៅមិនទាន់ឃើញមានប្រតិកម្មពីចិន ឬ WHO ចំពោះរបាយការណ៍របស់ក្រុមអ្នកជំនាញឯករាជ្យទេ។ គួរបញ្ជាក់ថា នេះមិនមែនជាលើកទី១ ទេដែលចិន និង WHO បានរងការស្តីបន្ទោសក្នុងរឿងជំងឺកូវីដ១៩។ សហរដ្ឋអាមេរិកហ៊ានទាំងចង្អុលមុខចិនថាជាអ្នកបង្កើតវីរុសកូវីដ១៩ និងចោទ WHO ពីបទមានសមានចិត្ត និងស៊ុមគ្រលំជាមួយចិន។ បន្ទាប់មក មានប្រទេសខ្លះក៏បានចាក់ស្របតាមសហរដ្ឋអាមេរិក ដូចយ៉ាងអូស្រ្តាលី។ តែត្រូវបានចិនវាយបកវិញដោយប្រើទណ្ឌកម្មសេដ្ឋកិច្ច។ គេមិនដឹងថា តើអ្វីដែលក្រុមអ្នកជំនាញឯករាជ្យបានលើកឡើងនៅក្នុងរបាយការណ៍ខ្លួនសមហេតុផលដែរ ឬទេ?។
អ្វីដែលគេអាចនិយាយបាន ទោះបីការងារអ្វីក៏ដោយក៏គេអាចធ្វើឲ្យបានលឿនជាងនេះ និងគួរណាតែធ្វើឲ្យបានមុនជាងនេះដែរ។ គេអាចបន្ទោសចិនពីភាពយឺតយ៉ាវក្នុងការប្រកាសពីវត្តមានវីរុសកូវីដ១៩ និងលាក់ព័តមាននេះ។ គេអាចបន្ទោស WHO ពីការមើលស្រាលលើវីរុសកូវីដ១៩ និងមានការអាល់អែលក្នុងការប្រកាសវីរុសនេះជាវីរុសឆ្លងរាលដាលសកល។ តែគេមិនត្រូវភ្លេចនិយាយទេថា ឥទ្ធិពលនៃការឆ្លងវីរុសកូវីដ១៩ មានល្បឿនលឿន និងមានទ្រង់ទ្រាយធំដែលបានធ្វើឲ្យគ្រប់គ្នាមានការភ្ញាក់ផ្អើលយ៉ាងខ្លាំង។ ចូរកុំភ្លេចថា ជាង ១ឆ្នាំដែលវីរុសកូវីដ១៩ បានញំញី និងកំពុងបន្តញំញីពិភពលោកដោយមានទាំងមេរោគបំប្លែងខ្លួនរបស់វាចំនួន ២ ឬ ៣ ប្រភេទនាពេលបច្ចុប្បន្ន។ មួយនវិញទៀត ទោះបីជាពិភពលោកមានវ៉ាក់សាំងបង្ការវាក៏ដោយក៏គេនៅមិនទាន់បានស្គាល់ច្បាស់នូវអត្តសញ្ញាណ និងប្រភពដើមពិតរបស់កូវីដ១៩។
បេសកកម្មរបស់ក្រុមអ្នកជំនាញ WHO នៅចិនមានដំណើរដោយរលូន?
ការពិតស្តីពីអត្តសញ្ញាណ និងប្រភពដើមរបស់កូវីដ១៩ នឹងអាចដឹងនៅថ្ងៃណាមួយតាមរយៈបេសកកម្មរបស់ក្រុមអ្នកជំនាញមានគ្នា ១០នាក់របស់អង្គការសុខភាពពិភពលោក។ ពួកគេទាំង ១០នាក់កំពុងស្ថិតក្នុងប្រទេសចិនដើម្បីស៊ើបអង្កេតស្វែងរកអត្តសញ្ញាណ និងប្រភពដើមនៃជំងឺកូវីដ១៩។ គួររម្លឹកថា បេសកកម្មមួយនេះត្រូវបានទាមទារដោយក្រុមប្រទេសបស្ចិមលោកតាំងពីដំបូងទីមកម្ល៉េះ។ តែគឺទើបនៅពាក់កណ្តាលឆ្នាំ ២០២០ ដែលក្រុមប្រទេសសមាជិក WHO បានឯកភាពគ្នាដើម្បីបង្កើតក្រុមនេះឡើង។ បន្ទាប់មក គេត្រូវរង់ចាំការអនុញ្ញាតពីចិនដែលហាក់មិនសូវស្វាគមន៍នឹងយន្តការណ៍មួយនេះប៉ុន្មានទេ។
តែ WHO បានបញ្ជាក់តាំងពីដំបូងថា បេសកកម្មរបស់ក្រុមអ្នកជំនាញខ្លួនមិនមែនស្វែងវែកមុខអ្នកទទួលខុសត្រូវលើជំងឺកូវីដ១៩ ដើម្បីកាត់ទោសទេ។ តែស្វែងរកអត្តសញ្ញាណ និងប្រភពដើមរបស់កូវីដ១៩ ដើម្បីទាញជាមេរៀន និងបញ្ចៀសកុំឲ្យមេរោគដដែលនេះផ្ទុះឡើងជាថ្មីនាពេលខាងមុខ។ រហូតមកដល់ពេលនេះ បេសកកម្មរបស់អ្នកជំនាញ WHO ទាំង ១០នាក់មានដំណើរការដោយរលូន ហើយចិនក៏បានទទួលពួកគេយ៉ាងរាក់ទាក់ដែរ នេះបើតាមព័ត៌មានចុះផ្សាយដោយបណ្តាញសារព័ត៌មានរដ្ឋចិនក្នុងថ្ងៃអង្គារ ទី១៩ មករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ