អង្កេតកូវីដ១៩ ៖ អ្នកជំនាញអង្គការសុខភាពពិភពលោកខ្លះ មិនបានទិដ្ឋាការចូលចិន
ក្នុងក្របខ័ណ្ឌនៃការអង្កេតរកដើមហេតុនៃការផ្ទុះជំងឺកូវីដ១៩ អង្គការសុខភាពពិភពលោកបានបញ្ជូនក្រុមអ្នកជំនាញ១០រូប ទៅប្រទេសចិន។ ក្រុមអ្នកជំនាញត្រូវចេញដំណើរទៅនៅថ្ងៃអង្គារទី ៥មករាម្សិលមិញ ប៉ុន្តែអ្នកជំនាញខ្លះមិនទាន់មានទិដ្ឋាការចាំបាច់សម្រាប់ចូលទឹកដីចិនផង។ នៅថ្ងៃពុធទី ៦ មករា២០២១នេះ ចិនគ្រាន់តែបានគូសបញ្ជាក់ថាកំពុងបន្តចរចាជាមួយអង្គការសុខភាពពិភពលោក។
ចុះផ្សាយនៅថ្ងៃ៖
ស្តាប់ - ០២:១៩
“ថ្ងៃនេះយើងបានទទួលដំណឹងថា អាជ្ញាធរចិនមិនទាន់ផ្តល់ទិដ្ឋាការដល់គ្រប់ក្រុមអ្នកជំនាញទេ ! ខ្ញុំខកចិត្តណាស់ ព្រោះអ្នកជំនាញពីររូបបានចេញដំណើរទៅហើយ ហើយខ្លះទៀត ត្រូវខកខានដំណើរនៅនាទីចុងក្រោយទៅវិញ”។ នេះជាប្រសាសន៍របស់លោក Tedros Adhanom Ghebreyesus នាយកអង្គការសុខភាពពិភពលោកទៅកាន់អ្នកសារព័ត៌មាន នៅទីក្រុងហ្សឺណែវ។
ជាងមួយឆ្នាំក្រោយការលេចឡើងនូវជំងឺកូវីដ១៩ អង្គការសុខភាពពិភពលោកបានសម្រេចបញ្ជូនអ្នកជំនាញវិទ្យាសាស្ត្រ១០រូប ដែលឆ្លងកាត់ការដំណើរការជ្រើសរើសយ៉ាងយូរ ទៅបំពេញបេសកកម្មអង្កេតនៅចិន តែដល់ថ្ងៃចាប់ផ្តើម បែរជាពុំបានទទួលទិដ្ឋាការគ្រប់គ្រាន់ចាំបាច់សម្រាប់ចូលទឹកដីចិនទៅវិញ។ បើតាមមន្ត្រីអង្គការសុខភាពពិភពលោក មានអ្នកជំនាញម្នាក់អាចត្រលប់ក្រោយទាន់ ឯអ្នកជំនាញម្នាក់ទៀត ទៅដល់ពាក់កណ្តាលផ្លូវហើយ ហើយកំពុងរង់ចាំនៅក្នុងប្រទេសមួយផ្សេងទៀត។
ជំងឺកូវីដ១៩នៅធ្ងន់ធ្ងរខ្លាំង ចិនធ្វើគ្រប់យ៉ាងដើម្បីការពារនិង គ្រប់គ្រងជំងឺនេះ។ វាមិនមែន ត្រឹមតែបញ្ហាផ្តល់វីសា/ទិដ្ឋាការ ទេ ! នេះបើជាប្រតិកម្មតបរបស់អ្នកនាំពាក្យក្រសួងការបរទេសចិន នៅព្រឹកថ្ងៃពុធទី ៦មករា ដោយធានាអះអាងថា ចិន និងអង្គការសុខភាពពិភពលោកកំពុងបន្តចរចាគ្នា អំពីកាលបរិច្ឆេទច្បាស់លាស់ និងបែបបទនៃទស្សនកិច្ចរបស់ក្រុមអ្នកជំនាញ។
ក្នុងក្របខ័ណ្ឌនៃការអង្កេតរកដើមហេតុនៃកូវីដ១៩ ចិនត្រូវទទួលក្រុមអ្នកជំនាញរបស់អង្គការសុខភាពពិភពលោក តែទស្សនកិច្ចនេះជារឿងរសើបខ្លាំងណាស់សម្រាប់អាជ្ញាធរចិន។ ចិនខ្វល់ខ្វាយមិនចង់មានទំនួលខុសត្រូវលើជំងឺរាតត្បាតដែលបានសម្លាប់ជីវិតមនុស្សនៅលើពិភពលោកអស់ជាង១លាន៨សែននាក់រួចមកហើយទេ។ ប្រសិនបើអ្នកជំនាញបានទទួលទិដ្ឋាការគ្រប់គ្រាន់អាចចូលជាន់ទឹកដីចិនបានហើយ អ្នកជំនាញទាំងអស់ត្រូវធ្វើចត្តាឡីស័ក ១៤ថ្ងៃទៀត ពោលគឺក្រុមអ្នកជំនាញអាចចាប់ផ្តើមបេសកម្មបាន នៅចុងខែ ក្រោយថ្ងៃទី ២០មករា ថ្ងៃដែលអាមេរិកមានរដ្ឋាភិបាលថ្មី។ ចិនយល់ព្រមឱ្យមានការអង្កេតឯករាជ្យ ដោយខ្លួនជាកំណត់ពេលវេលា មានន័យថាចិនចាំទាល់តែដាននៃការចម្លងដំបូង ពិបាករក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ