ប្រធានាធិបតីរុស្ស៊ីវ្ល៉ាឌីមៀរ ពូទីនកំពុងប្រើយុទ្ធសាស្រ្ត និងសេណារីយ៉ូស៊ីរីសម្រាប់សង្រ្គាមនៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៥:៥៥
អស់រយៈពេលជាង ១ខែដែលរុស្ស៊ីបានធ្វើសង្រ្គាមឈ្លានពានអ៊ុយក្រែន។ ជារៀងរាល់ថ្ងៃតាំងពីថ្ងៃដំបូង កងទ័ពរុស្ស៊ីបន្តទម្លាក់គ្រាប់បែក និងបាញ់គ្រាប់មីស៊ីលសំដៅលើអគារ និងលំនៅដ្ឋានរបស់ប្រជាជន។ តែរូបភាពដែលបានធ្វើឲ្យពិភពលោកចាប់អារម្មណ៍ និងអាណោចអាធមខ្លាំង គឺការរត់ភៀសខ្លួនរបស់ជនស៊ីវិលក្មេង ចាស់ដើម្បីគេចពីសង្រ្គាម។ អ្នកខ្លះបានរត់ចេញពីប្រទេសទៅជ្រកកោននៅក្នុងប្រទេសក្បែរខាង និងអ្នកខ្លះទៀតបានធ្វើការបម្លាស់ទីក្នុងស្រុក។ កំណត់សម្គាល់មួយទៀត យុទ្ធសាស្រ្ត និងសេណារីយ៉ូសង្រ្គាមដែលប្រធានាធិបតីរុស្ស៊ីពូទីនកំពុងធ្វើលើអ៊ុយក្រែនពេលនេះ គឺដូចគ្នានឹងអ្វីដែលពូទីនបានធ្វើលើប្រទេសស៊ីរីកាលពីឆ្នាំ ២០១៥។
មិនថាជាទីក្រុងធំ ឬជាទីក្រុងតូច មិនថានៅពេលយប់ ឬនៅពេលថ្ងៃ កងទ័ពរុស្ស៊ីបានស្រោចគ្រាប់បែក និងគ្រាប់មីស៊ីលសឹងគ្មានរលួសថ្ងៃដោយមិនគិតជាកន្លែងអ្វីទេ។ រូបភាពទាំងអស់នេះនាំឲ្យគេនឹកឃើញនូវអន្តរាគមន៍យោធារបស់រុស្ស៊ីលើទឹកដីស៊ីរីកាលពីឆ្នាំ ២០១៥។ គួររម្លឹកបន្តិចថា ស៊ីរីបានផ្តើមធ្លាក់ក្នុងសង្រ្គាមស៊ីវិលក្នុងឆ្នាំ ២០១១ តាមរយៈការងើបបះបោររបស់ប្រជាជនប្រឆាំងនឹងប្រធានាធិបតីអាសាដ។ ជាង ១០ឆ្នាំក្រោយមក អាសាដកំពុងបន្តកាន់អំណាចណែនក្នុងដៃនៅក្នុងប្រទេសមួយដែលខ្ទេចខ្ទីរគ្មានសល់ និងមានប្រជាជនជាច្រើនលាននាក់បានរត់ភៀសខ្លួនចេញពីប្រទេស ឬមួយក៏ប្តូរកន្លែងរស់នៅក្នុងស្រុក។
បើកុំតែមានការជួយគាំទ្រ និងអន្តរាគមន៍យោធាពីរុស្ស៊ីរបស់ប្រធានាធិបតីពូទីន ម្ល៉េះអាសាដក៏មិនអាចបន្តតោងអំណាចមកដល់បច្ចុប្បន្ន ហើយទឹកដីស៊ីរី ពិសេសរចនាសម្ព័ន្ធរបស់ទីក្រុងធំ តូចក៏ប្រហែលមិនត្រូវបានកម្ទេចឲ្យរៀបដល់ដីដូចសព្វថ្ងៃដែរ។ ពិតណាស់ គេមិនអាចប្រដូចស្ថានការណ៍អ៊ុយក្រែនទៅនឹងស្ថានការណ៍ស៊ីរីបានទេ ព្រោះអ៊ុយក្រែនមិនបានធ្លាក់ក្នុងសង្រ្គាមហែកហួរផ្ទៃក្នុងដូចស៊ីរីដែលតម្រូវឲ្យមានអន្តរាគមន៍យោធាពីរុស្ស៊ី ហើយរុស្ស៊ីក៏គ្មានហេតុផលអ្វីដែលត្រូវចូលឈ្លានពានអ៊ុយក្រែនដែរ។ អ៊ីចឹងហើយបានជាទង្វើរបស់រុស្ស៊ីពេលនេះបានបំផុសឲ្យមានការថ្កោលទោសជាសកល និងការដាក់ទណ្ឌកម្មចាស់ដៃពីក្រុមបស្ចិមប្រទេស។
ក៏ប៉ុន្តែ និងអ្វីដែលគេអាចប្រដូចបានរវាងអ៊ុយក្រែន និងស៊ីរីពេលនេះ គឺការដែលពូទីនបានប្រើយុទ្ធសាស្រ្ត និងសេណារីយ៉ូសង្រ្គាមដូចគ្នាបិះបិទនៅលើសមរភូមិ។ ផ្ទាំងស៊ីបនៃយុទ្ធសាស្រ្ត និងសេណារីយ៉ូសង្រ្គាមរបស់ពូទីន គឺការបំផ្លាញហេដ្ឋារចនាសម្ព័ន្ធស៊ីវិល សាលារៀន អគារ ឬមួយក៏មន្ទីរពេទ្យក្នុងគោលដៅបំភិតបំភ័យប្រជាជន។ តាមរយៈយុទ្ធសាស្រ្ត និងសេណារីយ៉ូសង្រ្គាមរបៀបនេះ ពូទីនបានទុកផ្លូវតែពីរគត់ឲ្យប្រជាជនជ្រើសរើស ឬមួយចុះចូល ឬមួយក៏រត់ចេញ។ តែគេបានសង្កេតឃើញថាមកទល់ពេលនេះ ប្រជាជនអ៊ុយក្រែនសឹងតែទាំងអស់បានជ្រើសយកផ្លូវភៀសខ្លួនចេញពីប្រទេស ឬមួយក៏ប្តូរទីតាំងក្នុងស្រុកជាជាងជ្រើសយកផ្លូវចុះចូល។
លើសពីនេះ ប្រជាជនអ៊ុយក្រែន ប្រុស ស្រី ពិសេសប្រុសៗបានកាន់អាវុធ និងប្រើគ្រប់មធ្យោបាយទាំងអស់ដើម្បីរារាំង និងត តាំងទល់នឹងទាហានរុស្ស៊ី។ កម្មវត្ថុ និងការប្តេជ្ញាចិត្តរបស់ពួកគេមានតែមួយគត់ គឺការពារអធិបតេយ្យភាព និងបូរណភាពទឹកដីអ៊ុយក្រែន ទោះត្រូវបង់ថ្លៃក្នុងតម្លៃប៉ុន្មានក៏ដោយចុះ។ តើប្រជាជនអ៊ុយក្រែន និងប្រជាជនស៊ីរី ពិសេសក្រុមអ្នកប្រឆាំងកំពុងមានវាសនាដូចគ្នា ឬ?។ គេប្រហែលមិនអាច ឬមិនទាន់និយាយយ៉ាងដូចនេះបាននៅឡើយទេ។ អ្វីដែលគេអាចនិយាយបាន ក្រុមអ្នកប្រឆាំងនៅស៊ីរីកំពុងចូលរួមគាំទ្រ និងសម្តែងសាមគ្គីភាពជាមួយប្រជាជនអ៊ុយក្រែន ព្រោះចង់ ឬមិនចង់ រុស្ស៊ីរបស់ពូទីនបានក្លាយជាសត្រូវរួមរបស់ក្រុមអ្នកប្រឆាំងស៊ីរី និងអ៊ុយក្រែននៅពេលនេះ។
សាររបស់ក្រុមអ្នកប្រឆាំងនៅស៊ីរីសម្រាប់អ៊ុយក្រែន និងប្រជាជនអ៊ុយក្រែនទូទៅ គឺត្រូវក្លាហាន និងបន្តការតស៊ូដើម្បីការពារបូរណភាពទឹកដី និងបុព្វហេតុរបស់ខ្លួន។ គ្រូពេទ្យស៊ីរីម្នាក់ប្រចាំក្នុងទីក្រុងអ៊ីឡិបបានផ្តល់អនុសាសន៍ឲ្យប្រជាជនអ៊ុយក្រែនការពារមន្ទីរពេទ្យដោយចាក់បេតុងបន្ថែមនៅជុំវិញដើម្បីទប់ទល់នឹងគ្រាប់បែកសត្រូវរបស់ពូទីនដែលមិនបានបែងចែករវាងជនស៊ីវិលក្មេង ចាស់ អ្នករងរបួស និងក្រុមអ្នកប្រយុទ្ធទេ។ ទន្ទឹមនឹងប្រើយុទ្ធសាស្រ្តសង្រ្គាមដូចនៅស៊ីរី ពូទីនក៏បានយល់ព្រមឲ្យប្រើទ័ពស៊ីឈ្នួល ពិសេសទ័ពស៊ីរីដែលមានជំនាញប្រយុទ្ធក្នុងទីក្រុងដើម្បីជួយច្បាំងជាមួយទ័ពរុស្ស៊ីនៅអ៊ុយក្រែន។ ពីមួយថ្ងៃទៅមួយថ្ងៃ និងក៏ដូចជានៅស៊ីរី ទីក្រុងធំ តូចរបស់អ៊ុយក្រែនត្រូវបានគ្រាប់បែក និងគ្រាប់មីស៊ីលរុស្ស៊ីកម្ទេចមើលលែងយល់ និងមើលលែងស្គាល់។
ក៏ដូចជានៅស៊ីរី ការវាយប្រហារដោយគ្រាប់បែក និងគ្រាប់មីស៊ីលបានបង្ខំឲ្យប្រជាជនអ៊ុយក្រែនរត់ចោលស្រុក ឬបម្លាស់ទីក្នុងស្រុក។ គ្រាន់តែសង្រ្គាមជាង ១ខែកន្លងទៅ មានប្រជាជនអ៊ុយក្រែនចំនួន ៣លាន ៧សែននាក់បានភៀសខ្លួនទៅជ្រកកោននៅក្នុងប្រទេសជិតខាង និងមានប្រមាណ ៦លាន ៥សែនទៀតបានបង្ខំចិត្តបម្លាស់ទីក្នុងស្រុក។ នេះជាព្រឹត្តិការណ៍មួយដែលស៊ីរីបានស្គាល់ដូចគ្នា គ្រាន់តែថា មិនលឿនឆាប់រហ័សដូចអ៊ុយក្រែនទេ។ ទំរាំមានជនភៀសខ្លួន និងជនបម្លាស់ទីដូចអ៊ុយក្រែនសព្វថ្ងៃ ស៊ីរីបានស្គាល់សង្រ្គាមស៊ីវិលរ៉ាំរ៉ៃរាប់សិបឆ្នាំ។ ចំណែកអ៊ុយក្រែនទើបស្គាល់សង្រ្គាមតែជាង ១ខែប៉ុណ្ណោះ។
នេះបញ្ជាក់ឲ្យឃើញថា បើសង្រ្គាមបន្តអូសបន្លាយ ចំនួនជនភៀសខ្លួន និងជនបម្លាស់ទីអ៊ុយក្រែននឹងកើនឡើងថែមទៀត។ នេះស បញ្ជាក់ឲ្យឃើញថា យុទ្ធសាស្រ្ត និងសេណារីយ៉ូសង្រ្គាមដែលប្រធានាធិបតីរុស្ស៊ីពូទីនប្រើលើអ៊ុយក្រែនមានលក្ខណៈសាហាវ និងព្រៃផ្សៃជាងនៅស៊ីរីទៅទៀត។ ក្រុមអ្នកវិភាគយល់ថា ដើម្បីស្រោចស្រង់ស៊ីរី និងប្រជាជនស៊ីរី គេត្រូវចាត់ការត្រឹមអាសាដទាន់នៅមានពេល។ តែសម្រាប់អ៊ុយក្រែនវិញ ការកំចាត់ពូទីនទាន់នៅមានពេលមិនត្រឹមតែអាចស្រោចស្រង់អ៊ុយក្រែន និងប្រជាជនអ៊ុយក្រែនប៉ុណ្ណោះទេ តែប្រហែលជាអាចស្រោចស្រង់រុស្ស៊ី និងប្រជាជនរុស្ស៊ីផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ