រុស្ស៊ីអះអាងថា នឹងមិនផ្គត់ផ្គង់ហ្កាសឲ្យអឺរ៉ុបទទេៗទេ បើអឺរ៉ុបមិនប្រគល់ប្រាក់ជារូបិយបណ្ណ “រូប្ល”
ជម្លោះក្នុងវិស័យថាមពលហ្កាស រវាងរុស្ស៊ី និងក្រុមប្រទេសអឺរ៉ុប កំពុងលេចរូបរាង្គកាន់តែខ្លាំង ដោយសារតែបញ្ហាបង់ប្រាក់ថ្លៃហ្កាស។ រុស្ស៊ីរងទណ្ឌកម្មសេដ្ឋកិច្ច ធ្វើឲ្យរាំងខ្ទប់យ៉ាងខ្លាំងដល់ប្រព័ន្ធធនាគារ ព្រមទាំងសាច់ប្រាក់សុទ្ធ។ កាលពីថ្ងៃចន្ទម្សិលមិញ វិមានក្រឹមឡាំងបានអះអាងថា ចាប់ពីពេលនេះទៅ រុស្ស៊ីនឹងមិនផ្គត់ផ្គង់ហ្កាសឲ្យអឺរ៉ុប ទទេៗឡើយ បើអឺរ៉ុបមិនព្រមប្រគល់ប្រាក់ ជារូបិយបណ្ណ “រូប្ល” ឲ្យរុស្ស៊ីទេនោះ។ ការទាមទារ ដែលក្រុមប្រទេសអឺរ៉ុបបានបដិសេធ ដោយអះអាងថា វាមិនមានកំណត់ នៅក្នុងកិច្ចសន្យា។
ចុះផ្សាយនៅថ្ងៃ៖
កាលពីចុងសប្តាហ៍មុន លោកពូទីន បានប្រកាសថា ចង់ឲ្យក្រុមប្រទេស “មិនមែនជាមិត្ត” ដែលទិញហ្កាសរុស្ស៊ីទាំងអស់ ត្រូវតែបង់ប្រាក់មកឲ្យរុស្ស៊ី ជារូបិយបណ្ណរូប្ល ដែលជារូបិយបណ្ណជាតិរបស់រុស្ស៊ី។ ហើយនៅថ្ងៃចន្ទ ទី២៨ មីនា លោក Dmitri Peskov អ្នកនាំពាក្យវិមានក្រឹមឡាំង បានអះអាងថា ភាគីរុស្ស៊ីកំពុងតែរកមធ្យោបាយ ដើម្បីឲ្យអ្នកទិញហ្កាសរុស្ស៊ី ត្រូវតែបង់ប្រាក់មកឲ្យរុស្ស៊ី ជារូបិយបណ្ណជាតិរុស្ស៊ី។ អ្នកនាំពាក្យរូបនេះបន្ថែមថា រុស្ស៊ីមិនអាចបន្តផ្គង់ផ្គង់ហ្កាស ទទេៗឲ្យទៅអឺរ៉ុបបានតទៅទៀតទេ បើអឺរ៉ុបមិនបង់ប្រាក់ជារូបិយបណ្ណរូប្ល។
ក្រោយការដាក់កំហិតថ្មីនេះ ក្រុមប្រទេសអឺរ៉ុប បានប្រតិកម្មភ្លាមៗ ថាវាជារឿងមិនអាចទទួលយកបានទេ។ ប្រទេសអឺរ៉ុបមួយចំនួន ដូចជា អាល្លឺម៉ង់ អ៊ីតាលី ប៉ូឡូញ ដែលជាអ្នកទិញហ្កាសរុស្ស៊ីច្រើនបំផុតនោះ បានអះអាងថា គេគ្មានប្រាក់រូប្លឯណា ទៅបង់ឲ្យរុស្ស៊ីទេ។ ហើយជាងនេះទៀត ក្នុងកិច្ចសន្យាបានកំណត់តម្លៃហ្កាស ជាប្រាក់អឺរ៉ូ ដែលមានន័យថាអ្នកទិញ ត្រូវបង់ប្រាក់ ជាប្រាក់អឺរ៉ូ។
ថ្លែងនៅក្នុងកិច្ចប្រជុំ G7 នៅរសៀសថ្ងៃចន្ទ ទី២៨មីនា លោក Robert Habeck រដ្ឋមន្ត្រីក្រសួងសេដ្ឋកិច្ចអាល្លឺម៉ង់ បានលើកឡើងថា ការទាមទាររបស់រុស្ស៊ីនេះ គឺមានលក្ខណៈជាការបំពានកិច្ចសន្យា ជាឯកតោភាគី។ លោករដ្ឋមន្ត្រីសេដ្ឋកិច្ចអាល្លឺម៉ង់ បានសង្កត់បន្ថែមថា អ្វីដែលលោកពូទីនកំពុងធ្វើនេះ គឺបំភ័យក្រុមប្រទេសអឺរ៉ុប ឲ្យអឺរ៉ុបបាក់បែកគ្នា។ រដ្ឋមន្ត្រីសេដ្ឋកិច្ច នៃប្រទេស G7 បានប្រកាសរួមគ្នា ប្រាប់ទៅក្រុមហ៊ុនទាំងអស់ ដែលទិញហ្កាសពីរុស្ស៊ី មកចែកចាយនៅអឺរ៉ុប គឺត្រូវបន្តគោរពអ្វីដែលមានចែងក្នុងកិច្ចសន្យា ដែលមានសុពលភាព មិនត្រូវធ្វើតាមការទាមទាររបស់លោកពូទីនឡើយ។
គួរបញ្ជាក់ថា សេដ្ឋកិច្ចរុស្ស៊ី កំពុងតែរងសំពាធខ្លាំងណាស់ ដោយសារតែទណ្ឌកម្មសេដ្ឋកិច្ច ពីក្រុមប្រទេសបស្ចឹមលោក។ ប្រព័ន្ធធានាគារ និងហិរញ្ញវត្ថុរុស្ស៊ី កំពុងរងការរាំងខ្ទប់ យ៉ាងលំបាកលំបិន ដោយសារតែគ្មានចរាចរណ៍រូបិយបណ្ណ ជាមួយប្រទេសផ្សេង។ ការទាមទារឲ្យអ្នកទិញហ្កាស ត្រូវបង់ប្រាក់ឲ្យរុស្ស៊ីជាប្រាក់រូប្ល អាចជាយុទ្ធសាស្ត្រដែលលោកពូទីន ចង់ជួយវិស័យហិរញ្ញវត្ថុ និងធនាគារុស្ស៊ីដែលកំពុងតែខ្វះសាច់ប្រាក់។
ដោយឡែក យោងតាមការវិភាគរបស់លោក Eric Dor សាស្ត្រាចារ្យផ្នែកគ្រប់គ្រង នៅសកលវិទ្យាល័យកាតូលិកទីក្រុងលីស គឺអតិថិជនទិញហ្កាសរុស្ស៊ី មិនអាចប្តូរប្រាក់រូប្ល ហើយផ្ទេរទៅឲ្យរុស្ស៊ីបានដោយងាយឡើយ នៅក្នុងពេលនេះ ព្រោះថាប្រតិបត្តិការ ជាមួយធនាគាររុស្ស៊ីសឹងទាំងអស់ ត្រូវបានហាមឃាត់។ ទន្ទឹមគ្នានេះ ការដែលភាគីរុស្ស៊ី ចង់សើរើកិច្ចសន្យានាពេលនេះ វាហាចហុចឱកាស ឲ្យក្រុមប្រទេសអឺរ៉ុប ទាមទារកែប្រែចំណុចដែលគេចង់បានដែរ។ ជាក់ស្តែងដូចជាការកាត់បន្ថយថេរវេលានៃកិច្ចសន្យា ដើម្បីអាចផ្តាច់ខ្លួន ឈប់រំពឹងលើហ្កាសរុស្ស៊ី ឲ្យបានកាន់តែឆាប់ កាន់តែល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ