ប្រមុខដឹកនាំប៉ាឡេស្ទីនរិះគន់លោកខាងលិច រឿងស្តង់ដារពីរ រវាងបញ្ហាអ៊ុយក្រែន និងបញ្ហាប៉ាឡេស្ទីន
លោក ម៉ះមូដ អាបាស ប្រមុខដឹកនាំដែនដីប៉ាឡេស្ទីន បានរិះគន់ក្រុមលោកខាងលិច ថាបានប្រកាន់ ស្តង់ដារពីរ នៅចំពោះមុខបញ្ហាអ៊ុយក្រែន និងបញ្ហាប៉ាឡេស្ទីន។ ក្នុងវិបត្តិអ៊ុយក្រែន បស្ចិមលោក បានរូតរះពួតដៃគ្នា ដោយសំអាងលើច្បាប់អន្តរជាតិ សម្រុកដាក់ទណ្ឌកម្មរុស្ស៊ី ដែលចូលឈ្លានពានអ៊ុយក្រែន ប៉ុន្តែលោកខាងលិច មិនខ្វល់នឹងដាក់ទណ្ឌកម្មលើអ៊ីស្រាអែល ដែលប្រព្រឹត្តបទឧក្រិដ្ឋលើដែនដីប៉ាឡេស្ទីនទេ។
ចុះផ្សាយនៅថ្ងៃ៖
ស្តាប់ - ០១:៤៩
ប្រធានអាជ្ញាធរប៉ាឡេស្ទីន លោក អាបាស មិនថ្កោលទោសការឈ្លានពានរបស់រុស្ស៊ីលើអ៊ុយក្រែនទេ។ អ្នកការទូតលោកខាងលិចមិនពេញចិត្តឡើយ ហើយបើតាមប្រភពមិនបញ្ចេញឈ្មោះ ក្រុមបស្ចិមលោក ថែមទាំងបានលួចជំរុញ ឱ្យប៉ាឡេស្ទីនប្រកាសថ្កោលទោសទង្វើឈ្លានពានអ៊ុយក្រែនផង។
នៅថ្ងៃអាទិត្យទី ២៧មីនានេះ នាឱកាសធ្វើសន្និសីទកាសែតក្បែរលោកប្រមុខការទូតអាមេរិក អង់តូនី ប្លីងកិន ប្រមុខដឹកនាំប៉ាឡេស្ទីនវ័យ៨៧ឆ្នាំ បានស្តីបន្ទោសលោកខាងលិចដោយចំៗ រឿងប្រកាន់ស្តង់ដារពីរនៅចំពោះមុខបញ្ហាពីរគឺអ៊ុយក្រែននិងប៉ាឡេស្ទីន។ លោកអាបាស បានប្រកាសថា ព្រឹត្តិការណ៍នៅអឺរ៉ុបពេលនេះឆ្លុះឱ្យឃើញ ពីស្តង់ដារពីរ យ៉ាងច្បាស់ក្រលែត។ “អង្គការការពារសិទ្ធិមនុស្សអន្តរជាតិ អង្គការក្រៅរដ្ឋាភិបាលនៅអ៊ីស្រាអែល បានចោទនិងចាត់ទុក អាណានិគមដ៏ឧក្រិដ្ឋរបស់អ៊ីស្រាអែលថាមានទម្រង់ជាការបោសសម្អាតជាតិពិន្ធុ ប្រកាន់ពូជសាសន៍ ជាការជាន់ឈ្លីជនជាតិមួយ ជាការរំលោភជាន់ឈ្លីច្បាប់អន្តរជាតិ ប៉ុន្តែគ្មានប្រទេសណាមួយចាត់វិធានការបិទបញ្ចប់អំពើរបស់អ៊ីស្រាអែល និងដាក់ទោសអ៊ីស្រាអែលសោះ”។
នៅចំពោះមុខអ្នកសារព័ត៌មានមុនជំនួបជាមួយលោកប្លីងកិន លោកអាបាស បានអះអាងប៉ាឡេស្ទីនមិននៅខាងរុស្ស៊ីទេ តែប៉ាឡេស្ទីនមានអារម្មណ៍រងអំពើអយុត្តិធម៌។ ប៉ាឡេស្ទីនមិនថ្កោលទោសរុស្ស៊ី ដែលធ្លាប់ទទួលស្គាល់ប៉ាឡេស្ទីនជារដ្ឋឯករាជ្យមួយ មិនមែនជាការគាំទ្រទង្វើរបស់មូស្គូឡើយ តែជាការបង្ហាញឱ្យឃើញអំពីពុតត្បុតរបស់ក្រុមលោកខាងលិច ដែលដាក់ទណ្ឌកម្មយ៉ាងលឿនលើរុស្ស៊ី និងគ្មានសោះលើអ៊ីស្រាអែល។ អ៊ីស្រាអែលបានធ្វើអាណានិគមកិច្ចលើតំបន់ស៊ីហ្សកដានី ហ្សេរុយសាឡិមខាងកើតរបស់ប៉ាឡេស្ទីន តាំងពីឆ្នាំ១៩៦៧មក និងបានបិទខ្ទប់តំបន់ហ្កាហ្សាតាំងពី១៥ឆ្នាំមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ