ដំណើរទស្សនកិច្ចរបស់លោកស៊ី ជីនពីងនៅកូរ៉េខាងត្បូងជាសារព្រមានចំពោះមេដឹកនាំកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៥:១៧
នៅថ្ងៃព្រហស្បតិ៍នេះ លោកស៊ី ជីនពីង ប្រធានាធិបតីចិន បានចាប់ផ្តើមដំណើរទស្សនកិច្ចរយៈពេល ២ថ្ងៃ ទៅកាន់ប្រទេសកូរ៉េខាងត្បូង។ ដំណើរទស្សនកិច្ច ដែលបង្កប់ទៅដោយអត្ថន័យចង់ស្តីបន្ទោសដល់របបដឹកនាំក្រុងព្យុងយ៉ាង ដែលជារឿយៗតែងតែធ្វើទង្វើបង្កហេតុ មិនស្តាប់ការព្រមានរបស់ចិន។
ចាប់តាំងពីលោក ស៊ី ជីនពីង ឡើងកាន់តំណែងជាប្រធានាធិបតីចិន កាលពីខែមីនា ឆ្នាំ២០១៣មក លោកមិនទាន់ដែលធ្វើដំណើរទៅកាន់កូរ៉េខាងជើងម្តងនៅឡើយទេ ហើយគេក៏មិនទាន់ដែលឃើញលោកគីម ជុងអ៊ុន មេដឹកនាំកូរ៉េខាងជើង ទទួលការអញ្ជើញឲ្យទៅបំពេញទស្សនកិច្ច នៅក្នុងប្រទេសចិននៅឡើយដែរ។ ផ្ទុយទៅវិញ លោកប្រធានាធិបតីចិនបានជួបជាមួយលោកស្រីប៉ាក់ គុនហេ ប្រធានាធិបតីកូរ៉េខាងត្បូង ចំនួន ៤លើករួចមកហើយ ក្នុងនោះ មានជំនួបកំពូលចំនួន ២លើក គឺលើកទីមួយ នៅពេលលោកស្រីប៉ាក់ គុនហេ ទៅបំពេញទស្សនកិច្ចផ្លូវរដ្ឋ នៅចិន កាលពីខែមិថុនា ឆ្នាំ២០១៣ និងលើកទី២ នៅក្នុងដំណើរទស្សនកិច្ចផ្លូវរដ្ឋរបស់លោកស៊ី ជីនពីង ទៅកាន់កូរ៉េខាងត្បូង នៅពេលនេះ។
ការណ៍ដែលប្រធានាធិបតីចិនចេញទៅបំពេញទស្សនកិច្ច នៅកូរ៉េខាងត្បូង មុនទៅកូរ៉េខាងជើងបែបនេះ គឺជារឿងដែលមិនធ្លាប់មានទេ នៅក្នុងប្រវត្តិទំនាក់ទំនងចិន-កូរ៉េ រាប់សិបឆ្នាំកន្លងទៅនេះ។ គេសង្កេតឃើញថា ប្រធានាធិបតីចិនមុនៗគ្រប់រូបតែងតែទៅបំពេញទស្សនកិច្ចនៅកូរ៉េខាងជើង មុនទៅកូរ៉េខាងត្បូង ដើម្បីបង្ហាញថា ចិនផ្តល់អាទិភាពទៅលើទំនាក់ទំនងជាមួយកូរ៉េខាងជើង ជាងជាមួយកូរ៉េខាងត្បូង។ ម៉ៅ សេទុង ថែមទាំងធ្លាប់បានលើកឡើងទៀតថា ទំនាក់ទំនង រវាងចិន និងកូរ៉េខាងជើង មានភាពជិតដិតប្រៀបដូចជា “អណ្តាតនិងធ្មេញ”។
នៅក្នុងពេលបច្ចុប្បន្ននេះ ទំនាក់ទំនង “អណ្តាតនិងធ្មេញ” នេះ កំពុងតែមានការវិវឌ្ឍប្រែប្រួលខ្លាំង ជាពិសេស ចាប់តាំងពីលោកស៊ី ជីនពីង ឡើងកាន់តំណែងជាប្រធានាធិបតីចិន ហើយកូរ៉េខាងជើងដែលស្ថិតក្រោមការដឹកនាំរបស់លោក គីម ជុងអ៊ុន ហាក់ដូចជាមិនសូវស្តាប់ចិន ដែលធ្លាប់តែជាខ្នងបង្អែក។
ក៏ប៉ុន្តែ ជំនួបជាច្រើនលើក រវាងលោកស៊ី ជីនពីង និងលោកស្រីប៉ាក់ គុនហេ មិនមែនធ្វើឡើង ដើម្បីគ្រាន់តែជាការផ្ញើសារទៅកាន់មេដឹកនាំកូរ៉េខាងជើងនោះទេ ប៉ុន្តែ វាក៏ជាការបញ្ជាក់ឲ្យឃើញពីការរឹតចំណងទាក់ទងជាមួយកូរ៉េខាងត្បូងផងដែរ។
គួរបញ្ជាក់ថា នៅក្នុងពេលបច្ចុប្បន្ននេះ ចិន គឺជាដៃគូពាណិជ្ជកម្មលំដាប់ទីមួយរបស់កូរ៉េខាងត្បូង។ ការដោះដូរពាណិជ្ជកម្ម រវាងកូរ៉េខាងត្បូង និងចិន កាលពីឆ្នាំ២០១៣ មានទំហំទឹកប្រាក់រហូតដល់ទៅ ២៧៥ពាន់លានដុល្លារ ហើយប្រទេសទាំងពីរកំពុងតែជជែកគ្នា អំពីការចុះកិច្ចព្រមព្រៀងពាណិជ្ជកម្មសេរីជាមួយគ្នា ដើម្បីបង្កើនការដោះដូរពាណិជ្ជកម្មឲ្យកាន់តែច្រើនជាងសព្វថ្ងៃនេះទៅទៀត។
ជាការពិតថា ទំនាក់ទំនង រវាងកូរ៉េខាងត្បូង និងចិន មានចំណុចស្មុគស្មាញមួយ នៅត្រង់ថា កូរ៉េខាងត្បូង គឺជាសម្ព័ន្ធមិត្តរបស់អាមេរិក។ នៅលើទឹកដីកូរ៉េខាងត្បូង មានទាហានអាមេរិករាប់ម៉ឺននាក់កំពុងឈរជើង ហើយកូរ៉េខាងត្បូងពឹងផ្អែកខ្លាំងលើអាមេរិក ដើម្បីជួយក្នុងវិស័យការពារជាតិ។ ជាទូទៅ កូរ៉េខាងត្បូង ត្រូវប្រឈមមុខនឹងជម្រើសស្មុគស្មាញ រវាងម្ខាងតម្រូវការសេដ្ឋកិច្ច ដែលកូរ៉េខាងត្បូងត្រូវការទីផ្សារចិន ដើម្បីនាំចេញទំនិញ ហើយម្ខាងទៀត វិស័យការពារជាតិ ដែលត្រូវពឹងផ្អែកខ្លាំងលើអាមេរិក។
ក៏ប៉ុន្តែ សម្ព័ន្ធភាពយោធាជាមួយអាមេរិក ក៏មិនមែនជាឧបសគ្គរារាំងមិនឲ្យកូរ៉េខាងត្បូងបង្កើនទំនាក់ទំនងជាមួយចិននោះដែរ។ ចិន និងកូរ៉េខាងត្បូង សុទ្ធតែសំឡឹងឃើញពីផលប្រយោជន៍ពីការបង្កើនទំនាក់ទំនងនឹងគ្នា ទាំងខាងសេដ្ឋកិច្ច និងភូមិសាស្រ្តនយោបាយ។
ចិន និងកូរ៉េខាងត្បូងសុទ្ធតែធ្លាប់ឆ្លងកាត់ប្រវត្តិជូរចត់ដោយសារយោធាជប៉ុនដូចគ្នា កាលពីសម័យសង្រ្គាម ហើយសព្វថ្ងៃ ប្រទេសទាំងពីរសុទ្ធតែមានជម្លោះជាមួយជប៉ុនដូចគ្នា ទាំងជម្លោះដែនសមុទ្រ និងជម្លោះទាក់ទងនឹងប្រវត្តិសាស្រ្ត។
កូរ៉េខាងត្បូងត្រូវការចិន ដើម្បីជួយរារាំងកុំឲ្យកូរ៉េខាងជើងផលិតអាវុធនុយក្លេអ៊ែរ។ ចំណែកចិនវិញក៏អាចសំឡឹងឃើញឱកាសល្អមួយ ដើម្បីកាត់បន្ថយឥទ្ធិពលរបស់អាមេរិក នៅកូរ៉េខាងត្បូង ជាពិសេស ដើម្បីបង្ការទុកក្រែងថ្ងៃណាមួយ របបកុម្មុយនិស្តកូរ៉េខាងជើងត្រូវដួលរលំ ហើយកូរ៉េទាំងពីរត្រូវរួបរួមគ្នាវិញក្រោមរបបដឹកនាំកូរ៉េខាងត្បូង។ ចិនមិនចង់ឃើញប្រទេសដែលនៅជាប់នឹងព្រំដែនជាមួយចិន ស្ថិតក្រោមឥទ្ធិពលរបស់អាមេរិកទាំងស្រុង។
រដ្ឋាភិបាលក្រុងវ៉ាស៊ីងតោនក៏ហាក់ដូចជាសប្បាយចិត្តចំពោះការណ៍ដែលចិន និងកូរ៉េខាងត្បូងរឹតចំណងទាក់ទងនឹងគ្នានេះដែរ។ កាលពីថ្ងៃពុធម្សិលមិញនេះ ឧបការីរងទទួលបន្ទុកកិច្ចការអាស៊ីបូព៌ា នៃក្រសួងការបរទេសអាមេរិកបានសម្តែងនូវការអបអរសាទរនឹងការណ៍ ដែលលោកស៊ី ជីនពីង ទៅបំពេញទស្សនកិច្ចនៅកូរ៉េខាងត្បូង មុនទៅកូរ៉េខាងជើង។ សម្រាប់អាមេរិក ការណ៍ដែលចិន និងកូរ៉េខាងត្បូងមានទំនាក់ទំនងល្អនឹងគ្នា គឺជាចំណុចវិជ្ជមានមួយ នៅក្នុងការដោះស្រាយវិបត្តិនុយក្លេអ៊ែរកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ