ប្រតិបត្តិការកុម្ម៉ង់ដូអាមេរិកសម្លាប់ប៊ិនឡាដិននៅឆ្នាំ២០១១
ចុះផ្សាយនៅថ្ងៃ៖
ស្តាប់ - ០៧:៣៨
នៅក្នុងនាទីប្រវត្តិសាស្រ្តពិភពលោករបស់យើង នៅសប្តាហ៍នេះ សេង ឌីណា សូមលើកឡើង អំពីប្រតិបត្តិការរបស់កងកុម្ម៉ង់ដូអាមេរិក ដើម្បីសម្លាប់ប៊ិនឡាដិន នៅក្នុងប្រទេសប៉ាគីស្ថាន នៅឆ្នាំ២០១១។
នៅថ្ងៃទី២ ខែឧសភា ឆ្នាំ២០១១ លោកបារ៉ាក់ អូបាម៉ា បានប្រកាសឲ្យពិភពលោកទាំងមូលបានដឹងថា អូសាម៉ា ប៊ិនឡាដិន មេភេរវជនដែលគេតាមរកមុខបំផុត អស់រយៈពេល១០ឆ្នាំមកហើយនោះ ត្រូវបានសម្លាប់ នៅក្នុងប្រតិបត្តិការកុម្ម៉ង់ដូអាមេរិក នៅទីក្រុងអាបូតាបាដ ប្រទេសប៉ាគីស្ថាន។ អ្វីៗត្រូវបានរៀបចំធ្វើឡើងតាំងពីរាប់ខែមុន ដោយលាក់ការណ៍យ៉ាងសម្ងាត់បំផុត។
ខែមករា ឆ្នាំ២០១១ នៅក្នុងពេលដែកសេអ៊ីអា កំពុងតាមឃ្លាំមើលផ្ទះនៅអាបូតាបាដ ហើយគេនៅមិនទាន់ប្រាកដច្បាស់នៅឡើយផងថា អ្នកដែលនៅក្នុងផ្ទះ គឺជាប៊ិនឡាដិន លោកអូបាម៉ាបានចេញបញ្ជាឲ្យរៀបចំគម្រោងការណ៍ទុកជាស្រេច ដើម្បីត្រៀមបើកប្រតិបត្តិការវាយប្រហារលើប៊ិនឡាដិន។ ភារកិច្ចនេះត្រូវបានគេប្រគល់ទៅឲ្យកងកុម្ម៉ងដូដ៏ចំណានបំផុតរបស់អាមេរិក ដែលគេឲ្យឈ្មោះថា SEAL Team Six។
ថ្ងៃទី១១ខែមករា នាយកទីភ្នាក់ងារចារកិច្ចសេអ៊ីអា គឺលោក ឡេអន ប៉ាណេតា (Leon Panetta) បានជួបដោយសម្ងាត់ជាមួយមេបញ្ជាការកងកុម្ម៉ង់ដូអាមេរិក គឺឧត្តមនាវីឯក វីលីយ៉ាម ម៉ាក់រ៉េវិន (William McRaven) ដើម្បីពាំនាំយកបទបញ្ជាពីលោកអូបាម៉ា ឲ្យរៀបចំប្រតិបត្តិការកុម្ម៉ង់ដូនៅអាបូតាបាដ ប៉ុន្តែ មិនត្រូវបញ្ចេញឲ្យដឹងថា គោលដៅនៃការវាយប្រហារគឺប៊ិនឡាដិន។
ខែមេសា SEAL Team Six ចាប់ផ្តើមធ្វើការហាត់សមនៅក្នុងផ្ទះមួយដែលត្រូវបានគេសាងសង់ឡើងឲ្យដូចគ្នាទាំងស្រុងទៅនឹងផ្ទះនៅអាបូតាបាដ។
តាមគម្រោងការណ៍ កងកុម្ម៉ង់ដូ ចំនួន ២៣នាក់ រួមជាមួយនឹងអ្នកបកប្រែម្នាក់ នឹងធ្វើដំណើរតាមឧទ្ធម្ភាគចក្រចំនួន ២គ្រឿង ហោះហើរនៅពេលយប់ងងឹត ចេញពីប្រទេសអាហ្វហ្កានីស្ថាន សំដៅទៅអាបូតាបាដ។ ពេលទៅដល់ ទាហាន ៦នាក់ នឹងត្រូវដាក់ពង្រាយនៅខាងក្រៅរបងផ្ទះ, ៦នាក់ផ្សេងទៀត ត្រូវចុះតាមខ្សែពួរពីឧទ្ធម្ភាគចក្រទៅលើដំបូល វាយចាក់ចុះទៅជាន់ខាងក្រោម ចំណែកឯ ១២នាក់ផ្សេងទៀត ចុះចតនៅខាងក្នុងបរិវេណផ្ទះ វាយលុកចាប់ពីជាន់ផ្ទាល់ដី ឡើងទៅជាន់ខាងលើ។ គិតជាសរុប ចាប់តាំងពីពេលទៅដល់ រហូតពេលបញ្ចប់ប្រតិបត្តិការហើយឡើងឧទ្ធម្ភាគចក្រមកវិញ ការវាយឆ្មក់នេះត្រូវចំណាយពេលយ៉ាងយូរបំផុត ត្រឹម ៣០នាទី ធ្វើយ៉ាងណាចាកចេញពីអាបូតាបាដ ដោយសុវត្ថិភាព មុនពេលកងទ័ពប៉ាគីស្ថានមកដល់។
ដើម្បីគេចពីរ៉ាដារបស់កងទ័ពប៉ាគីស្ថាន ឧត្តមនាវីឯក ម៉ាក់រ៉េវិន បានធ្វើសំណើពិសេស សុំប្រើប្រាស់ឧទ្ធម្ភាគចក្រធុនទំនើបចុងក្រោយបំផុតដែលអាមេរិកទើបនឹងផលិតបាន ហើយដែលមានបច្ចេកវិទ្យាទំនើបខាងបំបាំងកាយពីរ៉ាដា។
នៅថ្ងៃទី២៦ ខែមេសា ក្រោយពីបានហាត់សមអស់រយៈពេលជិត១ខែ កងកុម្ម៉ង់ដូ Seal Team Six បានធ្វើដំណើរតាមយន្តហោះ ទៅកាន់មូលដ្ឋានទ័ពអាមេរិកមួយ នៅក្នុងទីក្រុងចាឡាឡាបាដ ប្រទេសអាហ្វហ្កានីស្ថាន ដើម្បីរង់ចាំបញ្ជាពីលោកអូបាម៉ា។ រហូតមកទល់នឹងពេលនោះ កងកុម្ម៉ង់ដូអស់ទាំងនេះនៅតែមិនទាន់ដឹងនៅឡើយទេថា ចំណុចស៊ីបនៃប្រតិបត្តិការដែលគេត្រៀមធ្វើនេះ គឺប៊ិនឡាដិន។
តាមការពិត សូម្បីតែសេអ៊ីអាក៏នៅមិនទាន់មានភស្តុតាងដែលអាចបញ្ជាក់ច្បាស់១០០% នៅឡើយដែរថា អ្នកដែលនៅក្នុងផ្ទះនៅអាបូតាបាដ គឺពិតជាប៊ិនឡាដិន។ ក្រោយពីបានតាមឃ្លាំមើលអស់រយៈពេលប្រមាណជា ៨ខែ សេអ៊ីអា បានធ្វើសេចក្តីសន្និដ្ឋានថា ប្រូបាប៊ីលីតេ ដែលប៊ិនឡាដិនស្ថិតក្នុងផ្ទះនៅអាបូតាបាដ គឺមានក្នុងចន្លោះប្រមាណពី ៦០% ទៅ ៧០% តែប៉ុណ្ណោះ។ ទោះជាយ៉ាងនេះក៏ដោយ លោកអូបាម៉ាបានសម្រេចឲ្យបើកប្រតិបត្តិការកុម្ម៉ង់ដូនៅអាបូតាបាដ។
ចាឡាឡាបាដ យប់ថ្ងៃសៅរ៍ ទី៣០មេសា ឆ្នាំ២០១១ ឧត្តមនាវីឯក ម៉ាក់រ៉េវិន បានចេញបញ្ជាឲ្យក្រុមកុម្ម៉ង់ដូត្រៀមខ្លួនបើកប្រតិបត្តិការវាយលុកលើផ្ទះនៅអាបូតាបាដ នៅថ្ងៃយប់ថ្ងៃអាទិត្យ ឈានចូលថ្ងៃចន្ទ ទី២ឧសភា ដោយប្រាប់ពួកគេថា គោលដៅនៃប្រតិបត្តិការនេះ គឺដើម្បីសម្លាប់អូសាម៉ា ប៊ិនឡាដិន មេភេរវជនដែលទទួលខុសត្រូវលើការវាយប្រហារភេរវកម្មដ៏ធំមិនធ្លាប់មានលើសហរដ្ឋអាមេរិក កាលពីថ្ងៃទី១១ កញ្ញា ឆ្នាំ២០០១។
ថ្ងៃអាទិត្យ ទី១ឧសភា ម៉ោង ១០និង៣០នាទីយប់ កុម្ម៉ង់ដូទាំង ២៣នាក់ ឡើងជិះឧទ្ធម្ភាគចក្រពិសេស ២គ្រឿង ចាកចេញពីបន្ទាយនៅចាឡាឡាបាដ តាមពីក្រោយដោយឧទ្ធម្ភាគចក្រធុន Chinook ២គ្រឿងផ្សេងទៀត ដឹកកងកុម្ម៉ង់ដូចំនួន ៥៦នាក់ ដែលជាទ័ពជំនួយ ឈប់ចាំនៅប្រមាណជា ៥០គីឡូម៉ែត្រពីអាបូតាបាដ ត្រៀមចាំជួយក្នុងករណីចាំបាច់។
នៅឯរដ្ឋធានីវ៉ាស៊ីងតោន លោកអូបាម៉ា និងមន្រ្តីជំនិតៗទទួលបន្ទុកខាងផ្នែកសន្តិសុខជាតិ ជួបប្រជុំគ្នា នៅសេតវិមាន ដើម្បីតាមដានមើលប្រតិបត្តិការ តាមរយៈរូបភាពថតផ្ទាល់ដោយដ្រូនឈ្លបយកការណ៍។
ម៉ោងប្រមាណជា ១២និង៣០នាទីរំលងអធ្រាត ឧទ្ធម្ភាគចក្រទាំង ២គ្រឿង របស់កងកុម្ម៉ង់ដូ SEAL Team Six បានហោះទៅដល់ផ្ទះនៅអាបូតាបាដ។ ឧទ្ធម្ភាគចក្រទី១ រៀបចំចុះចតនៅក្នុងបរិវេណផ្ទះ ក៏ប៉ុន្តែ ត្រូវធ្លាក់ដោយជួបនឹងបញ្ហាអាកាសធាតុ។ គ្រោះថ្នាក់នេះមិនបានបណ្តាលឲ្យមានអ្នករងរបួសនោះទេ ក៏ប៉ុន្តែ វាតម្រូវឲ្យមានការផ្លាស់ប្តូរផែនការ ដើម្បីសម្របខ្លួនទៅតាមស្ថានការណ៍ជាក់ស្តែង។ ឧទ្ធម្ភាគចក្រទី២ ដែលគ្រោងទម្លាក់កងកុម្ម៉ង់ដូនៅលើដំបូលផ្ទះ ក៏ត្រូវប្តូរមកចុះចតនៅខាងក្រៅបរិវេណផ្ទះវិញ រួចហើយទើបវាយលុកចូលតាមទ្វាររបងចូលទៅខាងក្នុង។
ក្រោយពីបានជួបប្រយុទ្ធគ្នាមួយប្រាវ ជាមួយនឹងភេរវជន នៅជាន់ផ្ទាល់ដី កុម្ម៉ង់ដូអាមេរិកបានវាយលុកទៅជាន់ខាងលើ ហើយបានរកឃើញ និងបាញ់សម្លាប់ប៊ិនឡាដិន នៅក្នុងបន្ទប់ដេក នៅជាន់ទី៣។
ប្រមាណជា ៣៨នាទី ក្រោយពីចាប់ផ្តើមប្រតិបត្តិការ កងកុម្ម៉ង់ដូអាមេរិក បានចាកចេញពីអាបូតាបាដ ហោះសំដៅទៅកាន់ប្រទេសអាហ្វហ្កានីស្ថាន ដោយនាំទៅជាមួយនូវសាកសពរបស់ប៊ិនឡាដិន ព្រមទាំងកុំព្យូទ័រ ដែលផ្ទុកនូវឯកសារសំខាន់ៗទាក់ទងនឹងក្រុមអាល់កៃដា។ មុននឹងចាកចេញ ពួកគេបានដាក់គ្រាប់បែកកម្ទេចឧទ្ធម្ភាគចក្រដែលធ្លាក់ ដើម្បីចៀសវាងកុំឲ្យបច្ចេកវិទ្យាដ៏ទំនើបនិងសម្ងាត់ត្រូវធ្លាក់ទៅក្នុងដៃសត្រូវ។
នៅវ៉ាស៊ីងតោន ម៉ោង១១ និង៣៥នាទីយប់ ថ្ងៃទី១ ឧសភា (ត្រូវជាម៉ោង ៨ និង៣៥នាទី ព្រឹកថ្ងៃទី២ឧសភា នៅប៉ាគីស្ថាន) លោកអូបាម៉ា បានធ្វើសេចក្តីថ្លែងការណ៍ជាសាធារណៈ ប្រកាសឲ្យពលរដ្ឋអាមេរិក ក៏ដូចជា ពិភពលោកទាំងមូលដឹង អំពីការស្លាប់របស់អូសាម៉ា ប៊ិនឡាដិន នៅក្នុងប្រតិបត្តិការកុម្ម៉ង់ដូអាមេរិក ក្នុងប្រទេសប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ