ហេតុអ្វីបានជាកូរ៉េខាងជើងព្រមផ្អាកកម្មវិធីនុយក្លេអ៊ែរនៅពេលនេះ?
ចុះផ្សាយនៅថ្ងៃ៖
ស្តាប់ - ០៣:៣៥
កាលពីថ្ងៃពុធ កូរ៉េខាងជើងបានប្រកាសថានឹងសុខចិត្តផ្អាកកម្មវិធីនុយក្លេអ៊ែររបស់ខ្លួន ហើយអនុញ្ញាតឲ្យក្រុមមន្រ្តីអធិការកិច្ចនុយក្លេអ៊ែររបស់អ.ស.ប.វិលត្រឡប់ចូលមកក្នុងប្រទេសកូរ៉េខាងជើងវិញ។ ចំណែកភាគីអាមេរិកវិញ បានសន្យាថានឹងផ្តល់ជំនួយជាស្បៀងអាហារចំនួន ២៤ម៉ឺនតោនដល់កូរ៉េខាងជើង ជាថ្នូរនឹងការផ្អាកកម្មវិធីនុយក្លេអ៊ែរនេះ។ ក៏ប៉ុន្តែ សំណួរសួរថា តើកូរ៉េខាងជើងផ្អាកកម្មវិធីនុយក្លែអ៊ែរ ដោយសារតែចង់បានជំនួយជាស្បៀងអាហារនេះមែន ឬក៏មានមូលហេតុអ្វីផ្សេងទៀត?
នៅខែកញ្ញា ឆ្នាំ២០០៥ កូរ៉េខាងជើងបានព្រមព្រៀងថានឹងបញ្ឈប់កម្មវិធីនុយក្លេអ៊ែររបស់ខ្លួន ជាថ្នូរនឹងជំនួយសេដ្ឋកិច្ច ការដកទណ្ឌកម្ម និងការភ្ជាប់ទំនាក់ទំនងឡើងវិញជាមួយសហគមន៍អន្តរជាតិ។ ក៏ប៉ុន្តែ នៅខែមេសា ឆ្នាំ២០០៩ កូរ៉េខាងជើងបានធ្វើការបាញ់សាកល្បងមីស៊ីលអន្តរទ្វីប និងអាវុធនុយក្លេអ៊ែរ ដែលធ្វើឲ្យក្រុមប្រឹក្សាសន្តិសុខចេញសេចក្តីថ្លែងការណ៍ថ្កោលទោស។
កូរ៉េខាងជើងក៏បានដកខ្លួនចេញពីការចរចា ៦ភាគី បណ្តេញមន្រ្តីអធិការកិច្ចនុយក្លេអ៊ែររបស់អ.ស.ប.ចេញពីប្រទេស ហើយចាប់ផ្តើមបន្តកម្មវិធីនុយក្លេអ៊ែររបស់ខ្លួនតទៅទៀត។ ចាប់ពីពេលនោះ ការចរចារកដំណោះស្រាយវិបត្តិនុយក្លេអ៊ែរកូរ៉េខាងជើងត្រូវជាប់គាំងទាំងស្រុង។
ស្រាប់តែមកដល់ថ្ងៃពុធ ២៩ កុម្ភៈនេះ កូរ៉េខាងជើងបានធ្វើការប្រកាសដ៏គួរឲ្យភ្ញាក់ផ្អើលមួយថាខ្លួននឹងផ្អាកកម្មវិធីនុយក្លេអ៊ែរ ហើយនឹងអនុញ្ញាតឲ្យមន្រ្តីអធិការកិច្ចនុយក្លេអ៊ែររបស់ AIEA វិលត្រឡប់ចូលមកកូរ៉េខាងជើងវិញ។ ជាផ្លូវការ កូរ៉េខាងជើងសុខចិត្តផ្អាកកម្មវិធីនុយក្លេអ៊ែរនេះ ជាថ្នូរនឹងជំនួយជាស្បៀងអាហារពីសហរដ្ឋអាមេរិក។
ប្រសិនបើគេមើលទៅលើស្ថានភាពបច្ចុប្បន្ននៅកូរ៉េខាងជើង ដែលប្រជាជន ប្រមាណជាង ៦លាននាក់ កំពុងប្រឈមមុខនឹងការខ្វះស្បៀង គេគួរតែអាចនិយាយបានថា ជំនួយជាស្បៀងអាហារ ២៤ម៉ឺនតោន របស់អាមេរិក គឺពិតជាមានសារៈសំខាន់សម្រាប់កូរ៉េខាងជើង។ ក៏ប៉ុន្តែ តើវាមានសារៈសំខាន់ សម្រាប់របបដឹកនាំក្រុងព្យុងយ៉ាង រហូតដល់សុខចិត្តផ្អាកកម្មវិធីនុយក្លេអ៊ែររបស់ខ្លួនមែនឬ?
បើយើងពិនិត្យឲ្យបានហ្មត់ចត់ទៅ យើងឃើញថា ប្រជាជនកូរ៉េខាងជើងជួបនឹងគ្រោះអត់ឃ្លានជាយូរណាស់មកហើយ ប៉ុន្តែ មេដឹកនាំកូរ៉េខាងជើងតែងតែយកការអភិវឌ្ឍវិស័យយោធាធំជាងសុខមាលភាពរបស់ប្រជាជន។ មេដឹកនាំកូរ៉េខាងជើងតែងតែយល់ថា កម្មវិធីនុយក្លេអ៊ែរយោធារបស់ខ្លួន គឺជាអាវុធដ៏សំខាន់បំផុត ដើម្បីឲ្យកូរ៉េខាងជើងអាចឈរជើង នៅលើឆាកអន្តរជាតិ ទល់នឹងសហរដ្ឋអាមេរិកបាន។
ដូច្នេះ ត្រឹមតែជំនួយជាស្បៀងអាហារមួយមុខមិនមែនជាមូលហេតុចម្បង ដែលជំរុញឲ្យកូរ៉េខាងជើងសុខចិត្តផ្អាកកម្មវិធីនុយក្លេអ៊ែរពេលនេះទេ។ ជាការពិតថា កូរ៉េខាងជើងត្រូវការស្បៀងអាហារ ប៉ុន្តែ អ្វីដែលសំខាន់ជាងជំនួយស្បៀងអាហារនេះទៅទៀត គឺការព្រមព្រៀងជាលក្ខណៈទ្វេភាគីជាមួយសហរដ្ឋអាមេរិក។
តាំងពីដើមរៀងមក មេដឹកនាំកូរ៉េខាងជើងតែងតែចាត់ទុកថា ជម្លោះនៅឧបទ្វីបកូរ៉េ គឺជាជម្លោះរវាងកូរ៉េខាងជើង និងសហរដ្ឋអាមេរិក។ កូរ៉េខាងត្បូងវិញ គ្រាន់តែជាកូនជឹងរបស់អាមេរិកតែប៉ុណ្ណោះ។ មេដឹកនាំកុម្មុយនិស្តក្រុងព្យុងយ៉ាងមិនដែលចាត់ទុកកូរ៉េខាងត្បូងថាជាប្រទេសឯករាជ្យមួយនោះទេ។
ហេតុដូច្នេះហើយបានជាកូរ៉េខាងជើងតែងតែទាមទារចរចាតែពីរនាក់អាមេរិក ដើម្បីជជែកអំពីសំណុំរឿងនុយក្លេអ៊ែរ ការដកទណ្ឌកម្ម និងការចុះកិច្ចព្រមព្រៀងសន្តិភាពបញ្ចប់សង្រ្គាមកូរ៉េ។ ក៏ប៉ុន្តែ សហរដ្ឋអាមេរិកតែងតែបដិសេធមិនចរចាទ្វេភាគី ដោយទាមទារឲ្យដោះស្រាយបញ្ហានុយក្លេអ៊ែរ តាមរយៈយន្តការ ៦ភាគី ដែលធ្លាប់ធ្វើកន្លងមក។ ទើបតែចុងក្រោយថ្មីៗនេះ ដែលអាមេរិកសុខចិត្តចរចាទ្វេភាគីជាមួយកូរ៉េខាងជើង រហូតបានឈានដល់ការព្រមព្រៀងគ្នា ផ្អាកកម្មវិធីនុយក្លេអ៊ែរ ជាថ្នូរនឹងជំនួយស្បៀងអាហារ។
ថ្វីដ្បិតតែអាមេរិកទាមទារថា ការចរចាទ្វេភាគីនេះគ្រាន់តែជាការចរចា ដើម្បីបើកផ្លូវឆ្ពោះទៅចាប់ផ្តើមការចរចា ៦ភាគីឡើងវិញ ក៏ប៉ុន្តែ សម្រាប់មេដឹកនាំកូរ៉េខាងជើងការចុះកិច្ចព្រមព្រៀងទ្វេភាគីជាមួយអាមេរិក គឺជាជោគជ័យដ៏ធំមួយ។ មេដឹកនាំកូរ៉េខាងជើងអាចនឹងនិយាយបានថា នៅទីបំផុត ខ្លួនអាចទាញមហាអំណាចអាមេរិកឲ្យមកចរចាមួយទល់នឹងមួយបាន។
ជោគជ័យផ្នែកការទូតនេះ វាកាន់តែមានសារៈសំខាន់ថែមទៀត សម្រាប់លោកគីម ជុងអ៊ុន ដែលទើបនឹងឡើងមកកាន់អំណាច ហើយដែលត្រូវគេមើលឃើញថា ជាមេដឹកនាំមានវ័យក្មេងខ្ចី និងខ្វះបទពិសោធន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ