ការប្រកួតបាល់ទាត់ពិភពលោក៖ តើអ្នកណាជាអ្នកទទួលផលចំណេញ?
ចុះផ្សាយនៅថ្ងៃ៖
ស្តាប់ - ០៧:៥២
ការប្រកួតបាល់ទាត់ដណ្តើមពានរង្វាន់ពិភពលោក (World Cup 2010) ដែលមានរយៈពេល១ខែគត់ (ពីថ្ងៃទី១១មិថុនា ដល់ថ្ងៃទី១១កក្កដា) ពេលនេះ បានមកដល់ទីបញ្ចប់ហើយ។ អេស្ប៉ាញកំពុងតែអរសប្បាយនឹងជោគជ័យជាជើងឯកពិភពលោក។ ចំណែកអាហ្វ្រិកខាងត្បូងក៏កំពុងតែអរសប្បាយនឹងជោគជ័យក្នុងឋានៈជា ម្ចាស់ផ្ទះផងដែរ។ ក៏ប៉ុន្តែ សំណួរសួរថា តើអ្នកណាខ្លះដែលទាញយកផលចំណេញពីការប្រកួតបាល់ទាត់ពិភពលោកនេះ?
អេស្ប៉ាញបានក្លាយជាជើងឯកបាល់ទាត់ពិភពលោក ជាលើកទី១! ក្នុងពេលដែលអេស្ប៉ាញកំពុងហ៊ោកញ្ជ្រៀវនឹងជោគជ័យជាជើងឯកនេះ អាហ្វ្រិកខាងត្បូងក៏កំពុងអបអរនឹងជោគជ័យរបស់ខ្លួនដែរ គឺជោគជ័យក្នុងឋានៈជាម្ចាស់ផ្ទះ សម្រាប់ World Cup ដែលរៀបចំធ្វើជាលើកដំបូងបង្អស់ នៅលើទឹកដីនៃទ្វីបអាហ្វ្រិក។
មានអ្នកខ្លះយល់ថា អាហ្វ្រិកខាងត្បូងមិនមានសមត្ថភាពគ្រប់គ្រាន់ ដើម្បីធ្វើជាម្ចាស់ផ្ទះរៀបចំការប្រកួត World Cup នេះទេ។ គេបារម្ភខ្លាចខ្វះហេដ្ឋារចនាសម្ព័ន្ធ និងបញ្ហាអសន្តិសុខ។ ក៏ប៉ុន្តែ នៅទីបំផុត អាហ្វ្រិកខាងត្បូងបានរៀបចំការប្រកួតបាល់ទាត់ដ៏ល្អមួយ។ ល្អហួសពីការរំពឹងទុកទៅទៀតផង។ ហេដ្ឋារចនាសម្ព័ន្ធថ្មីៗ ទំនើបៗ មានគ្រប់គ្រាន់ សម្រាប់ការប្រកួត។ សន្តិសុខសណ្តាប់ធ្នាប់ក៏រក្សាបានល្អ។
តើអាហ្វ្រិកខាងត្បូងបានចំណេញអ្វីពីការធ្វើជាម្ចាស់ផ្ទះរៀបចំ World Cup នេះ? បើនិយាយពីផ្នែកហិរញ្ញវត្ថុ អាហ្វ្រិកខាងត្បូងមិនទទួលបានផលចំណេញពីការប្រកួត World Cup នេះទេ គឺមានតែខាតទៅវិញផង ពីព្រោះអាហ្វ្រិកខាងត្បូងបានចំណាយលុយដ៏ច្រើនសន្ធឹកសន្ធាប់ (៤០០០លានអឺរ៉ូ) ដើម្បីរៀបចំការប្រកួត ជាពិសេស គឺចំណាយទៅលើការសាងសង់ពហុកីឡាដ្ឋាន។ ចំណែកឯចំណូល ដែលបានមកពី World Cup នេះ មានមិនគ្រប់សម្រាប់ចំណាយផង។
ក៏ប៉ុន្តែ ទោះជាយ៉ាងណា ការសាងសង់ហេដ្ឋារចនាសម្ព័ន្ធ សម្រាប់រៀបចំ World Cup បានជួយបង្កើតការងារ ផ្តល់ប្រាក់ចំណូលដល់ប្រជាជនអាហ្វ្រិកខាងត្បូងរាប់ម៉ឺននាក់។ ម្យ៉ាងទៀត នៅក្រោយការប្រកួតបញ្ចប់ទៅ រាល់ហេដ្ឋារចនាសម្ព័ន្ធដែលសាងសង់រួច វានៅជារបស់អាហ្វ្រិកខាងត្បូងដដែល។
អ្នកខ្លះគិតថា ការធ្វើជាម្ចាស់ផ្ទះរៀបចំ World Cup អាចផ្តល់ផលចំណេញក្នុងរយៈពេលវែងចំពោះសេដ្ឋកិច្ច ដូចជា ការទាក់ទាញទេសចរ និងអ្នកវិនិយោគបរទេសឲ្យចូលទៅអាហ្វ្រិកខាងត្បូង ជាដើម។ ក៏ប៉ុន្តែ នេះគ្រាន់តែជាការប៉ាន់ស្មានប៉ុណ្ណោះ។ បើតាមបទពិសោធន៍កន្លងមក គេមិនមានភស្តុតាងដែលអាចបញ្ជាក់ថា ការរៀបចំការប្រកួតកីឡាធំៗ ដូចជា World Cup ឬក៏អូឡាំពិក នេះ ពិតជាផ្តល់ផលចំណេញផ្នែកសេដ្ឋកិច្ចដល់ប្រទេសជាម្ចាស់ផ្ទះនោះទេ។
ផលចំណេញដែលមិនអាចប្រកែកបាន សម្រាប់អាហ្វ្រិកខាងត្បូង គឺមោទនភាពជាតិ។ ប្រជាជនអាហ្វ្រិកខាងត្បូង ក៏ដូចជា ប្រជាជនទូទៅ នៅទ្វីបអាហ្វ្រិក មានមោទនភាពយ៉ាងខ្លាំង ដោយបានរៀបចំប្រកបដោយជោគជ័យ នូវការប្រកួតកីឡាដ៏អស្ចារ្យមួយនេះ។
បើគេនិយាយពីរឿងលុយ អ្នកចំណេញច្រើនជាងគេគឺសហព័ន្ធកីឡាបាល់ទាត់ពិភពលោក (FIFA)។ ប្រាក់ចំណូល ដែល FIFA ទទួលបានពីការលក់សិទ្ធិផ្សាយបន្តផ្ទាល់ ការលក់សំបុត្រចូលទស្សនា និងពីក្រុមហ៊ុនដែលជួយឧបត្ថម្ភ (Sponsor) មានរហូតដល់ទៅ ២ ៧០០លានអឺរ៉ូ។ ក្រោយពីផាត់ការចំណាយអស់ទៅ FIFA នៅសល់លុយចំណេញប្រមាណជា ៨០០លានអឺរ៉ូ។
ក្រុមជម្រើសជាតិ ដែលទៅចូលរួមប្រកួត ក៏ទទួលបានលុយរាប់លានដែរ អាស្រ័យទៅតាមលទ្ធផលនៃការប្រកួត៖ តិចបំផុត គឺ ៦,៥លានអឺរ៉ូ (៨លានដុល្លារ) សម្រាប់ក្រុមដែលធ្លាក់វគ្គជម្រុះក្នុងពូល ហើយច្រើនបំផុតគឺ ២០លានអឺរ៉ូ (៣០លានដុល្លារ) សម្រាប់អេស្ប៉ាញ ដែលជាជើងឯក។
អាជ្ញាកណ្តាល និងចៅក្រមខ្សែបន្ទាត់ នៅក្នុងការប្រកួត World Cup ទទួលបានលុយម្នាក់ៗ ពី ៣៥០០០ដុល្លារ ទៅ ៥៥០០០ដុល្លារ ក្នុងមួយប្រកួតៗ។
ក្រៅពីនេះ មានអ្នកទទួលផលប្រយោជន៍ដោយប្រយោលពីការប្រកួត World Cup នេះ រួមមាន អ្នកលក់សម្ភារៈកីឡា (ជាពិសេស អ្នកលក់ឯកសណ្ឋានក្រុមជម្រើសជាតិល្បីៗ) អ្នកលក់ទូរទស្សន៍ អ្នកលក់ស្រាបៀរ ។ល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ