រដ្ឋអាមេរិក ផ្នែកខ្លះ ត្រូវបិទទ្វារលែងដំណើរការ ព្រោះសភាមិនអនុម័តគម្រោងថវិកា សម្រាប់សង់ជញ្ជាំងព្រំដែន
ចុះផ្សាយនៅថ្ងៃ៖
ស្តាប់ - ០៥:៤៨
នៅអាមេរិក ដោយសារតែជម្លោះរឿងថវិកាសង់ជញ្ជាំងព្រំដែន ធ្វើឲ្យអាមេរិកមិនអាចអនុម័តច្បាប់ថវិកាថ្មី ហើយលោកប្រធានាធិបតី ដូណាល់ ត្រាំ សម្រេចឲ្យរដ្ឋាភិបាលសហព័ន្ធមួយផ្នែកត្រូវបិទទ្វារលែងដំណើរការ។ បុគ្គលិករដ្ឋ ប្រមាណ៨០ម៉ឺននាក់ ត្រូវផ្អាកមិនឲ្យធ្វើការ ឬត្រូវបង្ខំឲ្យធ្វើការ ដោយគ្មានប្រាក់ឧបត្ថម្ភ។
តាំងតែពាក់កណ្តាលអធ្រាត្រថ្ងៃសៅរ៍ទី២២ធ្នូនេះមកម្ល៉េះ ដែលរដ្ឋាភិបាលសហព័ន្ធអាមេរិក បានបិទទ្វារមួយផ្នែកខ្លះ លែងដំណើរការ។ លោកប្រធានាធិបតី ដូណាល់ ត្រាំ បានសម្រេចដូច្នេះ ពីព្រោះតែរដ្ឋាភិបាលរបស់លោកមិនបានទទួលបានគម្រោងថវិកាគ្រប់ចំនួន ដូចដែលលោក ចង់បាន។
លោកប្រធានាធិបតីអាមេរិក ចង់បានគម្រោងថវិក ចំនួន៥.៧ពាន់លានដុល្លារ ដើម្បីចាត់ចែងដំណើរការរដ្ឋ ពិសេសផ្នែកសន្តិសុខ។ ពោលគឺលោក ត្រាំ ចង់យកថវិកាសម្រាប់សាងសង់ជញ្ជាំងព្រំដែនជាមួយនឹងប្រទេសម៉ិកស៊ិក ដើម្បីរាំងខ្ទប់ជនភៀសខ្លួន។ ហើយនេះគឺជាការសន្យាមួយដ៏ចម្បងរបស់លោក ត្រាំ តាំងតែពីពេលយុទ្ធនាការបោះឆ្នោតប្រធានាធិបតី ឆ្នាំ២០១៦មកម្ល៉េះ។ លោកត្រាំ បានព្រមានញឹកញយហើយថា បើសភាមិនព្រមឲ្យលុយគ្រប់ចំនួនសម្រាប់កិច្ចការនេះទេ លោកនឹងសម្រេចបិទទ្វារលែងដំណើរការរដ្ឋសហព័ន្ធ។ គឺនៅយប់ថ្ងៃសុក្រម្សិលមិញ ដែលព្រឹទ្ធសភា ដែលត្រូវជជែកគ្នាដល់យប់ជ្រៅ ហើយទីបំផុត នៅតែមិនអាចរកការឯកភាពគ្នាបានដដែល។
គួររម្លឹកថា ច្បាប់ថវិកានេះ បានអនុម័តឆ្លងសភាតំណាងរួចហើយ តែនៅជាប់គាំងត្រឹមព្រឹទ្ធសភា។ នៅព្រឹទ្ធសភានេះ មានសមាជិកមកពីបក្សសាធារណរដ្ឋរបស់លោក ត្រាំ ចំនួន៥១ ក៏ប៉ុន្តែដើម្បីអនុម័តច្បាប់ថវិកាជាតិបាន គឺចាំបាច់ត្រូវមានចំនួនព្រឹទ្ធសមាជិក យ៉ាងហោច ចំនួន៦០នាក់ឡើងទៅ ដែលយល់ព្រម ទើបអាចអនុម័តបាន។ ដូច្នេះគឺត្រូវឲ្យមាន ព្រឹទ្ធសមាជិក មកពីបក្សប្រជាធិបតេយ្យ ចូលរួមយល់ព្រមដែរ ទើបអាចទៅរួច។ ក៏ប៉ុន្តែ ជំហររបស់បក្សប្រជាធិបតេយ្យ គឺមិនចង់ឲ្យមានការសាងសង់ជញ្ជាំងបិទទ្វារព្រំដែននេះទេ។
នៅពីក្រោយការជជែកគ្នាដ៏តាន់តឹង នាយប់ថ្ងៃសុក្រទី២១ធ្នូ ទីប្រឹក្សាលោកប្រធានាធិបតី រួមទាំងកូនប្រសាររបស់លោកត្រាំផង បានទៅចរចាស្ងាត់ៗជាមួយអ្នកតំណាងនៃព្រឹទ្ធសមាជិករបស់បក្សទាំងពីរ ក៏ប៉ុន្តែសម្រេចសម្រួចទៅ ចំនួនលុយដែលព្រឹទ្ធសភាចង់យល់ព្រមអនុម័តឲ្យនោះ គឺត្រឹមតែ ១.៦ពាន់លានដុល្លារប៉ុណ្ណោះ។ ចំនួននេះ គឺធ្វើឲ្យលោក ត្រាំ មិនអាចទទួលយកបាន ហើយប្រមុខរដ្ឋអាមេរិក នៅតែទាមទារ គម្រោងថវិកាជាង៥ពាន់លានដដែល។
តើការសម្រេចបិទទ្វារលែងដំណើរការផ្នែកខ្លះរបស់រដ្ឋាភិបាលសហព័ន្ធ នៅពេលនេះ ប៉ះពាល់អ្វីខ្លះ?
ការផ្អាក ឬលែងដំណើរការរដ្ឋសហព័ន្ធនេះ គឺជាលើកទី៣ហើយ តាំងតែពីពេលលោកប្រធានាធិបតី ដូណាល់ ត្រាំ ឡើងកាន់អំណាចបានពីរឆ្នាំមក។
សហរដ្ឋអាមេរិក មានរដ្ឋចំនួន៥២ ក្នុងនោះ គឺមានរដ្ឋចំនួន ៩ ត្រូវផ្អាកសេវាកម្មស្ទើរទាំងស្រុង។ ហើយចំណែកភ្នាក់ងាររដ្ឋសំខាន់ៗជាច្រើន ក៏ត្រូវផ្អាកនិងកាត់បន្ថយសកម្មភាពការងារ។ ក្រសួងសំខាន់ៗ ដែលត្រូវប៉ះពាល់ខ្លាំងនោះ គឺមានក្រសួងកសិកម្ម ពាណិជ្ជកម្ម នគរូបនីយកម្ម ក្រសួងមហាផ្ទៃ និងក្រសួងទទួលបន្ទុកខាងសន្តិសុខជាតិជាដើម។ ចំណែកក្រសួងយុត្ថិធម៌និងក្រសួងហិរញ្ញវត្ថ ក៏ទំនងជារងការប៉ះពាល់ខ្លាំងដែរ។ សូម្បីតែភ្នាក់ងារអវកាស NASA ក៏ទទួលរងចំហាយនៃវិបត្តិនេះដែរ។ នេះបើតាមកាសែត The New York Times។
អ្នកទទួលរងគ្រោះខ្លាំង និងដោយផ្ទាល់នោះ គឺជាបុគ្គលិករបស់រដ្ឋអាមេរិកតែម្តង។ អ្នករដ្ឋការចំនួនដល់ទៅ១ភាគ៤ ត្រូវរកការលំបាកពីរឿងលុយកាក់ប្រចាំថ្ងៃ។ ពីព្រោះថា បុគ្គលិករបស់រដ្ឋាភិបាលសហព័ន្ធ ប្រមាណជា ៨០ម៉ឺននាក់ ត្រូវគ្រោះដោយសារតែរឿងនេះ។ ក្នុងនោះប្រមាណជា ៤២ម៉ឺននាក់ ត្រូវបន្តទៅធ្វើការដោយគ្មានទទួលប្រាក់ខែ ឬលុយឧបត្ថម្ភអ្វីទេ បើទោះបីជាក្នុងឱកាសបុណ្យណូអែលនិងឆ្លងឆ្នាំថ្មី ក៏ដោយចុះ។ ហើយបុគ្គលិករដ្ឋ ប្រមាណ៣៨ម៉ឺននាក់ នឹងត្រូវអញ្ជើញឲ្យសម្រាកនៅផ្ទះ។ តែការឈប់សម្រាកពីការងាររយៈពេលខ្លីនេះ ក៏គ្មានបានការទូរទាត់លុយកាក់ឲ្យដែរ។
តើវិបត្តិនេះ អាចនឹងត្រូវពន្យារពេលរហូតដល់ពេលណាទៅ?
ការផ្អាកដំណើរការរដ្ឋសហព័ន្ធយូរប៉ុណ្ណា គឺគ្មាននរណាអាចឆ្លើយបាន ក្រៅពីព្រឹទ្ធសភាអាមេរិកនោះទេ។ ពិសេសគឺសមាជិកព្រឹទ្ធសភាដែលមកពីបក្សប្រជាធិបតេយ្យតែម្តង។ នៅពេលដែលយើងកំពុងផ្សាយនេះ ព្រឹទ្ធសភាអាមេរិកក៏កំពុងតែជជែកគ្នារកដំណោះស្រាយដែរ ព្រោះថា ម្យ៉ាង សមាជិកព្រឹទ្ធសភា ក៏មិនចង់ឃើញរដ្ឋអាមេរិកលែងដំណើរដូច្នេះដែរ ពិសេសក្នុងកំពុងលេងមានបុណ្យទានដូច្នេះផង។ ចំពោះប្រធានធិបតីអាមេរិក ការយកឱកាសនេះ សម្រាប់ដាក់សម្ពាធដល់ព្រឹទ្ធសមាជិក ក៏ជាក្បួនយុទ្ធសាស្ត្រមួយមិនអន់ប៉ុន្មានដែរ។
ទោះយ៉ាងណា លោកប្រធានាធិបតី ដូណាល់ ត្រាំ បានថ្លែងក្តីសង្ឃឹមថា ការបិទទ្វារនិងផ្អាកដំណើរការរដ្ឋាភិបាលសហព័ន្ធនេះ គឺអាចមានរយៈពេលខ្លី មិនយូរឡើយ។ ហើយបើតាមការស្ទាប់ស្ទង់ប៉ាន់ប្រមាណរបស់អ្នកវិភាគនយោបាយមួនចំនួន គឺវិបត្តិនេះអាចនឹងត្រូវដោះស្រាយរួច នៅដើមខែមករាឆ្នាំថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ