នុយក្លេអ៊ែរអ៊ីរ៉ង់៖អាមេរិកអាចនឹងផ្អាកការដាក់ទ័ណ្ឌកម្មថ្មីលើអ៊ីរ៉ង់
ចុះផ្សាយនៅថ្ងៃ៖
ស្តាប់ - ០៥:២០
នៅសហរដ្ឋអាមេរិក លោកស្រី Wendy Sherman អ្នកចរចាភាគីអាមេរិកំាងបានស្នើឲ្យសភាអាមេរិកកាត់បន្ថយ និងព្យួរចោលគម្រោងដាក់ទ័ណ្ឌកម្មថ្មីលើប្រទេសអ៊ីរ៉ង់ស្តីពីបញ្ហានុយក្លេអ៊ែរ។ សំណើនេះត្រូវបានធ្វើឡើង ក្រោយពីមានកិច្ចចរចា ៦ភាគីស្តីពីរឿងនុយក្លេអ៊ែរអ៊ីរ៉ង់ក្នុងទីក្រុងហ្សឺណែវ ប្រទេសស្វីសកាលពីថ្ងៃទី១៥ និង ១៦ តុលាកន្លងមក និងត្រៀមបើកកិច្ចចរចាជាថ្មីនៅថ្ងៃទី៧ និង៨ វិច្ឆិកាខាងមុខ។ ទន្ទឹមគ្នានេះ ក្រុមប្រទេសសម្ព័ន្ធមិត្តអាមេរិកនៅដើមបូព៌ាកំពុងបារម្ភពីកាយវិការទន់ជ្រាយរបស់លោកអូបាម៉ានៅចំពោះមុខវិបត្តិស៊ីរី និងវិបត្តិនុយក្លេអ៊ែរអ៊ីរ៉ង់។
អ្វីដែលលោកស្រី Wendy បានស្នើឲ្យសភាកាត់បន្ថយ ឬមួយក៏ផ្អាកការដាក់ទ័ណ្ឌកម្មសេដ្ឋកិច្ចជាថ្មីប្រឆំាងនឹងប្រទេសអ៊ីរ៉ង់នោះ មកពីលោកស្រីចង់ទុកផ្លូវចរចាតាមសន្តិវិធី ជាជាងការប្រើទ័ណ្ឌកម្មដែលនឹងរឹតតែធ្វើឲ្យបញ្ហាដ៏ស្មុគស្មាញមួយនេះកាន់តែស្មុគស្មាញបន្ថែមទៀត និងកាន់តែអូសបន្លាយ។ ដូចគេបានដឹងហើយថា តំាងពីអ៊ីរ៉ង់មានប្រធានាធិបតីថ្មី គឺលោកហាស់សាន រ៉ូហានីមក ទំនាក់ទំនងរវាងអ៊ីរ៉ង់ និងក្រុមប្រទេសលោកខាងលិច ពិសេសអាមេរិក គឺមានភាពធូរស្រាលច្រើន គឺមិនតានតឹងដូចក្នុងជំនាន់លោកប្រធានាធិបតី Mahmoud Ahmadinejad ទេ។
ជាក់ស្តែងនៅក្នុងឱកាសមហាសន្និបាតអង្គការសហប្រជាជាតិថ្មីៗនេះក្នុងទីក្រុងញូយ៉ក លោករ៉ូហានីត្រូវបានថ្នាក់ដឹកនំាប្រទេសលោកខាងលិចជាច្រើនរូបទទួលជួបសំណេះសំណាល ក្នុងនោះ ក៏មានទំាងការសន្ទនាជាមួយលោកប្រធានាធិបតីអូបាម៉ាតាមទូរស័ព្ទទៀតផង។ បន្ទាប់មក ការបង្ហាញជំហរចង់ដោះស្រាយបញ្ហាឲ្យបានឆាប់រហ័សរបស់រូបលោករ៉ូហានីផ្ទាល់។ ទំាងនេះមិនភ្លេចទេ អំពីលទ្ធផលប្រកបដោយវិជ្ជមាន និងមានលក្ខណៈស្ថាបនានៃកិច្ចចរចា ៦ភាគីស្តីពីសំណុំរឿងនុយក្លេអ៊ែរអ៊ីរ៉ង់កាលពីថ្ងៃទី១៥ និង ១៦ តុលាថ្មីៗនេះនៅក្នុងទីក្រុងហ្សឺណែវ ប្រទេសស្វីស និងគម្រោងបើកកិច្ចចរចាជាថ្មីនៅថ្ងៃទី៧ និង៨ វិច្ឆិកាខាងមុខ។
គឺតាមរយៈសញ្ញាវិជ្ជមានជាច្រើនដ៏គួរឲ្យកត់សម្គាល់ទំាងអស់នេះហើយដែលលោកស្រី Wendy បានស្នើឲ្យសភាអាមេរិកផ្អាកមួយរយៈនូវការដាក់ទណ្ឌកម្មថ្មីណាមួយទៅលើរដ្ឋាភិបាលទីក្រុងតេហេរ៉ង់។ បំណងរបស់លោកស្រី Wendy គឺគេត្រូវតែជួយផ្តល់សន្ទុះនៅក្នុងកិច្ចចរចា ជាជាងពិចារណារឿងទ័ណ្ឌកម្មថ្មី។
តើសភាអាមេរិកអាចនឹងផ្អាកការដាក់ទ័ណ្ឌកម្មថ្មីលើអ៊ីរ៉ង់ជុំវិញរឿងនុយក្លេអ៊ែរនេះដែរ ឬទេ?
នៅអាមេរិកបច្ចុប្បន្ន អ្នកដែលមានសម្លេងភាគច្រើននៅក្នុងសភា គឺគណបក្សសាធារណរដ្ឋ មិនមែនគណបក្សប្រជាធិបតេយ្យរបស់លោកអូបាម៉ាទេ។ គឺមានតែនៅព្រឹទ្ធសភាទេ ដែលគណបក្សលោកអូបាម៉ាមានសម្លេងភាគច្រើន។ កាលពីខែកក្កដាកន្លងទៅ សភាបានអនុម័តច្បាប់មួយដ៏តឹងរឹងដើម្បីដាក់ទ័ណ្ឌកម្មបន្ថែមលើអ៊ីរ៉ង់ក្នុងវិស័យរថយន្ត។ គឺជាគម្រោងទ័ណ្ឌកម្មថ្មីមួយដែលព្រឹទ្ធសភានឹងត្រូវពិនិត្យមើលនៅថ្ងៃខាងមុខ។ តែក្រុមអ្នកតំណាងរាស្រ្តអាមេរិកំាងបានមើលឃើញសំណើរបស់លោកស្រី Wendy ថា ជាសំណើមួយដែលហាក់ដូចជាមានសុទិដ្ឋិនិយមជ្រុលពេកចំពោះសំណុំរឿងនុយក្លេអ៊ែរអ៊ីរ៉ង់។
មានអ្នកតំណាងរាស្រ្តអាមេរិកំាងជាច្រើនដែលទទួលបានការលើកទឹកចិត្តពីប្រទេសអ៊ីស្រាអែល ហ្សកដានី និងឥឡូវនេះ ពីប្រទេសអារ៉ាប៊ីសាអូឌីតទៀតនោះបានយល់ឃើញថា អ្នកដែលត្រូវធ្វើសម្បទានមុនគេនៅក្នុងរឿងនុយក្លេអ៊ែរអ៊ីរ៉ង់នេះ គឺប្រទេសអ៊ីរ៉ង់ខ្លួនឯងតែម្តង មិនមែនអាមេរិក ឬមួយក៏ប្រទេសណាផ្សេងទៀតទេ មានន័យថា អ៊ីរ៉ង់ត្រូវតែបញ្ឈប់ការចម្រើនធាតុអ៊ុយរ៉ាញូមរបស់ខ្លួនជាបន្ទាន់ និងគ្មានលក្ខខណ្ឌ។
កាយវិការទន់ជ្រាយរបស់លោកអូបាម៉ាបានធ្វើឲ្យសម្ព័ន្ធមិត្តក្នុងតំបន់ព្រួយបារម្ភ
កាយវិការការទូតបើកចំហររបស់លោកអូបាម៉ាទៅរកអ៊ីរ៉ង់ និងការដែលលោកអូបាម៉ាបានសម្រេចមិនវាយប្រហារស៊ីរីនៅពេលនេះ បានធ្វើឲ្យប្រទេសសម្ព័ន្ធមិត្តអាមេរិកមួយចំនួននៅដើមបូព៌ាគិតថា លោកប្រធានាធិបតីអាមេរិកហាក់ដូចជាបាននិងកំពុងធ្វើព្រងើយកន្តើយចំពោះពួកគេ។
តាមពិតទៅ និងអ្វីដែលប្រទេសមួយចំនួនក្នុងតំបន់បានស្តីបន្ទោសលោកប្រធានាធិបតីអាមេរិក អូបាម៉ានោះ គឺភាពអសមត្ថភាព និងអាកប្បកិរិយាទន់ជ្រាយរបស់លោកអូបាម៉ានៅចំពោះមុខវិបត្តិនុយក្លេអ៊ែរអ៊ីរ៉ង់ និងវិបត្តិនយោបាយក្នុងប្រទេសស៊ីរី។ ទំាងនេះមិនភ្លេចទេ ជម្លោះរវាងអ៊ីស្រាអែល និងប៉ាឡេស្ទីន។ ប្រទេសដែលបារម្ភខ្លំាងជាងគេ គឺអារ៉ាប៊ីសាអូឌីត និងប្រទេសអ៊ីស្រាអែល។ ក្នុងសប្តាហ៍នេះ ប្រមុខក្រសួងស៊ើបការសម្ងាត់អារ៉ាប៊ីសាអូឌីតបានថ្លែងនៅចំពោះមុខក្រុមអ្នកការទូតអឺរ៉ុបថា ប្រទេសអារ៉ាប៊ីសាអូឌីតបានដកខ្លួនថយបន្តិចពីសហរដ្ឋអាមេរិក ដោយសារតែលោកអូបាម៉ាលង់ស្នេហ៍របស់លោកប្រធានាធិបតីថ្មីអ៊ីរ៉ង់ ហាស់សាន រ៉ូហានី និងការដែលលោកអូបាម៉ាមិនវាយប្រហារស៊ីរី ដោយព្រមទទួលយកតាមសំណើរបស់ប្រទេសរុស្ស៊ីក្នុងការកម្ទេចអាវុធគីមីស៊ីរី។
ថ្មីៗនេះ និងដើម្បីសម្តែងការមិនសប្បាយចិត្តរបស់ខ្លួនចំពោះរដ្ឋបាលអាមេរិកំាង ប្រទេសអារ៉ាប៊ីសាអូឌីតថែមទំាងបានបដិសេធមិនទទួលយកអសនៈនៅក្រុមប្រឹក្សាសន្តិសុខអង្គការសហប្រជាជាតិដែលខ្លួនបានទាមទារចង់បានអស់ជាច្រើនឆ្នំាមកហើយ។ អ្នកវិភាគជនជាតិអារ៉ាប៊ីសាអូឌីតម្នាក់បានអះអាងថា ទង្វើរបស់ទីក្រុងរីយ៉ាដដែលមិនទទួលយកកៅអីនៅក្រុមប្រឹក្សាសន្តិសុខអង្គការសហប្រជាជាតិពេលនេះ គឺជាទង្វើមួយដែលអារ៉ាប៊ីសាអូឌីតចង់ដាក់ស្មារតីអាមេរិកឲ្យភ្ញាក់ឡើងក្នុងការដោះស្រាយបញ្ហានៅតំបន់ដើមបូព៌ាតាមវិធានការអនុវត្តជាក់ស្តែង ពោលមិនមែននិយាយតែមាត់ទេ។
ចំពោះប្រទេសអ៊ីស្រាអែលវិញ ក្តីបារម្ភរបស់អ៊ីស្រាអែល គឺខ្លាចតែលោកអូបាម៉ាខ្វះសេចក្តីម៉ឺងម៉ាត់ និងដាច់ខាតនៅក្នុងកិច្ចចរចាជាមួយអ៊ីរ៉ង់ស្តីពីបញ្ហានុយក្លេអ៊ែរ។ អ៊ីរ៉ង់ដែលជាសត្រូវស៊ីសាច់ហុតឈាមជាមួយអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ