អាមេរិកនិងរុស្ស៊ីចង់ផ្តោះប្តូរអ្នកទោសពីបទចារកម្ម
ចុះផ្សាយនៅថ្ងៃ៖
ស្តាប់ - ០៥:៤៥
ជន ១០នាក់ ដែលត្រូវអាមេរិកចោទប្រកាន់ថាជាភ្នាក់ងារចារកម្មរុស្ស៊ី ត្រូវបានកោះហៅឲ្យចូលខ្លួនទៅតុលាការ នៅថ្ងៃព្រហស្បតិ៍នេះ។ ព្រមពេលជាមួយគ្នានេះ ព័ត៌មានបានលេចឮទាំងមកពីខាងអាមេរិក និងខាងរុស្ស៊ី អំពីការចរចា ដើម្បីផ្តោះប្តូរអ្នកទោសគ្នាទៅវិញទៅមក។ បើទោះជាគ្មានការបញ្ជាក់អះអាងជាផ្លូវការពីរដ្ឋាភិបាលទាំងពីរ ដំណឹងអំពីការផ្លាស់ប្តូរអ្នកទោសនេះ គឺមានប្រភពចេញពីមេធាវីជនជាប់ចោទទាំង១០នាក់ និងពីគ្រួសាររបស់អ្នកទោស ដែលកំពុងជាប់គុក នៅរុស្ស៊ី ពីបទចារកម្ម។
អាមេរិក និងរុស្ស៊ី កំពុងចរចាគ្នា ដើម្បីផ្តោះប្តូរអ្នកទោស ដែលជាប់ទោសពីបទចារកម្ម?! ស្តាប់មើលទៅ ធ្វើឲ្យគេនឹកស្មានថា ពិភពលោកកំពុងដើរថយក្រោយត្រឡប់ទៅសម័យសង្រ្គាមត្រជាក់វិញទៅហើយ! តាំងពីសង្រ្គាមត្រជាក់បានបញ្ចប់ទៅនៅចុងទសវត្សរ៍ឆ្នាំ៩០ គេលែងឃើញអាមេរិក និងរុស្ស៊ី ធ្វើការផ្លាស់ប្តូរភ្នាក់ងារចារកម្មគ្នា ដូចពីមុនទៀតហើយ។
នៅពេលនេះ បើទោះជាមិនមានការបញ្ជាក់អះអាងជាផ្លូវការពីរដ្ឋាភិបាលទាំងពីរ ក៏ប៉ុន្តែ ព័ត៌មានស្តីពីការផ្លាស់ប្តូរអ្នកទោសគ្នានេះ មានកាន់តែច្បាស់ឡើងៗហើយ។ មេធាវីរបស់ជនជាប់ចោទរុស្ស៊ីទាំង១០នាក់ បានអះអាងថា ពួកគេពិតជាកំពុងចរចាជាមួយរដ្ឋាភិបាលអាមេរិកអំពីរឿងផ្តោះប្តូរអ្នកទោសនេះមែន។
ក្រុមគ្រួសាររបស់អ្នកទោសម្នាក់ ឈ្មោះអ៊ីហ្ករ ស៊ូតយ៉ាហ្គីន (Igor Soutiaguine) ដែលកំពុងជាប់គុកនៅរុស្ស៊ី ពីបទថាបានយកការណ៍សម្ងាត់ឲ្យអាមេរិក បានប្រាប់អ្នកកាសែតថា ស៊ូតយ៉ាហ្គីន បានផ្តល់ដំណឹងមកថា អាជ្ញាធររុស្ស៊ីកំពុងតែរៀបចំដោះលែងគាត់ ហើយបញ្ជូនចេញពីរុស្ស៊ី ទៅប្រទេសអង់គ្លេស។
តម្រុយមួយទៀត ដែលអាចឲ្យគេសន្និដ្ឋានថា ពិតជាមានការចរចាផ្តោះប្តូរអ្នកទោស គឺការប្រែប្រួលនៃនីតិវិធីតុលាការអាមេរិក ក្នុងការជំនុំជម្រះជនជាប់ចោទទាំង១០នាក់។ តាមគម្រោង គេត្រូវនៅបន្តសួរចម្លើយជនជាប់ចោទ៣នាក់ទៀត កាលពីថ្ងៃពុធ ម្សិលមិញ។ ក៏ប៉ុន្តែ ចៅក្រមបែរជាសម្រេចលុបការសួរចម្លើយនេះចោលវិញ ហើយកោះហៅជនជាប់ចោទទាំង ១០នាក់ ឲ្យចូលទៅបង្ហាញខ្លួននៅតុលាការ ក្នុងពេលជាមួយគ្នា នៅថ្ងៃព្រហស្បតិ៍នេះ។ ការកោះហៅនេះ គឺទំនងជាជនជាប់ចោទទាំង ១០នាក់ សុខចិត្តឆ្លើយសារភាពទទួលកំហុស ហើយឲ្យចៅក្រមប្រកាសទោសឆាប់ៗ ដើម្បីបើកផ្លូវឲ្យមានការផ្តោះប្តូរអ្នកទោស។
ប្រភពពីមន្រ្តីការទូត ដែលសុំមិនបញ្ចេញឈ្មោះ បានបង្ហើបប្រាប់ទីភ្នាក់ងារព័ត៌មានបារាំង អា-អែហ្វ-ប៉ែ ថា ការចរចារវាងអាមេរិក និងរុស្ស៊ី បានសម្រេចជាលទ្ធផលរួចទៅហើយ នៅថ្ងៃព្រហស្បតិ៍នេះ។ ការផ្តោះប្តូរអ្នកទោសអាចនឹងត្រូវធ្វើ នៅថ្ងៃសុក្រស្អែក។ ការផ្តោះប្តូរអ្នកទោសនេះនឹងត្រូវធ្វើឡើងស្ងាត់ៗ ដោយគ្មានការប្រកាសជាផ្លូវការនោះទេ។
រដ្ឋាភិបាលអាមេរិក ដែលសុខចិត្តធ្វើការផ្តោះប្តូរអ្នកទោសជាមួយរុស្ស៊ីនេះ គឺដើម្បីចៀសវាងកុំឲ្យមានដំណើរក្តីអូសបន្លាយវែង ដែលអាចនាំឲ្យខូចទំនាក់ទំនងជាមួយរុស្ស៊ី។ ម្យ៉ាងវិញទៀត ការជំនុំជម្រះ ដែលអូសបន្លាយវែង ក្រៅពីចំណាយពេលវេលា និងលុយកាក់ច្រើន ក៏នៅមានបញ្ហាមួយទៀត គឺការបែកធ្លាយការណ៍សម្ងាត់ ពីព្រោះថា ជាធម្មតា នៅក្នុងការជំនុំជម្រះក្នុងតុលាការ តែងតែមានការជជែកដេញដោលគ្នា នៅក្នុងសវនាការ។ ក៏ប៉ុន្តែ លោកអូបាម៉ា ក៏អាចនឹងត្រូវទទួលរងនូវការរិះគន់ផងដែរ ចំពោះការផ្តោះប្តូរអ្នកទោសនេះ។ គណបក្សសាធារណរដ្ឋប្រាកដជារិះគន់លោកអូបាម៉ាថាមានជំហរទន់ជ្រាយចំពោះរុស្ស៊ី។
រហូតមកទល់ពេលនេះ គឺនៅតែមិនទាន់ដឹងច្បាស់អំពីឈ្មោះអ្នកទោស ដែលរុស្ស៊ីព្រមដោះលែងជាថ្នូរនឹងជនជាប់ចោទ ១០នាក់ នៅអាមេរិកនេះទេ។ គេគ្រាន់តែដឹងថា ក្នុងចំណោមអ្នកទោស ដែលរុស្ស៊ីនឹងដោះលែងនេះ គឺមានស៊ូតយ៉ាហ្គីន។ ស៊ូតយ៉ាហ្គីន គឺជាអ្នកវិទ្យាសាស្រ្ត ជនជាតិរុស្ស៊ី ជំនាញខាងសព្វាវុធនុយក្លេអ៊ែរ ប៉ុន្តែ កាលពីឆ្នាំ២០០៤ ត្រូវតុលាការរុស្ស៊ីកាត់ឲ្យជាប់គុកចំនួន ១៥ឆ្នាំ ពីបទថាបានលួចយកការណ៍សម្ងាត់បញ្ជូនទៅឲ្យទីភ្នាក់ងារចារកម្មអាមេរិក (ស៊ី-អាយ-អេ)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ