មេដឹកនាំលោកខាងលិចទាមទារឲ្យប្រធានាធិបតីស៊ីរីចុះចេញពីតំណែង
ចុះផ្សាយនៅថ្ងៃ៖
ស្តាប់ - ០៦:០៧
កាលពីថ្ងៃព្រហស្បតិ៍ ១៨ សីហា ២០១១នេះ សហរដ្ឋអាមេរិក និងប្រទេសជាសម្ព័ន្ធមិត្តរួមមាន អង់គ្លេស បារាំង និងអាល្លឺម៉ង់ បានធ្វើការទាមទារជាសាធារណៈឲ្យប្រធានាធិបតីស៊ីរី គឺលោកបាស្ហា អាល់ អាសាដ (Bachar al-Assad) ចុះចេញពីអំណាច។ ក្នុងពេលជាមួយគ្នា អគ្គស្នងការអ.ស.ប.ទទួលបន្ទុកសិទ្ធិមនុស្សបានស្នើសុំឲ្យក្រុមប្រឹក្សាសន្តិសុខចេញប្តឹងទៅតុលាការព្រហ្មទណ្ឌអន្តរជាតិ ដើម្បីបើកការស៊ើបអង្កេតលើករណីឧក្រិដ្ឋកម្មប្រឆាំងមនុស្សជាតិ ដែលប្រព្រឹត្តដោយអាជ្ញាធរស៊ីរី។
ការទាមទារឲ្យលោកអាសាដចុះចេញពីតំណែងត្រូវបានធ្វើឡើង ស្ទើរតែព្រមៗគ្នា កាលពីថ្ងៃព្រហស្បតិ៍។ ការទាមទាររបស់បារាំង អង់គ្លេស និងអាល្លឺម៉ង់ ត្រូវបានធ្វើឡើង ក្នុងសេចក្តីថ្លែងការណ៍រួមគ្នា។ ទាំងនេះបង្ហាញថា មុននឹងឈានដល់ការចេញសេចក្តីថ្លែងការណ៍នេះ ប្រទេសទាំងនេះពិតជាបានជជែកពិភាក្សា និងបានព្រមព្រៀងគ្នាជាមុន។
យោងតាមមន្រ្តីសេតវិមាន អាមេរិក និងសម្ព័ន្ធមិត្តអឺរ៉ុបបានសម្រេចថានឹងទាមទារឲ្យលោកអាសាដចុះចេញពីតំណែង តាំងពីថ្ងៃទី៥ សីហា មកម៉្លេះ ក៏ប៉ុន្តែ បានពន្យារពេល ដោយសារតែតួកគី ដែលជាសម្ព័ន្ធមិត្តយ៉ាងជិតស្និទ្ធរបស់ស៊ីរី បានសុំពេលបន្តិចសិន ដើម្បីព្យាយាមបញ្ចុះបញ្ចូលលោកអាសាដឲ្យបញ្ឈប់អំពើហិង្សាលើបាតុករ។ បេសកកម្ម ដឹកនាំដោយរដ្ឋមន្រ្តីការបរទេសតួកគីត្រូវទទួលបរាជ័យ ដោយសារតែលោកអាសាដធ្វើគ ធ្វើថ្លង់មិនព្រមស្តាប់ រហូតដល់នាយករដ្ឋមន្រ្តីតួកគីបានប្រៀបធៀបលោកអាសាដ ទៅនឹងលោកកាដាហ្វ៊ីទៀតផង។
ក្រៅពីបានប្រកាសទាមទារឲ្យលោកអាសាដចុះចេញពីអំណាច លោកអូបាម៉ាក៏បានប្រកាសដាក់ទណ្ឌកម្មបន្ថែមផងដែរលើមេដឹកនាំស៊ីរី។ ទណ្ឌកម្មថ្មីនេះ រួមមាន ការផ្អឹបទ្រព្យសម្បត្តិរបស់រដ្ឋាភិបាលស៊ីរី ការហាមឃាត់ពលរដ្ឋ ឬក្រុមហ៊ុនអាមេរិកមិនឲ្យរកស៊ីជាមួយស៊ីរី និងការហាមឃាត់ការទិញប្រេងពីស៊ីរី។ លោកអូបាម៉ាបានអំពាវនាវឲ្យប្រទេសផ្សេងទៀតចូលរួមដាក់ទណ្ឌកម្មលើស៊ីរី ជាពិសេស ទណ្ឌកម្មលើវិស័យប្រេង និងឧស្ម័ន ដែលជាដង្ហើមសេដ្ឋកិច្ចរបស់ស៊ីរី។
សហភាពអឺរ៉ុបកំពុងតែពិចារណាចំពោះទណ្ឌកម្មថ្មីនេះ។ លើសពីនេះទៅទៀត ប្រទេសអឺរ៉ុបចំនួន ៤ ដែលជាសមាជិកក្រុមប្រឹក្សាសន្តិសុខ គឺបារាំង អង់គ្លេស អាល្លឺម៉ង់ និងព័រទុយហ្កាល់ កំពុងរៀបចំសេចក្តីព្រាងទណ្ឌកម្មថ្មីមួយ ដើម្បីដាក់ជូនក្រុមប្រឹក្សាសន្តិសុខអនុម័ត ក្នុងនោះ ក៏មានការហាមឃាត់ការលក់អាវុធទៅឲ្យស៊ីរីផងដែរ។ ក៏ប៉ុន្តែ ការអនុម័តទណ្ឌកម្មនេះ ប្រាកដជាត្រូវប្រឈមមុខនឹងការប្រឆាំងពីសំណាក់រុស្ស៊ី និងចិន ជាមិនខាន។
កាលពីម្សិលមិញនេះ ក្រុមប្រឹក្សាសន្តិសុខបានបើកកិច្ចប្រជុំពិសេសមួយ ដើម្បីស្តាប់របាយការណ៍របស់មន្រ្តីទទួលបន្ទុកសិទ្ធិមនុស្ស និងមន្រ្តីផ្នែកកិច្ចការមនុស្សធម៌។ អគ្គស្នងការអ.ស.ប.ទទួលបន្ទុកសិទ្ធិមនុស្សបានបង្ហាញនូវភស្តុតាងមួយចំនួន ដែលបញ្ជាក់ពីករណីរំលោភសិទ្ធិមនុស្សដ៏ធ្ងន់ធ្ងរ ប្រព្រឹត្តដោយអាជ្ញាធរស៊ីរី ទៅលើក្រុមប្រឆាំង។ ភស្តុតាងទាំងនោះបង្ហាញថា កងកម្លាំងប្រដាប់អាវុធស៊ីរីទទួលបញ្ជាពីរដ្ឋាភិបាលឲ្យបាញ់សម្លាប់បាតុករប្រឆាំង។ ក្នុងករណីមួយនោះ បាតុករចំនួន ២៦នាក់ ដែលត្រូវអាជ្ញាធរចាប់ខ្លួនបាន ត្រូវបានគេចងមុខ ហើយយកទៅបាញ់សម្លាប់ចោលតែម្តង។ អគ្គស្នងការសិទ្ធិមនុស្សបានស្នើសុំឲ្យក្រុមប្រឹក្សាសន្តិសុខប្តឹងទៅតុលាការព្រហ្មទណ្ឌអន្តរជាតិ (ក្រុងឡាអេ) ដើម្បីបើកការស៊ើបអង្កេតលើករណីឧក្រិដ្ឋកម្មប្រឆាំងមនុស្សជាតិនៅស៊ីរី។
ក្រុមប្រឹក្សាសន្តិសុខ នៅមិនទាន់ពិភាក្សាលើអនុសាសន៍របស់អគ្គស្នងការសិទ្ធិមនុស្សនេះនៅឡើយទេ។ ក៏ប៉ុន្តែ នៅថ្ងៃសៅរ៍ ឬថ្ងៃអាទិត្យស្អែកនេះ អ.ស.ប.នឹងបញ្ជូនមន្រ្តីស៊ើបអង្កេតមួយក្រុមទៅកាន់ប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ