ក្រុមផ្តាច់ទឹកដីនិយមអ៊ុយក្រែននៅតែកំណត់ការបោះឆ្នោតប្រជាមតិថ្ងៃ១១ឧសភា ទោះជាលោកពូទីនសុំអោយលើកពេល
ចុះផ្សាយនៅថ្ងៃ៖
ស្តាប់ - ០៤:៤៨
នៅថ្ងៃព្រហស្បតិ៍នេះ សកម្មជនផ្តាច់ទឹកដីនិយមក្រុងដូណេត ភាគខាងកើតអ៊ុយក្រែន បានជុំគ្នានិងសម្រេចថា មិនលើកពេលបោះឆ្នោតប្រជាមតិ ដែលត្រូវធ្វើថ្ងៃអាទិត្យ១១ឧសភា ចុងសប្តាហ៍នេះទេ ទោះជាប្រធានាធិបតីរុស្ស៊ី បានអំពាវនាវអោយពួកគេលើកពេលក៏ដោយ។ នៅថ្ងៃពុធម្សិលមិញ លោកពូទីនបានអំពាវនាវអោយក្រុមផ្តាច់ទឹកដីនិយម លើកពេលបោះឆ្នោតប្រជាមតិនេះ ទៅពេលក្រោយ។ មុននេះបន្តិច អាជ្ញាធរក្រុងគៀវ បានបដិសេធមិនព្រមចរចាជាមួយក្រុមផ្តាច់ទឹកដីនិយមដាច់ខាត។
ក្រុមផ្តាច់ទឹកដីនិយមក្រុងដូណេត មិនព្រមលើកពេលធ្វើប្រជាមតិ តាមការអំពាវនាវរបស់លោកពូទីន
ទោះជាក្រុមផ្តាច់ទឹកដីនិយមគាំទ្ររុស្ស៊ីពេញទីក៏ដោយ ក្រុមនេះមិនចង់ពន្យារពេលបោះឆ្នោតប្រជាមតិថ្ងៃអាទិត្យចុងសប្តាហ៍នេះទេ ព្រោះថា មើលអោយដល់ទៅ អ៊ុយក្រែនក៏ត្រូវរៀបចំការបោះឆ្នោតរើសប្រធានាធិបតីថ្មី នៅថ្ងៃ២៥ឧសភាដែរ ពោលគឺក្រោយថ្ងៃប្រជាមតិតែ២សប្តាហ៍ ប៉ុណ្ណោះ។ ដូច្នេះ បើអ៊ុយក្រែនមានប្រធានាធិបតីថ្មី នោះប្រជាជនភាគខាងកើតដែលគាំទ្ររុស្ស៊ីអាចនឹងបាត់បង់សិទ្ធិរបស់ពួកគេ ប្រឈមនឹងរដ្ឋាភិបាលថ្មីដែលលំអៀងទៅរកអឺរ៉ុបនិងអាមេរិកនោះ។ ដូច្នេះ ថ្ងៃ១១ឧសភានេះ ជាឳកាសចុងក្រោយសម្រាប់ក្រុងដូណេត ដើម្បីធ្វើប្រជាមតិ ប្រកាសឯករាជ្យភាព ភ្ជាប់ខ្លួនចូលទឹកដីរុស្ស៊ី។ អ្វីដែលយើងបារម្ភពេលនេះ គឺថា បើក្រុងគៀវនៅបន្តប្រតិបត្តិការយោធាប្រឆាំងក្រុមផ្តាច់ទឹកដីនិយម ការបោះឆ្នោតប្រជាមតិមិនដឹងថា តើអាចដំណើរការបានស្រួលរឺយ៉ាងណាទេ ព្រោះថាប្រជាជនកំពុងភ័យខ្លាចខ្លាំង។
អាជ្ញាធរក្រុងគៀវចោទក្រុមផ្តាច់ទឹកដីនិយមធ្ងន់ធ្ងរ រហូតដល់ថ្នាក់ថា ជាក្រុមក្រុមភេរវជន ដូច្នេះ អាជ្ញាធរមិនបន្ធូរដៃក្នុងប្រតិបត្តិការយោធាទេ។ អាជ្ញាធរក្រុងគៀវបានបដិសេធមិនចរចាដាច់ខាតជាមួយក្រុមផ្តាច់ទឹកដីនិយមទាំងនេះ។ លើសពីនេះ នាយករដ្ឋមន្ត្រីអន្តរកាលអ៊ុយក្រែន អ៊ីយ៉ាតសេនីយុក ថែមទាំងចោទលោកពូទីនថា អំពាវនាវអោយលើកពេលប្រជាមតិ ដើម្បីលក់ខ្យល់ ព្រោះថា ការអំពាវនាវនេះ គ្មានប្រយោជន៍អ្វីទេគ្មានប្រយោជន៍អ្វីទេ។
ដោយសារតែមូលហេតុទាំងនេះហើយ មើលទៅ ទើបក្រុមផ្តាច់ទឹកដីនិយមមិនព្រមលើកពេលបោះឆ្នោតប្រជាមតិ ព្រោះថា អាជ្ញាធរក្រុងគៀវមិនព្រមបន្ទន់ជំហរ នៅតែប្រឆាំងក្រុមខ្លួន និងរុស្ស៊ី។
ប្រធានាធិបតីរុស្ស៊ីបានសុំអោយក្រុមផ្តាច់ទឹកដីនិយមភាគខាងកើត លើកថ្ងៃបោះឆ្នោតប្រជាមតិ ១១ឧសភា ទៅពេលក្រោយ ក្នុងឱកាសទស្សនកិច្ចរបស់ប្រធានអង្គការសន្តិសុខនិងប្រតិបត្តិការអឺរ៉ុប នៅក្រុងម៉ូស្គូ
ម្សិលមិញ ប្រធានអង្គការសន្តិសុខនិងសហប្រតិបត្តិការអឺរ៉ុបបានជួបជាមួយលោកពូទីន ដើម្បីបន្ថយភាពតានតឹងក្នុងវិបត្តិអ៊ុយក្រែន។ ដូច្នេះ ក្នុងនាមជាហត្ថលេខីនៃកិច្ចព្រមព្រៀងចតុភាគីក្រុងហ្សឺណែវ ដោះស្រាយវិបត្តិអ៊ុយក្រែន ប្រធានាធិបតីរុស្ស៊ីក៏បង្ហាញទៅអង្គការសន្តិសុខអឺរ៉ុបវិញដែរថា រុស្ស៊ីគ្មានបំណងបង្កភាពតានតឹងក្នុងរឿងរ៉ាវអ៊ុយក្រែនទេ។ រុស្ស៊ីមានតែសកម្មនិងមមាញឹកក្នុងការចូលរួមដោះស្រាយដើម្បីអោយអ៊ុយក្រែនរកបានស្ថិរភាព សន្តិសុខឡើងវិញ។ ម្សិលមិញ វិមានក្រិមឡាំងប្រាប់ថា ប្រសិនបើក្រុមផ្តាច់ទឹកដីនិយមអ៊ុយក្រែន ស្តាប់តាមការអំពាវនាវរបស់លោកពូទីន លើកថ្ងៃបោះឆ្នោតប្រជាមតិទៅពេលក្រោយ ហើយបើអាជ្ញាធរក្រុងគៀវបញ្ឈប់សកម្មភាពយោធាប្រឆាំងក្រុមផ្តាច់ទឹកដីនិយម នោះវិបត្តិអ៊ុយក្រែនអាចនឹងបិទបញ្ចប់បាន។
កន្លងមក ប្រតិបត្តិការយោធាអ៊ុយក្រែនបានសម្លាប់មនុស្សច្រើននាក់ហើយ។ អំពើហិង្សាធ្ងន់ធ្ងរចុងក្រោយគេ គឺអំពើហិង្សានៅក្រុងអូដេសាភាគខាងត្បូង កាលពីសប្តាហ៍មុន។ អគ្គិភ័យនិងការប្រឈមរវាងកងកម្លាំងអ៊ុយក្រែន និងសកម្មជនគាំទ្ររុស្ស៊ី នៅក្រុងអូដេសា បានសម្លាប់មនុស្សជាង៤០នាក់។ ដូច្នេះ អ៊ុយក្រែនរស់រឺស្លាប់ ទាល់តែដោះស្រាយហិង្សាអោយបានចប់សព្វគ្រប់ជាមុនសិន។ អំពើហិង្សាដែលនៅតែមានជាប្រចាំនៅភាគខាងកើត ដូច្នេះវាអាចប៉ះពាល់ដល់ការបោះឆ្នោតប្រជាមតិថ្ងៃអាទិត្យនេះ។ ហើយក៏អាចបង្កចលាចលដល់ការបោះឆ្នោតប្រធានាធិបតីអ៊ុយក្រែនថ្ងៃ២៥ឧសភាដូចគ្នាដែរ។
ប៉ុន្តែ ការដែលក្រុងដូណេតមិនព្រមលើកពេលប្រជាមតិ ពេលនេះ ប្រឈមនឹងការមិនព្រមចរចាជាមួយក្រុមផ្តាច់ទឹកដីនិយមពីសំណាក់អាជ្ញាធរក្រុងគៀវទៀត នោះរឹតតែមិនអាចបញ្ចប់វិបត្តិក្នុងស្រុកទៅទៀត។ នាយករដ្ឋមន្ត្រីអ៊ុយក្រែន យ៉ាតសេនីយុក ប្រហែលជាអាក់អន់ចិត្តចំពោះប្រធានអង្គការសន្តិសុខនិងសហប្រតិបត្តិការអឺរ៉ុប ដែលបានចុះទៅជួបលោកពូទីននៅក្រុងម៉ូស្គូ។ លោកយ៉ាតសេនីយុក លើកឡើងថា គួរអោយឆ្ងល់ដែលការពិភាក្សាបញ្ហាអ៊ុយក្រែន បែរជាធ្វើនៅក្រុងម៉ូស្គូ គ្មានវត្តមានតួអង្គអ៊ុយក្រែន ហើយបែរជាធ្វើតែរវាងភាគីរុស្ស៊ី និងប្រធានអង្គការសន្តិសុខអឺរ៉ុបទៅវិញ។
ភាពតានតឹងនៅតែបន្ត អាមេរិកបានគំរាមដាក់ទណ្ឌកម្មថ្មីៗទៀត ប្រសិនបើការបោះឆ្នោតប្រធានាធិបតីថ្ងៃ២៥ឧសភាជួបភាពចលាចល។ ប៉ុន្តែ រុស្ស៊ីមិនដែលនិយាយផ្ទាល់មាត់ថា រុស្ស៊ីប្រឆាំងការបោះឆ្នោតប្រធានាធិបតីនៅអ៊ុយក្រែនទេ។ សម្រាប់រុស្ស៊ី ការដែលរុស្ស៊ីចោទការបោះឆ្នោតប្រធានាធិបតីអ៊ុយក្រែន ថាជារឿងមិនទំនង ក៏ដោយសារតែអំពើហិង្សាដែលនៅតែបន្តមាន នៅភាគខាងកើតនោះដែរ។ ម្សិលមិញ ប្រធានាធិបតីរុស្ស៊ីបានបង្ហាញប្រធានអង្គការសន្តិសុខនិងសហប្រតិបត្តិការអឺតរ៉ុបថា ខ្លួនខិតខំបន្ទន់ជំហរ ចៀសវាងភាពតានតឹងជាមួយរដ្ឋាភិបាលក្រុងគៀវ អាមេរិក និងអឺរ៉ុប។ លោកពូទីនប្រាប់ដែរថា រុស្ស៊ីបានដកកងទ័ពចេញពីព្រំដែនជាប់អ៊ុយក្រែនហើយ។ ប៉ុន្តែ អង្គការអូតង់ថា មិនទាន់មានភស្តុតាង ធ្វើអោយរុស្ស៊ីចោទទៅវិញថា អង្គការអូតង់ខ្វាក់ភ្នែកដែលមិនបានឃើញថា កងទ័ពរុស្ស៊ីបានដកថយចេញពីព្រំដែននោះ។
រូបភាពភាគខាងកើតអ៊ុយក្រែនពេលនេះ គឺប្រៀបបានទៅនឹងសង្គ្រាមស៊ីវិល។ ទោះជាមានកិច្ចព្រមព្រៀងចតុភាគី រវាងអ៊ុយក្រែន អាមេរិក អឺរ៉ុប និងរុស្ស៊ីក្តី ភាគីនិមួយៗនៅតែបន្តផ្គើនគំរាមគ្នាទៅវិញទៅមក មើលទៅវិបត្តិនេះមិនដឹងពេលណារកច្រកចេញបានប្រាកដទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ