ប្រធានាធិបតីអ៊ុយក្រែននឹងចុះហត្ថលេខាលើកិច្ចព្រមព្រៀងជាដៃគូជាមួយសហភាពអឺរ៉ុប
លោកប្រធានាធិបតីថ្មីអ៊ុយក្រែន ប៉េត្រូ ប៉ូរ៉ូឆិនកូ ដែលគេស្គាល់ថាជាអ្នកនិយមលោកខាងលិច បានថ្លែងកាលពីថ្ងៃព្រហស្បតិ៍ ម្សិលមិញថា លោកនឹងចុះហត្ថលេខាលើកិច្ចព្រមព្រៀងសមាគមជាមួយសហភាពអឺរ៉ុប នៅថ្ងៃ២៧ មិថុនា ខាងមុខនេះ នៅទីក្រុងព្រុចស៊ែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
សហភាពអឺរ៉ុប និង អ៊ុយក្រែន បានមូលគំនិតគ្នាចុះហត្ថលេខាលើកិច្ចព្រមព្រៀងសមាគមកាលពីខែវិច្ឆិកាឆ្នាំទៅ។ ប៉ុន្តែគម្រោងនោះត្រូវបានអាក់ខានទៅវិញ ដោយសារលោកប្រធានាធិបតីអ៊ុយក្រែនជំនាន់នោះ បានទទួលរងនូវការកៀបសង្កត់ពីសម្នាក់រុស្សី ហើយដែលឈានទៅដល់មានវិបត្តិនៅតំបន់គ្រីម៉េ។
លោកប៉ូរ៉ូឆិនកូ បានមានប្រសាសន៍ថា លោកនឹងចុះហត្ថលេខាលើសេចក្តីព្រាងសហប្រតិបត្តិការសេដ្ឋកិច្ច ដែលនៅសល់ ដើម្បីបញ្ចប់និតិវិធីចុះកិច្ចព្រមព្រៀងសមាគមជាមួយសហភាពអឺរ៉ុប។ គួររំលឹកផងដែរថា កិច្ចព្រមព្រៀងផ្នែកនយោបាយ ត្រូវបានលោកប្រធានាធិបតីបណ្តោះអាសន្នកាលនោះចុះហត្ថលេខារួចមកហើយកាលពីខែមីនា។ ក្នុងសេចក្តីព្រមព្រៀងនោះ អ៊ុយក្រែនអះអាង និងធានាថា អ៊ុយក្រែនជាប្រជាជាតិដែលនឹងប្រកាន់ខ្ជាប់នូវលទ្ធិប្រជាធិបតេយ្យសេរី ដោយឈរលើគោលការនិតិរដ្ឋ។
ការចុះហត្ថលេខាទាក់ទងទៅនឹងវិស័យសេដ្ឋកិច្ច ត្រូវបានពន្យាពេល ដោយសារតែវាតំរូវឲ្យ មានការលុបបំបាត់នូវឧបសគ្គមួយចំនួន ទាក់ទងនឹងវិស័យពន្ធដារ ដែលការនេះអាចប៉ះពាល់ដល់ផលប្រយោជន៍សេដ្ឋកិច្ចមួយភាគធំ របស់សហគ្រាសនឹងរបររកស៊ី នៅតំបន់ភាគខាងកើតអ៊ុយក្រែន។ គួរបញ្ជាក់ថាវិបត្តិទាមទារផ្តាច់ទឹកដី នៅតំបន់ភាគខាងកើតអ៊ុយក្រែន បានពុះកញ្ជ្រោលឡើង ដោយសារមេបះបោរនៅតាមតំបន់ទាំងនោះប្រឆាំងនិងការរំកិលខ្លួនរបស់អ៊ុយក្រែន ទៅកាន់តែជិតសហភាពអឺរ៉ុប។ យ៉ាងណាមិញ បានជារុស្សីបន្តគាំទ្រការបះបោរផ្តាច់ទឹកដីនៅអ៊ុយក្រែន ព្រោះថារុស្សីមិនចង់ឲ្យអ៊ុយក្រែន មានមេកើយថ្មីណាក្រៅពីខ្លួនទេ។ កន្លងមក សារព៌តមាន Wall Street Journal ធ្លាប់បានចុះផ្សាយថា អ៊ុយក្រែននឹងបន្តពន្យាពេលចុះហត្ថលេខា ជាមួយសហភាពអឺរ៉ុប រហូតទាល់តែខ្លួនស្វែងរងការចរចាជាមួយពួកបះបោរផ្តាច់ទឹកដីនិយមរុស្សីបានសម្រេច។
ទន្ទឹមគ្នានេះដែរ អ៊ុយក្រែន ទើបតែបានតែងតាំង ប្រមុខការទូតថ្មី គឺលោកប៉ាវឡូ គ្លីមគ្លីន។ ប្រមុខការទូតថ្មីនេះ នឹងទទួលបន្ទុក ចរចារកសន្តិភាព ជាមួយក្រុមបះបោរ និងរុស្សី ដើម្បីឈានទៅដល់ការបញ្ចប់អំពើហិង្សា នៅតំបន់ភាគខាងកើត។ បើសិនជាកិច្ចចុះហត្ថលេខាជាមួយសហភាពអឺរ៉ុបបានសម្រេចមែន នោះជាលើកទីមួយហើយ ដែលសហភាពអឺរ៉ុបអាចអោបក្រសោបប្រទេសក្នុងតំបន់មួយនេះ ដោយមិនចាំបាច់បញ្ចូលប្រទេសនេះជាសមាជិកពេញសិទ្ធិរបស់សហភាពអឺរ៉ុប។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ