អ៊ុយក្រែន ៖ ការចរចាមិនចម្រើនទៅមុខ ជំនួយមនុស្សធម៌ក៏យឺតយ៉ាវ
ចុះផ្សាយនៅថ្ងៃ៖
ស្តាប់ - ០៥:២១
ជំនួបចតុភាគី រវាងរដ្ឋមន្ត្រីការបរទេសអ៊ុយក្រែន និងរុស្ស៊ី ក្រោមការផ្តួចផ្តើមពីបារាំងនិងអាល្លឺម៉ង់ បានបិទទ្វារនៅយប់មិញ ដោយគ្មានលទ្ធផលអ្វីទាំងអស់។ តំណាងគ្រប់ភាគីដែលនិយាយជាប់មាត់អំពីភាពស្មុគស្មាញនៃជំនួបពិភាក្សា បានសម្តែងក្តីសង្ឃឹមថានឹងអាចមានការជួបចរចាការទូតទៀត។ បើទោះបីជានៅព្រឹកនេះភាគីរុស្ស៊ី បានប្រឹងត្រដរលើកឡើងអំពីចំណុចជឿនលឿនមួយចំនួន ក្នុងពេលពិភាក្សាគ្នាយ៉ាងណាក៏ដោយ ក៏ការពិតនៅតែជាការពិត មានត្រឹមតែការជួបប្រជុំថ្នាក់ការទូត តែស្ថានការណ៍មនុស្សធម៌ផ្ទាល់កន្លែងនៅភាគកើតអ៊ុយក្រែន មិនបានប្រសើរសោះ។
គ្មានលទ្ធផលអ្វី ទាំងអស់ មិនថាលើសំណុំរឿងបទឈប់បាញ់ ឬសំណុំរឿងនយោបាយទេ ! ពិភាក្សាគ្នាអស់៥ម៉ោង តែម្នាក់ៗចេញមក បានត្រឹមប្រហើរសម្តី ថា "ពិបាក" ! អាល្លឺម៉ង់ ម្ចាស់ផ្ទះដែលជាអ្នកផ្តួចផ្តើមរៀបចំជំនួបប្រជុំនេះ បានដឹង តាំងពីដំបូងនិងមិនរង់ចាំលទ្ធផលអ្វីពីការជួបពិភាក្សាគ្នាលើកនេះ នៅតែមានសុទិដ្ឋនិយមជាប់ជានិច្ច ដោយមើលឃើញថាអ៊ុយក្រែននិងរុស្ស៊ី បានបង្ហើបខ្លួនខិតទៅរកគ្នាបន្តិច។ បើប្រភពការទូតបារាំងវិញ បានអះអាងថា លំបាក តែមានការរីកចម្រើនដែរ។ រីកចម្រើនយ៉ាងណា ? គឺគ្មានអត្ថាធិប្បាយទេ ! ពេលចេញពីបន្ទប់ប្រជុំភ្លាម ភាគីរុស្ស៊ី មិនចេញស្តីអ្វីសូម្បីតែមួយមាត់។ ទើបតែនៅព្រឹកនេះទើប លោកសែកហ្គៃឡាហ្វ្រូស ចេញមុខពន្យល់ថាគ្មានលទ្ធផល គ្មានការព្រមព្រៀងអ្វីលើបទឈប់បាញ់ លើផ្នែកនយោបាយ និងបានបង្ហាញការសោកស្តាយចំពោះកាយវិការអ៊ុយក្រែនដែលចេះតែដាក់លក្ខខណ្ឌ ជាថ្នូរនឹងបទឈប់បាញ់។
ចរចាបន្ធូរសម្ពាធ
ប៉ុន្តែ ជំនួបប្រជុំនេះ ត្រូវបានគេចាត់ទុកថា ជាជំហានតូចមួយនៃដំណើរឆ្ពោះទៅរកផ្លូវល្អ ! ពីព្រោះកម្មវត្ថុគឺបញ្ចៀសកុំឱ្យមាន តែកងកម្លាំងយោធាអ៊ុយក្រែននិងរុស្ស៊ី ប្រឈមមុខដាក់គ្នា ដោយផ្ទាល់ខ្លាំងពេក។ អ្វីដែលគេកំពុងព្រួយបារម្ភខ្លាំងនាពេលនេះ គឺខ្លាចយោធាអ៊ុយក្រែន និងរុស្ស៊ី ប្រើកម្លាំងដាក់គ្នា។ ហើយដោយហេតុថាគ្រប់ភាគីសុទ្ធតែចង់ដោះស្រាយតាមផ្លូវចរចា ដូច្នេះបើគ្មានអ្នករៀបចំតុ ប្រមូលភាគីបក្ខដិបក្ខមកអង្គុយពិភាក្សាគ្នា នោះពិតជាមិនត្រឹមត្រូវទេ។ បើតាមប្រសាសន៍រដ្ឋមន្ត្រីការបទេសអាល្លឺម៉ង់ ការហៅរុស្ស៊ីនិងអ៊ុយក្រែនមកជួបប្រជុំ បើទោះបីជាត្រូវប្រើពេលយូរ ឬច្រើនដង ក៏ដោយ ក៏នេះជាការទទួលខុសត្រូវរបស់អឺរ៉ុប។ នៅល្ងាចនេះ ឬនៅថ្ងៃស្អែក គេនឹងអាចកំណត់ថ្ងៃឬពីបែបបទនៃការជួបពិភាក្សាគ្នាបន្តទៀត។
ស្ថានភាពមនុស្សធម៌ផុយស្រួយ
បើតាមសន្និសីទកាសែត របស់រដ្ឋមន្ត្រីការបរទេសរុស្ស៊ីនៅទីក្រុងប៊ែរឡាំងព្រឹកនេះ អ៊ុយក្រែននិងរុស្ស៊ីពិតជាបានរកឃើញកិច្ចព្រមព្រៀងមនុស្សធម៌មែន។ តាមការពិតកិច្ចព្រមព្រៀម បានរកឃើញតាំងពីថ្ងៃសៅរ៍មកម្ល៉េះទាក់ទងនឹងការជំនួយមនុស្សធម៌រុស្ស៊ីនេះ។ លោកប្រមុខការទូតអាល្លឺម៉ង់ ក៏បានបង្ហើបបន្តិចដែរថាប្រធានបទនេះត្រូវបានលើកយកពិភាក្សានៅយប់មិញ តែលោកបានត្រឹមមានប្រសាសន៍ថា ចំណុចប្រទាំងប្រទើសចុងក្រោយពាក់ព័ន្ធនឹងរបៀបរបបបញ្ជូនជំនួយមនុស្សធម៌ទំនងជាបានដោះស្រាយចេញ។ ប៉ុន្តែក្នុងស្ថានភាពជាក់ស្តែងគឺមិនដូច្នេះទេ។ ក្បួនរថយន្តជំនួយមនុស្សធម៌រុស្ស៊ី នៅតែជាប់គាំងតាមបណ្តោយព្រំដែននៅឡើយ។ រថយន្ត១៦គ្រឿងបានមកដល់ប៉ុស្តិ៍ត្រួតពិនិត្យតាមព្រំដែន រង់ចាំការត្រួតឆែកឆេរពីសំណាក់អង្គការកាកបាទក្រហម។ តែដំណើរដូចជាយឺតយ៉ាវពិបាកចាប់ផ្តើម។
នៅផ្ទាល់នឹងកន្លែងវិញ ភាពបន្ទាន់មានកាន់តែខ្លាំង។ បណ្តាជនអ៊ុយក្រែននៅភាគខាងកើត កំពុងរង់ចាំយ៉ាងអន្ទះសារ និងកំពុងនាំ គ្នាចង់រត់ទៅឆ្លងព្រំដែនទៅខាងរុស្ស៊ី។ នៅខាងរុស្ស៊ី មានជំរំរង់ចាំទទួលជនភៀសខ្លួន អ៊ុយក្រែននិយាយភាសារុស្ស៊ី។ ហើយអាជ្ញាធររុស្ស៊ី បានរៀបចំសេវា ជួយឱ្យក្រុមជនភៀសខ្លួនអ៊ុយក្រែនអាចមានដំបូលជ្រក និងមានការងារធ្វើ ព្រមទាំងកសាងជីវិតថ្មី នៅតាមក្រុងផ្សេងៗទៀត។ បើនរណាបានឆ្លងព្រំដែនផុតហើយ ពិតជាមិនចង់ដកខ្លួនថយក្រោយមកទឹកដីកំណើតទេ។ ខុសពីបណ្តាជនអ៊ុយក្រែនដែលនៅជាប់គាំងក្នុងភាគខាងកើត ឬក្នុងជំរំជនភៀសខ្លួននៅលូហ្កង់ គ្រប់គ្រងដោយពួកឧទ្ទាមចង់ផ្តាច់ទឹកដី និងដែលមានអារម្មណ៍ថារដ្ឋាភិបាលក្រុងគៀវមិនគិតគូរបោះបង់ចោល។ អស្ថិរភាពមានជារៀងរាល់ថ្ងៃ ដោយសារការបាញ់ផ្លោងរបស់ក្រុមប្រដាប់អាវុធចង់ផ្តាច់ទឹកដី និងមិនបានទទួលជំនួយមនុស្សធម៌អ្វីទេ ពីរដ្ឋាភិបាល ឬពីខាងរុស្ស៊ី។ បណ្តាជនអ៊ុយក្រែននៅភាគខាងកើត ដែលរង់ចាំជំនួយមនុស្សធម៌យ៉ាងលំបាកលំបិន ទាំងពីខាងរដ្ឋាភិបាល និងទាំងពីខាងរុស្ស៊ី កំពុងស្ថិតក្នុងស្ថានភាពទៅមុខក៏មិនរួច ថយក្រោយក៏មិនដល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ