មេទ័ពថៃទទួលស្គាល់ជ័យជំនះរបស់គណបក្សភឿថៃ
ចុះផ្សាយនៅថ្ងៃ៖
ស្តាប់ - ០៦:០៧
នៅថ្ងៃចន្ទ ៤ កក្កដា ២០១១នេះ រដ្ឋមន្រ្តីការពារជាតិថៃបានប្រកាសថា មេទ័ពថៃទទួលស្គាល់ជ័យជំនះរបស់គណបក្សភឿថៃ ក្នុងការបោះឆ្នោតជាតិ កាលពីថ្ងៃអាទិត្យ។ ការប្រកាសនេះបានធ្វើឲ្យក្តីបារម្ភជុំវិញការធ្វើរដ្ឋប្រហារយោធាបានធូរស្បើយមកវិញ។ សំឡេងដ៏ច្រើនលើសលុបដែលគណបក្សភឿថៃទទួលបាន ធ្វើឲ្យគេរំពឹងថា រដ្ឋាភិបាលថ្មីអាចនឹងមានស្ថិរភាព។ ទីផ្សារភាគហ៊ុនថៃបានកើនឡើងជិត ៥% នៅថ្ងៃចន្ទនេះ។ ទោះជាយ៉ាងណា ស្ថិរភាពនយោបាយថៃទៅថ្ងៃអនាគតអាស្រ័យទៅលើចំណាត់ការរបស់រដ្ឋាភិបាលថ្មីលើសំណុំរឿងលោកថាក់ស៊ីន និងទៅលើទំនាក់ទំនងរវាងរដ្ឋាភិបាលថ្មីជាមួយមេដឹកនាំកងទ័ព។
យោងតាមលទ្ធផលបណ្តោះអាសន្នរបស់គណៈកម្មាធិការជាតិរៀបចំការបោះឆ្នោតថៃ គណបក្សភឿថៃទទួលបានអាសនៈ ២៦៥ ចំណែកគណបក្សប្រជាធិបតេយ្យទទួលបាន ១៥៩។
គួរធ្វើការកត់សម្គាល់ថា យោងតាមលទ្ធផលបោះឆ្នោតបណ្តោះអាសន្ន នៅតាមបណ្តាខេត្តភាគច្រើន នៅជាប់នឹងព្រំដែនជាមួយកម្ពុជា ដូចជា ខេត្តស្រះកែវ នគររាជសីមា បុរីរ៉ាំ សុរិន និងស៊ីសាកេត ជាដើម គណបក្សប្រជាធិបតេយ្យត្រូវទទួលបរាជ័យទាំងស្រុង ដោយមិនអាចរកបានសូម្បីតែមួយអាសនៈ។ នៅតាមខេត្តទាំងនេះ អាសនៈភាគច្រើនលើសលុបត្រូវបានទៅគណបក្សភឿថៃ ជាពិសេស ខេត្តដែលកើតមានការប៉ះទង្គិចប្រដាប់អាវុធរវាងកម្ពុជានិងថៃ គឺខេត្តសុរិន (ដែលជាប់នឹងប្រាសាទតាក្របី និងតាក្របី) ភឿថៃទទួលបាន ៧អាសនៈ លើ ៨អាសនៈ និងខេត្តស៊ីសាកេត (ដែលជាប់នឹងប្រាសាទព្រះវិហារ) ភឿថៃទទួលបាន ៧អាសនៈ លើ ៨អាសនៈ។ នេះបញ្ជាក់ថា នយោបាយរបស់លោកអាភិស៊ីតទាក់ទងនឹងបញ្ហាព្រំដែនកម្ពុជា-ថៃ មិនបានទទួលការគាំទ្រពីប្រជាជននៅតាមព្រំដែនទេ។
ដោយមើលឃើញពីជ័យជំនះដ៏ធំធេងរបស់គណបក្សភឿថៃ មេដឹកនាំយោធាថៃដូចជាគ្មានជម្រើសអ្វី ក្រៅតែពីទទួលស្គាល់លទ្ធផលបោះឆ្នោតនេះទេ ពីព្រោះការធ្វើរដ្ឋប្រហារយោធាដណ្តើមអំណាចពីគណបក្សដែលទទួលសំឡេងគាំទ្រដ៏ច្រើនសន្ធឹកសន្ធាប់បែបនេះ គឺជាការប្រថុយប្រថាននឹងការងើបបះបោររបស់ប្រជាជន។
លោកស្រីយីងឡាក់បានប្រកាសថា លោកស្រីនឹងបង្កើតរដ្ឋាភិបាលចម្រុះជាមួយគណបក្សតូចៗផ្សេងទៀត។ រដ្ឋាភិបាលចម្រុះនេះនឹងមានអាសនៈសរុបក្នុងសភារហូតដល់ទៅ ២៩៩អាសនៈ។ ទីផ្សារមូលបត្រថៃបានកើនឡើងជិត ៥% ដោយប្រមើលមើលឃើញអំពីស្ថិរភាពនៃរដ្ឋាភិបាលថ្មី។ រដ្ឋាភិបាលដឹកនាំដោយគណបក្សភឿថៃនឹងមិនងាយដួលរលំនោះទេ លើកលែងតែតុលាការធម្មនុញ្ញថៃលុបលទ្ធផលបោះឆ្នោតចោល ឬមានរដ្ឋប្រហារយោធា។
ទោះជាយ៉ាងណា ស្ថិរភាពរបស់រដ្ឋាភិបាលលោកស្រីយីងឡាក់ នឹងអាស្រ័យទៅលើចំណាត់ការទៅលើបញ្ហាដ៏រសើបចំនួនពីរ៖ ការលើកលែងទោសលោកថាក់ស៊ីន និងការស៊ើបអង្កេតទៅលើមេទ័ពថៃ ជុំវិញការប្រើកម្លាំងបង្រ្កាបបាតុកម្មអាវក្រហម។
នៅថ្ងៃចន្ទនេះ លោកថាក់ស៊ីនបានថ្លែងថា លោកមិនមានគម្រោងវិលត្រឡប់ចូលប្រទេសថៃវិញ ក្នុងពេលភ្លាមៗនេះទេ។ ក៏ប៉ុន្តែ គេនៅតែគិតថា ការលើកលែងទោសឲ្យលោកថាក់ស៊ីនវិលចូលស្រុកវិញ គឺជានយោបាយរបស់គណបក្សភឿថៃ។ ការវិលត្រឡប់របស់លោកថាក់ស៊ីនអាចនឹងប្រឈមមុខនឹងការតវ៉ាប្រឆាំងពីសំណាក់គណបក្សប្រជាធិបតេយ្យ ពីសំណាក់មេទ័ពថៃ និងជាពិសេស ពីសំណាក់ក្រុមអាវលឿង។ ពួកអាវលឿងទំនងជានឹងចេញធ្វើបាតុកម្មបង្កអស្ថិរភាព បង្កើតជាលេសឲ្យមេទ័ពថៃធ្វើរដ្ឋប្រហារសាជាថ្មីទៀត។
បញ្ហាស្មុគស្មាញមួយទៀតរបស់លោកស្រីនាយករដ្ឋមន្រ្តីថ្មី គឺជុំវិញការស៊ើបអង្កេតលើការបង្រ្កាបបាតុកម្មដោយកងទ័ពថៃ នាពេលកន្លងមក ដែលបណ្តាលឲ្យមនុស្សយ៉ាងតិច ៩០នាក់ស្លាប់ និងរបួសជិត ២០០០នាក់។ មេទ័ពថៃទំនងជាមិនសុខចិត្តបណ្តោយឲ្យអំណាចរបស់ពួកគេត្រូវរង្គោះរង្គើនោះទេ។ ប្រសិនបើរដ្ឋាភិបាលថ្មីបើកការស៊ើបអង្កេត ហើយអាចឈានទៅធ្វើការដាក់ទោសមេដឹកនាំកំពូលៗថៃ ពួកគេអាចនឹងធ្វើរដ្ឋប្រហារទម្លាក់រដ្ឋាភិបាលនេះចោល ដូចដែលពួកគេធ្លាប់ធ្វើជាច្រើនលើកច្រើនសាកន្លងមក។
ផ្ទុយទៅវិញ បើសិនជារដ្ឋាភិបាលថ្មីមិនធ្វើការស៊ើបអង្កេតលើពួកមេទ័ពទេ លោកស្រីយីងឡាក់អាចនឹងបាត់បង់ការគាំទ្រពីសំណាក់ពួកអាវក្រហម។ នៅថ្ងៃចន្ទនេះ នៅពេលដែលគណបក្សភឿថៃនៅមិនទាន់បង្កើតរដ្ឋាភិបាលបាននៅឡើយផង មេដឹកនាំក្រុមអាវក្រហមបាមធ្វើការទាមទាររួចជាស្រេចឲ្យរដ្ឋាភិបាលថ្មីធ្វើការស៊ើបអង្កេតលើការបង្រ្កាបបាតុកម្មដោយកងទ័ពថៃ។
ទោះជាយ៉ាងណា គណបក្សភឿថៃទំនងជាអាចចរចាស្វែងរកការសម្រុះសម្រួលគ្នាជាមួយមេដឹកនាំអាវក្រហម និងមេទ័ពថៃជុំវិញបញ្ហាលើកលែងទោសនេះ។ អ្នកជំនាញថៃជាច្រើនបានធ្វើការវិភាគថា នៅពេលនេះ មេទ័ពថៃប្រហែលជាកំពុងតែបារម្ភអំពីជោគវាសនាផ្ទាល់ខ្លួនឯង ជាងការវិលចូលស្រុករបស់លោកថាក់ស៊ីនទៅទៀត។ ដូច្នេះ គេអាចនឹងស្រុះស្រួលគ្នាលើកលែងទោសឲ្យគ្រប់អ្នកនយោបាយទាំងអស់ ដែលត្រូវបានកាត់ទោស ឬកំពុងប្រឈមមុខនឹងការកាត់ទោស ក្នុងនោះមានទាំងលោកថាក់ស៊ីន ទាំងមេដឹកនាំអាវក្រហម ដែលខ្លះត្រូវរងការចោទប្រកាន់ពីបទភេរវកម្ម និងទាំងមេទ័ពថៃ ដែលប្រឈមមុខនឹងការស៊ើបអង្កេតពីរឿងបង្រ្កាបបាតុកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ