ប្រព័ន្ធបច្ចេកវិទ្យាកំពុងកាត់ផ្តាច់ទំនាក់ទំនងផ្ទាល់របស់មនុស្ស
ចុះផ្សាយនៅថ្ងៃ៖
ស្តាប់ - ០៣:៥០
វិស័យព័ត៌មានវិទ្យាកំពុងរីកលូតលាស់យ៉ាងខ្លាំងនៅកម្ពុជា។ សារតាមទូរស័ព្ទ សារអេឡិចត្រូនិក ឬអ៊ីមែល បណ្តាញសង្គមនានា ទាំងនេះគឺជាឧបករណ៍ និងមធ្យោបាយជួយមនុស្សនៅក្នុងទំនាក់ទំនងការងារ និងទំនាក់ទំនងជាឯកជន ដែលផ្តល់ភាពចំណេញពេលវេលាក៏ពិតមែន ប៉ុន្តែ វាក៏កំពុងកាត់ផ្តាច់នូវទំនាក់ទំនងដោយផ្ទាល់របស់មនុស្សផងដែរ។ ដោយសារឧបករណ៍ទាំងនេះ ពលរដ្ឋខ្មែរកាន់តែច្រើនឡើង មិនសូវបានជួបគ្នា ហើយរឹតតែមិនសូវមើលមុខគ្នា ញញឹមដាក់គ្នានៅតាមទីសារធារណៈទៀតផង។
មកដល់ពេលនេះ មានមនុស្សតិចណាស់ ដែលគ្មានទូរស័ព្ទ។ ទន្ទឹមគ្នានេះ ក៏មានមនុស្សភាគច្រើន ដែលមានទូរស័ព្ទលើសពី១គ្រឿង។ ហើយពួកគេក៏ត្រូវតែមានទូរស័ព្ទទំនើបប្រភេទស្មាតហ្វូន ដែលអនុញ្ញាតអោយពួកគេអាចប្រើប្រាស់កម្មវិធីទំនាក់ទំនងជាច្រើនទៀតផង។ នេះគេនៅមិនទាន់រាប់អ្នកដែលមានឧបករណ៍ ឬគ្រឿងបច្ចេកវិទ្យាទំនើបផ្សេងទៀតក្នុងពេលតែមួយ ដូចជា កុំព្យូទ័រយួដៃ Ipad Tablet និងឧបករណ៍ស្តាប់ចំរៀងនានាទៀតផង។
តាមរយៈវត្តមាននៃឧបករណ៍ទាំងនេះ គេអាចមើលឃើញអំពីការរីកចំរើន និងដំណើរទៅមុខក្នុងវិស័យព័ត៌មានវិទ្យានៅកម្ពុជា។ តាមរយៈឧបករណ៍ទាំងនេះហើយ ដែលពលរដ្ឋខ្មែរធ្វើទំនាក់ទំនងគ្នាដោយមិនបាច់ជួបមុខគ្នា។ និយាយបែបម្យ៉ាង វាបានផ្តល់ផលចំណេញនៃពេលវេលា វាក៏បានផ្តល់ផលចំណេញផ្នែកហិរញ្ញវត្ថុផងដែរ។ តាមរយៈ ឧបករណ៍ទាំងនេះ គេអាចផ្ញើឯកសារនានាអោយគ្នាទៅវិញទៅមក ដោយមិនបាច់ចំណាយពេលវេលា ក្នុងការធ្វើដំណើរដែលធ្វើអោយពួកគេខាតបង់ប្រេងសាំងនៃយានយន្ត។ ចំពោះអ្នកជំនួញវិញ តាមរយៈឧបករណ៍ទាំងនេះ គេក៏អាចបញ្ជាលក់ និងទិញ ឬធ្វើពាណិជ្ជកម្មជាមួយគ្នាបានដែរ។
មនុស្សគ្រប់គ្នាកំពុងតែសប្បាយរីករាយនឹងឧបករណ៍អេឡិចត្រូនិកទាំងនេះ។ នេះជានិន្នាការនៃការវិវត្តន៍នៃវិស័យបច្ចេកវិទ្យា ដែលរូបភាពទូទៅ ត្រូវបានគេវាយតម្លៃជាវិជ្ជមាន។ ប៉ុន្តែ ទន្ទឹមគ្នា ឧបករណ៍បច្ចេកវិទ្យាទាំងនេះកំពុងតែបំផ្លាញទំនាក់ទំនងផ្ទាល់របស់ពលរដ្ឋខ្មែរផងដែរ។
នៅតាមទីផ្សារសាធារណៈ គេឃើញតែមនុស្សឈ្ងោកមុខចុចទូរស័ព្ទផ្ញើសារទៅមិត្តភក្តិ បើទោះជាមានមិត្តភក្តិ២នាក់កំពុងនៅក្បែរគ្នាក៏ដោយ ក៏ពួកគេកំពុងចុចទូរស័ព្ទពួកគេដែរ។ ពេលដើរចូលជណ្តើរយន្ត អ្នកខ្លះទាញទូរស័ព្ទមកចុចលេងហ្គេម ដោយមិនខ្វល់ពីការសំឡឹងមើលមុខមនុស្សដែលនៅក្នុងជណ្តើរយន្តនោះឡើយ។ នៅក្នុងសម័យកាលនេះ និស្សិតក៏ត្រូវផ្ញើលំហាត់ ឬការងារដែលគ្រូដាក់អោយធ្វើនោះ ទៅតាមអ៊ីមែលរបស់គ្រូរបស់ពួកគេទៀត។ ទាំងនេះគេនៅ មិនទាន់និយាយអំពី ការឈ្លក់វង្វេងនឹងបណ្តាញសង្គម ហ៊្វេសប៊ុកនៃមនុស្សសម័យថ្មីផង។ ជាមួយនឹងបណ្តាញសង្គមហ្វ៊េសប៊ុកនេះ មិននៅទីណានោះទេ នៅក្នុងផ្ទះ នៅក្នុងសាលារៀន នៅតាមអាហារដ្ឋាន និងនៅតាមទីសាធារណៈនានា គេឃើញតែមនុស្សឈ្ងោកមុខនឹងទូរស័ព្ទ ជជែកគ្នាតាមបណ្តាញសង្គមមួយនេះ។
បាតុភូតទាំងនេះហើយ ដែលកំពុងធ្វើអោយមនុស្ស កាន់តែឃ្លាតឆ្ងាយពីគ្នា។ គួរបញ្ជាក់ឡើងវិញថា ដោយសារតែឧបករណ៍អេឡិចត្រូនិកទាំងនេះហើយ ដែលមនុស្សសូម្បីតែនៅក្បែរគ្នាក៏មិនបានងើបមុខមើលគ្នា ញញឹមដាក់គ្នានោះ។ និយាយបែបម្យ៉ាងទៀត វាហាក់ដូចជាកំពុងតែបំផ្លាញការទាក់ទងដោយផ្ទាល់ ទល់មុខនៃមនុស្ស។ នេះហើយជាបច្ច័យអវិជ្ជមាននៃការរីកចំរើនផ្នែកព័ត៌មានវិទ្យា ដែលកំពុងបង្កអោយមានវិបត្តិផ្នែកសង្គម។
ដើម្បីស្តារស្ថានភាពនេះអោយប្រសើរឡើងវិញនោះ គឺគ្មានអ្នកណាក្រៅពីបុគ្គលជាតួអង្គមនុស្សខ្លួនឯង ដែលអាចធ្វើអោយមានការផ្លាស់ប្តូរបាតុភូតនេះ។ ព្រោះវាពាក់ព័ន្ធនឹងសិទ្ធិ និងជីវិតជាឯកជនរបស់បុគ្គលនីមួយៗ។
បុគ្គលទាំងឡាយគួរបានយកមកធ្វើជាពិសោធន៍ នូវផលប្រយោជន៍នៃទំនាក់ទំនងដោយផ្ទាល់ ទល់មុខគ្នា។ ទំនាក់ទំនងឃើញមុខគ្នា វានឹងបង្កើនក្តីស្រឡាញ់ ការជឿទុកចិត្ត រវាងគ្នា និងគ្នា និងយល់អំពីគំនិតគ្នាទៅវិញទៅមក ជាជាងការអានសារ ឬឃ្លាដែលគេផ្ញើទៅផ្ញើមកតាមសារអេឡិត្រូនិក ដែលវាមិនបានបង្ហាញអំពីអត្ថន័យពិតប្រាកដនៃទឹកចិត្តនៃគូភាគីសន្ទនា។ ហើយគេគួរតែទទួលស្គាល់ថា ពេលខ្លះ សារទាំងនេះក៏បង្ក អោយមានការយល់ច្រឡំទៀតផង។ ចំពោះអ្នកលេងហ្វ៊េសប៊ុកវិញ គេក៏ត្រូវរវល់ និងចំណាយពេលដ៏ច្រើនសម្រាប់ការសន្ទនាជាមួយមិត្តភក្តិ ជាច្រើនរយនាក់នៅក្នុងទំព័ររបស់ខ្លួនផងដែរ។
ដូច្នេះ ដោយមិនបដិសេធផលចំណេញផ្នែកពេលវេលា និងហិរញ្ញវត្ថុ គេគួរតែត្រឡប់មករកការណាត់ជួបគ្នាដោយផ្ទាល់ ទោះក្នុងក្របខណ្ឌមិត្តភក្តិ ក្របខណ្ឌការងារក៏ដោយចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ