ស៊ីរី៖រុស្ស៊ីចោទក្រុមឧទ្ទាមថា រំលោភបទឈប់បាញ់ ប្រជាជនពុំទាន់ទទួលបានជំនួយមនុស្សធម៌នៅឡើយ
ចុះផ្សាយនៅថ្ងៃ៖
ថ្ងៃអង្គារម្សិលមិញ រុស្ស៊ីបានចោទក្រុមឧទ្ទាមស៊ីរី ថាបានរំលោភបទឈប់បាញ់ ដោយបន្តបាញ់ប្រហារ២៣ដង ទៅលើសង្កាត់ដែលមានមនុស្សរស់នៅ និងទីតាំងកងទ័ពស៊ីរី។ ទោះ យ៉ាងនេះ ក្តី បទឈប់បាញ់៤៨ម៉ោង ដែលចាប់អនុវត្តនៅស៊ីរីតាំងពីយប់ថ្ងៃចន្ទមក ហាក់កំពុងដំណើរការទៅមុខ។
ប្រសិតអង្គការសហប្រជាជាតិទទួលបន្ទុកស៊ីរី លោកស្តាហ្វាន ដឺ មីស្ទូរ៉ា សង្កេតឃើញថា ហិង្សាបានថយចុះ បន្តបន្ទាប់។ បើបទឈប់បាញ់ដំណើរការបាន៤៨ម៉ោងនៅយប់ថ្ងៃពុធនេះ ហើយបន្តរហូត១សប្តាហ៍ តាមការកំណត់ បន្ទាប់ទៅនេះ រុស្ស៊ីនិងអាមេរិកអាចចាប់ផ្តើមបើកយុទ្ធនាការយោធារួមគ្នាកំទេចក្រុមជីហាត។
ដោយឡែក រហូតពេលនេះ ប្រជាជនស៊ីរី នៅតំបន់ដែលរងការឡោមព័ទ្ធ នៅមិនទាន់បានទទួលស្បៀងជំនួយពីអង្គការសហប្រជាជាតិនៅឡើយ។
អង្គការសហប្រជាជាតិទាមទារការធានាសុវត្ថិភាពរថយន្តដឹកស្បៀងមនុស្សធម៌
តាមធម្មតា ពេលអនុវត្តបទឈប់បាញ់ នៅម៉ោង៧យប់ថ្ងៃចន្ទ ក្នុងស្រុកស៊ីរី ស្បៀងមនុស្សធម៌អង្គការសហប្រជាជាតិត្រូវទៅដល់កន្លែងដែលរងការឡោមព័ទ្ធ ពិសេសនៅអាឡិបដែលក្រុមឧទ្ទាមឡោមព័ទ្ធ។ មូលហេតុដែលអង្គការសហប្រជាជាតិមិនទាន់អាចដឹកស្បៀងទៅអោយប្រជាជនស៊ីរីបាន គឺដោយសារអង្គការសហប្រជាជាតិត្រូវការការធានាថា រថយន្តដឹកស្បៀងត្រូវមានសុវត្ថិភាពសន្តិសុខគ្រប់គ្រាន់ មិនត្រូវរងគ្រាប់កាំភ្លើងទេ។
ពេលបទឈប់បាញ់អនុវត្តភ្លាម ហិង្សានៅមិនទាន់ធ្លាក់ចុះពេញទំហឹងភ្លាមទេ។ អង្គការសហប្រជាជាតិប្រាប់ថា ក្រុមប្រឆាំងបានបាញ់កាំភ្លើងត្បាល់ នៅតាមបណ្តោយផ្លូវ ឈ្មោះថា កាស្ទែលឡូ ជាផ្លូវសំខាន់នៅខាងជើងក្រុងអាឡិប។ តាមផ្លូវនេះ គេអាចទៅដល់ព្រំដែនតួកគី។ ជាផ្លូវដែលឡានដឹកស្បៀងត្រូវឆ្លងកាត់។ ដោយសារបញ្ហានេះ រុស្ស៊ីបានដាក់ប៉ុស្តិ៍ត្រួតពិនិត្យមួយនៅផ្លូវកាស្ទែលឡូនេះ។
ពេលនេះ បទឈប់បាញ់ហាក់ដំណើរការទៅស្រួលមែន តែមិនមែនថា គ្មានហិង្សាសោះដែរ គឺនៅមានបន្តិចបន្តួចដែរ។ មិនអញ្ចឹងទេ ម្សិលមិញនេះ រុស្ស៊ីក៏មិនហ៊ានចោទក្រុមឧទ្ទាមថា រំលោភបទឈប់បាញ់ដែរ។ ម្សិលមិញ រុស្ស៊ីចោទថាមានការរំលោភបទឈប់បាញ់នៅខែត្រអាឡិប ភាគខាងជើង នៅដាម៉ាស នៅហាម៉ា ភាគកណ្តាល នៅអ៊ីតឡេប រឺនៅឡាតាក្ចេភាគខាងលិចប្រទេស។
បញ្ហាមួយទៀត ដែលធ្វើអោយគេមិនអាចដឹកស្បៀងជួយប្រជាជន គឹដោយសារថា បើខាងតួកគីក្បែរនោះ ចង់ដឹកស្បៀងពីតួកគីចូលមកជួយប្រជាជនស៊ីរី ក៏រដ្ឋាភិបាលស៊ីរីជំទាស់ដែរ។ រដ្ឋាភិបាលស៊ីរីទាមទារអោយតួកគីសម្របសម្រួលរឿងស្បៀងនេះ ជាមួយស៊ីរី និងអង្គការសហប្រជាជាតិសិន មិនមែនចង់ដឹកមក ក៏ដឹកស្រេចចិត្តចង់នោះទេ។
ស្ថានការណ៍ស្ងប់ស្ងាត់ ក្រោយអនុវត្តបទឈប់បាញ់
តាំងពីបទឈប់បាញ់ដាក់អនុវត្ត យប់ថ្ងៃចន្ទមក ហិង្សាបានថយចុះ រហូតឈានទៅរកភាពស្ងប់ស្ងាត់។ ប្រជាជនស៊ីរីបានធូរចិត្តដោយសារលែងលឺសូរសម្លេងគ្រាប់ផ្លោង រឺសម្លេងឈឺចាប់របស់ជនរងគ្រោះទៀត។
ថ្ងៃអង្គារម្សិលមិញនេះ ក្មេងៗបាននាំគ្នាចេញក្រៅផ្ទះ ជិះទោង រឺលេងសើចសប្បាយជាមួយគ្នាឡើងវិញ ដោយមិនចាំបាច់ត្រូវភ័យពីសម្លេងគ្រាប់បែកទៀតទេ។ ធម្មតា ក្មេងៗត្រូវមនុស្សចាស់ហាមមិនអោយចេញក្រៅ ខ្លាចពួកគេរងគ្រោះ។
បទឈប់បាញ់ អនុវត្ត ចំថ្ងៃបុណ្យអ៊ីស្លាម អាអ៊ីត អាល់ អាត់ហា។ នៅអាឡិប ប្រជាជនបានប្រារព្ធបុណ្យខ្លះដែរ តែក្រពះពួកគេទទេសុទ្ធតែម្តង គ្មានអ្វីហូបចុក សម្រាប់ថ្ងៃបុណ្យនេះទេ។ គ្មានបន្លែ ផ្លែឈើអ្វីសេសសល់ នៅតាមផ្សារសម្រាប់ប្រជាជនទេ ព្រោះសង្គ្រាមអូសបន្លាយជាង៥ឆ្នាំហើយ។ គិតទៅ ៥ឆ្នាំមកនេះ មានមនុស្សស្លាប់ ៣សែននាក់។
ក្រៅពីបញ្ហាអត់ឃ្លាន នៅតាមតំបន់មួយចំនួនទៀត ក្រុមសង្គ្រោះកំពុងខ្វះសម្ភារព្យាបាលមនុស្សដែលរងរបួស។ ដោយឡែក មន្ទីរប់ង់តាហ្កូនបា្រប់ថា ការវាយប្រហារផ្លូវអាកាសកំទេចក្រុមជីហាតរដ្ឋអ៊ីស្លាម ៦ថ្ងៃចុងក្រោយនេះ អាចធ្វើអោយមានជនស៊ីវិលរងគ្រោះ។
បទឈប់បាញ់នៅផុយស្រួយ
បទឈប់បាញ់ពេលនេះ ហាក់ដំណើរការទៅមុខ តែក៏ផុយស្រួយដែរ។ សូមរំលឹកថា បទឈប់បាញ់នេះ ស្ថិតក្នុងក្របខណ្ឌនៃកិច្ចព្រមព្រៀងរវាងរុស្ស៊ីនិងអាមេរិក តំរូវអោយមានការផ្អាកប្រយុទ្ធគ្នារវាងក្រុមឧទ្ទាមដែលអាមេរិកគាំទ្រ និងកងទ័ពរដ្ឋាភិបាលលោកអាសាដ ដែលរុស្ស៊ីគាំទ្រ។ ទិសដៅចុងក្រោយគឺអនុញ្ញាតអោយក្រុមឧទ្ទាមនិងរដ្ឋាភិបាលចូលតុចរចាគ្នាវិញ ដើម្បីរកដំណោះស្រាយជម្លោះ។
បទឈប់បាញ់នេះ មិនបញ្ចូលភាគីក្រុមភេរវនិយមជីហាតរដ្ឋអ៊ីស្លាម និងក្រុមអាល់ណូស្រាទេ។ ម្ល៉ោះហើយ ទោះមានបទឈប់បាញ់ ក៏ខាងកងទ័ពស៊ីរីនៅតែបន្តវាយក្រុមភេរវជនរដ្ឋអ៊ីស្លាម រឺក្រុមហ្វាតេ អាល់ឆាំ ជាអតីតក្រុមអាល់ណូស្រា។ ក្រុមអាល់ ណូស្រានេះ បានផ្តាច់ខ្លួនពីក្រុមអាល់កៃដា។
បញ្ហាដែលចោទសម្រាប់បទឈប់បាញ់ពេលនេះ គឺថា កន្លងមក ក្រុមឧទ្ទាមមួយចំនួនធ្លាប់បានចូលដៃគ្នាជាមួយក្រុមអាល់ ណូស្រា ដើម្បីវាយប្រហារកងទ័ពស៊ីរី។ សួរថា តើក្រុមឧទ្ទាមត្រូវដោះស្រាយយ៉ាងណា ត្រូវបន្តចូលដៃជាមួយក្រុមជីហាត រឺក៏ផ្តាច់ខ្លួនពីក្រុមនេះ ដើម្បីអាចទទួលបានប្រយោជន៍នយោបាយ ពីបទឈប់បាញ់ ?
ប៉ុន្មានម៉ោងក្រោយមានកិច្ចព្រមព្រៀងរវាងរុស្ស៊ីនិងអាមេរិក នៅចុងសប្តាហ៍មុននេះ ក្រុមឧទ្ទាមបានប្រាប់ថា បានទទួលសំបុត្រមួយច្បាប់ពីអាមេរិក។ ក្នុងសំបុត្រនោះ អាមេរិកដាក់លក្ខខណ្ឌអោយក្រុមឧទ្ទាមគោរពតាមបទឈប់បាញ់ដែលអាមេរិកព្រមព្រៀងជាមួយរុស្ស៊ី។ អាមេរិកព្រមានក្រុមឧទ្ទាមមិនអោយរួមដៃជាមួយក្រុមភេរវជនហ្វាតេ អាល់ឆាំ ដាច់ខាត មិនដូច្នោះទេ ក្រុមឧទ្ទាមនឹងទទួលផលវិបាក។
ដោយឡែក ក្នុងកិច្ចព្រមព្រៀងអាមេរិក-រុស្ស៊ី គេមិនបាននិយាយពីរឿងអំណាចប្រធានាធិបតីអាសាដទេ។ គេមិនបាននិយាយថា តើលោកអាសាដ ត្រូវចុះពីអំណាច រឺយ៉ាងណាទេ។ ដូច្នេះ ក្រុមឧទ្ទាមមិនសូវទុកចិត្តកិច្ចព្រមព្រៀងនេះប៉ុន្មានទេ ព្រោះវាអាចប៉ះពាល់ដល់ប្រយោជន៍ខ្លួន ក្នុងនយោបាយអន្តរកាលស៊ីរី។
ដូច្នេះ អាចនឹងមានសកម្មជនឧទ្ទាមណាមួយបះបោរ ប្រឆាំងកិច្ចព្រមព្រៀងអាមេរិក-ស៊ីរីបាន។ បញ្ហានេះ អាចនាំអោយបទឈប់បាញ់ដែលកំពុងអនុវត្តពេលនេះ បរាជ័យទៅវិញបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ