រដ្ឋាភិបាលស៊ីរីបញ្ចេញរថក្រោះទៅបង្រ្កាបបាតុកម្មប្រឆាំង
ចុះផ្សាយនៅថ្ងៃ៖
ស្តាប់ - ០៤:៥៨
នៅថ្ងៃចន្ទនេះ ការបង្រ្កាបបាតុកម្មនៅតែបន្តធ្វើ នៅប្រទេសស៊ីរី ដោយរដ្ឋាភិបាលចាប់ផ្តើមបញ្ចេញរថក្រោះ និងរថពាសដែក យកទៅដាក់ពង្រាយនៅក្នុងទីក្រុងដេរ៉ា (Deraa) ដែលជាចំណុចចាប់ផ្តើមនៃចលនាបាតុកម្ម។ ក្នុងពេលជាមួយគ្នានេះ អាជ្ញាធរស៊ីរីបានបិទច្រកព្រំដែនគោកជាមួយប្រទេសហ្សកដានីទាំងស្រុង។ នេះជាសញ្ញាថា អាជ្ញាធរស៊ីរីទំនងជាកំពុងបង្កើនការបង្រ្កាបលើចលនាប្រឆាំង។
ទីក្រុងដេរ៉ា (Deraa) ស្ថិតនៅប៉ែកខាងត្បូងប្រទេសស៊ីរី ជាប់ព្រំដែនជាមួយប្រទេសហ្សកដានី។ ទីក្រុងដេរ៉ានេះហើយ ដែលជាចំណុចចាប់ផ្តើមនៃចលនាប្រឆាំង នៅស៊ីរី។ ចាប់តាំងពីម៉ោង ៤ព្រឹកថ្ងៃចន្ទនេះមក (ម៉ោងក្នុងស្រុក) ទីក្រុងដេរ៉ាត្រូវបានកាត់ផ្តាច់ពីពិភពខាងក្រៅស្ទើរតែទាំងស្រុង។ ទឹក ភ្លើង និងបណ្តាញទូរស័ព្ទត្រូវបានកាត់ផ្តាច់។ រថក្រោះ និងរថពាសដែកជាច្រើនគ្រឿងបានចូលទៅដល់កណ្តាលក្រុង តាំងពីព្រលឹមស្រាងៗ។ រដ្ឋមន្រ្តីក្រសួងព័ត៌មាននៃប្រទេសហ្សកដានីបានឲ្យដឹងថា ស៊ីរីបានបិទច្រកព្រំដែនគោកទាំងអស់ជាមួយហ្សកដានី នៅព្រឹកថ្ងៃចន្ទនេះ។
យោងតាមការរៀបរាប់របស់ប្រជាជនដែលរស់នៅក្នុងទីក្រុងដេរ៉ា អាជ្ញាធរស៊ីរីបានប្រើកាំភ្លើងធំបាញ់ផ្លោងចូលក្នុងក្រុង និងដាក់ក្រុមអ្នកបាញ់ស៊ីបនៅលើដំបូលអគារ។ នៅតាមផ្លូវ គេឃើញមានអ្នកស្លាប់ និងអ្នករបួសជាច្រើន។ ក៏ប៉ុន្តែ គេនៅមិនទាន់ដឹងអំពីចំនួនពិតប្រាកដនោះទេ ពីព្រោះម្នាក់ៗនាំគ្នាពួនសំងំតែនៅក្នុងផ្ទះ គេចពីគ្រាប់កាំភ្លើង។
គួរបញ្ជាក់ថា ចាប់តាំងពីចាប់ផ្តើមមានចលនាបាតុកម្មប្រឆាំងរដ្ឋាភិបាលមក មានមនុស្សយ៉ាងតិច ៣៥០នាក់ បានបាត់បង់ជីវិត ក្នុងការបង្រ្កាបបាតុកម្ម។ ការបង្រ្កាបបាតុកម្មមានសន្ទុះកាន់តែខ្លាំង ចាប់តាំងពីថ្ងៃសុក្រមក។ ក៏ប៉ុន្តែ នៅថ្ងៃចន្ទនេះ គឺជាលើកទីមួយហើយ ដែលមានព័ត៌មានស្តីពីការបញ្ចេញរថក្រោះ និងរថពាសដែកមកបង្រ្កាបបាតុកម្ម។
កាលពីពេលថ្មីៗនេះ លោកបាស្ហារ អាល់ អាសាដ (Bachar al-Assad) ប្រធានាធិបតីស៊ីរី បានសុខចិត្តលុបចោលច្បាប់ស្តីពីការប្រកាសអាសន្ន តាមការទាមទាររបស់បាតុករ។ ក៏ប៉ុន្តែ សម្បទាននេះហាក់ដូចជាធ្វើឡើងយឺតពេលទៅហើយ ព្រោះអាជ្ញាធរស៊ីរីបានធ្វើការបង្រ្កាបបាតុកម្មបណ្តាលឲ្យមនុស្សរាប់រយនាក់បាត់បង់ជីវិតរួចទៅហើយ។ នៅពេលនេះ បាតុករប្រឆាំងទាមទារឲ្យលោកអាល់អាសាដចុះចេញពីតំណែងតែម្តង ហើយទាមទារឲ្យធ្វើការកែប្រែរដ្ឋធម្មនុញ្ញ ដើម្បីបញ្ចប់របបដឹកនាំដោយគណបក្សតែមួយ។
អ្នកវិភាគជាច្រើនយល់ថា រដ្ឋាភិបាលរបស់លោក អាល់ អាសាដ ទំនងជានឹងមិនសុខចិត្តចុះចាញ់ចលនាប្រឆាំង ដូចនៅប្រទេសអេហ្ស៊ីប ឬទុយនីស៊ីនោះទេ។ ដូច្នេះ គេកំពុងតែបារម្ភថា ឈាមអាចនឹងហូរកាន់តែច្រើន ក្នុងការបង្រ្កាបបាតុកម្ម នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ