កូរ៉េខាងត្បូងតាមប្រមាញ់រកទាហានរត់ចោលជួរ ដែលបានបាញ់សម្លាប់ទាហាន៥នាក់
ចុះផ្សាយនៅថ្ងៃ៖
ស្តាប់ - ០៨:០១
នៅថ្ងៃអាទិត្យទី ២២ មិថុនា កងទ័ពកូរ៉េខាងត្បូងកំពុងបើកប្រតិបត្តិការ តាមរកចាប់នាយទាហានម្នាក់ ដែល បានរត់ចោលជួរ បន្ទាប់ពីបាញ់សម្លាប់សហជីវិន៥នាក់របស់ខ្លួន កាលពីយប់ថ្ងៃសៅរ៍ នៅក្នុងបន្ទាយ ដែលស្ថិតនៅជាប់ព្រំដែនជាមួយកូរ៉េខាងជើង។ តាមអ្នកនាំពាក្យក្រសួងការពារជាតិកូរ៉េខាងត្បូង ការផ្ទុះអាវុធ បាញ់គ្នាមួយប្រាវ ជាមួយនាយទាហានរត់ចោលជួរខាងលើបានធ្វើឲ្យទាហានម្នាក់បន្ថែមទៀតរងរបួស នៅថ្ងៃអាទិត្យ។
នាយពលបាលលីម ដែលបានបាញ់សម្លាប់ទាហាន៥នាក់ និងធ្វើឲ្យរបួស ៧នាក់ នៅក្នុងអង្គភាពទ័ព ក្នុងខេត្តGangwon កំពុងរត់គេចខ្លួន ជាមួយនឹងកាំភ្លើងពាក់កណ្តាលស្វ័យប្រវត្តិមួយដើម និងគ្រាប់បែកដៃជាច្រើនគ្រាប់។
យោងតាមក្រសួងការពារជាតិកូរ៉េខាងត្បូង នាយពលបាល លីម អាយុ ២៣ឆ្នាំ ដែលកំពុងបម្រើការនៅអង្គភាព ទ័ពជើងគោក ទី ២២នឹងត្រូវអស់កាតព្វកិច្ចបម្រើយោធា ក្នុងរយៈពេល ៣ខែខាងមុខ។ តាមមន្រ្តីយោធា កូរ៉េខាងត្បូងដែលសុំមិនបញ្ចេញឈ្មោះ នាយទាហានលីម ពិបាកសម្របខ្លួន នៅក្នុងជួរកងទ័ព។ ការត្រួតពិនិត្យផ្នែកផ្លូវចិត្តនៅក្នុងអង្គភាពដែលលីមបម្រើការ ធ្លាប់បានណែនាំឲ្យអ្នកគ្រប់គ្រង មានការប្រុងប្រយ័ត្ន និងយកចិត្តទុកដាក់ជាពិសេស ទៅលើ នាយទាហានលីម។
រឿងបាញ់សម្លាប់នៅក្នុងជួរកងទ័ព ឧស្សាហ៍កើតមាននៅកូរ៉េខាងត្បូង
ករណីកន្លងមកបង្ហាញថា ការជេប្រមាថ ការប៉ះពាល់ផ្លូវភេទ អំពើហិង្សា និងសម្ពាធនៅក្នុងជួរកងទ័ពបានជំរុញឲ្យនាយទាហានដែលជាប់កាតព្វកិច្ចបម្រើយោធា ធ្លាក់ទឹកចិត្ត រហូតដល់ទៅ ហ៊ានបាញ់សម្លាប់មេបញ្ជាការ ឬទាហានផ្សេងទៀត។
ឧទាហរណ៍ កាលពី ឆ្នាំ ២០១១កន្លងទៅយុវទាហានជាប់កាតព្វកិច្ចម្នាក់ដែលមានអាយុ ១៩ឆ្នាំបានសម្លាប់សហជីវិនរបស់ខ្លួន៤នាក់ មុននឹងប៉ុនប៉ងសម្លាប់ខ្លួនឯង។ ប៉ុន្តែ កាលណោះ គេបានអន្តរាគមទាន់ មិនឲ្យយុវទាហានកេះបង្កៃគ្រាប់បែកសម្លាប់ខ្លួន។ នៅក្នុងពេលចាប់ខ្លួន យុវទាហានរូបនោះបានពន្យល់ថា ការជេប្រមាថ និងការវាយដំធ្វើបាប នៅក្នុងអង្គភាព ធ្វើឲ្យរូបគេមិនអាចទ្រាំទ្របានតទៅទៀត។
ក្រៅតែពីការធ្វើបាបនៅក្នុងបន្ទាយ យុវទាហានជាច្រើនដែលជាប់កាតព្វកិច្ចយោធានិយាយថា ពួកគេរងសម្ពាធដ៏ធំមួយ នៅពេលពួកគេជាប់ឈ្មោះឲ្យយាមប្រចាំការ នៅតាមបណ្តោយព្រំដែន ដែលនៅជាប់ជាមួយព្រំដែនកូរ៉េខាងជើង។ នៅតាមព្រំដែន ជាប់តំបន់ដែលគ្មានកងទ័ព កងទ័ពកូរ៉េខាងត្បូង ត្រូវថ្នាក់លើបញ្ជាឲ្យប្រុងប្រយ័ត្ន និងយាមយ៉ាងម៉ត់ចត់បំផុត។ បើទោះបីជាសង្រ្គាមកូរ៉េបានចប់ទៅហើយ កាលពីឆ្នាំ ១៩៥៣ ប៉ុន្តែ កូរ៉េខាងជើង និងខាងត្បូង នៅតែអាចផ្ទុះសង្គ្រាមដាក់គ្នា ដោយសារតែប្រទេសទាំងពីរមិនព្រមចុះហត្ថលេខាសន្តិភាពជាមួយគ្នា។
នៅតាមព្រំដែនកូរ៉េទាំងពីរ ទាហានរាប់ម៉ឺននាក់ ត្រូវដាក់ឲ្យប្រចំាការ យាមតឹងរ៉ឹងបំផុត។ នៅខាងកូរ៉េខាងត្បូង ទាហានមួយភាគ ដែលចូលទៅប្រចំាការនៅតាមព្រំដែន ជាប់តំបន់គ្មានកងទ័ព ភាគច្រើនជាយុវជនស៊ីវិល ដែលជាប់កាតព្វកិច្ចបម្រើកងទ័ព ដែលកំណត់ឡើងដោយច្បាប់របស់កូរ៉េខាងត្បូង។ ការខ្វះបទពិសោធន៍ និងទម្ងន់ទទួលខុសត្រូវ មិនស៊ីគ្នានឹងសមត្ថភាព ឧស្សាហ៍រុញច្រានឲ្យយុវទាហានបាក់ទឹកចិត្ត និងចង់រត់ចោលជួរ។
កាលពីពេលប៉ុន្មានឆ្នាំមុននេះ ក្រសួងការពារជាតិកូរ៉េខាងត្បូងបានបន្ទោសដល់ក្រុមកងទ័ពដែលប្រចំាការនៅតាមព្រំដែន ពីបទធ្វេសប្រហែល បណ្តោយឲ្យទាហានជាតិកូរ៉េខាងជើងម្នាក់អាចចូលក្នុងទឹកដីកូរ៉េខាងត្បូង។
កាលពីឆ្នាំ ១៩៨៤ គឺនៅក្នុងអង្គភាព ទ័ពជើងគោក ទី ២២ ដែលស្ថិតនៅតាមព្រំដែនជាមួយកូរ៉េខាជើង មាននាយទាហានកូរ៉េខាងត្បូង បានបាញ់សម្លាប់ទាហាន១៥នាក់ នៅក្នុងបន្ទាយ មុននឹងរត់ឆ្លងចូលទៅក្នុងទឹកដីកូរ៉េខាងជើង។ តើនេះដោយសារគេមិនអាចទ្រាំទ្របាននឹងសម្ពាធ របស់ថ្នាក់លើ កូរ៉េខាងត្បូង រហូតធ្វើឲ្យគេសុខចិត្តរត់ចុះចូលទៅក្នុងទឹកដីកូរ៉េខាងជើង ទៅឬមួយដោយសារទាហានខាងលើធ្លាប់ជាចារកិច្ចរបស់ កូរ៉េខាងជើង? កូរ៉េខាងជើងគ្រាន់តែបានបញ្ជាក់ថា ពិតជាមានទាហានរត់ចូលទៅក្នុងទឹកដីរបស់ខ្លួន ប៉ុន្តែមិនបានបញ្ជាក់ពី មូលហេតុនោះទេ។
រដ្ឋាភិបាលកូរ៉េខាងត្បូងបានយល់ដឹងពីបញ្ហាដែលកើតមាននៅក្នុងជួរកងទ័ព និងបានព្យាយាមកាត់បន្ថយការវាយធ្វើបាប នៅក្នុងបន្ទាយ ប៉ុន្តែ រឿងនេះត្រូវគេមើលឃើញថា នឹងមិនអាចដោះស្រាយ ឬធ្វើការផ្លាស់ប្តូរឥរិយាបទដែលធ្លាប់កើតមានជាប្រពៃណី នៅក្នុងជួរកងទ័ព កូរ៉េខាងត្បូងបានភ្លាមៗទេ។
ចូលបម្រើទ័ពជាកាតព្វកិច្ចរបស់ពលរដ្ឋ
នៅចំពោះមុខការគំរាមកំហែង ជាប់ជានិច្ចពីសំណាក់កូរ៉េខាងជើង ទីក្រុងសេអ៊ូលមាននយោបាយពង្រឹងចំនួនកងទ័ពរបស់ខ្លួន ដែលមានជិត ៧សែននាក់ ដើម្បីទប់ទល់នឹងទ័ពកូរ៉េខាងជើង ដែលមានចំនួន ១លាន សែននាក់។ នៅកូរ៉េខាងត្បូង មនុស្សទាំងពីរភេទ ដែល មានអាយុ ពី១៨ឆ្នាំ ដល់៣០ឆ្នាំ ត្រូវជាប់កាតព្វកិច្ចបម្រើយោធា យ៉ាងហោច ពីមួយឆ្នាំ ទៅពីរឆ្នាំ។ ពួកគេមួយចំនួនត្រូវផ្អាកការសិក្សា ឬការងារមួយរយៈ ដើម្បីចូលបម្រើយោធា។
ក្រុមមនុស្សមួយចំនួនត្រូវច្បាប់អនុញ្ញាតឲ្យគេចផុតពីកាតព្វកិច្ចយោធា មានដូចជាបុរសដែលមានកូន ឬមនុស្សក្នុងបន្ទុក ចាប់ពីបីនាក់ ឡើងទៅ ឬកីឡាករដែលធ្លាប់បានមេដាយអូឡាំពិក ឬក្រុមមនុស្សដែលមានសាក់ ពេញខ្លួន ដែលគេចាត់ទុកជាក្រុមបងធំ។ ក្រុមមនុស្សទាំងនេះ ត្រូវបានគេចាត់ទុកជាកូនព្រះ ដោយសារតែរួចផុតពីកាតព្វកិច្ចធ្វើយោធា។
មនុស្សមួយចំនួនបានលួចសាក់ ដើម្បីរួចខ្លួន ឬលួចសូកលុយដើម្បីកុំឲ្យជាប់ឈ្មោះធ្វើទាហាន។ ប៉ុន្តែ នៅពេលចាប់បាន ពួកគេនឹងត្រូវពិន័យជាប់គុក មួយឆ្នាំកន្លះ។ ចំណែកមនុស្សមួយក្រុមទៀត ឧទាហរណ៍ដូចជាក្រុមអ្នកចម្រៀង តារាភាពយន្តដែលមិនចង់ចូលធ្វើទាហានបានទៅសុំសញ្ជាតិបរទេសដើម្បីរួចផុតពីកាតព្វកិច្ច ប៉ុន្តែ បែរជាត្រូវគេបរិហាររិះគន់ និងចាត់ទុកជាការអ៉ាម៉ាស ឬត្រូវបណ្តេញចេញពីទឹកដីផងក៏មាន ព្រោះ នៅក្នុងផ្នត់គំនិតប្រជាជនកូរ៉េខាងត្បូង ការចូលបម្រើកងទ័ពជាមោទនភាព និងបញ្ជាក់ពីវីរភាពរបស់ប្រជាជននេះដើម្បីទប់ទល់នឹងការគំរាមកំហែងរបស់កូរ៉េខាងជើង។
នៅក្នុងជួរកងទ័ពកូរ៉េខាងត្បូង គេប្រកាន់វិន័យតឹងរ៉ឹង ដែលតាមពិតទៅ មិនស៊ីចង្វាក់គ្នា នឹងឥរិយាបថរបស់នាយទាហានជំនាន់ថ្មី ដែលចុះឈ្មោះ ដោយសារជាប់កាតព្វកិច្ចយោធា។ តាមមន្រ្តីយោធារបស់កូរ៉េខាងត្បូង យុវជនកូរ៉េខាងត្បូងបច្ចុប្បន្ន មានចរិកលក្ខណៈខុសពីជំនាន់ឪពុកម្តាយរបស់ពួកគេដែលធ្លាប់ចុះឈ្មោះបម្រើទាហានមួយរយៈ ទៅតាមការតម្រូវរបស់ច្បាប់។ ពីមុន គ្រប់ទាហានយុវជនកូរ៉េខាងត្បូងចុះឈ្មោះហ្វឹកហ្វឺនក្នុងជួរកងទ័ព ដើម្បីស្មារតីស្នេហាជាតិ ដើម្បីទប់ទល់នឹងការវាយប្រហារណាមួយរបស់កូរ៉េខាងជើង។ ប៉ុន្តែ បច្ចុប្បន្ន យុវជនភាគច្រើនមានចរិតអាត្មានិយម និងសម្ភារៈនិយម គឺមិនអាចទ្រាំទ្រនឹងជីវិតលត់ដំ នៅក្នុងជួរកងទ័ពបានទេ។ ដោយសារតែការលត់ដំ ហ្វឹកហ្វឺន និងវិន័យតឹងរ៉ឹង យុវជនជាច្រើនចង់គេចវេសមិនចង់ចូលចុះឈ្មោះក្នុងជួរកងទ័ព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ