ជំនួបរវាងប្រមុខដឹកនាំបារាំងនិងអាឡឺម៉ង់ដើម្បីរកវិធីផ្សះផ្សារគ្នា
ចុះផ្សាយនៅថ្ងៃ៖
ស្តាប់ - ០៤:២៩
នៅល្ងាចថ្ងៃចន្ទ ទី១៤ មិថុនា ២០១០នេះ លោកនីកូឡា សាកូហ្ស៊ី (Nicolas Sarkozy) និងលោកស្រីអង់ហ្កេឡា មែរកិល (Angela Merkel) នឹងជួបពិភាក្សាគ្នា នៅទីក្រុងប៊ែរឡាំង ប្រទេសអាឡឺម៉ង់។ ជំនួបនេះ គ្រោងធ្វើ កាលពីថ្ងៃចន្ទ សប្តាហ៍មុន ក៏ប៉ុន្តែ ត្រូវបានផ្អាកទៅវិញ ដែលជាហេតុធ្វើឲ្យគេយល់ថា បារាំង និងអាឡឺម៉ង់ខ្វែងគំនិតគ្នាកាន់តែខ្លាំង អំពីដំណោះស្រាយ វិបត្តិសេដ្ឋកិច្ចអឺរ៉ុប។
ការប្រកាសផ្អាកជំនួបកំពូលរវាងលោកសាកូហ្ស៊ី និងលោកស្រីមែរកិល កាលពីថ្ងៃចន្ទមុន បានធ្វើឲ្យគ្រប់គ្នាសន្និដ្ឋានថា ការខ្វែងគំនិតគ្នារវាងបារាំង និងអាឡឺម៉ង់ កើតមានកាន់តែខ្លាំង។ ហេតុផលនៃការលើកពេលជំនួបនេះ ត្រូវបានលើកឡើងខុសៗគ្នា ដោយភាគីអាឡឺម៉ង់ និងភាគីបារាំង។ រដ្ឋាភិបាលបារាំងបានលើកហេតុផលថា មកពីលោកស្រីមែរកិលជាប់រវល់ ទើបត្រូវលើកពេល។ ចំណែកខាងអាឡឺម៉ង់វិញ បានលើកឡើងថា ខាងភាគីបារាំង ក៏បានសុំលើកពេលប្រជុំនេះដែរ។
ជាទូទៅ យើងសង្កេតឃើញថា រាល់លើក នៅពេលមានបញ្ហា ក្នុងសហភាពអឺរ៉ុប គឺបារាំង និងអាឡឺម៉ង់នេះហើយ ដែលតែងតែសហការគ្នាយ៉ាងជិតស្និទ្ធ ដើម្បីស្វែងរកដំណោះស្រាយរួម។ ហេតុដូច្នេះហើយបានជា តែងតែចាត់ទុកបារាំង និងអាឡឺម៉ង់ថាជាកម្លាំងចលករដ៏សំខាន់បំផុត នៅក្នុងសហភាពអឺរ៉ុប។ ក៏ប៉ុន្តែ នៅពេលនេះ ប្រឈមមុខនឹងវិបត្តិសេដ្ឋកិច្ចដ៏ធ្ងន់ធ្ងរ ក្នុងតំបន់អឺរ៉ូ ប្រទេស ដែលជាក្បាលម៉ាស៊ីនសហភាពអឺរ៉ុបនេះ បែរជាប្រទាញប្រទង់គ្នាយ៉ាងខ្លាំងទៅវិញ។
ទាំងបារាំង និងទាំងអាឡឺម៉ង់ សុទ្ធតែយល់ស្របគ្នាថា អឺរ៉ុបចាំបាច់ត្រូវតែធ្វើកំណែទម្រង់ផ្នែកអភិបាលកិច្ចវិស័យ សេដ្ឋកិច្ច។ អឺរ៉ុបចាំបាច់ត្រូវតែមានវិធាន និងយន្តការ ដើម្បីគ្រប់គ្រងនយោបាយថវិកាជាតិនៃបណ្តារដ្ឋជាសមាជិក ដើម្បីចៀសវាងកុំឲ្យវិបត្តិដូចនៅប្រទេសក្រិក កើតឡើងជាថ្មីទៀត។ ក៏ប៉ុន្តែ អ្វីដែលប្រទេសទាំងពីរខ្វែងគំនិតគ្នា គឺខ្វែងគំនិតលើវិធីសាស្រ្តនៃការធ្វើកំណែទម្រង់នេះ។
បារាំងចង់ឲ្យគេបង្កើតស្ថាប័នពិសេសមួយ ដើម្បីត្រួតពិនិត្យមើលនយោបាយសេដ្ឋកិច្ច ជាពិសេស នយោបាយថវិកា របស់បណ្តាប្រទេសសមាជិកសហភាពអឺរ៉ុប ដែលប្រើលុយអឺរ៉ូ (១៦ប្រទេស)។ ចំណែកអាឡឺម៉ង់វិញចង់ឲ្យការត្រួតពិនិត្យថវិកាជាតិនេះ ត្រូវតែធ្វើឡើង ក្នុងក្របខ័ណ្ឌសហភាពអឺរ៉ុបទាំងមូល (២៧ប្រទេស) មិនមែនត្រឹមតែតំបន់អឺរ៉ូនោះទេ។
ចំណុចខ្វែងគំនិតគ្នាមួយទៀត គឺនៅត្រង់ថា អាឡឺម៉ង់ទាមទារឲ្យគ្រប់ប្រទេសក្នុងសហភាពអឺរ៉ុបកាត់បន្ថយឱនភាព ថវិកាឲ្យបានលឿនបំផុត។ កាលពីសប្តាហ៍មុននេះ រដ្ឋាភិបាលអាឡឺម៉ង់បានសន្យាកាត់បន្ថយឱនភាពថវិកាជាតិអាឡឺម៉ង់ឲ្យបាន ៨០ពាន់លានអឺរ៉ូ នៅឆ្នាំ២០១៤ ហើយបានទាមទារឲ្យប្រទេសផ្សេងទៀតយកតម្រាប់តាម។ ក៏ប៉ុន្តែ បារាំងបានរិះគន់វិធានការរបស់អាឡឺម៉ង់នេះ ដោយលើកឡើងថា ក្នុងរយៈពេលតែ ៤ឆ្នាំ (២០១០-២០១៤) ការកាត់បន្ថយឱនភាពថវិកាច្រើនសន្ធឹកសន្ធាប់ ដែលស្នើឡើងដោយអាឡឺម៉ង់នេះ នឹងធ្វើឲ្យប៉ះពាល់ដល់កំណើនសេដ្ឋកិច្ចអឺរ៉ុប។
នៅពេលនេះ គេនាំគ្នារង់ចាំមើលលទ្ធផលនៃជំនួបកំពូលរវាងលោកសាកូហ្ស៊ី និងលោកស្រីមែរកិល។ គេរំពឹងថា ប្រមុខដឹកនាំទាំងពីរនឹងអាចសម្រុះសម្រួលគ្នាបញ្ចប់ភាពតានតឹងនេះ ហើយស្វែងរកចំណុចកណ្តាលរួមគ្នាមួយ។ គេខ្លាចថា ជំនួបកំពូលអឺរ៉ុប ដែលនឹងចាប់បើកធ្វើនៅថ្ងៃព្រហស្បតិ៍ ទី១៧ មិថុនា ខាងមុខនេះ អាចនឹងត្រូវបរាជ័យ ប្រសិនបើបារាំង និងអាឡឺម៉ង់នៅតែខ្វែងគំនិតគ្នាបែបនេះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ