ជនជាតិរុស្ស៊ី២នាក់ ត្រូវបានចាប់ពង្រត់ នៅស៊ីរី ដោយក្រុមមិនបញ្ចេញឈ្មោះ
ដំណឹងនេះ បញ្ជាក់ជាផ្លូវការដោយស្ថានទូតរុស្ស៊ី ប្រចាំនៅស៊ីរី ដែលកំពុង វែកញែកបំភ្លឺអំពីទីកន្លែង ជាប់ក្នុងថ្នូរ នៅនៃជនរួមឈាមខ្លួន។ លោករដ្ឋមន្ត្រីការបរទេសរុស្ស៊ី Serguei Lavrov ថ្លែងថា ម៉ូស្គូនឹងចាត់រាល់វិធានការចាំបាច់ទាំងអស់ ដើម្បីរំដោះជាតិរុស្ស៊ី ទាំងនោះមកវិញ។ ពួកឧក្រិដ្ឋជន ទើបទាមទារប្រាក់លោះ ជាថ្នូរនឹងការដោះលែងគេ។
ចុះផ្សាយនៅថ្ងៃ៖
ស្តាប់ - ០២:៣០
ក្រសួងការបរទេសរុស្ស៊ីលំអិតថា ការចាប់ពង្រត់នោះ បានប្រព្រឹត្តទៅ ល្ងាចម្សិលមិញ ពេលដែល ជាតិរុស្ស៊ីទាំងពីរនាក់នោះ ធ្វើដំណើរតាមផ្លូវ ពីក្រុង Homs ទៅកាន់ក្រុងផែ Tartous នៅប៉ែកខាងលិចប្រទេសស៊ីរី។ ជាតិរុស្ស៊ីអភ័ព្វ ២នាក់នោះ គឺម្នាក់ឈ្មោះ Gorelov ដែលបាន ទៅដល់ប្រទេសស៊ីរី កាលពីដើមខែតុលា ដើម្បីធ្វើការតាមកុងត្រា ចុះជាមួយ ក្រុមហ៊ុន ឯកជន។ ម្នាក់ទៀត ឈ្មោះ Hassun កាន់ passeport ស៊ីរីផង រុស្ស៊ីផង ដោយគាត់មាន ប្រពន្ធ ជាតិរុស្ស៊ី ហើយរស់នៅជាប់ ជាអចិន្ត្រៃយនៅស៊ីរី។ ព្រឹកមិញ ពួកចាប់ពង្រត់នោះ បានទូរសព្ទ ទៅ រោងចក្រជាទីដែលអ្នកទាំងនោះធ្វើការ ថ្លែងទាមទារទៅហើយនូវប្រាក់សម្រាប់លោះ ជនដែលជាប់ ក្នុងដៃគេ ប៉ុន្តែ គេឥតលំអិត អំពីទំហំប្រាក់លោះនោះទេ។
ធ្លាក់ខ្លួនអភ័ព្វ ត្រូវគេចាប់ពង្រត់ដែរ ជាមួយ អ្នកទាំងពីរនោះ គឺវិស្វករ ជាតិអ៊ីតាលី ឈ្មោះ Mario Belluomo។ គេទាំងបីនាក់សុទ្ធតែធ្វើការ នៅរោងចក្រខាងស្លរំលាយដែកថែប នៃក្រុមហ៊ុន ឯកជន Hmisho Co។ ដោយធ្វើការឲ្យរោងចក្រនេះ គេបានស្នាក់នៅ ក្នុង សណ្ឋាគារ ក្នុងក្រុងផែ Tartous មាត់សមុទ្រមេឌីទែរ៉ាណេ ជាទីដែលមាន មូលដ្ឋានកងម៉ារីនរុស្ស៊ីស្ថិតនៅ ហើយជាក្រុងផែទី២ នៅស៊ីរី បន្ទាប់ពីក្រុងផែ ឈ្មោះ Lattaquié។
ដោយហេតុថា ការចាប់ពង្រត់ បានប្រព្រឹត្តទៅនៅជាយក្រុង Lattaquié នេះ បានជាទូរទស្សន៍ រុស្ស៊ី ហៅកន្លែងនោះថាជាកន្លែងជាប់បណ្តាសា។ ដ្បិត នៅជាយក្រុងនេះឯង កាលពី ខែតុលា កន្លងទៅ ក្រុមប្រឆាំងមួយនៅស៊ីរី ដែលប្រកាសខ្លួនឯង ជាអង្គភាពមួយ នៃ កងទ័ពសេរីស៊ីរី បានចាប់ពង្រត់ស្ត្រីអ្នកកាសែតជាតិអ៊ុយក្រែន ឈ្មោះ Anhar Kochneva ដែលធ្វើការ ឲ្យ ប្រព័ន្ធផ្សព្វផ្សាយរុស្ស៊ីមួយ។ គឺតាំងពីថ្ងៃទី ១៦ធ្នូ ម្សិលម៉្ងៃម្លេះ ដែលមេក្រុមនោះ ត្រូវប្រហារ ជីវិតស្ត្រីអ៊ុយក្រែននោះ ក្រោមបទចោទ ប្រកាន់ថា គាត់តែងលួចយកការណ៍ឲ្យ របប លោក ប្រធានាធិបតីស៊ីរី អាសាដ ដ្បិត តាមយោបល់មេក្រុមប្រឆាំងនោះ មិនអាចត្រូវចាត់ទុក ជា អ្នកកាសែតឡើយ មនុស្សដែលឈរថតរូប ដោយកាន់កាំភ្លើងនៅដៃ ហើយដែលបង្ហើរ តាម បណ្តាញ Facebook គឺរូបភាពបង្ហាញ ពួកទាហានកងទ័ពស៊ីរី ជាន់ឈ្លីទង់ជ័យ របស់ ក្រុមឧទ្ទាម។ ឥឡូវ ពេលប្រហារជីវិតអ្នកកាសែតអ៊ុយក្រែននេះ ទើបត្រូវមេក្រុមប្រឆាំង លើកទៅថ្ងៃក្រោយ ដោយទុកពេលឲ្យ រដ្ឋាភិបាលអ៊ុយក្រែននិងរុស្ស៊ី ដោះស្រាយវាសនាគាត់។
ពួកឧទ្ទាមស៊ីរី ថ្លែងថា ចាប់ពីអំណើះតទៅ ស្ថានទូតតំណាងរបស់រុស្ស៊ី អ៊ុយក្រែន ក៏ដូចជាពលរដ្ឋ ប្រទេសទាំងនេះ ព្រមទាំងជាតិអ៊ីរ៉ង់ គឺជា ទីដៅនៃរាល់កម្លាំងប្រឆាំងទាំងអស់ នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ