ជំនួបប្រមុខការទូតរុស្ស៊ី និងតំណាងពិសេស អ.ស.បដើម្បីរកសន្តិភាពឲ្យស៊ីរី
លោក Lakhdar Brahimi បេសកជនពិសេស របស់ អ.ស.ប. និងសម្ព័ន្ធអារ៉ាប ខាងរក ដំណោះស្រាយឲ្យវិបត្តិរ៉ាំរ៉ៃ នៅស៊ីរី ដែលល្ងាចម្សិលមិញបានអញ្ជើ្មញមកដល់ក្រុងម៉ូស្គូ ក្នុង ក្របខ័ណ្ឌទស្សនកិច្ចការងារ ថ្ងៃនេះត្រូវទទួលជួបចរចា ជាមួយលោករដ្ឋមន្ត្រីការបរទេសរុស្ស៊ី Serguei Lavrov។
ចុះផ្សាយនៅថ្ងៃ៖
ស្តាប់ - ០២:០០
កម្មវត្ថុដ៏ចម្បងនៃកិច្ចចរចានេះ តាមដែលក្រសួងការបរទេសរុស្ស៊ីផ្ទាល់ ប្រកាសឲ្យដឹង គឺជុំវិញសាច់រឿង ៖ តើជំហានជាក់ណា បែបណា ដែលអាចនឹងឈាន តទៅទៀត ដើម្បីធ្វើ ដំណោះស្រាយ តាមផ្លូវនយោបាយ និងការទូតឲ្យបានយ៉ាងឆាប់បំផុត ឲ្យស្ថានការណ៍ វិបត្តិរ៉ាំរ៉ៃ អស់ជាង ១ឆ្នាំកន្លះមកហើយ នៅស៊ីរី។
អ្វីដែលគួរឲ្យកត់សម្គាល់គឺថា ជំនួបនេះប្រព្រឹត្តទៅ ក្រោយពីមានចប់ទៅភ្លាម ការព្រមព្រៀង ឈប់បាញ់គ្នា ពីថ្ងៃទី ២៦ ដល់ថ្ងៃទី២៨ តុលា រវាង កងទ័ពរដ្ឋាភិបាល និង ក្រុម ប្រដាប់អាវុធប្លែកៗ នៃពួកប្រឆាំង នៅស៊ីរី ដើម្បីទុកលទ្ធភាពដល់ប្រជាជនដែលកាន់សាសនាអ៊ីស្លាម ប្រារព្ធបុណ្យរបស់គេ ក្នុងរយៈពេលនេះ។ ប៉ុន្តែ ស្ថានការណ៍ដែលវិវឌ្ឍពិតៗ គឺគ្មានភាគីណាមួយបានគោរពតាមការព្រមព្រៀងគ្នានោះឡើយ។ ម៉្លោះហើយ បានជាគ្រាន់តែក្នុងរយៈពេលនេះ បណ្តាជនស៊ីរីបានធ្លាក់ខ្លួនរងគ្រោះដល់ស្លាប់ អស់ជាច្រើនសិបនាក់ទៀត។
ក្នុងក្របខ័ណ្ឌទស្សនកិច្ចការងារលើកនេះ លោក Lakhdar Brahimi ក៏អញ្ជើញទៅកាន់ ក្រុងប៉េកាំងដែរ ដែលដោយរួមជាមួយម៉ូស្គូ តែងប្រើសិទ្ធិវេតូ ខ្ទប់មិនឲ្យក្រុមប្រឹក្សាសន្តិសុខ អ.ស.ប. អនុម័តយកសេចក្តីសម្រេចដែលដាក់ទណ្ឌកម្ម រដ្ឋាភិបាល លោកប្រធានាធិបតីស៊ីរី Bashar-al – Assad។ រដ្ឋាភិបាលស៊ីរីដែលតាមមតិបស្ចិមលោក គឺជាប់ទោសពិរុទ្ធ ក្នុងការធ្លាក់ខ្លួនស្លាប់ទៅនៃប្រជាពលរដ្ឋស៊ីវិល អស់ប្រមាណ ៣ម៉ឺននាក់ទៅហើយ ក្នុងវិបត្តិ នៅស៊ីរី ដែលអូសបន្លាយអស់ជាង ១ឆ្នាំកន្លះហើយ តាំងពីខែមីនា ឆ្នាំ២០១១មក។
ជាការរំលឹកថា គឺ កាលពីថ្ងៃទី១កញ្ញា ដែលអ្នកការទូតជើងចាស់ ជាអតីតរដ្ឋមន្ត្រីការបរទេស ជាតិ Algerie លោក Lakhdar Brahimi អាយុ ៧៨ឆ្នាំ ត្រូវបានជ្រើសតាំង ធ្វើជា បេសកជនពិសេស របស់ អ.ស.ប. និងសម្ព័ន្ធអារ៉ាប ខាងរកដំណោះស្រាយឲ្យវិបត្តិរ៉ាំរ៉ៃ នៅស៊ីរី ជំនួស លោក Kofi Annan ដែលលាចេញពីតំណេងនេះ មកពីគាត់យល់ថា គ្មានការគាំទ្របានគ្រប់គ្រាន់ ពីសំណាក់សហគមន៍អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ