បក្សប្រឆាំងធំបំផុតចោទពូទីនថាក្បត់ផលប្រយោជន៍ជាតិរុស្ស៊ី
បក្សប្រឆាំងនេះ គឺបក្សកុម្មុយនិស្តដែលស្ថិតនៅក្នុង”ប្រព័ន្ធអំណាច”ដោយមានអាសនៈដល់ទៅចំនួន១/៥ ឬ ៩២លើ៤៥០អាសនៈប្រចាំក្នុងសភាឌូម៉ា។ បក្សពួកគេ បានធ្វើមេទ្ទិញ ក្នុងថ្ងៃឈប់កន្លងទៅនៅទូទាំងប្រទេសប្រឆាំងនឹងគម្រោងរដ្ឋាភិបាលប្រែអាកាសយានដ្ឋាន ក្រុងរុស្ស៊ី Oulianovsk ឲ្យទៅជាឃ្លាំងស្តុករបស់អូតង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ជាបឋម គួរនិយាយថា ក្រុង Oulianovsk ស្ថិតនៅចម្ងាយ៨៨៥គ.ម. ខាងត្បូងពីរដ្ឋធានី ម៉ូស្គូ។ រុស្ស៊ី និងអូតង់ កំពុងធ្វើកិច្ចចរចា ដើម្បី ប្រែភាគខាងកើតនៃ អាកាសយានដ្ឋានក្រុងនេះឲ្យ ទៅជា “ចំណុចសម្រាប់ដឹកឆ្លងកាត់” នូវសម្ភារៈរបស់អូតង់ចេញពី អាហ្វហ្កានីស្ថានឆ្ពោះទៅកាន់ អឺរ៉ុបខាងលិច។ នៅនឹងចំណុចនេះ នឹងមាន បង្កើតឡើងជា ឃ្លាំងស្តុកវា មួយរយៈពេលសិន។
ថ្លែងពីលើវេទិកាអង្គមេទ្ទិញនៅចំកណ្តាលក្រុងម៉ូស្គូមេទ្ទិញដែលបានទទួលសេចក្តីអនុញ្ញាតពីសាលាក្រុង និងដោយមានមនុស្សចូលរួមប្រមាណ១.៥០០នាក់លោក Guennady Ziouganov ប្រធានបក្សកុម្មុយនិស្តសហព័ន្ធរុស្ស៊ី បានហៅគម្រោងផែនការនោះ ថាជា “ការបន្ថោកបន្ទាប” ប្រទេសរុស្ស៊ី។ គាត់បានប្រៀបប្រដូចបក្ស អូតង់ទៅនឹង “ម៉ាស៊ីនកិនថ្នល់ បើកកិនទឹកដីរុស្ស៊ី” និងបានចោទលោកនាយករដ្ឋមន្ត្រី ពូទីនដែលក្នុង១ខែទៀត ត្រូវទទួលសច្ចាប្រណិធានឡើង កាន់តំណែងជាប្រធានាធិបតីថ្មី ថាចុះញ៉ម “ប្រគល់ផលប្រយោជន៍ជាតិរុស្ស៊ី ទៅក្នុងដៃអូតង់” ហេតុ ដែលមានន័យថា “ក្បត់ផលប្រយោជន៍ជាតិរុស្ស៊ី”តែម្តង។
មេទ្ទិញនេះ បានប្រព្រឹត្តទៅក្រោមពាក្យស្លោកថា ៖
-“ ហាមដាច់ខាត មិនឲ្យមានស្បែកជើងកវែង របស់ អូតង់ មកជាន់លើដីរុស្ស៊ីឡើយ”។
ចំណែក ក្រសួងការបរទេស និងក្រសួងការពារជាតិរុស្ស៊ី តែងដោះសាដោយពន្យល់បំភ្លឺថា ៖ សាច់រឿងគឺមិនមែន អំពីមូលដ្ឋានយោធា ឫ វត្តមានពួកយោធាអូតង់ អ្វីណាឡើយ។ សាច់រឿង គឺ គ្រាន់តែ អំពីគម្រោងបង្កើតជា ឃ្លាំងស្តុកសម្ភារៈដែលដឹកតាមយន្តហោះ ពីអាហ្វហ្កានីស្ថាន រួច បន្ទាប់មក វាត្រូវបន្តដំណើរតាមផ្លូវដែកឆ្ពោះទៅកាន់កំពង់ផែ នៃ៣ប្រទេសនៅមាត់សមុទ្រ បាល់ទិក ពោលគឺ ឡេតូនី អេស្តូនី លីទុយអានី ហើយពីទីនោះ គឺដឹកតាមកប៉ាល់សមុទ្រ ទៅកាន់ អឺរ៉ុបខាងលិចតែម្តង។
រដ្ឋាភិបាលរុស្ស៊ី ក៏ គូសបញ្ជាក់ថា សម្ភារៈនោះសោត មិនមែនជា សម្ភារៈយោធាសោះឡើយ ហើយវាទទួលរ៉ាប់រងដឹក គឺដោយយន្តហោះរុស្ស៊ី បើកបរដោយពួក Pilote រុស្ស៊ី។ មិនតែប៉ុណ្ណោះសម្ភារៈទាំងនោះ នឹងស្ថិតនៅក្រោមការត្រួតពិនិត្យពេញទីដោយពួក មន្ត្រីគយរុស្ស៊ីតែម្តង។
ពួកកុម្មុយនិស្តរុស្ស៊ី ដែលបានធ្វើមិទ្ទិញប្រឆាំង នៅតាមក្រុងជាច្រើនពីខាងចុងបូព៌ា រហូតដល់ ប៉ែកបស្ចិមបង្អស់នៃប្រទេសគឺគេក្នក់ក្នាញ់ដោយរដ្ឋាភិបាលស្រាប់តែជ្រើសយកក្រុងOulianovsk ជាក្រុងកំណើតរបស់ លោក Lenine ដែលជាស្ថាបនិក បក្សកុម្មុយនិស្តសូវៀតនិងរដ្ឋសូវៀតផ្ទាល់ធ្វើជាឃ្លាំងស្តុក របស់អូតង់ ដែលជាសត្រូវស្លាប់រស់ របស់សូវៀតសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ