លោកពូទីន៖ អំពីបញ្ហាជនជាតិដែលជាបញ្ហាគន្លឹះនៃអត្ថិភាពរដ្ឋរុស្ស៊ី
ថ្ងៃចន្ទនេះ លោកនាយករដ្ឋមន្ត្រីពូទីន ក្នុងឋានៈជាបេក្ខជនម្នាក់សម្រាប់ប្រជែងយកតំណែងជាប្រធានាធិបតី នៅខែមីនាខាងមុខ បានចេញអត្ថបទទី២ ក្នុងកម្មវិធីបោះឆ្នោតរបស់គាត់។ លើកនេះ គឺឧទ្ទិសដល់បញ្ហាទំនាក់ទំនងរវាងជនជាតិទាំង១៦០ ដែលរស់នៅក្នុងលំហនៃសហព័ន្ធរុស្ស៊ី និងដល់ការរឹតបន្តឹងច្បាប់ចំពោះជនបន្លាស់ទីដែលទៅធ្វើការនៅរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
ដោយទទួលស្គាល់ថា បញ្ហាជាតិពន្ធុ ជាបញ្ហាស្មុគស្មាញបំផុតរបស់សហព័ន្ធរុស្ស៊ី លោកពូទីន ទិតៀនដល់ការឃោសនាអំពីគំនិតជាតិនិយមនៅក្នុងប្រទេស។ តាមជំនឿជឿជាក់របស់គាត់ ការប៉ុនប៉ងណាក៏ដោយ កសាងរុស្ស៊ី ជា”រដ្ឋមានជាតិពន្ធុតែមួយ“ គឺជា”ផ្លូវដ៏ខ្លីបំផុតដែលនាំទៅកាន់ការកម្ទេចប្រជាជនរុស្ស៊ី និងកម្ទេចរដ្ឋរុស្ស៊ីតែម្តង”។ ជាការកត់សម្គាល់ ពួកជាតិនិយមនៅរុស្ស៊ីតែងបន្លឺឡើងនូវការទាមទារចង់ឃើញរុស្ស៊ី ជា “រដ្ឋតែរបស់ជាតិរុស្ស៊ី”ប៉ុណ្ណោះ ដោយសំអាងលើទឡ្ហីករណ៍ថា ក្នុងចំណោមជាតិពន្ធុទំាង១៦០ ដែលសព្វថ្ងៃរស់នៅលើដែនដីរុស្ស៊ី ជាតិរុស្ស៊ី មានចំនួនដល់ទៅ ៨១%ឯណោះ។
តាមពួកជាតិនិយម គឺល្មមដល់ពេលដែលរដ្ឋអំណាចរុស្ស៊ីឈប់ផ្គត់ផ្គង់លុយដ៏ច្រើនសំបើម ទៅ”ចិញ្ចឹមបំប៉នអ្នកស្រុកនៅតំបន់ភ្នំកូកាស ”ទៀតឡើយ។ ចំណុចនេះតែងធ្វើឲ្យពួកជាតិនិយមរុស្ស៊ីច្រណែន។ ជាការកត់សំគាល់ តំបន់ភ្នំកូកាសនៅប៉ែកខាងត្បូងសហព័ន្ធរុស្ស៊ី គឺរួមក្តោប ៧ សាធារណរដ្ឋ ដែលចំណុះសហព័ន្ធនេះ មានទឹកដី ឆេឆេនីជាដើម។ ប្រជាជននៅតំបន់នោះសុទ្ធតែកាន់សាសនាអ៊ីស្លាម ហើយក្នុងរង្វង់ទសវត្សទី៩០ មានខ្លះបានបោកបក់ដោយរលកតស៊ូទល់នឹងម៉ូស្គូ ចង់ផ្តាច់ខ្លួនចេញ ដើម្បីបង្កើតជា”រដ្ឋអ៊ីស្លាម” តែម្តង។
បច្ចុប្បន្ន ក្រោយពីកម្ចាត់ទំនោរនោះសាបសូន្យទៅ ម៉ូស្គូតែងផ្តល់ហិរញ្ញប្បទានច្រើនសន្ធឹកសន្ធាប់យកចិត្តដែនដីទាំងនោះ ទាំងជំរុញដល់ការអភិវឌ្ឍន៍របស់គេ។ សំខាន់សម្រាប់ម៉ូស្គូ គឺការពារបានគង់វង្សបូរណភាព និងអធិបតេយ្យប្រទេសរុស្ស៊ី។ លោកពូទីនតែងរំលឹកអំពីរឿងនេះ ប្រកបដោយមោទនភាពជានិច្ច។ ម៉្លោះហើយបានជាក្នុងអត្ថបទខ្លួន លោកពូទីន បានឆ្លើយទៅពួកជាតិនិយមថា បន្ទាប់ពីការទាមទារខាងលើ គឺនឹងមានប្រតិកម្មបកវិញ ឲ្យឈប់”ចិញ្ចឹមបំប៉ន” តំបន់ឯទៀតនៃប្រទេសទៅដែរ ៖ គឺពិតជា Scenario បែបនេះ ដែលនៅទីបំផុត បាននាំទៅកាន់ការរលំរលាយទៅនៃសហភាពសូវៀត។
ដោយហេតុថា បញ្ហាជនបន្លាស់ទីទៅធ្វើការនៅរុស្ស៊ីតែងបង្កឡើង ជាបញ្ហាប៉ះទង្គិចរវាងជនជាតិបានជាលោកពូទីនក្នុងអត្ថបទខ្លួនព្រមានថា នរណាដែលមកធ្វើការនៅរុស្ស៊ី ដោយពាំនាំមកនូវវប្បធម៌ និងទំនៀមទម្លាប់ជាតិខ្លួន គប្បីត្រូវចេះគោរពចំពោះប្រពៃណីនៅរុស្ស៊ីផ្ទាល់។
ក្នុងន័យនេះ គាត់ស្នើឲ្យរឹតបន្តឹងច្បាប់កត់ត្រា និងចុះបញ្ជីជនបន្លាស់ទី ក៏ដូចជាមួលខ្ចៅបន្តឹងទណ្ឌកម្មនរណាដែលបំពានលើច្បាប់នេះ។ ព្រមជាមួយនេះ លោកពូទីនគាំទ្រដល់ “ការបញ្ចូលជនបន្លាស់ទីទៅក្នុងសង្គមរុស្ស៊ី បន្តិចម្តងៗ ដោយវិធីស៊ីវីល័យ”។ លោកពូទីនបញ្ចប់អត្ថបទគាត់ ក្នុងឋានៈជាបេក្ខជនប្រធានាធិបតីនៅរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ