មហាមិទ្ទិញជាថ្មី នៅរដ្ឋធានីម៉ូស្គូ
មិទ្ទិញថ្ងៃនេះ ដូចកាលពី៥ថ្ងៃមុនអ៊ីចឹង ចាត់ចែងឡើងដោយពួកប្រឆាំងនៅក្រៅ “ប្រព័ន្ធអំណាច” និងដោយពួកសកម្មជននៃបណ្តាអង្គការសង្គមស៊ីវិល។ គោលដៅរបស់គេ គឺតវ៉ាទល់នឹងលទ្ធផលនៃការបោះឆ្នោតកាលពីថ្ងៃទី៤ មីនា ដែលស្របនឹងលទ្ធផលនេះ គ.ជ.ប. បានប្រកាសជាផ្លូវការថា គឺលោកនាយករដ្ឋមន្ត្រីពូទីនដែលជាប់ជាប្រធានាធិបតីរុស្ស៊ីលើកនេះ សម្រាប់អាណត្តិរហូតដល់៦ឆ្នាំ។
ចុះផ្សាយនៅថ្ងៃ៖
ស្តាប់ - ០២:៣៤
អ្វីដែលសម្គាល់មិទ្ទិញលើកនេះ៖ទី១ វាប្រព្រឹត្តទៅ នៅតាមចិញ្ចើមដ៏ធំទូលាយនៃមហាវិថីឈ្មោះ “អារបាត់ថ្មី” ចម្ងាយតែជាង ១គ.ម.ប៉ុណ្ណោះ ពីកំពែងវិមានក្រេមឡាំង ដោយមិនរំខានដល់ចរាចរណ៍នៅតាមសរសៃផ្លូវនេះឡើយ។ ទី២ នៅពីលើហ្វូងបាតុករ បក់រវិចៗភាគច្រើន គឺដោយទង់ពណ៌លឿងទុំដែលជាទង់សម្គាល់ “បដិវត្តន៍ពណ៌លឿងទុំ” នៅរដ្ឋអ៊ុយក្រែន កាលពីចុងឆ្នាំ២០០៤។ ទី៣ សំខាន់បំផុត គឺការឡើងថ្លែងពីលើវេទិកាមិទ្ទិញនៃពួកអ្នកតំណាងរបស់បក្សប្រឆាំងនានា នៅក្រៅ “ប្រព័ន្ធអំណាច” និងនៃបណ្តាអង្គការសង្គមស៊ីវិលដែលក្នុងថ្ងៃបោះឆ្នោតទី៤ មីនា បានធ្វើជាអ្នកសង្កេតការណ៍នៅតាមការិយាល័យបោះឆ្នោត រួចដែលតាមសំដីគេ បានក្លាយជា ”សាក្សី” ឃើញផ្ទាល់ភ្នែក ការក្លែងបន្លំសន្លឹកឆ្នោតលុះទាល់តែលោកនាយករដ្ឋមន្ត្រីពូទីនជាប់ជាប្រធានាធិបតីឡើងវិញ។
ហេតុដែលនាំឲ្យពួកគេក្តៅក្រហាយរកលេខដាក់គ្មាន ពីព្រោះពិតជាពួកគេតែម្តងដែលក្នុងរលកមិទ្ទិញបោកបក់ក្នុងខែធ្នូប្រឆាំងនឹងលទ្ធផលបោះឆ្នោតសភាបានសម្រេចចិត្តជាឯកច្ឆ័ន្ទថា “ គ្មានសំឡេងគាំទ្រតែមួយសំឡេងក៏ទេដែរសម្រាប់បេក្ខជនពូទីន”។ ពាក្យស្លោកចម្បងដែលត្រដាងពីលើវេទិកាមិទ្ទិញមានសេចក្តីថា៖ទី១ “ការបោះឆ្នោតទាំងពីរលើកកន្លងទៅ ជាបាយឡុក-បាយឡ មិនអាចយកជាការទេ” ទី២ “សភាឌូម៉ាដែលមានជ្រើសរើសបាន មិនមែនជាសភាទេ” និងទី៣ “ប្រធានាធិបតីដែលថាឈ្នះឆ្នោតនោះ មិនមែនជាប្រធានាធិបតីទេ”។
វាគ្មិនដែលឡើងថ្លែងបែបយ៉ាងនាយកប្រតិបត្តិនៃសមាគមឈ្មោះ”សំឡេងម្ចាស់ឆ្នោត” អ្នកកាសែត ជាស្ថាបនិកម្នាក់នៃ”សម្ព័ន្ធអ្នកស្រុកម្ចាស់ឆ្នោត” មេដឹកនាំ”រណសិរ្សឆ្វេង” សុទ្ធតែទាមទារឲ្យធ្វើការបោះឆ្នោតសភា និងការបោះឆ្នោតប្រធានាធិបតីសាឡើងវិញ ឲ្យបានសុចរិតត្រឹមត្រូវ។ គេព្រមានថា ដរាបណាដែលគេមិនទាន់សម្រេចគោលដៅគេទេ គេនឹងបន្តធ្វើសកម្មភាពប្រឆាំងតទៅទៀត។
ចំណែកលោកពូទីន ក្នុងសម្ភាសន៍២ថ្ងៃមុនទៅ ពួកអ្នកកាសែតដែលឈ្នះឆ្នោតដោយបានសំឡេងគាំទ្រដល់ទៅ ៦៣,៦% ឫ អ្នកស្រុកម្ចាស់ឆ្នោតជាង ៤៥លាននាក់បានថ្លែងផ្គើនជាមុន ទៅពួកប្រឆាំងទាំងនោះថា ៤៥លាននាក់មិនអាចដឹកតាមឡាន Bus ទៅបោះឆ្នោត ដោយក្លែងបន្លំស្អីណាឡើយ។ មិនតែប៉ុណ្ណោះ ចំពោះជ័យជំនះគាត់ គាត់បានទទួលការអបអរ សរសើរទៅហើយ ពីមេដឹកនាំបស្ចិមលោក បែបយ៉ាងអាល្លឺម៉ង់ បារាំង អង់គ្លេស ហើយយប់មិញ ពីសំណាក់លោកប្រធានាធិបតីអាមេរិកទៅផង។
ចូលរួមក្នុងមិទ្ទិញពួកប្រឆាំងថ្ងៃនេះ តាមការប្រមាណឃើញនៃអាជ្ញាធរ គឺ៣ពាន់នាក់ ប៉ុន្តែតាមការអះអាងនៃពួកចាត់ចែងមិទ្ទិញផ្ទាល់ គឺដល់ទៅ ៣ម៉ឺននាក់ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ