ទស្សនកិច្ច លោកនាយករដ្ឋមន្ត្រីចិន Wen Jiabao នៅរុស្ស៊ី
លោក Wen Jiabao ដែលយប់មិញអញ្ជើញមកដល់ ក្រុងម៉ូស្គូ គឺដើម្បីចូលរួម ថ្ងៃនេះ ក្នុងជំនួបលើកទី១៧ នៃប្រមុខរដ្ឋាភិបាលចិន និងរុស្ស៊ី និងបំពេញទស្សនកិច្ចផ្លូវការ ហើយតាមប្រសាសន៍គាត់ផ្ទាល់ ក្នុងក្របខ័ណ្ឌទស្សនកិច្ចនេះ គាត់នឹងជួបចរចា ជាមួយ លោកប្រធានាធិបតីពូទីន និង លោកនាយករដ្ឋមន្ត្រីមេដវេដេវ។
ចុះផ្សាយនៅថ្ងៃ៖
ស្តាប់ - ០២:៤១
ក្នុងសេចក្តីថ្លែងការណ៍ជាលាយល័ក្ខអក្សរ ចែកផ្សព្វផ្សាយទៅពួកអ្នកកាសែត នៅ អាកាសយានដ្ឋានក្រុងម៉ូស្គូ ពេលគាត់អញ្ជើញមកដល់យប់មិញ លោកនាយករដ្ឋមន្ត្រីចិន Wen Jiabao បានឲ្យដឹងថា ក្នុងអំឡុងជាច្រើនឆ្នាំជាប់ ដោយសារការចូលរួម និងការជួយជ្រោមជ្រែង ផ្ទាល់ របស់ប្រមុខរដ្ឋទាំងពីរ ទំនាក់ទំនងយុទ្ធសាស្ត្រគ្រប់ជ្រុងជ្រោយ នៃសហប្រតិបត្តិការ និង ភាព ជាដៃគូ រវាងចិននិងរុស្ស៊ី ចេះតែបន្តរីកលូតលាស់ ដោយនាំមកនូវផ្លែផ្កាថ្មីៗជានិច្ច។ ហើយ យន្តការនៃជំនួបជារឿយៗ នៃប្រមុខរដ្ឋាភិបាលចិននិងរុស្ស៊ី តែងដើរតួសំខាន់ ក្នុងការច្រាន ទំនាក់ទំនងនេះនៃសហប្រតិបត្តិការអនុវត្តន៍ បានទៅមុខជាដរាប លើគ្រប់វិស័យ។
ឧទ្ទិសដល់ទស្សនកិច្ចនេះ ទាំងក្រុងម៉ូស្គូ ក៏បញ្ជាក់ថា រុស្ស៊ីនិងចិន ជាដៃគូយុទ្ធសាស្ត្រ ខាងផ្នែក នយោបាយក្រៅប្រទេស និងសេដ្ឋកិច្ច។ ចំណែកប្រព័ន្ធផ្សព្វផ្សាយប្រទេសចិន បានឲ្យដឹងថា ប្រធានបទសំខាន់ៗនៃកិច្ចចរចារបស់លោក Wen Jiabao នៅក្នុងរដ្ឋធានីរុស្ស៊ី គឺការពង្រីក តទៅទៀត ទំនាក់ទំនងជាមួយប្រទេសរុស្ស៊ី លើវិស័យនយោបាយ, ពាណិជ្ជកម្ម-សេដ្ឋកិច្ច, ថាមពល, មនុស្សធម៌ និងវិស័យឯទៀត។
តាមតួលេខ តំណាងពាណិជ្ជកម្មរបស់រុស្ស៊ីប្រចាំនៅប្រទេសចិន លោក Serguei Tsyplakov ក្នុង១០ខែកន្លងទៅនៃឆ្នាំនេះ ទំហំផ្តោះប្តូរពាណិជ្ជកម្ម រវាងចិន និងរុស្ស៊ី បានមានទឹកប្រាក់ ដល់៩០.០០០លានដុល្លារទៅហើយ ដោយគូភាគីរំពឹងថា ទៅទល់ ដំណាច់ឆ្នាំ២០១២នេះ វានឹងស្ទុះដល់ ១០០.០០០លានដុល្លារ តែម្តង។ ជាការរំលឹក ថ្នាក់ដឹកនាំប្រទេសទាំងពីរ រមែង ដាក់ទិសដូចគ្នាថា លើកទំហំផ្តោះប្តូរនេះ ឲ្យទៅទល់ឆ្នាំ២០២០ ឡើងដល់ ២០០.០០០លាន ដុល្លារតែម្តង ដ្បិត ប្រទេសទាំងពីរប្រើនៅស្ទើរនៅឡើយ សក្តានុពលដែលខ្លួនមាន។
ចំណុចមួយសម្គាល់ពាណិជ្ជកម្មចិន-រុស្ស៊ី គឺថា តាំងពីមានប្រព្រឹត្តទៅ”វេទិកាសេដ្ឋកិច្ច ចិន-រុស្ស៊ី” ឆ្នាំ២០០៨ គូភាគីអនុវត្តជាប់ជាណ្តើរៗទៅហើយ ការទូទាត់់គ្នា ដោយប្រើលុយ Rouble រុស្ស៊ី និង លុយ Yuan ចិន តែម្តង។ មិនតែប៉ុណ្ណោះ ប៉ុន្មានថ្ងៃមុន លោករដ្ឋមន្ត្រីការបរទេសរុស្ស៊ី Serguei Lavrov ថែមទាំងបញ្ចេញយោបល់ថា ក្នុង១០ឆ្នាំចំពោះមុខ ប្រាក់ Yuan ចិន នឹងក្លាយ ទៅជា “រូបិយវត្ថុអន្តរជាតិបម្រុងទុក”។
ភាគីចិន បានប្រកាសថា នាកិច្ចចរចា ជាមួយលោក លោកប្រធានាធិបតីរុស្ស៊ី ពូទីន និង លោក នាយករដ្ឋមន្ត្រី មេដវេដេវ ប្រមុខរដ្ឋាភិបាលចិន លោក Wen Jiabao នឹងពិភាក្សាអំពីវិធានការ ឆ្ពោះទៅពង្រឹងតទៅទៀត ទំនាក់ទំនងលើគ្រប់វិស័យ ក៍ដូចជាផ្លាស់ប្តូរមតិ ជុំវិញបញ្ហាអន្តជាតិ និង បញ្ហាតំបន់ណា ដែលសំខាន់ សម្រាប់ប្រទេសទាំងពីរ ជាដៃគូយុទ្ធសាស្ត្រនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ