លទ្ធផលការបោះឆ្នោតតំបន់នៅអាល្លឺម៉ង់ បំបាក់មុខលោកស្រីមែរគែល
ចុះផ្សាយនៅថ្ងៃ៖
ស្តាប់ - ០៦:១១
បក្សអភិរក្សកាន់អំណាចCDUអាល្លឺម៉ង់ របស់លោកស្រីអាន់ហ្កឺឡា មែរគែល បានអាម៉ាសមុខយ៉ាងខ្លាំង ក្នុងការបោះឆ្នោតជ្រើសរើសក្រុមប្រឹក្សាតំបន់ នៅMecklembourg-Poméramie ភាគខាងជើងប្រទេស ថ្ងៃអាទិត្យម្សិលមិញ។ បក្សកាន់អំណាចទទួលបានជោគជ័យត្រឹមលំដាប់ទី៣ប៉ុណ្ណោះ- មិនត្រឹមចាញ់សម្លេងឆ្នោតបក្សឆ្វេងនិយមSPD ទេ តែថែមទាំងចាញ់បក្សស្តាំនិយមជ្រុលដ៏ក្មេងខ្ចីAfD ទៀតផង។
បក្សស្តាំនិយមជ្រុល AfD ទទួលសម្លេងជាង២០,៨ភាគរយ ជោគជ័យលំដាប់ទី២ នាំមុខបក្សរបស់លោកស្រីមែរគែល ដែលទទួលសម្លេង១៩ភាគរយ។ បក្សសង្គមប្រជាធិបតេយ្យ ឆ្វេងនិយមSPDនាំមុខគេ ជាមួយសម្លេង៣០,៦ភាគរយ។ នេះជាលើកទី១ហើយ ដែលបក្សស្តាំនិយមជ្រុល AfD នាំមុខបក្សCDU ក្នុងការបោះឆ្នោតតំបន់។
បរាជ័យបក្សCDU ត្រូវបានទាំងអ្នកនយោបាយឆ្វេងនិយម និងស្តាំនិយម ទំលាក់កំហុសទៅលើនយោបាយអន្តោប្រវេសន៍របស់លោកស្រីអាន់ហ្កឺឡា មែរគែល ដែលប្រកាន់ជំហរជួយជនភៀសខ្លួន។ លទ្ធផលបោះឆ្នោតតំបន់ថ្ងៃអាទិត្យបានកាត់បន្ថយអានុភាពបក្សកាន់អំណាច មុនការបោះឆ្នោតសភា ឆ្នាំ២០១៧ខាងមុខនេះ។
តំបន់Mecklembourg-Poméramie ភាគខាងជើងអាល្លឺម៉ង់ មានប្រជាជនតិច តែជាកន្លែងដែលលោកស្រីមែរគែល ធ្លាប់ទទួលជោគជ័យនយោបាយ
តំបន់បោះឆ្នោត Mecklembourg-Poméramie ស្ថិតនៅភាគខាងជើងប្រទេសអាល្លឺម៉ង់ មានប្រជាជនប្រមាណ១លាន៦សែននាក់។ គិតទៅមិនច្រើនទេ ប្រៀបនឹងប្រជាជនសរុបនៅអាល្លឺម៉ង់ ដែលមានដល់ទៅជាង៨២លាននាក់។
នៅតំបន់ Mecklembourg-Poméramie នេះ មានក្រុងមួយឈ្មោះថា ស្ត្រាល់សាន់ Stralsund ជាកន្លែងដែលប្រមុខដឹកនាំមែរគែលបានចុះទៅឃោសនាបោះឆ្នោតផ្ទាល់។ ក្រុងនេះធ្លាប់បង្ហាញពីជោគជ័យរបស់លោកស្រី មែរគែល។ កាលពីខែធ្នូ ឆ្នាំ១៩៩០ លោកស្រីបានជាប់ឈ្មោះជាតំណាងរាស្ត្រ នៅមណ្ឌលស្ត្រាល់សាន់នេះ អនុញ្ញាតអោយលោកស្រីបានចូលសភាជាតិ។
ប៉ុន្តែ ថ្ងៃអាទិត្យម្សិលមិញ បក្សកាន់អំណាចរបស់លោកស្រីមែរគែល បែរជាចាញ់ឆ្នោត។ ប៉ុន្មានថ្ងៃចុងក្រោយនេះទៀត លោកស្រីមែរគែលបានឃោសនាអោយប្រជាជនកុំបោះឆ្នោតអោយបក្សស្តាំជ្រុលនិយម AfD។ ទីបំផុតគឺបក្សAfD នេះទៅវិញ ដែលបានទំលាក់បក្សកាន់អំណាចរបស់លោកស្រី អោយធ្លាក់សម្លេងដល់លំដាប់ទី៣។ លោកស្រីមែរគែល និងបក្សCDU ពិតជាបាក់មុខមិនតិចទេ។ តាំងពិឆ្នាំ២០០៥មក បក្សCDU ធ្លាប់តែជោគជ័យ។
លទ្ធផលឆ្នោតនៅតំបន់Mecklembourg ក៏ជាសញ្ញាអាសន្នមួយដែរសម្រាប់បក្សកាន់អំណាច នៅមុនការបោះឆ្នោតសភា ឆ្នាំ២០១៧។ គឺជាសញ្ញាប្រាប់លោកស្រីមែរគែលអោយមើលឡើងវិញ នូវនយោបាយអន្តោប្រវេសន៍របស់គាត់។ ឥឡូវនេះ បក្សកាន់អំណាចកំពុងចាំមើលការបោះឆ្នោតនៅរដ្ឋធានីប៊ែរឡាំងទៀត។ ការបោះឆ្នោតនេះ នឹងប្រព្រឹត្តទៅនៅថ្ងៃ១៨កញ្ញាខាងមុខ។
នយោបាយអន្តោប្រវេសន៍កាត់បន្ថយសម្លេងឆ្នោតបក្សកាន់អំណាច
បក្សកាន់អំណាចCDUទទួលស្គាល់ថា ការចាញ់ឆ្នោតម្សិលមិញនេះ សបង្ហាញថា ប្រជាជនបាននាំគ្នាបោះឆ្នោតតវ៉ា និងសំដែងការខឹងសម្បារចំពោះរដ្ឋាភិបាល។ ថ្នាក់ដឹកនាំបក្សកក្នុងតំបន់ទទួលស្គាល់ថា បរាជ័យនេះគឺដោយសារតែការឃោសនាឆ្នោតរបស់បក្សផ្តោតតែលើប្រធានបទតែមួយមុខ គឺប្រធានបទជនភៀសខ្លួន។
អាល្លឺម៉ង់បើកទ្វារទទួលជនភៀសខ្លួន នៅឆ្នាំ២០១៥ ដល់ទៅ១លាន១សែននាក់។ ហើយសម្រាប់ឆ្នាំ២០១៦នេះ អាល្លឺម៉ង់ក៏ត្រៀមទទួលជនសុំសិទ្ធិជ្រកកោន ៣សែននាក់។ នយោបាយអន្តោប្រវេសន៍ ដំបូងឡើយ ត្រូវបានប្រជាជនក្នុងស្រុកស្វាគមន៍ ព្រោះពួកគេអាណិតអាសូរជនភៀសខ្លួនដែលវេទនា ប្រថុយជីវិត រត់គេចសង្គ្រាម។
ប៉ុន្តែ បន្តិចម្តងៗ ប្រជាជនអាល្លឺម៉ង់លែងសូវគាំទ្រដូចមុន ដោយសារតែកាលពីបុណ្យចូលឆ្នាំសកល កន្លងទៅ មានរឿងអាស្រូវចាប់រំលោភ បំពានភេទស្រីៗ នៅស្រុកកូឡូញ ហើយក្នុងស្រុកក៏មានរឿងអសីលធម៌ផ្សេងៗ ដែលបង្កឡើងដោយជនភៀសខ្លួនដែរ។ មួយរយៈមុននេះទៀត អាល្លឺម៉ង់បានរងការវាយប្រហារភេរវកម្ម បង្កឡើងដោយក្រុមជីហាតរដ្ឋអ៊ីស្លាមទៀត។
ដូច្នេះ ប្រជាជនចោទសួរទៅវិញថា តើនយោបាយអន្តោប្រវេសន៍ដែលត្រូវចាយថវិកាជាតិសន្ធឹកសន្ធាប់ មានប្រយោជន៍អ្វីសំខាន់ទៅ បានជាលោកស្រីមែរគែល ខំអួត អួតហើយអួតទៀត ថាអាល្លឺម៉ងមានលទ្ធភាពជួយអោយជនភៀសខ្លួនរស់នៅចុះក្នុងសង្គមជាតិ។ ពេលនេះ ថ្នាក់ដឹកនាំបក្សកាន់អំណាចត្រូវតែពិភាក្សាគ្នា មើលបន្ទាត់នយោបាយខ្លួនឡើងវិញហើយ ព្រោះលទ្ធផលការបោះឆ្នោតម្សិលមិញនេះ ជាមេរៀនមួយសំខាន់សម្រាប់បក្ស។
ដោយសារនយោបាយអន្តោប្រវេសន៍ បក្សCDU របស់លោកស្រីអាន់ហ្កឺឡា កំពុងភិតភ័យ ចំពោះការបោះឆ្នោតសភា ឆ្នាំក្រោយនេះ។ លោកស្រីអាន់ហ្កឺឡា ប្រហែលពិបាកត្រូវបានតែងតាំងអោយបន្តដឹកនាំអាណត្តិទី៤ទៀតណាស់។ ការស្ទាបស្ទង់មតិបង្ហាញថា បក្សCDU និងបក្សដៃគូCSU អាចធ្លាក់សម្លេងឆ្នោតសភា មកនៅត្រឹម៣៣ភាគរយ ខុសពីពេលមុន ដែលគេស្ទង់មតិទៅ ឃើញថា បក្សនេះអាចទទួលបាន៤១ភាគរយ។
បក្សស្តាំនិយមជ្រុល AfDទើបបង្កើតឆ្នាំ២០១៣ តែអាចមានសង្ឃឹមចូលសភាជាតិ ក្នុងការបោះឆ្នោតសភាខាងមុខ
បក្សស្តាំនិយមជ្រុល AfD អាចឈ្នះសម្លេងច្រើន ក្នុងការបោះឆ្នោតតំបន់ម្សិលមិញ ដោយបានកើនប្រជាប្រិយភាពដល់លំដាប់ទី២ នាំមុខបក្សកាន់អំណាច។ បក្សស្តាំនិយមជ្រុល AfD ទើបបង្កើតឡើង ឆ្នាំ២០១៣ ប៉ុណ្ណោះ តែប្រជាប្រិយភាពក្នុងឆាកអន្តរជាតិកើនខ្ពស់។ បក្សនេះត្រូវបានគេស្គាល់ថា ប្រឆាំងនយោបាយចាយវាយលុយអឺរ៉ូ នៅសហភាពអឺរ៉ុប មិនពេញចិត្តអោយអាល្លឺម៉ង់ចេញថវិកាជួយអឺរ៉ុបហួសហេតុទេ។ បក្សនេះត្រូវបានគេស្គាល់ថា មាននយោបាយប្រឆាំងជនអន្តោប្រវេសន៍។ តែបក្សនេះឆ្លាត ចេះថ្លឹងថ្លែង មិនអោយនយោបាយប្រឆាំងជនអន្តោប្រវេសន៍របស់បក្សខ្លួន ដើរហួសបន្ទាត់ព្រំដែន។
ក្នុងការឃោសនាបោះឆ្នោតកន្លងមក បក្ស AfD បានប្រើយុទ្ធសាស្ត្របែបប្លែកទំនើបបន្តិច។ ជាជាងផ្តោតការឃោសនាបែបប្រពៃណី លើប្រធានបទសេដ្ឋកិច្ច បក្សស្តាំនិយមជ្រុលផ្តោតការឃោសនាលើអារ្យធម៌ និងភាពស៊ីវិល័យអាល្លឺម៉ង់ទៅវិញ។ ប្រហែលដូច្នេះហើយ ទើបបក្សនេះឡើងប្រជាប្រិយភា រហូតទទួលសម្លេងលើសបក្សហ្វាស៊ីសឈ្មោះថា NPDទៅទៀត។ បក្សហ្វាស៊ីសNPD ទទួលសម្លេងមិនដល់៥ភាគរយផង។
រីឯបក្សSPD ឆ្វេងនិយមវិញ ត្បិតថា នាំមុខបក្សស្តាំជ្រុល តែក៏មិនមានន័យថា បក្សឆ្វេងនិយមទទួលបានជោគជ័យទាំងស្រុងដែរទេ។ បក្សឆ្វេងនិយម SPD ទទួលបាន៣០ភាគរយមែន តែប្រៀបនឹងការបោះឆ្នោតឆ្នាំ២០១១ សម្លេងនេះថយចុះដល់ទៅ៥ពិន្ទុ។ បក្ស SPD នេះក៏ប្រហែលជាត្រូវបានប្រជាជនចាត់ទុកថា រួមដៃគ្នាក្នុងនយោបាយគាំទ្រជនភៀសខ្លួនដែរ ទើបបានជាបក្សទទួលបានសម្លេងទាបជាងមុន។
ក្នុងការបោះឆ្នោតតំបន់កាលពីខែមិនា បក្សស្តាំនិយមជ្រុល AfD ទទួលបានសម្លេងគួរសម ក្នុងតំបន់ចំនួន៣ គឺបានសម្លេងឆ្នោតពី១២ភាគរយ ទៅ២៤ភាគរយ។ គិតជារូមទៅ ឥឡុវនេះ បក្ស AfD មានសម្លេងតំណាងនៅ៩តំបន់ ក្នុងចំណោមតំបន់សរុបក្នុងប្រទេស១៦តំបន់។ គឺជាជោគជ័យខ្ពស់ ទោះបីបក្សស្តាំនិយមជ្រុលមួយនេះ មិនទាន់មានសម្លេងក្នុងសភាជាតិក៏ដោយ។
ប្រជាជនអាចបោះឆ្នោតអោយបក្ស AfD ទទួលបានសម្លេងខ្លះផង នៅឆ្នាំ២០១៧ខាងមុខផងក៏ថាបាន។ យោងតាមការស្ទាបស្ទង់មតិរបស់វិទ្យាស្ថានមួយ ស្តីពិការបោះឆ្នោតសភា បក្ស AfD នេះអាចឡើងកូត ក្លាយជាបក្សមានអនុភាពនយោបាយលំដាប់ទី៣នៅអាល្លឺម៉ង់។
យោងតាមការស្ទាបស្ទង់មតិនោះ គិតជាត្រួសៗ ប្រជាជនអាល្លឺម៉ង់អាចបោះឆ្នោតអោយបក្សស្តាំជ្រុលនិយម AfD ដល់ទៅ១២ភាគរយ។ បក្សកាន់អំណាចCDU និងដៃគូCSUវិញអាចទទួលបាន៣៤ភាគរយ ហើយបក្សឆ្វេងនិយមSPD ទទួលបាន២៣ភាគរយ។ បក្សបរិស្ថានវិញអាចទទួលសម្លេង១១ភាគរយ ហើយបក្សឆ្វេងជ្រុលDie Linke អាចបាន៩ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ