ថ្ងៃផ្តាច់ព្រាត់សម្រាប់ជោគវាសនាអនាគតរបស់ប្រជាជនអេកូស !
ចុះផ្សាយនៅថ្ងៃ៖
ស្តាប់ - ០៥:២៧
នៅថ្ងៃព្រហស្បតិ៍ ទី១៨ កញ្ញានេះ មានប្រជាជនអេកូសជាង ៤លាននាក់បានចូលរួមបោះឆ្នោតប្រជាមតិដើម្បីកំណត់ជោគវាសនាអនាគតរបស់ខ្លួន។ មានចម្លើយតែពីរគត់ដែលពួកគេត្រូវជ្រើសរើស គឺឯករាជ្យភាពផ្តាច់ខ្លួនចេញពីការគ្រប់គ្រងរបស់ប្រទេសអង់គ្លេស ឬមួយក៏បន្តរស់នៅក្រោមអាណាព្យាបាលរបស់ទីក្រុងឡុងដ៍ដូចសព្វថ្ងៃ។ លទ្ធផលនៃការស្ទង់មតិចុងក្រោយឲ្យដឹងថា អត្រានៃចំនួនអ្នកចង់បានឯករាជ្យ និងអ្នកមិនចង់បានឯករាជ្យមានចំនួនប្រហាក់ប្រហែលគ្នា តែអ្នកដែលចង់បន្តស្ថិតក្នុងប្រទេសអង់គ្លេសមានចំនួនលើសបន្តិចបន្តួច។ យ៉ាងណាក៏ដោយ លទ្ធផលផ្លូវការនឹងត្រូវគេប្រកាសឲ្យដឹងនៅថ្ងៃសុក្រស្អែក។
ជាភាសាបារំាងគេហៅថា អេកូស (Ecosse) រីឯភាសាអង់គ្លេសវិញ គឺស្កត់ឡេនដ៍ (Scotland)។ ចាប់តំាងពីឆ្នំា ១៧០៧ ពោលមានរយៈពេលជាង ៣០០ឆ្នំាមកហើយដែលដែនដីអេកូសបានភ្ជាប់ខ្លួនទៅក្នុងប្រទេសអង់គ្លេស។ តែតំាងពីពេលនោះមក ពាក្យ « ស្វ័យភាព ឬ ឯករាជ្យភាព » ត្រូវបានលើកឡើងជាញយដង ពិសេសពីក្រុមអ្នកឯករាជ្យនិយម។ កាលពីឆ្នំា ១៩៧៩ និងក្រោមការទាមទារចង់បានរបស់ប្រជាជនអេកូស អង់គ្លេសក្នុងនាមជាអាណាព្យាបាលក៏បានយល់ព្រមរៀបចំបោះឆ្នោតប្រជាមតិមួយដើម្បីផ្តល់ស្វ័យភាពឲ្យដែនដីអេកូស តាមរយៈការបង្កើតឲ្យមានសភាមួយដាច់ដោយឡែក។ តែដោយអត្រាអ្នកចូលរួមបោះឆ្នោតពេលនោះមានចំនួនតិចពេក ការបោះឆ្នោតកាលណោះក៏ត្រូវបានចាត់ទុកជាមោឃៈ។
បន្ទាប់មកក្នុងឆ្នំា ១៩៩៧ មានប្រជាជនអេកូសភាគច្រើនបានទាមទារចង់បានសភាជាតិមួយរបស់ខ្លួនផ្តាច់ចេញពីសភាអង់គ្លេស។ ជាថ្មីម្តងទៀតនៅពេលនោះ រដ្ឋអំណាចទីក្រុងឡុងដ៏ក៏បានផ្តើមពិនិត្យស៊ីជ្រៅចំពោះការទាមទារចង់បានរបស់ប្រជាជនអេកូស។ ទីបំផុតក្នុងឆ្នំា ១៩៩៨ និងបន្ទាប់ពីសភាអង់គ្លេសបានប្រកាសដាក់ឲ្យប្រើប្រាស់ច្បាប់ « Scotland Act » មក ប្រជាជនអេកូសទទួលបានស្វ័យភាពទូលំទូលាយ និងមានសិទ្ធិបង្កើតសភាមួយដាច់ដោយឡែករបស់ខ្លួន តែត្រូវគោរពតាមគោលការណ៍រាជាណាចក្រអង់គ្លេសតែមួយ។
ក្រោយមកទៀតក្នុងឆ្នំា ២០១១ នៅក្នុងការបោះឆ្នោតតំបន់ គណបក្សជាតិអេកូសរបស់លោកអាឡិច សាលម៉ុងបានឈ្នះឆ្នោតដោយទទួលបានសម្លេងគំាទ្ររហូតដល់ទៅ ៥៣%។ គឺចាប់តំាងពីពេលនោះហើយដែលលោកនាយករដ្ឋមន្រ្តីអេកូសអាឡិច សាលម៉ុងបានគិតគូរជាថ្មីពីឯករាជ្យភាពពេញទីរបស់ដែនដីអេកូស។ ជាថ្មីម្តងទៀត រដ្ឋាភិបាលអង់គ្លេសសព្វថ្ងៃគ្មានជម្រើសអ្វី ក្រៅពីសុំយោបល់ពីប្រជាជនអេកូស ដោយយល់ព្រមឲ្យមានការរៀបចំបោះឆ្នោតប្រជាមតិនៅថ្ងៃនេះ។
បើអេកូសទទួលបានឯករាជ្យ អង់គ្លេសជាអ្នកដែលបានខាតបង់ច្រើនជាងគេ
បើក្រុមអ្នកចង់បានឯករាជ្យទទួលបានជោគជ័យនៅក្នុងបោះឆ្នោតប្រជាមតិថ្ងៃនេះ អ្នកដែលទទួលការខាតបង់ខ្លំាងជាងគេ គឺគ្មាននរណាក្រៅពីអង់គ្លេសនោះទេ។ ពិតណាស់ថា អេកូសក្លាយជាទឹកដីឯករាជ្យ ឬមិនឯករាជ្យ ក៏អេកូសនៅបន្តស្ថិតជារាជានិយមមួយដែលសោយរាជ្យដោយស្តេចអង់គ្លេស អេលីសាបែត ដូចករណីប្រទេសកាណាដា និងប្រទេសអូស្រ្តាលីសព្វថ្ងៃ។ ប៉ុន្តែទន្ទឹមគ្នានេះ និងបើអេកូសទទួលបានឯករាជ្យ ក៏គ្មានអ្វីរារំាងមិនឲ្យអេកូសផ្តើមតាក់តែង ឬមួយក៏ធ្វើកំណែទម្រង់ច្បាប់រដ្ឋធម្មនុញ្ញរបស់ខ្លួនឡើយ។ ជារួម សម្រាប់ប្រទេសអង់គ្លេស ការបាត់បង់ដែនដីអេកូស គឺជាការខាតបង់មួយធំធេងណាស់ គឺទំាងទឹកដី នយោបាយ និងសេដ្ឋកិច្ច។
ទឹកដីដែលអង់គ្លេសត្រូវបាត់អស់ប្រមាណជា ៣០% រីឯចំនួនប្រជាជននឹងត្រូវថយចុះប្រមាណជា ៨%។ ទាក់ទងនឹងសេដ្ឋកិច្ចវិញ គឺជាការខាតបង់មួយយ៉ាងសម្បើម ព្រោះសេដ្ឋកិច្ចអង់គ្លេសបានពឹងពាក់យ៉ាងខ្លំាងលើធនធានធម្មជាតិនៅក្រោមដីអេកូស ពិសេសគឺប្រេងឆៅ និងឧស្ម័ន។ ចូរកុំភ្លេចថា ប្រភពប្រេងឆៅបម្រុងរបស់អង់គ្លេសចំនួន ៩៧% កំពុងស្ថិតក្រោមបាតសមុទ្រប៉ែកខាងជើងក្នុងទឹកដីអេកូស និងប្រភពឧស្ម័នបម្រុងមានរហូតដល់ទៅ ៥៦%។ គ្រាន់តែក្នុងឆ្នំា ២០១២ ២០១៣ ចំណូលបានមកពីការធ្វើអាជីវកម្មលើវិស័យទំាងពីរខាងលើមានចំនួនដល់ទៅ ៧ ០០០លានអឺរ៉ូ និងបានផ្តល់ការងារឲ្យប្រជាជនអង់គ្លេស និងអេកូសជិតកន្លះលាននាក់។
និយាយពីនយោបាយផ្ទៃក្នុងនៅអង់គ្លេស ឯករាជ្យភាពដែនដីអេកូសនឹងបង្កឲ្យមានវិបត្តិផ្ទៃក្នុងរបស់រដ្ឋាភិបាលរបស់លោកនាយករដ្ឋមន្រ្តីដេវីដ កាមេរ៉ូន។ លោកកាមេរ៉ូនដែលជាអ្នកដែលបានយល់ព្រមឲ្យមានការរៀបចំបោះឆ្នោតប្រជាមតិនៅអេកូសពេលនេះ។ ដូច្នេះចង់ ឬមិនចង់ លោកកាមេរ៉ូនត្រូវបង្ខំចិត្តចុះចេញពីតំណែង បើអង់គ្លេសបានបាត់បង់ដែនដីអេកូស។ អ៊ីចឹងហើយបានជានៅមុនថ្ងៃបោះឆ្នោតថ្ងៃនេះ លោកប្រមុខរដ្ឋាភិបាលអង់គ្លេសបានព្យាយាមចុះឃោសនាដោយសន្យាថា បើអេកូសបន្តស្ថិតក្នុងប្រទេសអង់គ្លេស នោះលោកនឹងផ្តល់ស្វ័យភាពទូលំទូលាយបន្ថែមទៀតឲ្យប្រជាជនអេកូស ពិសេសក្នុងផ្នែកពន្ធដារ និងសុខាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ