MH៣៧០៖ឧបករណ៍តាមរកប្រអប់ខ្មៅត្រូវបានបញ្ជូនដល់តំបន់ស្វែងរក តែក្តីសង្ឃឹមមានតិចតួច
នៅថ្ងៃសុក្រ ទី៤ មេសានេះ នាវាដឹកឧបករណ៍ដើម្បីតាមស្វែងរកប្រអប់ខ្មៅរបស់យន្តហោះ Malaysia Airlines បាត់ខ្លួនកាលពីថ្ងៃទី៨ មីនាទើបបានធ្វើដំណើរទៅដល់តំបន់ស្វែងរកក្នុងមហាសមុទ្រឥណ្ឌា។ គឺជាទីកន្លែងដែលផ្កាយរណបរបស់ប្រទេសអូស្រ្តាលីបានរកឃើញនូវវត្ថុជាច្រើនកំពុងអណ្តែតលើផ្ទៃទឹកសមុទ្រ។ តែបន្ទាប់ពីបានស្រង់វត្ថុខ្លះយកមកវិភាគមក វត្ថុទំាងនោះមិនមែនជាបំណែករបស់យន្តហោះ Malaysia Airlines ដែលបាត់ខ្លួនកាលពីជិត ១ខែកន្លងទៅទេ។ យ៉ាងណាក៏ដោយ គឺនៅតំបន់នោះហើយដែលរដ្ឋអំណាចម៉ាឡេស៊ីបានសន្និដ្ឋានថា ជាកន្លែងដែលយន្តហោះនោះបានធ្លាក់។
ចុះផ្សាយនៅថ្ងៃ៖
ស្តាប់ - ០២:២៣
បន្ទាប់ពីបានធ្វើដំណើរអស់រយៈ ៥ថ្ងៃ ៤យប់មក នាវាអូស្រ្តាលីដែលដឹកឧបករណ៍ដើម្បីតាមស្វែងរកប្រអប់ខ្មៅរបស់យន្តហោះ Malaysia Airlines បានទៅដល់មហាសមុទ្រឥណ្ឌាហើយនៅថ្ងៃសុក្រនេះ។ ឧបករណ៍ដែលមានទម្ងន់ ៣៥គីឡូក្រាមនោះមានបំពាក់ដោយខ្សែអង់តែនដើម្បីស្វែងចាប់រលកសញ្ញាដែលបញ្ចេញដោយប្រអប់ខ្មៅចំនួន២ របស់យន្តហោះ Malaysia Airlines នៅបាតសមុទ្រក្នុងជម្រៅ ៦ ០០០ម៉ែត្រដែលបានបាត់ខ្លួនកាលពីជិត ១ខែមុន ពោលនៅថ្ងៃទី៨ មីនា។ តាមធម្មតា ប្រអប់ខ្មៅរបស់យន្តហោះ Malaysia Airlines បាត់ខ្លួននោះអាចផ្តល់រលកសញ្ញារបស់វាតែក្នុងរយៈពេល ៣០ថ្ងៃប៉ុណ្ណោះ មានន័យថា បើលើសពី ៣០ថ្ងៃ ទៅ ប្រអប់ខ្មៅនោះឈប់ផ្តល់រលកសញ្ញាអ្វីទំាងអស់ ហើយឧបករណ៍តាមស្វែងរកប្រអប់ខ្មៅនោះក៏មិនអាចដឹងទីតំាងរបស់ប្រអប់ខ្មៅនោះដែរ។
ដូច្នេះបើគេគិតពីថ្ងៃបាត់យន្តហោះនៅថ្ងៃទី៨ មីនាមកដល់ថ្ងៃទី៤ មេសានេះ គឺនៅសល់រយៈពេលតែ ៤ថ្ងៃគត់ដែលប្រអប់ខ្មៅអាចបន្តផ្តល់រលកសញ្ញារបស់វា និងដែលឧបករណ៍ស្វែងរកអាចដឹងទីតំាងជាក់ច្បាស់របស់ប្រអប់ខ្មៅទំាងនោះ។ យ៉ាងណាក៏ដោយ បេសសកម្មនៃការស្វែងរកប្រអប់ខ្មៅនោះត្រូវប្រើពេលយូរ ប្រៀបដូចជាការរៀវរកម្ជុលនៅបាតសមុទ្រអ៊ីចឹង ព្រោះតំបន់ដែលត្រូវស្វែងរកមានទំហំធំធេងណាស់។ តែវាជាកាតព្វកិច្ចមួយដែលរដ្ឋអំណាចម៉ាឡេស៊ី និងក្រុមហ៊ុន Malaysia Airlines ត្រូវតែធ្វើដើម្បីស្វែងរកការពិតជូនក្រុមគ្រួសារអ្នកដំណើរទំាង ២៣៩នាក់ដែលជិះនៅក្នុងយន្តហោះបាត់ខ្លួននោះ។
សូមជម្រាបជូនថា ជិត ១ខែកន្លងមកហើយដែលគេនៅតែគ្មានព័ត៌មានច្បាស់លាស់ជុំវិញការបាត់យន្តហោះរបស់ក្រុមហ៊ុន Malaysia Airlines ប៊ូអ៊ីង ៧៧៧ ជើងហោះហើរលេខ MH៣៧០។ គឺមានតែការស្វែងរកប្រអប់ខ្មៅទំាងពីររបស់យន្តហោះនោះទេទើបគេអាចដឹងពីអាដ៍កំបំាង ព្រោះថា ប្រអប់ខ្មៅនោះបានថតទុកទំាងអស់នូវគ្រប់ព័ត៌មាននៃការហោះហើរ ព្រមទំាងកិច្ចសន្ទនារបស់អ្នកបើកបរយន្តហោះនោះ។ ដោយឡែកក្នុងពេលជាមួយគ្នានេះ លោក អានវ៉ារ អ៊ីប្រាហ៊ីម ប្រធានគណបក្សប្រឆំាងក្នុងប្រទេសម៉ាឡេស៊ីបានចោទរដ្ឋាភិបាលពីការលាក់ព័ត៌មានពិតជុំវិញការបាត់យន្តហោះនោះ។ នៅក្នុងកិច្ចសន្ទនាជាមួយកាសែតអង់គ្លេស Daily Telegraph លោកអ៊ីប្រាហ៊ីមបានអះអាងថាដោយចោទជាសំណួរថា ហេតុអ្វីបានជាប្រព័ន្ធរ៉ាដាម៉ាឡេស៊ីមិនអាចចាប់បាននៅពេលដែលយន្តហោះនោះបានហោះប្តូរផ្លូវដោយឆ្លងកាត់ខេត្តម៉ាឡេស៊ីរហូតដល់ទៅ ៤ខេត្តឯណោះ មុននឹងបាត់ដំណឹងឈឹងសូន្យ?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ