MH៣៧០៖ប្រតិបត្តិការស្វែងរកបំណែកយន្តហោះរបស់ Malaysia Airlines នៅក្នុងមហាសមុទ្រឥណ្ឌាបានផ្អាក
នៅថ្ងៃព្រហស្បតិ៍ ទី២៧ មីនានេះ ការស្វែងរកវត្ថុដែលកំពុងអណ្តែតលើផ្ទៃទឹកសមុទ្រក្នុងមហាសមុទ្រឥណ្ឌាត្រូវបានផ្អាកមួយរយៈ ដោយសារតែធាតុអាកាសមិនល្អ។ ដោយឡែក រូបភាពផ្តល់ដោយផ្កាយរណបពីប្រទេសមួយចំនួនបានបង្ហាញឲ្យឃើញនូវបំណែកកាន់តែច្រើនឡើងៗដែលកំពុងអំណ្តែតលើផ្ទៃទឹកសមុទ្រ។ តែរហូតមកដល់ថ្ងៃនេះ គេនៅមិនអាចស្រង់យកវត្ថុទំាងនោះមកវិភាគដើម្បីចង់ដឹងថា តើវាជាបំណែកយន្តហោះរបស់ក្រុមហ៊ុន Malaysia Airlines ដែលបានបាត់ខ្លួនតំាងពី ៣សប្តាហ៍មិន ឬអត់ទេ។
ចុះផ្សាយនៅថ្ងៃ៖
ស្តាប់ - ០២:០២
អាដ៍កំបំាងនៃការបាត់យន្តហោះមួយគ្រឿងរបស់ក្រុមហ៊ុន Malaysia Airlines កំពុងធ្វើពិភពលោកឆ្ងល់កាន់តែខ្លំាងឡើងៗពីមួយថ្ងៃ ទៅមួយថ្ងៃ។ គឺជាលើកទី២ហើយក្នុងសប្តាហ៍នេះដែលប្រតិបត្តិការស្វែងរកបំណែកយន្តហោះរបស់ក្រុមហ៊ុន Malaysia Airlines ត្រូវបានផ្អាកជាថ្មី។ មូលហេតុ មកពីធាតុអាកាសមិនអំណោយផល។ សូមជម្រាបជូនថា អស់ជាច្រើនថ្ងៃកន្លងមកហើយ ពោលតំាងពីផ្កាយរណបបានបង្ហាញឲ្យឃើញនូវវត្ថុជាច្រើនដែលកំពុងអណ្តែតត្រៀបត្រាលើផ្ទៃទឹកសមុទ្រក្នុងមហាសមុទ្រឥណ្ឌាប៉ែកខាងត្បូងមក មានប្រទេសជាច្រើនបានបញ្ជូនយន្តហោះ និងនាវាជាច្រើនគ្រឿងដើម្បីស្វែងរកវត្ថុទំាងនោះដោយសង្ឃឹមថា ជាបំណែកយន្តហោះរបស់ក្រុមហ៊ុន Malaysia Airlines ដែលបានបាត់ខ្លួនតំាងពី ៣សប្តាហ៍កន្លងមក។
នៅថ្ងៃនេះទៀត និងបន្ទាប់ពីផ្កាយរណបរបស់បារំាង ដល់វេនផ្កាយរណបរបស់ប្រទេសថៃម្តងដែលបានបង្ហាញឲ្យឃើញនូវបំណែកប្រមាណជា ៣០០ ខុសៗគ្នា មានប្រវែងពី ២ ទៅ ១៥ម៉ែត្រដែលកំពុងអណ្តែតត្រៀបត្រានៅក្នុងមហាសមុទ្រឥណ្ឌាប៉ែកខាងត្បូង នេះជាព័ត៌មានផ្តល់ដោយទីភ្នាក់ងារសាធារណៈថៃទទួលបន្ទុកខាងផ្កាយរណប។ នៅថ្ងៃពុធម្សិលមិញ រដ្ឋាភិបាលម៉ាឡេស៊ីក៏បានប្រកាសឲ្យដឹងពីរូបភាពផ្តល់ដោយផ្កាយរណបរបស់ខ្លួនដែលបង្ហាញឲ្យឃើញនូវវត្ថុចំនួន ១២២ ខុសៗគ្នាកំពុងអណ្តែតលើផ្ទៃទឹកសមុទ្រក្នុងបរិវាន ៤០០គីឡូម៉ែត្រក្រឡាស្ថិតប៉ែកខាងត្បូងមហាសុទ្រឥណ្ឌា។
តែរហូតមកដល់ពេលនេះ គេនៅមិនទាន់អាចស្រង់បានវត្ថុណាមួយយកមកវិភាគដើម្បីចង់ដឹងថា តើវាពិតជាបំណែកយន្តហោះរបស់ក្រុមហ៊ុន Malaysia Airlines ដែលបានបាត់ខ្លួនកាលពីថ្ងៃទី៨ មីនាកន្លងមក ឬយ៉ាងណានោះទេ។ ដូច្នេះ អាដ៍កំបំាងកំពុងបន្តមាន ហើយការស្វែងរកក៏កំពុងបន្តធ្វើដោយគ្មានអ្នកណាម្នាក់ហ៊ានអះអាងថា តើក្រុមគ្រួសាររបស់អ្នកដំណើរនឹងដឹងការពិតនៅថ្ងៃណាមួយ ឬអត់ទេ។ តែអ្វីដែលក្រុមគ្រួសារអ្នកដំណើរ ពិសេសជនជាតិចិនបាន និងកំពុងបន្តធ្វើសព្វថ្ងៃ គឺបាតុកម្មដាក់គំនាបលើរដ្ឋាភិបាលម៉ាឡេស៊ី និងក្រុមហ៊ុន Malaysia Airlines ឲ្យផ្តល់ការពិតជូនពួកគេ។ រីឯរដ្ឋាភិបាលចិនវិញ ក៏ជម្រុញរដ្ឋាភិបាលម៉ាឡេស៊ីឲ្យទទួលយកជំនួយពីក្រុមអ្នកឯកទេសចិនដើម្បីស្វែងរកការពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ