យន្តហោះម៉ាឡេស៊ីបាត់ ៖ ការអង្កេតឧក្រិដ្ឋកម្មផ្តុំលើបុគ្គលិកយន្តហោះ
ប៉ូលិសម៉ាឡេស៊ី បានងាកទៅផ្តុំការស៊ើបអង្កេតឧក្រិដ្ឋកម្មទៅលើតែក្រុមបុគ្គលិកក្នុងយន្តហោះ ជើងហោះហើរ MH៣៧០ ដែលបានបាត់ស្រមោលតាំងពីថ្ងៃទី ៨ មីនាមក។ ចំណែកអ្នកធ្វើដំណើរទាំង២២៧នាក់ ត្រូវច្រានចេញពីផ្លូវអង្កេត។ នេះបើតាមភ្នាក់ងារសារព័ត៌មានផ្លូវការម៉ាឡេស៊ី។
ចុះផ្សាយនៅថ្ងៃ៖
ស្តាប់ - ០១:៥០
បើតាមមេប៉ូលិស ក្រុមអ្នកអង្កេតបានច្រើនចោលសេចក្តីសន្និដ្ឋានដែលថា អ្នកដំណើរម្នាក់ ឬច្រើននាក់ នាំគ្នាចាប់មនុស្សធ្វើចំណាប់ថ្នូរបង្វែរផ្លូវយន្តហោះ ដើម្បីបង្កភេរវកម្ម ឬដោយមានបញ្ហាផ្ទាល់ខ្លួន បញ្ហាផ្លូវចិត្ត រហូតនាំឱ្យបាត់យន្តហោះMH៣៧០ហើយ។ ប៉ុន្តែក្រុមអ្នកអង្កេត នៅតែបន្តផ្តោតការតាមដានលើអ្នកបើកបរទាំងពីររូប ដដែល បើទោះបីជាគ្មានរកឃើញវត្ថុសង្ស័យពាក់ព័ន្ធនឹងអ្នកទាំងពីរ និងបើទោះបីជាគ្មានការបង្ហើបបង្ហាញព័ត៌មានអ្វីសង្ស័យអ្វីទាក់ទងនឹងអ្នកបើកបរទាំងពីរក៏ដោយ។
ការអង្កេតឧក្រិដ្ឋកម្ម ធ្វើឡើងដោយក្រុមប៉ូលិសម៉ាឡេស៊ីរហូតមកទល់នឹងពេលគ្មានលទ្ធផលអ្វីទាំងអស់។ មេប៉ូលិសបានត្រឹមបញ្ជាក់បន្ថែមនៅថ្ងៃពុធនេះ អំពីក្តីអស់សង្ឃឹមថា ប្រហែលជាគេមិនអាចដឹងជារហូតទៅអំពី មូលហេតុនៃការបាត់យន្តហោះ
មានតែប្រអប់ខ្មៅយន្តហោះតែប៉ុណ្ណោះ ដែលអាចពន្យល់បំភ្លឺគ្រោះថ្នាក់ដ៏ចម្លែកនេះបាន។ ប៉ុន្តែយុទ្ធនាការស្វែងរកហាក់មានសង្ឃឹមកាន់ស្តួចស្តើងឡើងៗ។ ថ្ងៃពុធនេះ នាវាមុជទឹកអង់គ្លេស បានទៅដល់មហាសមុទ្ទឥណ្ឌាត្រង់ចំណុចសង្ស័យហើយ ដើម្បីជួយធ្វើប្រតិបត្តិការជាមួយនាវាអូស្ត្រាលីក្នុងការអូសខ្សែកាបតាមចាប់សញ្ញាប្រអប់ខ្មៅ។ ការស្វែងរកនេះនឹងមានរយៈពេលយូរ និងត្រូវការខិតខំប្រឹងប្រែងខ្លាំងណាស់ ព្រោះតំបន់ស្រាវជ្រាវធំ ជ្រៅ ឯប្រអប់ខ្មៅក៏ជិតផុតអាយុឱ្យសញ្ញា។
លោកនាយករដ្ឋមន្ត្រីម៉ាឡេស៊ី ក៏ត្រូវទៅដល់ក្រុងPerth អូស្ត្រាលីនៅ ល្ងាចថ្ងៃពុធនេះ ដើម្បីជួបនាយករដ្ឋមន្ត្រីអូស្រ្តាលី និងដើម្បីធ្វើសហការដឹកនាំការស្វែងរកជាមួយនឹងក្រុមអ្នកនៅក្នុងសមុទ្ទ។ សូមបញ្ជាក់ថា តាំងពីវិបត្តយន្តហោះកើតឡើង ម៉ាឡេស៊ីបានទទួលរងការរិះគន់យ៉ាងខ្លាំង ពិសេសពីសំណាក់ក្រុមគ្រួសារអ្នកដំណើរចិន ថាកូឡាឡាំពួ អសមត្ថភាព និងមានចេតនាលាក់ការពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ