លោកពូទីនទូរស័ព្ទទៅនិយាយជាមួយលោកអូបាម៉ា
ចុះផ្សាយនៅថ្ងៃ៖
ស្តាប់ - ០៧:៥១
ប្រធានាធិបតីរុស្ស៊ី លោកវ្លាឌីមៀរ ពូទីនបានទូរស័ព្ទ កាលពីល្ងាចថ្ងៃសុក្រ ទី ២៨ មីនា លោកបារ៉ាក់ អូបាម៉ា ដែលកំពុងបំពេញទស្សនកិច្ច នៅប្រទេសអារ៉ាប៊ី សាអ៊ូឌីត។ ចាប់តាំងពីមានវិបត្តិ នៅគ្រីមេ ដែលរុស្ស៊ីទើបចាប់បញ្ចូលជាទឹកដីរបស់ខ្លួន នេះជាលើកទីមួយ ដែលប្រធានាធិបតីរុស្ស៊ី ទូរស័ព្ទ ទៅប្រមុខដឹកនាំអាមេរិក។ ប្រធានាធិបតីរុស្ស៊ីអំពាវនាវឲ្យអាមេរិកចូលរួមគ្នាជាមួយរុស្ស៊ី ដើម្បីធានារក្សាស្ថិរភាពនៅ អ៊ុយក្រែន។
ប្រធានាធិបតីរុស្ស៊ី លោកវ្លាឌីមៀរ ពូទីនបានទូរស័ព្ទ កាលពីល្ងាចថ្ងៃសុក្រម្សិលមិញ ទៅលោកបារ៉ាក់ អូបាម៉ា ដែលកំពុងបំពេញទស្សនកិច្ច នៅប្រទេសអារ៉ាប៊ី សាអ៊ូឌីត។ ចាប់តាំងពីមានវិបត្តិ នៅគ្រីមេ ដែលរុស្ស៊ីទើបចាប់បញ្ចូលជាទឹកដីរបស់ខ្លួន នេះជាលើកទីមួយ ដែលប្រធានាធិបតីរុស្ស៊ី ទូរស័ព្ទ ទៅប្រមុខដឹកនាំអាមេរិក។ ប្រធានាធិបតីរុស្ស៊ីអំពាវនាវឲ្យអាមេរិកចូលរួមគ្នាជាមួយរុស្ស៊ី ដើម្បីធានារក្សាស្ថិរភាពនៅ អ៊ុយក្រែន។
តាមសេចក្តីប្រកាសព័ត៌មានរបស់សេតវិមាន លោកពូទីនបានទូរស័ព្ទទៅលោកអូបាម៉ា ដើម្បីនិយាយពីសំណើរបស់អាមេរិក ដែលចង់ដោះស្រាយវិបត្តិនៅអ៊ុយក្រែន តាមរយៈការទូត។ សំណើរបស់អាមេរិក ត្រូវបានលោកប្រមុខការបរទេសចន ឃែរី បានចងក្រង និងត្រូវបានបង្ហាញម្តងហើយ ទៅរដ្ឋមន្រ្តីការបរទេសរុស្ស៊ី កាលពីថ្ងៃចន្ទដើមសប្តាហ៍នេះ នៅក្នុងទីក្រុងឡាអេ។
នៅក្នុងសំណើរបស់ខ្លួន អាមេរិក (ទៅតាមការចង់បានរបស់លោកអូបាម៉ា) បានទាមទារឲ្យ រុស្ស៊ី ដកខ្លួន ដូចជា ប្រមូលទ័ព ចូលក្នុងមូលដ្ឋានទ័ពរបស់ខ្លួនវិញ និងដកទ័ពចេញពីតាមព្រំដែនរុស្ស៊ី អ៊ុយក្រែន។ តាមមន្រ្តីយោធាអាមេរិក ដែលបាននិយាយប្រាប់ទូរទស្សន៍ CNN រុស្ស៊ីមានទ័ព ជាង៤ម៉ឺននាក់ នៅតាមពំ្រដែន ភាគខាងកើតអ៊ុយក្រែន នៅក្រោមលេសធ្វើសមយុទ្ធ។ អាជ្ញាធរអ៊ុយក្រែនវិញវាយតម្លៃថា ទ័ពរុស្ស៊ី មានដល់ទៅជាង៨ម៉ឺននាក់ នៅតាមព្រំដែន រហូតធ្វើឲ្យអ៊ុយក្រែនបារម្ភថា រុស្ស៊ីនឹងអាចយកលេសដូចនៅគ្រីមេ ប្រើទ័ពឈ្លានពានចូលក្នុងទឹកដីផ្សេងទៀតរបស់អ៊ុយក្រែន។
លោកបាន គីមូន ដែលបានជួបលោកពូទីន នៅសប្តាហ៍នេះ បានដកស្រង់ សំដីរបស់លោកប្រធានាធិបតីរុស្ស៊ី ដែលថា រុស្ស៊ីគ្មានមហច្ឆិតាឈ្លានពានទឹកដីអ៊ុយក្រែនទេ។ លោកអូបាម៉ា នៅក្នុងកិច្ចសន្ទនាទូរស័ព្ទកាលពីសុក្រ បានទាមទារឲ្យលោកពូទីនឆ្លើយតបនឹងសំណើរបស់អាមេរិក តាមរយៈសំណៅសរសេរ គឺមិនមែនថា តែមាត់ទេ។
ម្យ៉ាងទៀត ក្នុងសំណើរបស់អាមេរិក អាមេរិកទាមទារឲ្យគេបញ្ជូនក្រុមអធិការកិច្ចអន្តរជាតិ ដើម្បីតាមដានមើល ថា តើជនជាតិភាគតិច ដូចជាជនជាតិ តាតារ នៅទឹកដីគ្រីមេ ដែលមិនពេញចិត្តនឹងការគ្រប់គ្រងរបស់រុស្ស៊ី ទទួលការរំលោភសិទ្ធិដែរឬទេ។ ទីបីទៀត អាមេរិកចង់ឲ្យម៉ូស្គូចរចាដោយផ្ទាល់ជាមួយទីក្រុងគៀវ និងទទួលស្គាល់ គាំទ្រការបោះឆ្នោតប្រធានាធិបតីនៅអ៊ុយក្រែន។
ប្រធានាធិបតីរុស្ស៊ីវិញ តាមវិមានក្រេមឡាំង បានអំពាវនាវឲ្យអាមេរិកចូលរួមជាមួយរុស្ស៊ី ដើម្បីធានាស្ថិរភាពនៅអ៊ុយក្រែន។ តាមទីក្រុងម៉ូស្គូ ក្រុមជាតិនិយម និងក្រុមបំបែកខ្លួន មានកាន់តែច្រើន និងកំពុងគំរាមកំហែងអ្នកស្រឡាញ់សន្តិភាព នៅអ៊ុយក្រែន។ ប្រធានាធិបតីរុស្ស៊ីបានលើកឡើងផងដែរពីការព្រួយបារម្ភរបស់ខ្លួនទាកទងនឹងតំបន់ដែលសំបូរប្រជាជននិយាយភាសារុស្ស៊ី នៅក្នុងប្រទេសម៉ុលដាវី។ ម៉ុលដាវី អតីតទឹកដីសហភាពសូវៀត ដែលស្ថិតនៅចន្លោះ រូម៉ានី និងអ៊ុយក្រែនកំពុងចង់ភ្ជាប់ខ្លួន ជាមួយសហភាពអឺរ៉ុប។ លំហាត់សមយុទ្ធកាន់តែសកម្មរបស់ទាហានរុស្ស៊ី នៅក្នុងមូលដ្ឋានទ័ព ក្នុងតំបន់Transdniestrie ក្នុងប្រទេសម៉ុលដាវី ធ្វើឲ្យលោកប្រធានាធិបតីម៉ុលដាវីបារម្ភខ្លាចក្រែងរុស្ស៊ីប្រើទ័ពអន្តរាគមន៍ និងលេបយកទឹកដីរបស់ខ្លួន ដូចដែលរុស្ស៊ីបានធ្វើកន្លងមក ជាមួយតំបន់គ្រីមេរបស់អ៊ុយក្រែន៕
ភាពតានតឹង រវាងរុស្ស៊ី និងប្រទេសលោកខាងលិចកើតមាន បន្ទាប់ពីរុស្ស៊ីបានចងភ្ជាប់ជ្រោយគ្រីមេ របស់អ៊ុយក្រែន ទៅក្នុងទឹកដីរុស្ស៊ី។ ការចុចទូរស័ព្ទរបស់លោកពូទីន ទៅលោកអូបាម៉ា កាលពីយប់ថ្ងៃសុក្រ អាចបង្ហាញពីឆន្ទះ ការប៉ុនប៉ង ក្នុងការដោះស្រាយភាពតានតឹងនៅអ៊ុយក្រែន តាមរយៈការចរចាការទូត។ លោកពូទីនចុចទូរស័ព្ទ ទៅលោកអូបាម៉ា គឺនៅមួយថ្ងៃគត់ ក្រោយលោកអូបាម៉ាបាននិយាយប្រាប់ទូរទស្សន៍អាមេរិក ពីលទ្ធភាពបន្ធូរបន្ថយភាពតានតឹង នៅអ៊ុយក្រែន តាមរយៈការចរចាការទូត។
ដោយសារតែភ្ជាប់ទឹកដីគ្រីមេ របស់អ៊ុយក្រែន ចូលទៅក្នុងទឹកដីរបស់ខ្លួន រុស្ស៊ីរងការដាក់សម្ពាធ និងទណ្ឌកម្មពីគ្រប់ទិស ជាពិសេស ពីសហភាពអឺរ៉ុប និងអាមេរិក។ កាលពីយប់ថ្ងៃព្រហស្បតិ៍ ទី ២៧ មីនា ការបោះឆ្នោតនៅមហាសន្និបាតរបស់អង្គការសហប្រជាជាតិ រឹតតែធ្វើឲ្យនយោបាយរុស្ស៊ី ឯកោ និងទទួលការថ្កោលទោសពី អន្តរជាតិ។ សេចក្តីសម្រេចរបស់មហាសន្និបាតបានចាត់ទុក ការបោះឆ្នោតប្រជាមតិនៅគ្រីមេ ថា ជារឿងខុសច្បាប់ និងបានទាមទារឲ្យប្រទេសទាំងអស់ក្នុងពិភពលោកមិនទទួលស្គាល់ការភ្ជាប់ជ្រោយគ្រីមេ របស់អ៊ុយក្រែន ទៅក្នុងទឹកដីរុស្ស៊ី។
នៅក្នុងស្ថានភាពបច្ចុប្បន្ន រុស្ស៊ី ចង់ ឬមិនចង់ ត្រូវតែចាំបាច់ ត្រលប់មករកចរចា ជាមួយប្រទេសលោកខាងលិច ដែលមានអាមេរិកដឹកមុខគេ។ រុស្ស៊ីអាច ចាំបាច់ត្រូវមករកចរចា ជាមួយ ប្រទេសលោកខាងលិច ដើម្បីអាចទាមទារភាពស្របច្បាប់របស់ខ្លួន ក្នុងការគ្រប់គ្រងទឹកដីគ្រីមេផង ព្រោះ រហូតមកដល់ពេលនេះ សហភាពអឺរ៉ុប និងអាមេរិក គ្រាន់តែថ្កោលទោស និងចាត់ទុក ការបោះឆ្នោត ប្រជាមតិ នៅគ្រីមេថា ខុសច្បាប់ ប៉ុន្តែ អ៊ុយក្រែនផ្ទាល់ដែលជាម្ចាស់របស់គ្រីមេ និងប្រទេសលោកខាងលិច មិនបានស្រែកទាមទារឲ្យរុស្ស៊ីប្រគល់ទឹកដីគ្រីមេមកឲ្យអ៊ុយក្រែនវិញទេ។ គេគ្រាន់តែបារម្ភខ្លាចក្រែងរុស្ស៊ីប្រើទ័ពឈ្លានពានចូលក្នុងទឹកដី ផ្សេងទៀត របស់អ៊ុយក្រែន។ ដូច្នេះ ក្នុងបរិបទនេះ បើសិនជារុស្ស៊ីព្រមចរចានៅពេលនេះ គឺរុស្ស៊ីនឹងអាចសង្ឃឹមរក្សាទឹកដីគ្រីមេជារបស់ខ្លួន។
ទណ្ឌកម្មរបស់អាមេរិក និងសហភាពអឺរ៉ុបចាប់ផ្តើមចេញផ្លែផ្កា
បើទោះបីជាមនុស្សជំនិតរបស់លោកពូទីននិយាយថា ពួកគេមានមោទនភាព ដែលស្ថិតនៅក្នុងបញ្ជីខ្មៅ ដាក់ទណ្ឌកម្មរបស់អាមេរិក ប៉ុន្តែ ទណ្ឌកម្មរបស់អាមេរិក និងសហភាពអឺរ៉ុប រួមផ្សំនឹងវិបត្តិដែលរុស្ស៊ីចាប់ផ្តើមមានជាមួយអ៊ុយក្រែន កំពុងជះឥទ្ធិពលមិនល្អទៅលើសេដ្ឋកិច្ចរុស្ស៊ី។
យោងតាម អគ្គនាយកធនាគារSberbank ដែលជាធនាគាដ៏ធំនៅរុស្ស៊ី ទឹកប្រាក់ប្រមាណ ៣៥ពាន់លានដុល្លារ ត្រូវដកចេញពីធនាគារនៅរុស្ស៊ី នៅក្នុងរយៈពេល តែពីរខែចុងក្រោយនេះ។ ការដកសាច់ប្រាក់នេះនឹងអាចធ្វើឲ្យសេដ្ឋកិច្ចរុស្ស៊ីធ្លាក់ថយចុះ។ មួយវិញទៀត គិតត្រឹមខែមីនានេះ លំហូរទុនចេញពីប្រទេស មានដល់៧០ពាន់លានដុល្លារ នៅពេលដែលអ្នកវិនិយោគ ចាប់ផ្តើមដកខ្លួន ចេញពីរុស្ស៊ី ដោយសារតែដំណឹងដាក់ទណ្ឌកម្មពីប្រទេសលោកខាងលិច។ លំហូរទុនចេញ ពី ប្រទេសជាវិបត្តិដែលរដ្ឋាភិបាលខំប្រឹងទប់ស្កាត់ ដើម្បីធានាដល់សុខភាពសេដ្ឋកិច្ចប្រទេស។
ដំណឹងរឹតតែមិនល្អមួយទៀតនោះគឺ នៅពេលលោកអូបាម៉ា បានប្រកាសកាលពីថ្ងៃព្រហស្បតិ៍ថា អាមេរិកគ្រោងនឹងរៀបចំដាក់ទណ្ឌកម្មថ្មីមួយទៀត គឺជាទណ្ឌកម្មទីបី ក្នុងករណីថា រុស្ស៊ីមិនព្រមប្តូរជំហរ ដើម្បីបន្ធូរភាពតានតឹង ពោល គឺបើរុស្ស៊ី មិនព្រមដកទ័ពរបស់ខ្លួនចេញពីព្រំដែន របស់ខ្លួន ដែលនៅជាប់ជាមួយអ៊ុយក្រែន។
សហភាពអឺរ៉ុប និងអាមេរិកធ្លាប់បានចេញទណ្ឌកម្ម ដាក់ទៅលើមនុស្សស្និទ្ធ នឹងលោកប្រធានាធិបតីរុស្ស៊ី ដោយផ្អឹបទុកទ្រព្យសម្បត្តិរបស់ពួកគេ ដែលមាននៅបរទេស។ នៅដើមសប្តាហ៍នេះ ប្រទេសដែលមានសេដ្ឋកិច្ចលូតលាស់ខ្លាំង G៧ ដែលប្រជុំគ្នានៅទីក្រុងឡាអេបានព្រមានថា បើសិនរុស្ស៊ីប្រើទ័ពឈ្លានពាន ចូលទៅក្នុងទឹកដីអ៊ុយក្រែនបន្ថែមទៀត នោះ គេសង្កត់ធ្ងន់ ដាក់ទណ្ឌកម្មទៅលើសេដ្ឋកិច្ចរុស្ស៊ីតែម្តង ដោយផ្តោតសំខាន់ទៅលើវិស័យថាមពល អាវុធ និងហិរញ្ញវត្ថុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ