គួរយកចិត្តទុកដាក់ លើការងារមួយចំនួនបន្ថែមទៀត ដើម្បីជំរុញការគាំទ្រសេវារថយន្តក្រុងសាធារណៈ
ចុះផ្សាយនៅថ្ងៃ៖
ស្តាប់ - ០៥:០៦
តួលេខនៃអ្នកឡើងជិះរត់រថយន្តក្រុងសាធារណៈបានកើនឡើងជារៀងរាល់ថ្ងៃនៅក្នុងសប្តាហ៍ដំបូង។ ក្រោយមកចំនួនក៏ធ្លាក់ចុះមកវិញបន្តិច។ ទោះយ៉ាងណាក៏ដោយ រហូតដល់ពេលនេះ បើយោងតាមការបញ្ជាក់របស់មន្ត្រី ជាន់ខ្ពស់របស់សាលារាជធានីភ្នំពេញ ជាមធ្យមមានអតិថិជនប្រមាណ ១៧០០នាក់ដែលប្រើប្រាស់សេវារថយន្តក្រុងសាធារណៈ។ សាលារាជធានីភ្នំពេញ និងទីភ្នាក់ងារសហប្រតិបត្តិការអន្តរជាតិជប៉ុន JICA នៅចង់ឃើញ ការគាំទ្រច្រើនជាងនេះទៀត។ ប៉ុន្តែ គេសង្កេតឃើញថា មានចំនុចចំបងៗមួយចំនួន ដែលអាចជាការទាក់ទាញអតិថិជន ដូចជា គន្លងផ្លូវសម្រាប់រថយន្តក្រុង ការផ្សព្វផ្សាយបន្ថែម មិនត្រូវបានអនុវត្តពីដំបូងទីឡើយ។
ចាប់តាំងពីថ្ងៃទី៥កុម្ភៈ ដែលជាថ្ងៃដំបូងនៃការផ្តើមសាកល្បងរថយន្តក្រុងសាធារណៈនោះ ចំនួនអ្នកប្រើប្រាស់សេវានេះ បានបន្តការឡើងរហូត នៅក្នុងសប្តាហ៍ទីមួយ។ នៅក្នុងថ្ងៃដំបូង រថយន្តក្រុងចំនួន១០ បានទទួលអតិថិជនចំនួន១០២៩នាក់។ នៅក្នុងថ្ងៃបន្តបន្ទាប់មកទៀតនោះ ចំនួនអ្នកគាំទ្រសេវាដឹកជញ្ជូនសាធារណៈក្នុងក្រុងនេះបានបន្តកើនឡើងរហូតដល់ចំនួនជិត២០០០នាក់ក្នុងមួយថ្ងៃ។
ប៉ុន្តែ បើតាមការអះអាងរបស់មន្ត្រីជាន់ខ្ពស់របស់សាលារាជធានីភ្នំពេញ ចំនួនអ្នកជិះរថយន្តក្រុងសាធារណៈបានធ្លាក់ចុះមកវិញ មកនៅត្រឹម១៧០០នាក់ជាមធ្យមក្នុងមួយថ្ងៃ។ ប្រសិនបើគេ គេគណនាលេខ រកចំណូលប្រចាំថ្ងៃពីសេវារថយន្តក្រុងសាធារណៈនៅពេលនេះ គេក៏អាចទទួលចំនួនជាង៦០០ដុល្លារដែរ ក្នុងមួយថ្ងៃ បានន័យថា ៦០០០ដុល្លារក្នុងរយៈពេល១០ថ្ងៃ និង១៨០០០ដុល្លារក្នុងរយៈពេល១ខែ។
បើគេពិនិត្យចំនួនអ្នកប្រើប្រាស់សេវាដឹកជញ្ជូនសាធារណៈនេះ ថ្វីដ្បិតអ្នកជំនាញរបស់សាលារាជធានីភ្នំពេញអះអាងថា វាជាសញ្ញាដ៏ល្អនៃការចាប់ផ្តើមគម្រោងសាកល្បងមែនក៏ដោយនោះ ប៉ុន្តែអាជ្ញាធររាជធានី នៅចង់ឃើញការគាំទ្រធំធេង និងគគ្រឹកគគ្រេងជាងនេះទៀត។
មានមតិសាធារណៈជាច្រើន ដែលស្វាគមន៍វត្តមានរថយន្តក្រុងសាធារណៈនៅក្នុងរាជធានីភ្នំពេញ។ ប៉ុន្តែគេក៏មិនទាន់ឃើញការស្វាគមន៍ទាំងនោះបានក្លាយជាសកម្មភាព តាមរយៈការប្រើប្រាស់សេវាដឹកជញ្ជូនសាធារណៈនេះនោះឡើយ។
ដើម្បីជំរុញអោយពលរដ្ឋគាំទ្រ និងប្រើប្រាស់សេវានេះអោយបានកាន់តែច្រើន ចាប់ពី ដំណាក់កាលសាកល្បងមែននោះ មានកត្តាមួយចំនួនដែលគេគួរអនុវត្ត តាំងពីការចាប់ផ្តើមនេះតែម្តង ដើម្បីទាក់ទាញអតិថិជន។
ទីមួយ គឺការអនុវត្តការសាកល្បង នៅលើខ្សែផ្លូវច្រើន ដែលមិនមែនមានតែមួយខ្សែនៅលើផ្លូវមុនីវង្សដូចពេលនេះឡើយ។ តាមរយៈការចុះផ្សាយនៃសារព័ត៌មានមួយចំនួនដែលសម្ភាសន៍ពលរដ្ឋទូទៅនោះ មាននិស្សិត និងអ្នកធ្វើការមិនតិចឡើយដែលចង់បានវត្តមានរថយន្តក្រុងនៅលើមហាវិថីផ្សេងៗទៀត ដែលស្ថិតនៅតំបន់ដែលពួកគេធ្វើចរាចរណ៍។
ប្រសិនបើគេអនុវត្តគម្រោងសាកល្បងតែមួយផ្លូវយ៉ាងដូច្នេះ តើសាលារាជធានី ឬអ្នកអនុវត្តគម្រោងជាក់ច្បាស់ក្នុងចិត្តទេថា ពួកគេបានជ្រើសរើស ជម្រើសត្រឹមត្រូវនោះ? បានន័យថា ជួនកាលខ្សែរត់ នៃរថយន្តក្រុងសាធារណៈប្រហែលជាដំណើរការល្អជាង នៅលើមហាវិថីម៉ៅ សេងទុង ឬមហាវិថីកម្ពុជាក្រោមក៏អាចថាបាន។ ដូច្នេះប្រសិនសាលារាជធានីអនុវត្តការសាកល្បង នៅលើផ្លូវយ៉ាងហោចណាស់ចំនួន២ ឬ៣នោះ សាលារាជធានីក៏អាចទទួលបានព័ត៌មានជាមូលដ្ឋាន អំពីការគាំទ្រ ឬមិនគាំទ្រ ឬអកប្បកិរិយា របស់អ្នកប្រើប្រាស់បានច្រើនដែរ។
កត្តាទី២។ អ្នកដែលគាំទ្រគម្រោងរថយន្តក្រុងជាស្មារតីហើយនោះ ពួកគេមិនហ៊ានប្រថុយប្រថាននឹងពេលវេលានៃចរាចរណ៍របស់រថយន្តក្រុងនោះឡើយ ពីព្រោះរថយន្តក្រុងសាធារណៈនេះមិនមានគន្លងផ្លូវជាអាទិភាព ដែលធានាភាពទៀងពេលវេលាសម្រាប់អតិថិជននោះទេ។ បានន័យថា ប្រសិនបើមានការកកស្ទះ រថយន្តក្រុងនេះនឹងត្រូវជាប់គាំងជាមួយនឹងការកកស្ទះតែម្តង។
ទី៣ គឺជាកត្តាដ៏សំខាន់មួយដែរ។ នោះគឺការឃោសនាផ្សព្វផ្សាយ។ កន្លងមកនេះ ក្រៅការដាក់សម្ពោធបើកអោយដំណើរការសាកល្បងដែលគេឃើញមានវត្តមានលោកអភិបាលរាជធានីភ្នំពេញ ហើយដែលត្រូវបានប្រព័ន្ធសារព័ត៌មានចុះផ្សាយនោះ គេមិនបានឃើញមានសកម្មភាពផ្សព្វផ្សាយផុលផុសឡើយ។ មានដែរការផ្សាយស្ពតបន្តិចបន្តួច។ មានដែរការដាក់ចងបដាទទឹងផ្លូវនៅតាមមហាវិថីព្រះមុនីវង្ស។
ប៉ុន្តែគ្មានឡើយការបង្កើតព្រឹត្តិការណ៍ និងផ្តល់ព័ត៌មានពីសាលារាជធានី ជាបន្តបន្ទាប់ដើម្បីនិយាយអំពីដំណើរការរថយន្តក្រុង និងយកឱកាសនេះដើម្បីអំពាវនាវបន្ថែម ដើម្បីបង្កើនអ្នកគាំទ្រសេវារថយន្តក្រុងនោះឡើយ។ សាលារាជធានីមិនគួររង់ចាំទម្លាក់ការទទួលខុសត្រូវ ឬកំហុសទៅលើពលរដ្ឋថា ជាអ្នកមិនគាំទ្រសេវាដឹកជញ្ជូនសាធារណៈនេះ ខណៈសាលារាជធានីមិនទាន់បានប្រឹងប្រឹងអស់លទ្ធភាពនោះនៅឡើយនោះទេ។ ការបង្កើតព្រឹត្តិការណ៍ បន្តផ្សព្វផ្សាយព័ត៌មានស្តីអំពីសេវារថយន្តក្រុង និងអំពាវនាវរកគាំទ្របន្ថែមនោះ តិច ឬច្រើនវានឹងអាចជំរុញកំណើនអ្នកគាំទ្រដែរ។
ទី៤ បើទោះជាក្នុងដំណាក់កាលសាកល្បងក៏ពិតមែន ប៉ុន្តែគោលនយោបាយមួយចំនួន ដូចជាការផ្តល់អាទិភាពដល់ក្រុមសិស្ស និស្សិត ដូចជាការយកតម្លៃទាបជាងធម្មតា នោះ ក៏ជាព្រឹត្តិការណ៍មួយ និងជាការទាក់ទាញមួយដែរ។
កត្តាទាំងឡាយដែលត្រូវបានរៀបរាប់ខាងលើនេះ វាក៏មិនមែនជាកំលាំងចលករស្នូលនៃដំណើរការរថយន្តក្រុងសាធារណៈនោះទេ។ ប៉ុន្តែការរួមផ្សំនៃចំនុចទាំងអស់ សុទ្ធតែការរួមចំណែកក្នុងការជំរុញអោយសេវាដឹកជញ្ជូនសាធារណៈបានទទួលការគាំទ្រកាន់ច្រើន។ ហើយប្រសិនបើ ពេលនេះវាជារយៈពេលនៃការសាកល្បងទៀតនោះ ការអនុវត្តយុទ្ធសាស្ត្រច្រើន វារឹតតែមានភាពចាំបាច់ ដើម្បីគេអាចវាយតម្លៃអំពីភាពជោគជ័យ ឬបរាជ័យនៃគម្រោងមួយនេះ។
ទោះយ៉ាងណាក៏ដោយ គេនៅរង់ចាំមើលលទ្ធផលនៅពេលបញ្ចប់រយៈពេលសាកល្បងនៅថ្ងៃទី៤មិនាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ