លោក ហ៊ុន សែន ត្រៀមស្វាគមន៍កីឡាការិនី ស៊ន សៀវម៉ី ម្ចាស់មេដាយមាស Asian Games នៅយប់នេះ
លោកនាយករដ្ឋមន្ត្រី ហ៊ុន សែន នឹងទទួលស្វាគមន៍នៃការមកដល់របស់កីឡាការិនី ស៊ន សៀវម៉ី ម្ចាស់មេដាយមាស Asian Games នៅយប់ថ្ងៃអាទិត្យនេះ។ ពិធីស្វាគមន៍នឹងរៀបចំធ្វើឡើងនៅវិមានសន្តិភាព ខណៈដែលកីឡារិនី ស៊ន សៀវម៉ី និងគណៈប្រតិភូកីឡាកម្ពុជា នឹងធ្វើដំណើរមកដល់ប្រទេសកម្ពុជាវិញ នៅវេលាម៉ោង១០និង៣០នាទីយប់ថ្ងៃអាទិត្យនេះ។
ចុះផ្សាយនៅថ្ងៃ៖
ស្តាប់ - ០១:៥៥
ក្បួនរថយន្តរបស់កីឡាការិនី ស៊ន សៀវម៉ី នឹងត្រូវជិះអមដោយម៉ូតូសរបស់ប៉ូលីសចំនួន៦គ្រឿង ចេញពីព្រលានយន្តហោះអន្តរជាតិភ្នំពេញនៅច្រកទ្វារ VIP។ នេះបើតាមការប្រកាសរបស់គណៈកម្មាធិការជាតិអូឡាំពិកកម្ពុជា។ គណៈកម្មាធិការជាតិអូឡាំពិកកម្ពុជា បានអោយដឹងនៅក្នុងទំព័រហ្វេសប៊ុករបស់ខ្លួននៅក្រោយកិច្ចប្រជុំថ្ងៃអាទិត្យនេះថា កីឡាការិនីតេក្វាន់ដូ ម្ចាស់មេដាយមាស ស៊ន សៀវម៉ី នឹងទទួលបានការផ្តល់កិត្តិយសយ៉ាងធំធេង តាមរយ:បានការទទួលដោយផ្ទាល់នៅមាត់ទ្វារយន្តហោះច្រក VIP ពីសំណាក់ លោករដ្ឋមន្ត្រីក្រសួងទេសចរណ៍ ថោង ខុន និង លោករដ្ឋមន្ត្រីក្រសួងអប់រំយុវជននិងកីឡា ហង់ ជួនណារ៉ុន។ ស៊ន សៀវម៉ី នឹងជិះលើរថយន្តមួយគ្រឿងគ្មានដំបូល ដែលនៅលើរថយន្តនោះ មានតែមនុស្សបីនាក់ប៉ុណ្ណោះ ម្នាក់គឺកញ្ញា ស៊ន សៀវម៉ី ម្ចាស់មេដាយមាស Asian Game ម្នាក់ទៀតគឺជាគ្រូបង្វិកជនជាតិកូរ៉េខាងត្បូង និងម្នាក់ទៀតគឺលោក ញ៉ាន សុខវិសាល នាយបេសកកម្ម។ ក្បួនរថយន្តរបស់ពួកគេ នឹងត្រូវដង្ហែរចេញពីព្រលានយន្តហោះអន្តរជាតិភ្នំពេញ ឆ្ពោះមកកាន់វិមានសន្តិភាព ជាទីដែលលោកនាយករដ្ឋមន្ត្រី ហ៊ុន សែន នឹងទទួលស្វាគមន៍នៅវេលាម៉ោង១១និង៣០នាទី និងក្រៅពីនេះ ស៊ន សៀវម៉ី ក៍នឹងទទួលបានគ្រឿងឥស្សយយសថ្នាក់ជាតិមួយផងដែរ។ នេះបើតាមការប្រកាសរបស់គណៈកម្មាធិការជាតិអូឡាំពិកកម្ពុជា។
សូមបញ្ជាក់ជូនថា កីឡាការិនីតេក្វាន់ដូ ស៊ន សៀវម៉ី និងគណៈប្រតិភូកីឡាកម្ពុជា នឹងធ្វើដំណើរមកដល់ព្រលានយន្តហោះអន្តរជាតិភ្នំពេញ នៅវេលាម៉ោង១០និង៣០នាទីយប់ ថ្ងៃអាទិត្យទី៥តុលានេះ។ ក្រៅពីការរៀបចំទទួលស្វាគមន៍ដោយរដ្ឋាភិបាលយ៉ាងអធឹកអធមហើយនោះ ប្រជាពលរដ្ឋខ្មែរជាច្រើនផ្សេងទៀត ក៍កំពុងត្រៀមខ្លួនចូលរួមដង្ហែរក្បួន ម្ចាស់ជ័យលាភីមេដាយមាសរូបនេះ អោយពេញទីក្រុងភ្នំពេញផងដែរ។ ស៊ន សៀវម៉ី បានយកឈ្នះនៅថ្ងៃចុងក្រោយនៃការប្រកួតកីឡាអាស៊ីលើកទី១៧នៅទីក្រុងអ៊ីនឆ័នប្រទេសកូរ៉េខាងត្បូង លើកីឡាការិនី អ៊ីរ៉ង់ លើវិញ្ញាសារតេក្វាន់ដូក្នុងប្រភេទទម្ងន់៧៣គីឡូក្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ